ಮಾದಾರ ಚೆನ್ನಯ್ಯ ಸ್ವಾಮಿಗಳು ಹಿಂದುತ್ವ ಮನಸ್ಥಿತಿಯಿಂದ ಹೊರಬರಲಿ

ಶ್ರೀಗಳು ತಮ್ಮ ಪೀಠದ ಆಶೋತ್ತರವನ್ನು ಗಾಳಿಗೆ ತೂರಿ ಬಸವಧರ್ಮಕ್ಕೆ ತಿಲಾಂಜಲಿ ನೀಡಿರುವುದು ವಿಪರ್ಯಾಸವೇ ಸರಿ

ಬಸವ ಕಲ್ಯಾಣ

ವೈದಿಕ ಮನಸ್ಥಿತಿಯುಳ್ಳ ಮಾದಾರ ಚೆನ್ನಯ್ಯ ಸ್ವಾಮಿಗಳು ಜಾತಿ ಮನೆಯಲ್ಲಿರಲಿ ಹೊರಗಲ್ಲ ಎಂದರೆ ಏನರ್ಥ?

ಜಾತಿ ಎನ್ನುವ ಮನಸ್ಥಿತಿ ಮನದಲ್ಲಿ ಮತ್ತು ಮನೆಯೊಳಗಿದ್ದಾಗಲೇ ಅದು ಹೊರಗಡೆ ಪ್ರಕಟವಾಗುವುದು. ಜಾತಿ ಒಳಗಿರಲಿ ಹೊರಗಲ್ಲ ಎಂಬುದು ಅರ್ಧ ಸತ್ಯ ಇದು ಬ್ರಾಹ್ಮಣ್ಯ ನೀತಿಯಾಗಿದೆ.

ಹಾವು ಸಾಯಬಾರದು ಕೋಲು ಮುರಿಯಬಾರದು ಎನ್ನುವ ಹಾಗೆ ಜವಬ್ದಾರಿ ಸ್ಥಾನದಲ್ಲಿ ಇದ್ದವರು ಅರ್ಧ ಗೋಡೆಯ ಮೇಲೆ ದೀಪ ಇಟ್ಟಂತೆ ಮಾತನಾಡಬಾರದು. ಬಸವಧರ್ಮ ಹಿನ್ನೆಲೆ ಹೊಂದಿದ ಮಾದಾರ ಚೆನ್ನಯ್ಯ ಸ್ವಾಮಿಗಳು ಹಿಂದುತ್ವ ಮನಸ್ಥಿತಿಯಿಂದ ಹೊರಬರಲಿ.

ಸಂಘ ಪರಿವಾರದಲ್ಲಿ ಬೆಳೆದ ಸ್ವಾಮಿಗಳಿಗೆ ವೈದಿಕರು ಸೃಷ್ಟಿಸಿದ ಜಾತಿಯ ಕರಾಳ ಸ್ಥಿತಿ ಅರ್ಥವಾಗದಾಗಿದೆ. ಅರ್ಥವಾದರೂ ಸ್ವಾರ್ಥ ಸಾಧನೆಗಾಗಿ ಮಾದಿಗ ಸಮುದಾಯವನ್ನು ವೈದಿಕರ ಗುಲಾಮರಾಗಿಸುವುದು ದುರಂತವೇ ಸರಿ.

ಹಿಂದೂ ವೈದಿಕ ಧರ್ಮವೇ ರಾಷ್ಟ್ರೀಯತೆ ಎಂದು ತಿಳಿದುಕೊಂಡು ಅದರ ಬೆಳವಣಿಗೆಗೆ ಹಗಲಿರುಳು ಶ್ರಮಿಸುವ ಪೂಜ್ಯರು ತಮ್ಮ ಪೀಠದ ಆಶೋತ್ತರವನ್ನು ಗಾಳಿಗೆ ತೂರಿ ಬಸವಧರ್ಮಕ್ಕೆ ತಿಲಾಂಜಲಿ ನೀಡಿರುವುದು ವಿಪರ್ಯಾಸವೇ ಸರಿ.

ದೇಶದಲ್ಲಿ ಜಾತಿಯತೆ ಹೊಗಬೇಕಾದರೆ ಅದು ಬಸವಧರ್ಮದಿಂದ ಮಾತ್ರ ಸಾಧ್ಯ. ಹಿಂದುತ್ವದಿಂದ ಸಾಮರಸ್ಯ ಸಾಧ್ಯವಿಲ್ಲ. ಮತಾಂತರ ತಡೆಗಟ್ಟಬೇಕಾದರೆ ಜಾತಿ ನೋಡದೆ ಅವರಲ್ಲಿ ಪ್ರೀತಿ, ಸಹೋದರತೆ ಮತ್ತು ಸಮಾನತೆಯ ಸಾಮರಸ್ಯದ ಬೆಸುಗೆ ಹಾಕಬೇಕು. ಉಂಡು ಉಡುವ, ಕೊಂಬ-ಕೊಡುವ ಸಂಸ್ಕೃತಿ ನಡೆಯಬೇಕು ಕೇವಲ ದಲಿತರ ಮನೆಯಲ್ಲಿ ಪಾದಪೂಜೆ ಮಾಡಿಸಿಕೊಂಡರೆ ಸಾಲದು.

ಮಾದಾರ ಚೆನ್ನಯ್ಯ ಸ್ವಾಮಿಗಳು ಹಿಂದುತ್ವ, ರಾಷ್ಟ್ರೀಯತೆ ಮಾತುಗಳನ್ನಾಡುವುದು ಬಿಟ್ಟು ತಮ್ಮ ಗುರುಗಳಂತೆ ಮಾದಿಗ ಸಮಾಜವನ್ನು ಬಸವಧರ್ಮಕ್ಕೆ ಜೋಡಣೆ ಮಾಡುವ ಕಾರ್ಯ ಮಾಡಲಿ.