ಜನವರಿ 17: ಕೊನೆಗೂ ಕ್ರಾಂತಿಕಾರಕ ಅಜೆಂಡ ಹಿಡಿದ ಮಠಾಧೀಶರು

ಲಿಂಗಾಯತ ಮಠಾಧೀಶರ ಒಕ್ಕೂಟದ ಧಾರವಾಡದ ಸಭೆಯ ಅಜೆಂಡಾವನ್ನು ಗಂಭೀರವಾಗಿ ಓದಿ. ಲಿಂಗಾಯತ ಮಠಾಧೀಶರಿಗೆ ಬಸವಣ್ಣ ಮೈಮೇಲೆ ಬಂದಿದ್ದಾರೋ ಎಂಬಂತೆ ಭಾಸವಾಗುತ್ತದೆ.

(ಜನವರಿ 17ರ ಸಭೆಗೆ ನಿಮ್ಮ ಪ್ರತಿಕ್ರಿಯೆ ಕಳಿಸಿ. ಉತ್ತಮ ಆಲೋಚನೆಗಳನ್ನು ಪ್ರಕಟಿಸುತ್ತೇವೆ, ಪೂಜ್ಯರಿಗೆ ತಲುಪಿಸುತ್ತೇವೆ. basavamedia1@gmail.com)

ಬೆಂಗಳೂರು

ಲಿಂಗಾಯತ ಧರ್ಮ ಸಂಘಟನೆಗೆ ಇಂದು ಕಾಲ ಪಕ್ವವಾಗಿದೆ ಎಂದು ಅನೇಕರು ನಾವು ಮಾತನಾಡುತ್ತಿದ್ದೆವು. ಎಂಬತ್ತೇಳನೆಯ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನದ ಸರ್ವಾಧ್ಯಕ್ಷರಾದ ಗೊರುಚ ಅವರು ನಮ್ಮ ಬಳಿಯಲ್ಲಿ ಅನೇಕ ಸಾರಿ ಈ ಮಾತನ್ನು ಹೇಳಿದ್ದಾರೆ. ಶ್ರೀ ಅರವಿಂದ ಜತ್ತಿ ಬಸವ ಭವನದಲ್ಲಿ ಸೇರಿದಾಗ ಈ ಮಾತನ್ನು ಮತ್ತೆ ಮತ್ತೆ ಹೇಳಿದ್ದಾರೆ.

ಶರಣ ಅಶೋಕ ಬರಗುಂಡಿ ಅವರು ಕೂಡ ಹೀಗೆ ಚರ್ಚೆ ಮಾಡುತ್ತಿದ್ದಾರೆ. ಲಿಂಗಾಯತದ ಸಬಲೀಕರಣಕ್ಕೆ ಅವರು ಅವಿರತ ದುಡಿಯುತ್ತಿದ್ದಾರೆ. ರಾಜ್ಯದಾದ್ಯಂತ ವಚನ ಮಾಂಗಲ್ಯ ಮದುವೆಗಳು ಅವರ ನೇತೃತ್ವದಲ್ಲಿ ನಡೆಯುತ್ತಿವೆ. ಲಿಂಗಾಯತದ ಆಚರಣೆಗಳು ಬಸವ ಪ್ರಣೀತ ತತ್ವದಲ್ಲಿ ನಡೆಯಬೇಕು ಎಂಬ ಅಭಿಯಾನವನ್ನು ಏಕವ್ಯಕ್ತಿ ಡಣಾಯಕರಂತೆ ಅವರು ಹೋರಾಟ ನಡೆಸಿದ್ದಾರೆ. ಒಂದು ದಿನವೂ ಬಿಡುವಿಲ್ಲದಂತೆ ಅವರು ಊರಿಂದ ಊರಿಗೆ ಪ್ರವಾಸ ಮಾಡುತ್ತಾ ಲಿಂಗಾಯತರಲ್ಲಿ ಜಾಗೃತಿ ಮೂಡಿಸುತ್ತಿದ್ದಾರೆ.

ಡಾ. ಜೆ. ಎಸ್. ಪಟೀಲರು ಮತ್ತೊಬ್ಬ ಡಣಾಯಕರು. ಈ ಬಗ್ಗೆ ಡಾ. ಎಸ್. ಎಂ. ಜಾಮದಾರ್ ಅವರು ಕಾರ್ಯಪ್ರವೃತ್ತರಾಗಿದ್ದಾರೆ.

ಕ್ರಾಂತಿಕಾರಕ ಅಜೆಂಡ

ಇದಕ್ಕೆ (ಲಿಂಗಾಯತ ಧರ್ಮ ಸಂಘಟನೆಗೆ) ಸಾಕ್ಷಿಯೆಂಬಂತೆ ಲಿಂಗಾಯತ ಮಠಾಧೀಶರ ಒಕ್ಕೂಟವು ಇದೇ ೧೭ ರಂದು ಧಾರವಾಡದಲ್ಲಿ ಸಭೆ ಸೇರುತ್ತಿದೆ. ಸಭೆ ಸೇರುತ್ತಿರುವುದು ವಿಶೇಷವೇನಲ್ಲ. ಆದರೆ ಈ ಸಭೆಯಲ್ಲಿ ಚರ್ಚೆಗೆ ಇಡಲಾಗಿರುವ ಅಜೆಂಡ ನಿಜಕ್ಕೂ ಕ್ರಾಂತಿಕಾರಕವಾಗಿವೆ. ಈ ಅಜೆಂಡಾದ ಕಾರ್ಯಸೂಚಿಯನ್ನು ಗಂಭೀರವಾಗಿ ಪದಪದವನ್ನು ಓದಿದರೆ ಲಿಂಗಾಯತ ಮಠಾಧೀಶರಿಗೆ ಬಸವಣ್ಣ ಮೈಮೇಲೆ ಬಂದಿದ್ದಾರೋ ಎಂಬಂತೆ ಭಾಸವಾಗುತ್ತದೆ.

ನಮ್ಮೆಲರಿಗೂ ಪೂಜ್ಯರೂ ಗೌರವಾನ್ವಿತರೂ ಆದ ಶ್ರೀ ಜಗದ್ಗುರು ತೋಂಟದ ಸಿದ್ಧರಾಮ ಶ್ರೀಗಳ ನೇತೃತದಲ್ಲಿ ಇಂತಹ ಕಾಂತ್ರಿಕಾರಕ ಸಭೆ ನಡೆಯುತ್ತಿದೆ ಎಂಬುದು ಬಹಳ ಮುಖ್ಯವಾದ ಬೆಳವಣಿಗೆಯಾಗಿದೆ. ಲಿಂಗಾಯತ ಸಂಘಟನೆಗಳಲ್ಲಿ ಅನೇಕ ಬಾರಿ ‘ಸ್ವಾಮೀಜಿಗಳನ್ನು ನೆಚ್ಚಿಕೊಂಡರೆ ಲಿಂಗಾಯತ ಧರ್ಮದ ಜಾಗೃತಿ ಸಾಧ್ಯವಿಲ್ಲ’ ಎಂಬ ಅನುಮಾನದ ಅಭಿಪ್ರಾಯಗಳ ವ್ಯಕ್ತವಾಗುತ್ತಿದ್ದವು. ಇದಕ್ಕೆಲ್ಲಾ ಧಾರವಾಡದಲ್ಲಿನ ಜನವರಿ ೧೭ರ ಲಿಂಗಾಯತ ಮಠಾಧೀಶರ ಸಭೆಯ ಅಜೆಂಡ ಕೊನೆ ಹಾಡುತ್ತಿರುವಂತೆ ಕಾಣುತ್ತಿದೆ.

ಮತ್ತೊಂದು ವಿಶೇಷ ಎಂದರೆ ಜನವರಿ ೧೭ ರಂದು ನಡೆಯುವ ಲಿಂಗಾಯತ ಮಠಾಧೀಶರ ಸಭೆಯ ಹಿಂದಿನ ದಿನ, ಅಂದರೆ ಜನವರಿ ೧೬ ರಂದು ಜಾಗತಿಕ ಲಿಂಗಾಯತ ಮಹಾಸಭೆಯ ಆಡಳಿಯ ಮಂಡಳಿಯ ಸಭೆಯೂ ಧಾರವಾಡದಲ್ಲಿ ನಡೆಯುತ್ತಿದೆ. ಇವೆಲ್ಲಾ ಶ್ಲಾಘನೀಯ, ಸ್ವಾಗತಾರ್ಹ ಬೆಳವಣಿಗೆಗಳು.

ಹಿಂದುತ್ವದ ಕಪಿಮುಷ್ಟಿ

ಲಿಂಗಾಯತ ಮಠಾಧೀಶರ ಒಕ್ಕೂಟ ಸಭೆಯಲ್ಲಿನ ಅಜೆಂಡಗಳಲ್ಲಿ ನನಗೆ ವೈಯುಕ್ತಿಕವಾಗಿ ಎರಡನೆಯದು ಬಹಳ ಮುಖ್ಯ. ಅದು ಹಿಂದುತ್ವದ ಕಪಿಮುಷ್ಟಿಯಿಂದ ಲಿಂಗಾಯತ ಯುವಕರನ್ನು ಮುಕ್ತಿಗೊಳಿಸುವ ಮಾರ್ಗವನ್ನು ಕುರಿತಂತೆ ಸಭೆಯಲ್ಲಿ ನಡೆಯುವ ಚರ್ಚೆ. ಇದು ಕೇವಲ ಲಿಂಗಾಯತ ಯುವಕರ ರಕ್ಷಣೆ ಮಾತ್ರವಲ್ಲದೆ ಭಾರತದ ಜನತಂತ್ರವನ್ನು ಉಳಿಸುವ ಮಹಾಮಾರ್ಗವಾಗಿದೆ.

ಇದು ಕ್ರಾಂತಿಕಾರಕ ಬೆಳವಣಿಗೆ. ಏಕೆಂದರೆ ಈ ಬಗ್ಗೆ ಜಾಗೃತಿ ಮೂಡಿಸುವುದಕ್ಕಾಗಿ ರಾಜ್ಯದಾದ್ಯಂತ “ಅಭಿಯಾನ” ನಡೆಸುವ ಬಗ್ಗೆಯೂ ಸಭೆಯಲ್ಲಿ ನಿರ್ಣಯವಾಗಲಿದೆ.

ಲಿಂಗಾಯತ ಯುವಕರನ್ನು ಸಂಘ ಪರಿವಾರ ದುರ್ಬಳಕೆ ಮಾಡಿಕೊಳ್ಳುತ್ತಿದೆ. ಆ ಮೂಲಕ ತನ್ನ ಹಿತಾಸಕ್ತಿಗಳನ್ನು, ತನ್ನ ಅಜೆಂಡಾವನ್ನು ಅದು ಸಾಧಿಸಿಕೊಳ್ಳುತ್ತಿದೆ. ಸಮಾನತೆಯ ಬಸವ ಸಿದ್ಧಾಂತದ ವಿರುದ್ಧ ೧೨ನೆಯ ಶತಮಾನದಲ್ಲಿ ಬ್ರಾಹ್ಮಣ್ಯವು ಹೇಗೆ ಹತ್ಯಾಕಾಂಡ ನಡೆಸಿತ್ತೋ ಅದೇ ರೀತಿಯಲ್ಲಿ ೨೧ ನೆಯ ಶತಮಾನದಲ್ಲಿ ಬಸವಣ್ಣನವರನ್ನು, ವಚನ ಸಾಹಿತ್ಯವನ್ನು, ಸಮಾನತೆ ಪ್ರಣಾಳಿಕೆಯನ್ನು ಕೊನೆಗೊಳಿಸುವ, ಅದನ್ನು ವೇದಾಗಮ ಶಾಸ್ತ್ರ ಪುರಾಣದಲ್ಲಿ ಲೀನ-ವಿಲೀನಗೊಳಿಸುವ ಪ್ರಯತ್ನಕ್ಕೆ ಅದು ಮುಂದಾಗಿದೆ.

ಕುಂಕುಮಧಾರಿ ನಾಯಕರು

ನಮ್ಮ ಯುವಕರು-ಯುವತಿಯರು ಹಿಂದುತ್ವಕ್ಕೆ ಬಲಿಯಾಗಿರುವುದರಿಂದಲೇ ಬಸವ-ವಿರೋದಿ-ವಚನ ಸಂಸ್ಕೃತಿ ವಿರೋಧಿ ರಾಜಕೀಯ ಕರ್ನಾಟಕದಲ್ಲಿ ನೆಲೆಯೂರಿದೆ ಮತ್ತು ಬೆಳೆಯುತ್ತಿದೆ. ನಮ್ಮ ಯುವ ಸಮುದಾಯವನ್ನು ಹಿಂದುತ್ವದ ಸಂಕೋಲೆಯಿಂದ ಬಿಡುಗಡೆ ಎಷ್ಟು ಮುಖ್ಯವೋ ಅಷ್ಟೇ ಮತ್ತು ಅದಕ್ಕಿಂತ ಹೆಚ್ಚು ಮುಖ್ಯವಾದುದು ಬಸವಣ್ಣನವರ ಹೆಸರು ಹೇಳಿಕೊಂಡು ಲಿಂಗಾಯತರ ನಾಯಕರೆಂದು ಬಡಬಡಿಸುತ್ತಿರುವ ಕುಂಕುಮಧಾರಿಗಳಿಗೆ – ತೋರಿಕೆಗೆ ದಟ್ಟವಾಗಿ ವಿಭೂತಿ ಬಳಿದುಕೊಂಡು ಮೆರೆಯುತ್ತಿರುವ ರಾಜಕಾರಣಿಗಳಿಗೆ ಬುದ್ಧಿ ಕಲಿಸಬೇಕಾಗಿದೆ.

ಸತ್ಯನಾರಾಯಣ ಪೂಜೆ, ಗುರವಾರ-ಗುರವಾರ ಬೃಂದಾವನ ಸುತ್ತುವುದು, ಶಿರಡಿ-ತಿರುಪತಿಗೆ, ಧರ್ಮಸ್ಥಳಕ್ಕೆ ಹೋಗುವುದು ಇವೆಲ್ಲ ಶರಣ ಧರ್ಮದಲ್ಲಿಲ್ಲ. ಪ್ರವಾಸಕ್ಕೆಂದು, ಪ್ರಕೃತಿಯನ್ನು ಸವಿಯಲು ಇಂತಹ ಪ್ರವಾಸಗಳು ನಡೆಯಬಹುದು. ಆದರೆ ಗುಡಿ ಸುತ್ತಲು, ಹರಕೆ ಸಲ್ಲಿಸಲು, ಮಂಡೆ ನೀಡಲು ಧಾರ್ಮಿಕ ನೆಲೆಯಲ್ಲಿ ಆಚರಿಸುವುದು ಸಲ್ಲ.

ಈ ಬಗೆಯ ಮೌಢ್ಯದಿಂದ, ಅರ್ಥರಹಿತ ಆಚರಣೆಗಳಿಂದ ನಮ್ಮ ಮುಗ್ದ ಜನರು ಹಗಲು-ರಾತ್ರಿ ಗಳಿಸಿದ ಹಣವನ್ನು ದಾನ-ದಕ್ಷಿಣೆಯಲ್ಲಿ, ಮುಡುಪು ನೀಡುವುದರಲ್ಲಿ, ಹರಕೆ ಹೊತ್ತುಕೊಳ್ಳುವದರಲ್ಲಿ ಕಳೆದುಕೊಳ್ಳುತ್ತಿದ್ದಾರೆ.

ಮಾಲೆಗಳ ಸರಮಾಲೆ

ಮಾಲೆ ಧರಿಸುವ (ಹನುಮ ಮಾಲೆ, ದತ್ತ ಮಾಲೆ, ಅಯ್ಯಪ್ಪ ಮಾಲೆ, ಅನುಸೂಯ ಮಾಲೆ ಮುಂತಾದ) ಅರ್ಥರಹಿತ ಮೌಢ್ಯದ ಆಚರಣೆಗಳಿಗೆ ನಮ್ಮ ಯುವಕರು ಬಲಿಯಾಗಿದ್ದಾರೆ. ಮಾಲೆ ಧರಿಸುವುದು ಬಸವ ಸಂಸ್ಕೃತಿಯಲ್ಲ. ಯಾರಾದರೂ ಇಂತಹ ಮಾಲೆ ಹಾಕಿಕೊಳ್ಳುವ ಆಚರಣೆಯನ್ನು ಬಾಹ್ಮಣ್ಯದವರು ಆಚರಿಸುವುದನ್ನು ನೋಡಿದ್ದೀರಾ? ಇವುಗಳಿಗೆ ಬಸವ ಸಂವಿಧಾನದಲ್ಲಿ ಅವಕಾಶವಿಲ್ಲ ಎಂಬುದನ್ನು ಲಿಂಗಾಯತರಲ್ಲಿ ಸಾರಬೇಕಾಗಿದೆ.

ಲಿಂಗಾಯತರ ಮೇಲೆ ನಡೆಯುತ್ತಿರುವ ನಿರಂತರ ಸಾಂಸ್ಕೃತಿಕ, ಆರ್ಥಿಕ. ಸಾಮಾಜಿಕ ಆಕ್ರಮಣ-ದಾಳಿಯನ್ನು ಎದುರಿಸಲು ಲಿಂಗಾಯತರಲ್ಲಿ ಜಾಗೃತಿ ಮೂಡಿಸುವದಕ್ಕೆ ಸಂಬಂಧಿಸಿದ ಮಹಾಸಭೆಯನ್ನು ಜನವರು ೧೭ ರಂದು ಧಾರವಾಡದಲ್ಲಿ ನಡೆಯುತ್ತಿದೆ. ಈ ನಿರಂತರ ದಾಳಿ ಯಾವುವು?

•ವಚನ ದರ್ಶನ ಎಂಬ ಕುಕೃತಿಯ ಮೂಲಕ ಬಸವ ಸಿದ್ಧಾಂತವನ್ನು, ವಚನ ಸಂವಿಧಾನವನ್ನು ವಿಕೃತಿಗೊಳಿಸುವ ಆರ್ ಎಸ್ ಎಸ್ ಪ್ರಯತ್ನ

• ಶರಣರನ್ನು ಕೆಟ್ಟದಾಗಿ ತೋರಿಸಲು ಪ್ರಯತ್ನಿಸಿದ ಶರಣರ ಶಕ್ತಿ ಚಿತ್ರ

•ಸಂವಿಧಾನ ಶಿಲ್ಪಿ ಬಾಬಾ ಸಾಹೇಬ ಡಾ. ಬಿ. ಆರ್. ಅಂಬೆಡ್ಕರ್ ಅವರ ಹೆಸರನ್ನು ಜಪಿಸಿವುದಕ್ಕೆ ಬದಲಾಗಿ “ದೇವರ” ಹೇಸರನ್ನು ಜಪಿಸಿದ್ದರೆ “ಸ್ವರ್ಗ’ ದೊರಕುತ್ತಿತ್ತು ಎಂಬ ಗೃಹ ಮಂತ್ರಿ ಅಮಿತ್ ಶಾ ಅವರ ಮಾತುಗಳು ಸಂವಿಧಾನ ವಿರೋಧಿ ಮಾತ್ರವಲ್ಲ, ಅವು ಬಸವ ಸಂವಿಧಾನ ವಿರೋಧಿಯೂ ಹೌದು.

ಏಕೆಂದರೆ ಲಿಂಗಾಯತರಿಗೆ ಬಸವ ಸಂವಿಧಾನದಲ್ಲಿ ಸ್ವರ್ಗವೂ ಇಲ್ಲ, ನರಕವೂ ಇಲ್ಲ. ನಮಗಿರುವುದೊಂದೇ ಭೂಮಿ. ಇಂತಹ ಗಣತಂತ್ರ ವಿರೋಧಿ ಕ್ರಮ-ನಡೆಗಳನ್ನು ನಾವು ವಿರೋಧಿಸಬೇಕು.

• ಬಸವನಗೌಡ ಯತ್ನಾಳ ಮೂಲಕ ಬಸವಣ್ಣನವರ ಬಗ್ಗೆ ಹೀಯಾಳಿಕೆಯ-ಕೀಳು ಭಾಷೆಯ ಪ್ರಯೋಗ. ಇಡೀ ದೇಶದ ಶ್ರದ್ಧಾಬಿಂದು, ಕರ್ನಾಟಕ ಸಾಂಸ್ಕೃತಿಕ ನಾಯಕ ಬಸವಣ್ಣನವರ ಬಗ್ಗೆ ಕೀಳುತನದ, ಹೀಯಾಳಿಕೆಯ ಧೂರ್ತತನದ ಮಾತನಾಡಿದ ಯತ್ನಾಳ್‌ಗೆ ಆರ್‌ಎಸ್‌ಎಸ್ ಮತ್ತು ಬಿಜೆಪಿ ಕ್ರಮ ತೆಗೆದುಕೊಂಡಿಲ್ಲ. ಅಂದ ಮೇಲೆ ಯತ್ನಾಳ್ ಬಸವಣ್ಣನವರ ಬಗ್ಗೆ ಹೇಳಿರುವ ಕೀಳು ಮಾತು ಆರ್‌ಎಸ್‌ಎಸ್‌ಗೆ ಒಪ್ಪಿಗೆಯಿದೆ ಎಂದೇ ಅರ್ಥ.
• ಶೀಟಿ ರವಿ ಎನ್ನುವ ಶಾಸನಕರ್ತ ವಿಧಾನ ಪರಿಷತ್ತಿನಲ್ಲಿ ಶ್ರೀಮತಿ ಲಕ್ಷ್ಮಿ ಹೆಬಾಳ್ಕರ್ ಬಗ್ಗೆ ಬಳಸಿರುವ ಹೀನ ಮಾತು ಲಿಂಗಾಯತಕ್ಕೆ ಬಗೆದ ದ್ರೋಹ, ಮುಖ್ಯಮಂತ್ರಿಯವರಿಗೆ “ನಿತ್ಯಸುಮಂಗಲಿ” ಪದದ ಬಳಕೆಯು ಮಹಿಳೆಯರನ್ನು ಹೀಯಾಳಿರುವ ಮಾತು. ಇದಕ್ಕೆ ಲಿಂಗಾಯತದಲ್ಲಿ ಅವಕಾಶವಿಲ್ಲ.
• ಸಾಣೆಹಳ್ಳಿ ಶ್ತೀಗಳ ಬಗ್ಗೆ ಅತ್ಯಂತ ಅವಮಾನಕರ ಮಾತುಗಳನ್ನು ಆಡುತ್ತಿರುವ ವಿರೋಧಿಗಳು. (ಸಾಣೆಹಳ್ಳಿ ಶ್ರೀಗಳ ಮಾತುಗಳನ್ನು ಈ ವಿಷಭಟ್ “ಗೊಡ್ಡು ಪುರಾಣ” ಎನ್ನುತ್ತಾನೆ. ತನ್ನ ಪತ್ರಿಕೆಯಲ್ಲಿ ಬಸವ ತತ್ವದ ಬಗ್ಗೆ ಅವಹೇಳನಕಾರಿ ಲೇಖನಗಳಿಗೆ ಪ್ರೋತ್ಸಾಹ ನೀಡುತ್ತಾನೆ.)
• ಉತ್ತರ ಪ್ರದೇಶದ ಪ್ರಯಾಗ್‌ರಾಜ್‌ನಲ್ಲಿ ನಡೆಯಲಿರುವ ‘ಕುಂಭಮೇಳ’ ಎನ್ನುವ ಹಿಂದುತ್ವದ ಮೌಢ್ಯಚರಣೆಗೆ ಲಿಂಗಾಯತರನ್ನು ಕರೆದುಕೊಂಡು ಹೋಗುತ್ತಿರುವ ಆರ್ ಎಸ್ ಎಸ್ ಮತ್ತು ಅದಕ್ಕೆ ಕುಮ್ಮಕ್ಕು ನೀಡುತ್ತಿರುವ ರಾಜ್ಯದ ಎರಡು ದೊಡ್ಡ ಮಠಗಳು.

•ಸೇಡಂ ನಗರದಲ್ಲಿ ನಡೆಯುತ್ತಿರುವ ಭಾರತ ಸಂಸ್ಕೃತಿ ಉತ್ಸವವು ಕೂಡ ಬಸವಣ್ಣನವರ ನಾಡಾದ ಕಲ್ಯಾಣ ಕರ್ನಾಟಕವನ್ನು ಆರ್ ಎಸ್ ಎಸ್ ಮಯಮಾಡುವ ಹುನ್ನಾರವಾಗಿದೆ. ಸುಮಾರು ೨೫೦ ಎಕರೆ ಪ್ರದೇಶದಲ್ಲಿ ೯ ದಿನಗಳ ಕಾಲ ಹತ್ತಾರು ಲಕ್ಷ ಜನರನ್ನು ಸೇರಿಸಿ ಆರ್ ಎಸ್ ಎಸ್, ಬಿಜೆಪಿ, ವಿಶ್ವ ಹಿಂದು ಪರಿಷತ್, ಭಜರಂಗ ದಳ, ಅಖಿಲ ಭಾರತ ವಿದ್ಯಾರ್ಥಿ ಪರಿಷತ್ ಮುಂತಾದ ಸಂಘಪರಿವಾರದ ಮೂಲಕ ಹತ್ತಾರು ಕೋಟಿ ರೂಪಾಯಿ ವೆಚ್ಚದಲ್ಲಿ ನಡೆಸುತ್ತಿರುವ ಭಾರತ ಸಂಸ್ಕೃತಿ ಉತ್ಸವವು ಲಿಂಗಾಯತ ಯುವಕರಿಗೆ, ಒಬಿಸಿ ಯುವಕರಿಗೆ ಮಂಕು ಭೂದಿ ಎರಚುವ ಕುಕೃತ್ಯವಾಗಿದೆ. ಅಲ್ಲಿ ಬಸವಣ್ಣನವರಿಗೆ ಸ್ಥಾನ ನೀಡುವುದಿಲ್ಲ. ನೀಡಿದರೂ ಮುಲಾಜಿಗೆ ಅಷ್ಟೇ.

• ಹೀಗೆ ಲಿಂಗಾಯತದ ಮೇಲೆ, ಬಸವಣ್ಣನವರ ಮೇಲೆ ವಚನ ಸಾಹಿತ್ಯದ ಮೇಲೆ, ಸಂವಿಧಾನದ ಮೇಲೆ, ಜನತಂತ್ರದ ಮೇಲೆ ನಡೆಯುತ್ತಿರುವ ದಾಳಿಯನ್ನು ಹಿಮ್ಮೆಟ್ಟಿಸಬೇಕಾಗಿದೆ.

ನಮ್ಮ ಒತ್ತಾಸೆ ಮತ್ತು ಹಕ್ಕೊತ್ತಾಯ

(೧). ಲಿಂಗಾಯತ ಮಠಗಳು ಮೂಢ ನಂಬಿಕೆಗಳನ್ನು ಹರಡಬಾರದು, ಪಾಲಿಸಬಾರದು ಎಂದು ನಿರ್ಣಯ ತೆಗೆದುಕೊಳ್ಳಬೇಕು.

(೨). ಮುತೈದೆಯರಿಗೆ ಮುಡಿ ತುಂಬುವಂತಹ ಲಿಂಗ ಅಸಮಾನತೆಯ ಕಾರ್ಯಕ್ರಮಗಳನ್ನು ಮೊದಲು ಮಠಗಳು-ಮಠಾಧೀಶರು ನಿಲ್ಲಿಸಬೇಕು. ಏಕೆಂದರೆ ಲಿಂಗಾಯತದಲ್ಲಿ ವಿಧವೆಯರನ್ನೂ ಸೇರಿಕೊಂಡು, ಎಲ್ಲಾ ಜಾತಿ-ಪಂಗಡ ಮಹಿಳೆಯರೂ ಮುತೈದೆಯರೇ. ಈ ಬಗ್ಗೆ ಮಠಾಧೀಶರ ಸಭೆಯಲ್ಲಿ ನಿರ್ಣಯವಾಗಬೇಕು. ಲಿಂಗಾಯತದಲ್ಲಿ ಯಾವ ಮಹಿಳೆಯೂ “ಮುಂಡೆ”ಯಾಗುವುದಿಲ್ಲ.

(೩). ಲಿಂಗಾಯತ ಮಠಗಳಲ್ಲಿ ಯಾವುದೋ ಚಾರಿತ್ರಿಕ ಕಾರಣಕ್ಕೆ ಸಂಸ್ಕೃತದ ಪಾಠಶಾಲೆಗಳಿವೆ. ಅವುಗಳನ್ನು ಮಠಗಳು ಹಂತ ಹಂತವಾಗಿ ಮುಚ್ಚಬೇಕು.

(೪). ಆರ್ ಎಸ್ ಎಸ್ ಸ್ವಯಂಸೇವಕರಾಗಿರುವ ಶಾಸಕರು-ಮಂತ್ರಿಗಳನ್ನು ಮಠಗಳ ಕಾರ್ಯಕ್ರಮಗಳಿಗೆ ಕರೆಸುವುದನ್ನು ಹೇಗೆ ನಿಲ್ಲಿಸಬೇಕು ಎಂಬ ಬಗ್ಗೆ ಮಠಾಧೀಶರ ಸಭೆಯಲ್ಲಿ ಚರ್ಚೆಯಾಗಬೇಕು.

(೫). ಆರ್ ಎಸ್ ಎಸ್ ಪೋಷಿತ-ಪ್ರಾಯೋಜಿತ-ಪ್ರೋತ್ಸಾಹಿತ ಕಾರ್ಯಗಳಿಗೆ — ಸೇಡಂನಲ್ಲಿ ನಡೆಯುವ ಭಾರತ ಸಂಸ್ಕೃತಿ ಉತ್ಸವ, ಪ್ರಯಾಗ್ ರಾಜ್ ನಲ್ಲಿ ನಡೆಯುವ ಕುಂಭಮೇಳ, ಸೂಲಿಬೆಲಿ ಆಯೋಜಿಸುತ್ತಿರುವ ಕಾವೇರಿ ಆರತಿ-ತುಂಗಭದ್ರಾ ಆರತಿ ಮುಂತಾದ ಗಂಗಾ ಆರತಿ ಅನುಕರಣೆಯ ಕಾರ್ಯಕ್ರಮಗಳಿಗೆ ಅವಕಾಶ-ಪ್ರೋತ್ಸಾಹ, ಅನುದಾನ ನೀಡಕೂಡದು.

(೬). ಲಿಂಗಾಯತ ಮಠಾಧೀಶರ ಒಕ್ಕೂಟದ ಸಭೆಯಲ್ಲಿ ಹಿಂದುತ್ವವಾದಿಗಳನ್ನು ಮಠಕ್ಕೆ ಕರೆಸುವ, ಅವರಿಂದ ಶಿವಾನುಭವ ಗೋಷ್ಟಿ ನಡೆಸುವ ಭಾಷಣ ಮಾಡಿಸುವ, ಪ್ರಶಸ್ತಿ ನೀಡುವ ಕೆಲಸವನ್ನು ಲಿಂಗಾಯತದ ಯಾವ ಮಠಗಳು ಇನ್ನು ಮುಂದೆ ಮಾಡಕೂಡದು ಎಂಬ ನಿರ್ಣಯವನ್ನು ತೆಗೆದುಕೊಳ್ಳಬೇಕು.

ಇವು ನಮ್ಮ ಒತ್ತಾಯ.