ವೇದಗಳು ಭಿನ್ನತೆ ಭೋದಿಸುತ್ತವೆ, ವಚನಗಳು ಪ್ರೀತಿಸಲು ಕಲಿಸುತ್ತವೆ: ಅಶೋಕ ಬರಗುಂಡಿ

ಗದಗ

ಜಾಗತಿಕ ಲಿಂಗಾಯತ ಮಹಾಸಭಾ, ಗದಗ ಜಿಲ್ಲಾ ಹಾಗೂ ತಾಲೂಕು ಘಟಕಗಳ ಆಶ್ರಯದಲ್ಲಿ ಬುಧವಾರ ಸಾಯಂಕಾಲ ತೋಂಟದಾರ್ಯ ಮಠದ ಅನುಭವ ಮಂಟಪದಲ್ಲಿ ಚಿಂತನ ಕಾರ್ಯಕ್ರಮ ನಡೆಯಿತು.

“ಶರಣರು ವೇದಗಳನ್ನು ಯಾಕೆ ನಿರಾಕರಿಸಿದರು” ಎಂಬ ವಿಷಯದ ಕುರಿತು ಅನುಭಾವವನ್ನು ಶರಣ ಚಿಂತಕ ಅಶೋಕ ಬರಗುಂಡಿ ಅವರು ನೀಡಿದರು.

ವೇದಗಳು ಭಿನ್ನತೆಯನ್ನು ಭೋದಿಸುತ್ತವೆ. ಅವು ಮನುಷ್ಯ ಮನುಷ್ಯರಲ್ಲಿ ದ್ವೇಷಕ್ಕೆ ದಾರಿ ಮಾಡಿಕೊಡುತ್ತವೆ. ದೇವರ ಕುರಿತು ಜನರಲ್ಲಿ ಇಲ್ಲದ ಭ್ರಾಂತಿಗಳನ್ನು ಹುಟ್ಟು ಹಾಕುತ್ತವೆ. ವೇದಗಳು ಸೂತಕಗಳ ಸಾಗರವಾಗಿವೆ. ಉತ್ತಮರೆಂಬ ಭ್ರಾಂತಿಯಲ್ಲಿ ದುಡಿಯದೇ ಹೊಟ್ಟೆ ಹೊರೆಯಲು ಉಪದೇಶ ನೀಡುತ್ತವೆ. ಕರ್ಮಸಿದ್ದಾಂತವೇ ವೇದಗಳ ಮೂಲಾಧಾರವಾಗಿದೆ. ಅಸಮಾನತೆಯೇ ಇವುಗಳ ಮುಖ್ಯ ಗುರಿಯಾಗಿದೆ. ಅದಕ್ಕಾಗಿ ಬಸವಾದಿ ಶರಣರು ವೇದಗಳನ್ನು ಸಂಪೂರ್ಣ ಅಲ್ಲಗಳೆಯುತ್ತಾರೆ ಎಂದು ಹೇಳಿದರು.

ಶರಣರ ವಚನ ವಿಚಾರಧಾರೆ ನೋಡುವುದಾದರೆ, ವಚನಗಳು ಅಭಿನ್ನತೆಯನ್ನು ಭೋದಿಸುತ್ತವೆ. ವಚನಗಳು ಮನುಷ್ಯ ಮನುಷ್ಯರನ್ನಷ್ಟೇ ಅಲ್ಲದೆ ಸಕಲ ಜೀವಿಗಳನ್ನು ಪ್ರೀತಿಸಲು ಕಲಿಸುತ್ತವೆ.

ದೇವರ ಕುರಿತು ಭ್ರಾಂತಿಗೆ ಎಡೆಗೊಡದೆ “ತನ್ನ ತಾನಾರೆಂದರಿದೊಡೆ ತಾನೇ ದೇವ ನೋಡಾ” ಎಂದು ತನ್ನಲ್ಲಿರುವ ದೈವತ್ವವನ್ನು ತೋರಿಸುತ್ತವೆ. ಶರಣರು “ಲಿಂಗಧಾರಿ ಸದಾಶುಚಿ” ಎನ್ನುತ್ತಾ ಸಕಲ ಸೂತಕಗಳನ್ನು ಅಲ್ಲಗಳೆಯುತ್ತಾರೆ. ದುಡಿಯದೇ ಉಣ್ಣುವುದನ್ನು ತಿರಸ್ಕರಿಸಿದ ಶರಣರು “ಕಾಯಕವೇ ಕೈಲಾಸ”ವೆಂದು ಹೇಳಿ ಗುರುವಾದಡೂ ಕಾಯಕದೊಳಗು, ಲಿಂಗವಾದಡೂ ಕಾಯಕದೊಳಗು, ಜಂಗಮವಾದಡೂ ಕಾಯಕದೊಳಗು ಎನ್ನುತ್ತಾ ಸರ್ವರೂ ಕಾಯಕ ಮಾಡಿಯೇ ಉಣ್ಣಬೇಕೆಂದು ಹೇಳುತ್ತಾ, ಕಾಯಕದಿಂದಲೇ ಜೀವನ್ಮುಕ್ತಿ, ಸ್ವತಃ ದೇವರೇ ಆದರೂ ಕಾಯಕವಿಲ್ಲದೆ ಇರಲಾಗದೆಂದು ಖಡಾಖಂಡಿತ ತಿಳಿಸುತ್ತಾರೆ.

ಕರ್ಮಸಿದ್ಧಾಂತವನ್ನು ಅಲ್ಲಗಳೆದು ಕಾಯಕ ಸಿದ್ಧಾಂತವನ್ನು ಎತ್ತಿಹಿಡಿದು, ಹುಟ್ಟಿನಿಂದ ಶ್ರೇಷ್ಠ ಕನಿಷ್ಠ ಎಂಬ ಭ್ರಾಂತಿಗೆ ಒಳಗಾಗದೆ ಸರ್ವಸಮಾನತೆಯನ್ನು ಸಾಧಿಸಲು ಶರಣರು ತಿಳಿಸುತ್ತಾರೆ. ಎಲ್ಲಾ ಬಗೆಯ ಅಸಮಾನತೆಗಳನ್ನು ಅಲ್ಲಗಳೆದು ಕರುಣೆ ವಿನಯ ಸಮತೆಗಳೇ ಸರ್ವಶ್ರೇಷ್ಠವೆಂದು ಸಾರಿದ ಶರಣರ ವಚನಗಳು ಸಾರ್ವಕಾಲಿಕ ಸತ್ಯದ ಮಾರ್ಗ ವನ್ನು ತೋರಬಲ್ಲವು ಎಂದು ಬರಗುಂಡಿ ಅವರು ಹೇಳಿದರು.

ಕಾರ್ಯಕ್ರಮದಲ್ಲಿ ಶೇಖಣ್ಣ ಕವಳಿಕಾಯಿ, ಗೌರಕ್ಕ ಬಡಿಗಣ್ಣವರ, ಶ್ರೀದೇವಿ ಶೆಟ್ಟರ್, ಎ.ವೈ. ನವಲಗುಂದ, ಶಿವಣ್ಣ ಮುಗದ, ಎಸ್.ಎಸ್. ಕಳಸಾಪುರಶೆಟ್ರ, ನಿರ್ಮಲ ಪಾಟೀಲ, ಜಯಶ್ರೀ ಹಳ್ಳಿಕೇರಿ, ಸುಜಾತ ವಾರದ, ಮಂಜುಳಾ ಹಾಸಿಲ್ಕರ ಮತ್ತಿತರರು ಉಪಸ್ಥಿತರಿದ್ದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ_
https://chat.whatsapp.com/FfnvVrZr7jWFggbitEJjky