ಕಲಬುರಗಿ
ಸೆಪ್ಟೆಂಬರ್ 2ರಂದು ಕಲಬುರ್ಗಿ ನಗರದಲ್ಲಿ ನಡೆಯಲಿರುವ ಬಸವ ಸಂಸ್ಕೃತಿ ಅಭಿಯಾನದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಬಸವಾಭಿಮಾನಿಗಳು ಭಾಗವಹಿಸುವಂತೆ ಶಾಸಕ ಅಲ್ಲಮಪ್ರಭು ಪಾಟೀಲ ಕೋರಿದರು.
ಶ್ರಾವಣ ಮಾಸದ ಅಂಗವಾಗಿ ಜಾಗತಿಕ ಲಿಂಗಾಯತ ಮಹಾಸಭಾ ಹಾಗೂ ಬಸವಪರ ಸಂಘಟನೆಗಳ ಸಂಯುಕ್ತಾಶ್ರಯದಲ್ಲಿ ತಿಂಗಳಾದ್ಯಂತ ನಡೆದ “ಮನೆಯಂಗಳದಲ್ಲಿ ವಚನ ವೈಭವ” ವಿಶೇಷ ಕಾರ್ಯಕ್ರಮದ ಸಮಾರೋಪ ಸಮಾರಂಭದಲ್ಲಿ ಸಮಾರೋಪ ಭಾಷಣ ಮಾಡಿದ ಅವರು, ಎಲ್ಲರನ್ನು ಅಪ್ಪಿಕೊಂಡ, ಒಪ್ಪಿಕೊಂಡ ಬಸವಣ್ಣನವರು ಇಷ್ಟಲಿಂಗ ಜನಕರು. ಅವರ ತತ್ವಾದರ್ಶ ಅಳವಡಿಸಿಕೊಳ್ಳಬೇಕು ಎಂದು ತಿಳಿಸಿದರು.
ಮುಖ್ಯ ಅತಿಥಿಯಾಗಿದ್ದ ಶಾಸಕ ಎಂ.ವೈ. ಪಾಟೀಲ ಮಾತನಾಡಿ, ಶರಣ ಸಾಹಿತ್ಯ, ಸ್ವಾತಂತ್ರ್ಯ ಹಾಗೂ ಸಮಗ್ರ ಕ್ರಾಂತಿಯ ಕುರಿತು ವಿವರಿಸಿದರಲ್ಲದೆ ಇಂದಿನ ಸಂಸತ್ತನ್ನು ಅಂದಿನ ಅನುಭವ ಮಂಟಪಕ್ಕೆ ಹೋಲಿಸಿದರು. ಮುಂಬರುವ ಜನಗಣತಿಯಲ್ಲಿ ಎಲ್ಲರೂ ಲಿಂಗಾಯತ ಎಂದು ಬರೆಸಿಕೊಂಡು ಸಮುದಾಯದ ಒಗ್ಗಟ್ಟನ್ನು ತೋರಿಸುವಂತೆ ಕರೆ ನೀಡಿದರು.
ಜಾಗತಿಕ ಲಿಂಗಾಯತ ಮಹಾಸಭಾ ಜಿಲ್ಲಾಧ್ಯಕ್ಷ ಪ್ರಭುಲಿಂಗ ಮಹಾಗಂವಕರ ಅವರು ಅಧ್ಯಕ್ಷತೆ ವಹಿಸಿದ್ದರು. ಕಲಬುರಗಿ ಮಹಾಪೌರರಾದ ವರ್ಷಾ ರಾಜು ಮಾನೆ ಮತ್ತು ಉಪಮಹಾಪೌರರಾದ ತೃಪ್ತಿ ಶ್ರೀನಿವಾಸ ಲಾಕೆ ಅವರನ್ನು ಸನ್ಮಾನಿಸಲಾಯಿತು.
ಜಾಗತಿಕ ಲಿಂಗಾಯತ ಮಹಾಸಭಾದ ಪ್ರಧಾನ ಕಾರ್ಯದರ್ಶಿ ಆರ್. ಜಿ. ಶೆಟಕಾರ್ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಸೀತಾರಾಮ ಚವ್ಹಾಣ ಪ್ರತಿದಿನ ನಡೆದ ಕಾರ್ಯಕ್ರಮದ ವೈಶಿಷ್ಟ್ಯವನ್ನು ವಿವರಿಸಿದರು.
ಜಾಗತಿಕ ಲಿಂಗಾಯತ ಮಹಾಸಭಾದ ಕಾರ್ಯದರ್ಶಿ ಶರಣ ಅಶೋಕ ಘೂಳಿ ನಿರೂಪಿಸಿದರು. ಮಹಿಳಾ ಘಟಕದ ಸದಸ್ಯರು ವಚನ ಪ್ರಾರ್ಥನೆ ಸಲ್ಲಿಸಿದರು. ಕಾರ್ಯಕ್ರಮದ ಯಶಸ್ಸಿಗೆ ಕಾರಣರಾದ ದಾಸೋಹಿಗಳು ಹಾಗೂ ಅನುಭಾವಿಗಳನ್ನು ವಿಶೇಷವಾಗಿ ಸನ್ಮಾನಿಸಿ ಗೌರವಿಸಲಾಯಿತು.
ಬಸವರಾಜ ಕೋಣಿನ್, ಹಣಮಂತ್ರಾಯ, ಮುರುಘೇಂದ್ರ ಚಿಂಚೋಳಿಮಠ, ಶಿವಶರಣಪ್ಪ ದೇಗಾಂವ್, ನಳಿನಿ ಮಹಾಗಂವಕರ, ವಿದ್ಯಾಶ್ರೀ ಶಿಣ್ಣೂರ, ನೀಲಮ್ಮ ತಾಯಿ, ಸಾವಿತ್ರಿ ಪಾಲ್ಕಿ, ಸೇರಿದಂತೆ ಮತ್ತು ಅನೇಕರು ಭಾಗವಹಿಸಿದ್ದರು.
