ಬಸವಕಲ್ಯಾಣದ ಇತಿಹಾಸಕ್ಕೆ ಕಪ್ಪು ಚುಕ್ಕೆಯಾದ ದಸರಾ ದರ್ಬಾರ್

ಬಸವಕಲ್ಯಾಣ

ವಿಶ್ವಗುರು ಬಸವಣ್ಣನವರ ಕರ್ಮಭೂಮಿ, ಶರಣಭೂಮಿ, ಲಿಂಗಾಯತ ಧರ್ಮಿಯರ ಪವಿತ್ರ ಕ್ಷೇತ್ರ ಬಸವಕಲ್ಯಾಣದಲ್ಲಿ ನಡೆಯುತ್ತಿರುವ ವೀರಶೈವವಾದಿ ರಂಭಾಪುರಿ ಶ್ರೀಗಳ ದಸರಾ(ರಾಜ) ದರ್ಬಾರ್ ಆಡಂಬರದ, ರಾಜಕಾರಣಿಗಳ ಒಡ್ಡೋಲಗವಾಗಿದೆ.

“ಎನಗಿಂತ ಕಿರಿಯರಿಲ್ಲ ಶಿವಭಕ್ತರಿಗಿಂತ ಹಿರಿಯರಿಲ್ಲ” ಎಂಬ ಬಸವಣ್ಣನವರ ಕಿಂಕರ ತತ್ವ ಮೂಲೆಗುಂಪಾಗಿದೆ. ಒಬ್ಬ ಗುರುವಾದವನು ಜನಗಳ ಆಚರಣೆಗೆ ಯೋಗ್ಯವಾಗುವ ಮಾರ್ಗವನ್ನು ಹೇಳಿಕೊಡಬೇಕೇ ವಿನಾ ರಾಜ ವೈಭವದಿಂದ ಮೆರೆಯುವುದಲ್ಲ.

“ಭಕ್ತಿ ಎಂಬುದು ತೋರಿ ಉಂಬ ಲಾಭವಲ್ಲ” ಎಂದು ಶರಣರು ಹೇಳುತ್ತಾರೆ ಆದರೆ ಶರಣರ ನಾಡಲ್ಲಿ ಆಡಂಬರದ ಭಕ್ತಿ ರಾರಾಜಿಸುತ್ತಿದೆ.

ದಸರಾ ದರ್ಬಾರಕ್ಕೆ ಜನ ಬರದಿರುವುದನ್ನು ಗಮನಿಸಿದ ಆಯೋಜಕರು ಮಹಿಳೆಯರಿಗೆ ಉಚಿತವಾಗಿ ಸೀರೆ ಕುಬ್ಬಸ ಕೊಟ್ಟು ಆಮಿಷಕ್ಕೊಳಗು ಮಾಡಿ ಕರೆಯಿಸಿಕೊಳ್ಳುತ್ತಿರುವರು. ಇದೇ ಹಣವನ್ನು ರೈತರ ಬೆಳೆ ಹಾನಿಗೆ ಪರಿಹಾರವಾಗಿ ಹಂಚಬಹುದಿತ್ತು.

ಬಸವಕಲ್ಯಾಣ ನಾಡಿನ ಜನರು ಇಂದೆಂದೂ ಕಂಡರಿಯದ ರಾಜ ವೈಭವದಿಂದ ಮೆರೆಯುವ ಗುರುಗಳನ್ನು ನೋಡಿ ದಿಗ್ಭ್ರಮೆಗೊಂಡಿರುವುದಂತೂ ಸತ್ಯ. ಸರಳ ಮತ್ತು ಸತ್ಯ ಹಾಗೂ ತತ್ವಭರಿತನಾಗಿರುವವನೇ ಗುರು ಎಂದು ಇಡೀ ಜಗತ್ತಿಗೆ ತೋರಿಸಿಕೊಟ್ಟ ಬಸವಣ್ಣನವರ ಈ ನಾಡಲ್ಲಿ ಅದಕ್ಕೆ ತದ್ವಿರುದ್ಧವಾದ ಆಚರಣೆಗೆ ಇಂಬುಕೊಟ್ಟ ರಾಜಕಾರಣಿಗಳನ್ನು ಮತ್ತು ಬಸವತತ್ವ ಮಠಾಧೀಶರ ನಡೆ ಸೋಜಿಗವನ್ನುಂಟು ಮಾಡಿದೆ.

ಹಾರಕೂಡ ಶ್ರೀಗಳ ನುಡಿಯ ಸೋಲು:
ಬಸವಣ್ಣನವರನ್ನು ನಿಂದಿಸುವವರಿಗೆ, ಟೀಕಿಸುವವರಿಗೆ ಉಳಿಗಾಲವಿಲ್ಲ ಎಂದು ಹೇಳಿದ ಹಾರಕೂಡ ಶ್ರೀಗಳ ಮಾತು ನಗೆಪಾಟಲಿಗೀಡಾಗಿದೆ. ಬಸವತತ್ವ(ಲಿಂಗಾಯತ) ವಿರೋಧಿ ಆಚರಣೆಗಳಾದ ದೇವಿ ಆರಾಧನೆ, ಸಾರ್ವಜನಿಕವಾಗಿ ಪಾದಪೂಜೆ ಮಾಡುವುದು ಆ ಪಾದದ ನೀರನ್ನು ಲಿಂಗದ ಮೇಲೆ ಹಾಕಿ ಭಕ್ತರಿಗೆ ಕುಡಿಸುವುದು, ಇದು ಬಸವಣ್ಣನವರನ್ನು ನಿಂದಿಸಿ ಮತ್ತು ಬಸವತತ್ವವನ್ನು ಅಪಮಾನಗೊಳಿಸಿದ್ದಕ್ಕೆ ಸಮವಾಗಿದೆ. ಈಗ ಹಾರಕೂಡ ಶ್ರೀಗಳ ನುಡಿಯು ನಡೆಯಿಲ್ಲದ ಶೃಂಗಾರದಂತಾಗಿದೆ.

ಬಾಲ ಬಿಚ್ಚಿದ ರಂಭಾಪುರಿ ಶ್ರೀಗಳು:
ಬಸವತತ್ವದವರ ವಿರೋಧಕ್ಕೆ ಮಣಿದು ಅಡ್ಡಪಲ್ಲಕ್ಕಿ ಪರ್ಯಾಯವಾಗಿ ಆಚರಿಸಿಕೊಳ್ಳುತ್ತೇವೆ ಎಂದು ಹೇಳಿದ ಶ್ರೀಗಳು ತ್ರಿಪುರಾಂತ ಕೆರೆ ವಿಷಯದಲ್ಲಿ ಈಗ ನಿಧಾನಕ್ಕೆ ಬಾಲ ಬಿಚ್ಚಿದ್ದಾರೆ. ಬಸವತತ್ವ ನಾಡಲ್ಲಿ ನಡೆಸಿದ ದಸರಾ ದರ್ಭಾರದಲ್ಲಿ ಒಂದು ದಿನವೂ ಬಸವಾದಿ ಪ್ರಮಥರ ವಚನಗಳ ಚಿಂತನೆಯನ್ನು ಮಾಡದ ರಂಭಾಪುರಿ ಶ್ರೀಗಳು ಬಸವ ಭೂಮಿಯ ತ್ರಿಪುರಾಂತಕ ಕೆರೆಗೆ ಕಾಲ್ಪನಿಕ ವ್ಯಕ್ತಿ ರೇಣುಕಾಚಾರ್ಯರ ಹೆಸರಿಡಬೇಕು ಮತ್ತು ರೇವಣಸಿದ್ಧ ಹೆಸರಿನ ವೃತ್ತ ಸ್ಥಾಪನೆ ಮಾಡಬೇಕು ಎಂದು ಇಲ್ಲಿನ ರಾಜಕಾರಣಿಗಳಿಗೆ ಒತ್ತಾಯ ಮಾಡುವುದರ ಹಿಂದೆ ಬಸವಣ್ಣನವರನ್ನು ಧ್ವೇಷಿಸುವ ಬಸವತತ್ವವನ್ನು ಹತ್ತಿಕ್ಕುವ, ಶರಣ ಸ್ಮಾರಕಗಳನ್ನು ಮುಚ್ಚಿಹಾಕುವ ದುರುದ್ಧೇಶ ಹೊಂದಿದ್ದಾರೆ.

ರಾಜ್ಯದ ಬಸವ ತತ್ವ ನಿಷ್ಟ ಲಿಂಗಾಯತರು ಇವರ ಈ ಹೇಳಿಕೆಯನ್ನು ಉಗ್ರವಾಗಿ ಖಂಡಿಸುವುದಲ್ಲದೆ ಬಸವತತ್ವವನ್ನು ಒಪ್ಪಿಕೊಳ್ಳೊದಿರುವ ಮತ್ತು ಬಸವತತ್ವ ವಿರೋಧಿ ಕಾರ್ಯ ಮಾಡುವ ಇವರನ್ನು ಮುಂದೆಂದು ಕಲ್ಯಾಣಕ್ಕೆ ಪ್ರವೇಶ ಮಾಡಗೊಡದಂತೆ ಹೋರಾಟ ಮಾಡಬೇಕು.

ಜಾತಿ ಜಂಗಮರ ದರ್ಬಾರ್:
ಜಂಗಮ ಜಾತಿ ಪ್ರಮಾಣ ಪತ್ರಕ್ಕೆ ಹೋರಾಟ ಮಾಡಿ ಪರಿಶಿಷ್ಟ ವರ್ಗದವರ ಹಕ್ಕು ಕಸಿದುಕೊಂಡ ಇವರು ಪಾದಪೂಜೆಗೆ ಮತ್ತು ಗುರುಸ್ಥಾನಕ್ಕೆ ಯೋಗ್ಯರೇ ಎಂಬ ಅರಿವು ಲಿಂಗಾಯತರಿಗೆ ಇರದಿರುವುದು ದುರಂತ. ಗುರುವರ್ಗದ ಜಾತಿ ಜಂಗಮರು ಕೂಡಿ ಲಿಂಗಾಯತ ಧರ್ಮಕ್ಕೆ ವಿರೋಧ ಮಾಡಿ ಬಸವಣ್ಣನವರ ತತ್ವಕ್ಕೆ ಚ್ಯುತಿ ತಂದಿರುವ ಇವರನ್ನು ಅದಾವ ಅಭಿಮಾನಕ್ಕೆ ಜೋತು ಬಿದ್ದು ಅಡ್ಡಪಲ್ಲಕ್ಕಿ ಹೋರುವಿರಿ?.

ಇವರ ಜಂಗಮ ಜಾತಿ ಅಭಿಮಾನ ಕಾರಣವಾಗಿ ಪಂಚಮಸಾಲಿ ಸಮಾಜ ಎಚ್ಚೆತ್ತುಕೊಂಡು ಇವರನ್ನು ತಿರಸ್ಕರಿಸಿದ ಹಾಗೆ ಇನ್ನಿತರ ಲಿಂಗಾಯತ ಒಳಪಂಗಡಗಳು ಇವರಿಂದ ಬೇಗ ಹೊರಗಡೆ ಬರುವುದು ಒಳಿತು. ಲಿಂಗಾಯತ ಸಮಾಜಕ್ಕೆ ಮತ್ತು ಸಮಾಜದ ನಿಮ್ನ ವರ್ಗಕ್ಕೆ ವಿರಕ್ತ ಮಠಾಧೀಶರ ಕೊಡುಗೆಗಿಂತ ಪಂಚಾಚಾರ್ಯರ ಕೊಡುಗೆ ಶೂನ್ಯವಾಗಿದೆ.

ಅವರ ವೇದಿಕೆಗಳು ಜಾತಿ ಜಂಗಮರಿಂದ ತುಂಬಿರುತ್ತವೆ ವಿನಾ ಒಬ್ಬರೇ ಒಬ್ಬ ನಿಮ್ನ ವರ್ಗದ ಅಥವಾ ಲಿಂಗಾಯತ ಮಠಾಧೀಶ ಸ್ವಾಮಿಗಳು ಇರುವುದಿಲ್ಲ. ಜಂಗಮ ಜಾತಿಯನ್ನು ಬೆಳೆಸುವ ಪಂಚಾಚಾರ್ಯರಿಂದ ಲಿಂಗಾಯತರು, ಲಿಂಗಾಯತ ಮಠಾಧೀಶರು, ಲಿಂಗಾಯತ ರಾಜಕಾರಣಿಗಳು ದೂರವಿರದಿದ್ದರೆ ನೀವು ಬಸವದ್ರೋಹಿಗಳೇ ಆಗುವಿರಿ. ಅಧಿಕಾರ ಶಾಶ್ವತವಲ್ಲ ಅಧಿಕಾರಕ್ಕಾಗಿ ಬಸವತತ್ವವನ್ನು ಬಲಿ ಕೊಡದಿರಿ ಬಸವಣ್ಣನವರ ಅವಕೃಪೆಗೆ ಪಾತ್ರರಾಗಿರುವಿರಿ.

ದುಂದುವೆಚ್ಚದ ದಸರಾ ದರ್ಭಾರ್:
ಒಂದು ಕಡೆ ಬೀದರ ಜಿಲ್ಲೆಯಲ್ಲಿ ಅತೀ ಹೆಚ್ಚು ಮಳೆಯಾಗಿ ರೈತರು ಅತೀವೃಷ್ಟಿಯಿಂದ ಬಳಲುತ್ತಿದ್ದಾರೆ, ಇನ್ನೊಂದು ಕಡೆ ಇಲ್ಲಿನ ರಾಜಕಾರಣಿಗಳು ಕೋಟಿ ಕೋಟಿ ಹಣ ಸುರಿದು ದಸರಾ ದರ್ಬಾರ್ ನಡೆಸಿ ಹಣದ ದುಂದುವೆಚ್ಚ ಮಾಡುತ್ತಿರುವುದು ಯಾವ ಪುರುಷಾರಾರ್ಥಕ್ಕಾಗಿ ಎಂದು ಜನಸಾಮಾನ್ಯರು ಮಾತಾಡಿಕೊಳ್ಳುತ್ತಿದ್ದಾರೆ.

ಇಂದು ಸಮಾಜಕ್ಕೆ ಕಿಂಕರ ಸ್ವಾಮಿಗಳು ಬೇಕೇ ವಿನಾ ಅಹಂಕಾರ ದರ್ಪದ ಸ್ವಾಮಿಗಳು ಬೇಕಿಲ್ಲ. ವಿಚಾರಶೀಲರು, ವೈಜ್ಞಾನಿಕ ಮನೋಭಾವ ಉಳ್ಳವರು, ಸಮಾನತೆ ತತ್ವ ಪಾಲಿಸುವ ಗುರುಗಳಿಂದ ಸಮಾಜದ ಸ್ವಾಸ್ಥ್ಯ ಸಾಧ್ಯವೇ ಹೊರತು ಭಕ್ತರನ್ನು ಶೋಷಿಸಿ, ಅವರ ಹೆಗಲ ಮೇಲೆ ಕುಳಿತು, ಆಡಂಬರದ ಬದುಕು ಮಾಡುವ ಗುರುಗಳಿಂದ ಅಲ್ಲ. ಎಂಬ ಸತ್ಯ ಇಂದು ಸಮಾಜ ಅರ್ಥ ಮಾಡಿಕೊಳ್ಳಬೇಕು. ಹತ್ತಾರು ಕೋಟಿ ಖರ್ಚು ಮಾಡಿ ಆಡಂಬರದ ಕಾರ್ಯಕ್ರಮಗಳ ಉಪಯೋಗ ದೊಡ್ಡ ದೊಡ್ಡ ಸ್ವಾಮಿಗಳಿಗೆ, ರಾಜಕಾರಣಿಗಳಿಗೆ ಹೊರತು ಜನ ಯಸಾಮಾನ್ಯರಿಗೆ ಏನೂ ಉಪಯೋಗವಾಗದು.

ರಾಜ್ಯದಲ್ಲಿ ನಿರುದ್ಯೋಗ, ಬಡತನ, ಆತ್ಮಹತ್ಯೆಯಂತಹ ಜ್ವಲಂತ ಸಮಸ್ಯೆಗಳಿಗೆ ಯಾವ ಗುರುಗಳಿಂದ ಪರಿಹಾರ ಸಿಕ್ಕಿಲ್ಲ ಮತ್ತು ಸಿಗುವುದೂ ಇಲ್ಲ ಎಂಬ ಸತ್ಯ ಅರ್ಥ ಮಾಡಿಕೊಂಡು ಆಡಂಬರದ ಕಾರ್ಯಕ್ರಮಗಳನ್ನು, ದುಂದು ವೆಚ್ಚದ ಕಾರ್ಯಕ್ರಮಗಳನ್ನು ಧಿಕ್ಕರಿಸುವ ಮನೋಭಾವ ಬೆಳೆಸಿಕೊಳ್ಳಬೇಕು.

ಬಸವ ತತ್ವದ ಪೂಜ್ಯರ ಮಹಾಮೌನ ಕಾರಣವಾಗಿ ಬಸವಕಲ್ಯಾಣದ ಭೂಮಿಯಲ್ಲಿ ನಡೆದಿರುವ ಬಸವತತ್ವ ಆಚರಣೆ ವಿರೋಧಿ ದಸರಾ ದರ್ಬಾರ್ ಬಸವಕಲ್ಯಾಣ ಇತಿಹಾಸಕ್ಕೆ ಕಪ್ಪು ಚುಕ್ಕೆಯಾಗಿದೆ.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/BvguxN7Z0AG9g7Il7l5Lzh