ಜಗಲಿಯಿಂದ ಕಾಲ್ಪನಿಕ ದೇವರ ತೆಗೆದ ಬಳ್ಳಾರಿಯ ಎರಡು ಕುಟುಂಬಗಳು

ಬಳ್ಳಾರಿ

ಬಳ್ಳಾರಿಯ ಎರಡು ಶರಣ ಕುಟುಂಬಗಳು ತಾವು ಸಾಂಪ್ರದಾಯಕವಾಗಿ ಪೂಜಿಸುತ್ತಿದ್ಧ ದೇವರುಗಳನ್ನು ತೆರವುಗೊಳಿಸಿದರು.

ಇವರೇ ಬಳ್ಳಾರಿ ನಗರದ ನಾಗಲಿಂಗಪ್ಪ, ರಾಜೇಶ್ವರಿ ಮತ್ತು ಬಳ್ಳಾರಿ ಗ್ರಾಮಾಂತರದ ಪಂಪಾಪತಿ, ಪಾರ್ವತಮ್ಮ ದಂಪತಿಗಳು.

ಈ ದಂಪತಿಗಳು ಸ್ವತಃ ತಾವೇ ನಿಶ್ಚಯಿಸಿಕೊಂಡು, ತಮ್ಮ ಮನೆಯ ಸದಸ್ಯರ ಒಮ್ಮತ ಪಡೆದುಕೊಂಡು ಲಕ್ಷ್ಮಿ-ಗಣಪ-ಸರಸ್ವತಿ, ರಾಘವೇಂದ್ರ, ವೀರಭದ್ರ ಫೋಟೋಗಳು, ನಂದಿ, ಈಶ್ವರ, ದೇವಿ ಮೂರ್ತಿಗಳನ್ನು ಜಗಲಿಯಿಂದ ತೆರವುಗೊಳಿಸಿದರು.

ಇತ್ತೀಚೆಗೆ ನಡೆದ ಕಾರ್ಯಕ್ರಮದಲ್ಲಿ ಬಸವಣ್ಣನವರಿಗೆ ಜೈಕಾರ ಹಾಕುತ್ತ ಧರ್ಮ ಗುರುಗಳ ಭಾವಚಿತ್ರ, ಮೂರ್ತಿ ಹಾಗೂ ವಚನ ಪುಸ್ತಕವನ್ನು ಕುಟುಂಬ ಸದಸ್ಯರು ಹೊತ್ತುಕೊಂಡು, ಹೊರಗಡೆಯಿಂದ ಮನೆಯ ಪ್ರವೇಶ ಮಾಡಿ, ಅವುಗಳನ್ನೆಲ್ಲ ಮನೆಯ ಜಗುಲಿಯ ಮೇಲೆ ಪ್ರತಿಷ್ಠಾಪಿಸಿದರು.

ಇನ್ನು ಮುಂದೆ ಲಿಂಗಾಯತ ಧರ್ಮದ ಕಡ್ಡಾಯ ಆಚರಣೆಗಳಾದ ಇಷ್ಟಲಿಂಗ ಏಕದೇವೋಪಾಸನೆ ಹಾಗೂ ಬಸವಗುರುವಿನ ಪೂಜೆಯನ್ನು ಮಾತ್ರ ಮಾಡುವ ದಿಟ್ಟ ನಿರ್ಧಾರ ಕೈಗೊಂಡಿರುವುದಾಗಿ ದಂಪತಿಗಳು ಹೇಳಿದರು.

“ಪೂಜ್ಯ ನಿಜಗುಣ ಸ್ವಾಮೀಜಿಗಳ ಪ್ರವಚನ ಕೇಳಿದ ಮೇಲೆ ಪರಿವರ್ತನೆಯಾದೆವು. ಬಸವಣ್ಣ, ಲಿಂಗದ ಮೇಲೆ ತಿಳಿದುಕೊಂಡ ಮೇಲೆ ಕಾಲ್ಪನಿಕ ದೇವರುಗಳಿಂದ ಏನೂ ಪ್ರಯೋಜನವಿಲ್ಲವೆಂದು ಅರಿವಾಯಿತು,” ಎಂದರು.

ಎಸ್. ಶಿವಕುಮಾರ, ಅಂದ್ರಾಳ ಘಟಕದ ರಾಷ್ಟ್ರೀಯ ಬಸವದಳ ಅಧ್ಯಕ್ಷರು, ಕಾರೇಕಲ್ಲು ಬಸನಗೌಡರು, ಜಾಗತಿಕ ಲಿಂಗಾಯತ ಮಹಾಸಭಾ ಜಿಲ್ಲಾ ಉಪಾಧ್ಯಕ್ಷರು, ಇವರ ನೇತೃತ್ವದಲ್ಲಿ ಕಾರ್ಯಕ್ರಮಗಳು ನಡೆದವು.

ಹೆಚ್. ಗಾಳೇಶಪ್ಪ, ಶಿಡಿಗಿನಮೊಳೆ ಪಂಪಾಪತಿ, ಚಿಂತೆಕುಂಟ ಪಂಪಾಪತಿ, ಇಬ್ರಾಹಿಂಪುರದ ಗಾದಿಲಿಂಗಪ್ಪ ಮತ್ತು ರಾಷ್ಟ್ರೀಯ ಬಸವ ದಳ ಮತ್ತು ಜಾಗತಿಕ ಲಿಂಗಾಯತ ಮಹಾಸಭಾ ಸದಸ್ಯರುಗಳು ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.