ಲಿಂಗಾಯತ ಧರ್ಮ ಅಭಿಯಾನ ರೂಪಿಸಲು ಫೆಬ್ರವರಿ 19 ಜಂಟಿ ಸಮಿತಿಯ ಮಹತ್ವದ ಸಭೆ

“ಯಾವುದೇ ಬ್ಯಾನರ್ ನಲ್ಲಿ ಲಿಂಗಾಯತ ಮಠಾಧೀಶರ ಒಕ್ಕೂಟದ ಅಥವಾ ಜಾಗತಿಕ ಲಿಂಗಾಯತ ಮಹಾಸಭಾದ ಹೆಸರುಗಳು ಇರುವುದಿಲ್ಲ. ಇದು ಇಡೀ ಲಿಂಗಾಯತ ಸಮುದಾಯದ ಕಾರ್ಯಕ್ರಮ.”

ಧಾರವಾಡ

ಈ ವರ್ಷ ರಾಜ್ಯಾದ್ಯಂತ ನಡೆಯಲಿರುವ ಲಿಂಗಾಯತ ಧರ್ಮ ಜಾಗೃತಿ ಅಭಿಯಾನದ ರೂಪರೇಷೆಯನ್ನು ತಯಾರಿಸಲು ಜಂಟಿ ಸಮಿತಿಯೊಂದು ಅಸ್ತಿತ್ವಕ್ಕೆ ಬಂದಿದೆ.

ಈ ಸಮಿತಿಯ ಮಹತ್ವದ ಸಭೆ ಧಾರವಾಡದಲ್ಲಿ ಫೆಬ್ರವರಿ 19 ಸಂಜೆ ನಾಲ್ಕು ಗಂಟೆಗೆ ನಡೆಯಲಿದೆ.

ಪೂಜ್ಯ ಬಸವಲಿಂಗ ಪಟ್ಟದ್ದೇವರು, ಪೂಜ್ಯ ತೋಂಟದ ಸಿದ್ಧರಾಮ ಶ್ರೀಗಳು, ಪೂಜ್ಯ ಪಂಡಿತಾರಾಧ್ಯ ಶಿವಾಚಾರ್ಯ ಶ್ರೀಗಳು, ಪೂಜ್ಯ ಶಿವಾನಂದ ಶ್ರೀಗಳು, ಜಂಟಿ ಸಮಿತಿಯಲ್ಲಿದ್ದಾರೆ. ಮೈಸೂರಿನ ಶರತಚಂದ್ರ ಸ್ವಾಮೀಜಿಯವರನ್ನೂ ಜಂಟಿ ಸಮಿತಿಯಲ್ಲಿ ನೇಮಿಸಲಾಗಿದೆಯೆಂದು ತಿಳಿದುಬಂದಿದೆ.

ಜಾಗತಿಕ ಲಿಂಗಾಯತ ಮಹಾಸಭಾದ ಪ್ರಧಾನ ಕಾರ್ಯದರ್ಶಿ ಎಸ್ ಎಂ ಜಾಮದಾರ್ ಸಂಘಟನೆಯ ಪರವಾಗಿ ಐದು ಪದಾಧಿಕಾರಿಗಳನ್ನು ಜಂಟಿ ಸಮಿತಿಯ ಸದಸ್ಯರನ್ನಾಗಿ ನೇಮಿಸಿದ್ದಾರೆ: ಜಿ ಬಿ ಪಾಟೀಲ, ಬೆಂಗಳೂರು, ಬಸವರಾಜ ಧನ್ನೂರ, ಬೀದರ, ಬಸವರಾಜ ರೊಟ್ಟಿ, ಬೆಳಗಾವಿ, ಎಮ್ ವಿ ಗೊಂಗಡಶೆಟ್ಟಿ, ಧಾರವಾಡ ಮತ್ತು ಮಹಾದೇವಪ್ಪ, ಮೈಸೂರು.

ಈ ಬೆಳವಣಿಗೆಗಳ ಬಗ್ಗೆ ಸಂಬಂಧಿಸಿದ ಕೆಲವರ ಜೊತೆ ಮಾತನಾಡಿದಾಗ ನಮಗೆ ಸಿಕ್ಕಿರುವ ಮಾಹಿತಿ:

1) ಫೆಬ್ರವರಿ 19ರ ಸಭೆಯಲ್ಲಿ ಮುಖ್ಯವಾದ ನಿರ್ದಾರಗಳನ್ನು ತೆಗೆದುಕೊಳ್ಳಲಾಗುವುದು. ಮಕ್ಕಳ ಪರೀಕ್ಷೆ, ಮಳೆ ಮುಂತದ ಅಂಶಗಳನ್ನು ಪರಿಗಣಿಸಿ ವಿವಿಧ ಜಿಲ್ಲೆಗೆಳಲ್ಲಿ ಅಭಿಯಾನದ ದಿನಾಂಕಗಳನ್ನು ಸೂಚಿಸಲಾಗುವುದು.

2) ಮಠಾಧೀಶರ ಒಕ್ಕೂಟ ಮತ್ತು ಜಾಗತಿಕ ಮಹಾಸಭಾ ಈ ಕೆಲಸ ಶುರು ಮಾಡಿದೆಯಷ್ಟೇ. ಅಭಿಯಾನ ಈ ಎರಡು ಸಂಘಟನೆಗಳಿಗೆ ಸೀಮಿತವಾಗದೆ ಎಲ್ಲಾ ಬಸವ ತತ್ವದ ಸಂಸ್ಥೆ ಸಂಘಟನೆಗಳನ್ನು ಮುಕ್ತವಾಗಿ ಪಾಲ್ಗೊಳ್ಳುವಂತೆ ಮಾಡಲು ಪ್ರಾಮಾಣಿಕವಾಗಿ ಪ್ರಯತ್ನಿಸಲಾಗುವುದು. “ಯಾವುದೇ ವೇದಿಕೆ ಅಥವಾ ಬ್ಯಾನರ್ ಗಳಲ್ಲಿ ಒಕ್ಕೂಟದ ಅಥವಾ ಜಾಗತಿಕ ಮಹಾಸಭಾದ ಹೆಸರುಗಳು ಇರುವುದಿಲ್ಲ. ಇದು ಇಡೀ ಲಿಂಗಾಯತ ಸಮುದಾಯದ ಕಾರ್ಯಕ್ರಮ,” ಎಂದು ಒಬ್ಬರು ಹೇಳಿದರು.

3) ಅಭಿಯಾನ ‘ಮತ್ತೆ ಕಲ್ಯಾಣ’ದ ಮಾದರಿಯಲ್ಲಿ ನಡೆಯುವುದು. ‘ಮತ್ತೆ ಕಲ್ಯಾಣ’ದಲ್ಲಿ ನಡೆದ ಚಟುವಟಿಕೆಗಳ ಅನುಭವದ ಸಂಪೂರ್ಣ ಪ್ರಯೋಜನ ಪಡೆದುಕೊಳ್ಳಲಾಗುವುದು. ‘ಅದೇ ರೀತಿಯ ಕಾರ್ಯಕ್ರಮವನ್ನು ವಿಸ್ತಾರವಾಗಿ ಎಲ್ಲಾ ಜಿಲ್ಲೆಗಳಲ್ಲಿ ಬೇರೆ ಬೇರೆ ಸಂಘಟನೆಗಳ ಸಹಯೋಗದಲ್ಲಿ ನಡೆಸಲಾಗುವುದು. ಇದರಲ್ಲಿ ಸಾಣೇಹಳ್ಳಿ ಶ್ರೀಗಳ ಮಾರ್ಗದರ್ಶನ ಮುಖ್ಯವಾಗುತ್ತದೆ,’ ಎಂದು ಇನ್ನೊಬ್ಬರು ಹೇಳಿದರು.

ಅಭಿಯಾನ ‘ಮತ್ತೆ ಕಲ್ಯಾಣ’ದ ಮಾದರಿಯಲ್ಲಿ ನಡೆಯುವುದು. ‘ಮತ್ತೆ ಕಲ್ಯಾಣ’ದಲ್ಲಿ ನಡೆದ ಚಟುವಟಿಕೆಗಳ ಅನುಭವದ ಸಂಪೂರ್ಣ ಪ್ರಯೋಜನ ಪಡೆದುಕೊಳ್ಳಲಾಗುವುದು.

4) ಜಿಲ್ಲಾ ಮಟ್ಟದಲ್ಲಿ ಆಯ್ದ ವ್ಯಕ್ತಿಗಳಿಗೆ ಜವಾಬ್ದಾರಿ ನೀಡಲಾಗುವುದು. ಅವರು ಆಯಾ ಪ್ರದೇಶಗಳಲ್ಲಿ ಸಕ್ರಿಯವಾಗಿರುವ ಸಂಘಟನೆಗಳನ್ನು ಸೇರಿಸಿಕೊಂಡು ಅಭಿಯಾನ ನಡೆಸುವಂತೆ ನೋಡಿಕೊಳ್ಳಲಾಗುವುದು.

“ಅಭಿಯಾನವನ್ನು ಬಹಳ ಗಂಭೀರವಾಗಿ ತೆಗೆದುಕೊಂಡಿದ್ದೇವೆ. ಆದರೆ ಕೆಲಸವನ್ನು ಯಾರೊಬ್ಬರ ಮೇಲೂ ಹಾಕದೆ ಸ್ವಪ್ರತಿಷ್ಠೆಯನ್ನು ಬಿಟ್ಟು ಪ್ರತಿಯೊಬ್ಬರೂ ಕೈ ಜೋಡಿಸಿದರೆ ಮಾತ್ರ ಇದು ಯಶಸ್ವೀಯಾಗಲು ಸಾಧ್ಯ,” ಎಂದು ಒಬ್ಬರು ಪ್ರಮುಖರು ಹೇಳಿದರು.

ಜನವರಿ 17ರಂದು ಬಸವ ಮೀಡಿಯಾ ಲಿಂಗಾಯತ ಸಮಾಜದ ಮೇಲೆ ನಡೆಯುತ್ತಿರುವ ಸಾಂಸ್ಕೃತಿಕ ದಾಳಿಯನ್ನು ತಡೆಯಲು ರಾಜ್ಯದ ಮೂಲೆ ಮೂಲೆಗಳಲ್ಲಿ ಬಸವ ಭಕ್ತರ ಅಭಿಯಾನ ನಡೆಸಲು ಲಿಂಗಾಯತ ಮಠಾಧೀಶರ ಒಕ್ಕೊಟ ನಿರ್ಣಯ ತೆಗೆದುಕೊಂಡಿದೆ ಎಂದು ವರದಿ ಮಾಡಿತ್ತು.

ನಂತರ ಇದರ ಬಗ್ಗೆ ಬಸವ ಮೀಡಿಯಾದಲ್ಲಿ ಹಲವಾರು ದಿನಗಳು ನಡೆದ ಚರ್ಚೆಯಲ್ಲಿ ಮೂಡಿದ ಅಭಿಪ್ರಾಯಗಳನ್ನು ಕ್ರೋಡೀಕರಿಸಿ ಮಠಾಧೀಶರಿಗೆ ತಲುಪಿಸಲಾಗಿತ್ತು.