ಅಭಿಯಾನ ಕಾರ್ಯಕರ್ತರಿಗೆ ಅಭಿನಂದನೆ, ಮಲ್ಲನಮೂಲೆ, ಬಂಡಳ್ಳಿ ಶ್ರೀಗಳಿಗೆ ನಮನ

 ಚಾಮರಾಜನಗರ:

ಬಸವ ಸಂಸ್ಕೃತಿ ಅಭಿಯಾನ ಕಾರ್ಯಕ್ರಮದ ಲೆಕ್ಕಪತ್ರ ಮಂಡನೆ, ಇತ್ತೀಚೆಗೆ ಲಿಂಗೈಕ್ಯರಾದ ಮಲ್ಲನಮೂಲೆ ಹಾಗೂ ಬಂಡಳ್ಳಿ ಶ್ರೀಗಳಿಗೆ ಶ್ರದ್ಧಾಂಜಲಿ ಹಾಗೂ ಅಭಿಯಾನಕ್ಕಾಗಿ ದುಡಿದವರಿಗೆ, ದಾನಿಗಳಿಗೆ ಅಭಿನಂದನ ಕಾರ್ಯಕ್ರಮ ಸಿದ್ದಮಲ್ಲೇಶ್ವರ ವಿರಕ್ತಮಠದ ಆವರಣದಲ್ಲಿ ಮಂಗಳವಾರ ನಡೆಯಿತು.

ಬಸವೇಶ್ವರ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಮಾಡುವುದರ ಮೂಲಕ ಲಿಂಗಾಯತ ಮಠಾಧಿಪತಿಗಳು ಹಾಗೂ ಮುಖಂಡರಿಂದ ವಿದ್ಯುಕ್ತವಾಗಿ ಉದ್ಘಾಟಿಸಲಾಯಿತು.

ಲಿಂಗೈಕ್ಯ ಉಭಯ ಶ್ರೀಗಳ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಮಾಡುವ ಮೂಲಕ ಶ್ರದ್ಧಾಂಜಲಿ ಗೌರವ ಸಲ್ಲಿಸಲಾಯಿತು.

ಚಾಮರಾಜನಗರ ವಿರಕ್ತಮಠದ ಶ್ರೀಗಳವರು ಮಲ್ಲನ  ಮೂಲೆ ಶ್ರೀಗಳಿಗೆ ನುಡಿನಮನ ಸಲ್ಲಿಸಿದರು. ಚಿಕ್ಕಿಂದವಾಡಿ ಶ್ರೀಗಳವರು ಬಂಡಳ್ಳಿ ಶ್ರೀಗಳವರಿಗೆ ನುಡಿ ನಮನ  ಸಲ್ಲಿಸಿದರು.

ಸಭೆಯ ಪ್ರಾಸ್ತಾವಿಕ ಮಾತುಗಳನ್ನು ಅಭಿಯಾನದ ಗೌರವ ಸಲಹೆಗಾರರಾದ ಕಾಳನಹುಂಡಿ ವಿರೂಪಾಕ್ಷ ವಕೀಲರು ನುಡಿದರು.

ಅಭಿಯಾನದ ಖಜಾಂಚಿಗಳಾದ ಬಂದಿಗೌಡನಹಳ್ಳಿ ಸಿದ್ದಮಲ್ಲಪ್ಪ ಅವರು ಸಭೆಗೆ ಲೆಕ್ಕಪತ್ರ ಮಂಡಿಸಿದರು. ಲೆಕ್ಕಪತ್ರದ ಸಂಪೂರ್ಣ ವಿವರಗಳನ್ನು ಒಳಗೊಂಡ ಕೈಪಿಡಿಯನ್ನು ಸಭೆಯಲ್ಲಿ ಹಾಜರಿದ್ದ ಎಲ್ಲ ಮುಖಂಡರಿಗೆ ವಿತರಿಸಲಾಯಿತು. ಲೆಕ್ಕಪತ್ರದ ಪಾರದರ್ಶಕತೆಗೆ ಸಭೆಯಿಂದ ಭರ್ಜರಿ ಪ್ರಶಂಸೆ ವ್ಯಕ್ತವಾಯಿತು.

ಅದಾದ ನಂತರ ಮರೆಯಾಲ ಮೃಗರಾಜೇಂದ್ರ ಮಹಾಸಂಸ್ಥಾನ ಮಠದ ಅಧ್ಯಕ್ಷರಾದ ಇಮ್ಮಡಿ ಮುರುಘರಾಜೇಂದ್ರ ಮಹಾಸ್ವಾಮೀಜಿ, ಲಿಂಗೈಕ್ಯರಾದ ಶ್ರೀಗಳಿಗಾಗಿ ನುಡಿ ನಮನ ಸಲ್ಲಿಸಿ, ಬಸವ ಸಂಸ್ಕೃತಿ ಅಭಿಯಾನ ಸಮಿತಿಯು ನಡೆಸಿದ ಆದರ್ಶ ಕಾರ್ಯಪದ್ಧತಿ, ಪಾರದರ್ಶಕ ಲೆಕ್ಕಪತ್ರ ಮಂಡನೆ ಹಾಗೂ ನಿಜವಾದ ಶರಣ ಧರ್ಮದ ನಡವಳಿಕೆಯನ್ನು ಶ್ಲಾಘಿಸಿದರು.

“ಸಾರ್ವಜನಿಕ ಸಂಘ-ಸಂಸ್ಥೆಗಳಿಗೆ ಚಾಮರಾಜನಗರ ಜಿಲ್ಲಾ ಬಸವ ಸಂಸ್ಕೃತಿ ಅಭಿಯಾನ ಸಮಿತಿ ಮಾದರಿ” ಎಂದು ಪ್ರಶಂಸಿಸಿದರು. ನಂತರ ಇತ್ತೀಚೆಗೆ ಕರ್ನಾಟಕ ಸಹಕಾರರತ್ನ ಪ್ರಶಸ್ತಿಗೆ ಭಾಜನರಾದ  ಪೇಟೆಯ ಎಚ್.ಎಸ್. ನಂಜುಂಡಪ್ರಸಾದ ಅವರನ್ನು ಹಾಗೂ ಚಾಮರಾಜನಗರ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘಕ್ಕೆ ಆಯ್ಕೆಯಾಗಿರುವ ರಾಮಸಮುದ್ರ ಸಿದ್ದಲಿಂಗ ಸ್ವಾಮಿ ತಂಡದವರನ್ನು ಸನ್ಮಾನಿಸಲಾಯಿತು.

ಅಭಿಯಾನದ ನೇತೃತ್ವ ವಹಿಸಿದ್ದ ಪಡುಗೂರಿನ ಅಡವಿ ಮಠಾಧ್ಯಕ್ಷರಾದ ಪೂಜ್ಯ ಶಿವಲಿಂಗೇಂದ್ರ ಸ್ವಾಮೀಜಿಗಳು ಆಶೀರ್ವಚನ ನೀಡುತ್ತ, ಅಭಿಯಾನ ನಡೆಯಲು ಜಗದ್ಗುರು ಶ್ರೀ ಶಿವರಾತ್ರಿ ದೇಶಿಕೇಂದ್ರ ಮಹಾಸ್ವಾಮಿಗಳವರ ಮಾರ್ಗದರ್ಶನ, ಅಭಿಯಾನ ಸಮಿತಿಯ ಪರಿಶ್ರಮ, ಜಿಲ್ಲೆಯ ಎಲ್ಲಾ ಬಸವಭಕ್ತರ ಸೇವಾ ಭಾವನೆ, ಎಲ್ಲಾ ಬಸವಪರ ಸಂಘಟನೆಗಳ ಬೆಂಬಲ,

ದಾನಿಗಳ ಉದಾರತೆ ಇವೆಲ್ಲ ಕಾರಣಗಳಿಂದ ಅಭಿಯಾನ ಯಶಸ್ವಿಯಾಗಿದೆ ಎಂದು ತಿಳಿಸಿದರು.

ಮುಂದಿನ ದಿನಗಳಲ್ಲಿ ಜಿಲ್ಲೆಯ ಎಲ್ಲಾ ಬಸವಪರ ಲಿಂಗಾಯಿತ ಸಂಘ ಸಂಸ್ಥೆಗಳು  ಒಕ್ಕೂಟದಂತೆ ಕೆಲಸ ಮಾಡುವಂತಾಗಲಿ, ಬಸವಾಭಿಮಾನಿಗಳ ಹಾಗೂ ಇಲ್ಲಿ ನೆರೆದಿರುವ ಮುಖಂಡರುಗಳ ಸಲಹೆಯಂತೆ ಜಿಲ್ಲೆಯ ಲಿಂಗಾಯಿತ ಮುಖಂಡರುಗಳ ಮಾಹಿತಿ ಹೊಂದಿರುವ ಪುಸ್ತಕ ಬಿಡುಗಡೆಗೆ ಕಾರ್ಯನಿರ್ವಹಿಸಿ.

ಮೈಸೂರು ಚಾಮರಾಜನಗರ ಭಾಗದ ಎರಡು ಜಿಲ್ಲೆಗಳ ಹಿರಿಯ ಲಿಂಗಾಯತ ಮುಖಂಡರ ಸಭೆ ನಡೆಸಿ ಪ್ರಸ್ತುತ ಸನ್ನಿವೇಶದಲ್ಲಿ ಲಿಂಗಾಯತ ಸಮಾಜವು ಎದುರಿಸುತ್ತಿರುವ ಸಮಸ್ಯೆಗಳಿಗೆ ಪರಿಹಾರವನ್ನು ಕಂಡುಕೊಳ್ಳುವ ದಿಶೆಯಲ್ಲಿ ಕಾರ್ಯನಿರ್ವಹಿಸಿ ಜೊತೆಜೊತೆಗೆ ಪ್ರತಿವರ್ಷ ಜಿಲ್ಲೆಯ ಯಾವುದಾದರೊಂದು ತಾಲೂಕು ಕೇಂದ್ರದಲ್ಲಿ ಬಸವ ಸಂಸ್ಕೃತಿ ಅಭಿಯಾನ ನಡೆಯಲಿ ಎಂದು ಆಶೀರ್ವದಿಸಿದರು.

ಸಭೆಯ ಅಧ್ಯಕ್ಷತೆಯನ್ನು ಅಭಿಯಾನದ ಅಧ್ಯಕ್ಷರಾದ ಕೊಡಿಮೊಳೆ ರಾಜಶೇಖರ್ ವಹಿಸಿದ್ದರು. ಅಭಿಯಾನದ ಗೌರವ ಸಲಹೆಗಾರರಾದ ಸಂತೆಮರಹಳ್ಳಿ ಎಂ. ವೇದಮೂರ್ತಿ ಉಪಸ್ಥಿತರಿದ್ದರು.

ಸಭೆಯಲ್ಲಿ ಚಾಮುಲ್ ಅಧ್ಯಕ್ಷ ಮದುವನಹಳ್ಳಿ ನಂಜುಂಡಸ್ವಾಮಿ, ಅಖಿಲ ಭಾರತ ವೀರಶೈವ ಲಿಂಗಾಯತ ಮಹಾಸಭಾ ಜಿಲ್ಲಾಧ್ಯಕ್ಷ ಎಂ.ಎಂ. ನಂದೀಶಕುಮಾರ, ತಾಲೂಕು ಅಧ್ಯಕ್ಷರುಗಳಾದ ಬಾಲಚಂದ್ರಮೂರ್ತಿ, ಜಿ.ಎಂ ಮಹದೇವಪ್ಪ, ಜಿಲ್ಲೆಯ ಎಲ್ಲಾ ಲಿಂಗಾಯತ ಸಂಘ-ಸಂಸ್ಥೆಗಳ ಅಧ್ಯಕ್ಷರು, ಪ್ರತಿನಿಧಿಗಳು, ಊರಗೌಡರು, ಯಜಮಾನರು ಬಸವ ಸಂಸ್ಕೃತಿ ಅಭಿಯಾನಕ್ಕಾಗಿ ರಚಿಸಿದ ಎಲ್ಲ ಸಮಿತಿಗಳ ಅಧ್ಯಕ್ಷರು ಪದಾಧಿಕಾರಿಗಳು ಅಭಿಯಾನಕ್ಕಾಗಿ ಸಂಚಾಲಕರಾಗಿದ್ದ ಮೂಡಗೂರು ಶ್ರೀಗಳು, ಕಬ್ಬಳ್ಳಿ ಶ್ರೀಗಳು, ಕುಂತೂರು ಶ್ರೀಗಳು, ಚಿಕ್ಕಿಂದವಾಡಿ ಶ್ರೀಗಳು, ಅಗರಕಲ್ಲು ಮಠದ ಶ್ರೀಗಳು, ಮರಿಯಾಲ ಶ್ರೀಗಳು, ಚಾಮರಾಜನಗರ ಮಠದ ಶ್ರೀಗಳು, ಗೇರಟ್ಟಿ ಶ್ರೀಗಳು ಸೇರಿದಂತೆ ಇಪ್ಪತ್ತಕ್ಕೂ ಹೆಚ್ಚು ಮಠಾಧಿಪತಿಗಳು ಉಪಸ್ಥಿತರಿದ್ದರು.

ಸಭೆಯಲ್ಲಿ ಅಭಿಯಾನಕ್ಕಾಗಿ ಹಗಲಿರುಳೆನ್ನದೆ ದುಡಿದ ಸಮಿತಿಯ ಎಲ್ಲಾ ಮುಖಂಡರನ್ನು ಮಠಾಧಿಪತಿಗಳು ಹಾಗೂ ಸಮುದಾಯದ ಮುಖಂಡರು ಅಭಿನಂದಿಸಿದರು.

ಆರಂಭದಲ್ಲಿ ನಾಗರಾಜಪ್ಪನವರು ಪ್ರಾರ್ಥಿಸಿದರು. ಅಭಿಯಾನದ ಕಾರ್ಯದರ್ಶಿ ಏನ್ರೀಚ್ ಮಹದೇವಸ್ವಾಮಿ ಆರಂಭದಲ್ಲಿ ಸರ್ವರನ್ನೂ ಸ್ವಾಗತಿಸಿದರು. ಕೊನೆಯಲ್ಲಿ ಹಾಜರಿದ್ದ ಎಲ್ಲಾ ಮಠಾಧಿಪತಿಗಳಿಗೆ ಹಾಗೂ ಸಮುದಾಯದ ಮುಖಂಡರಿಗೆ ವಂದಿಸಿದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/H81yNL3dGRcHb7EBxL5oqr