ಸಾಧಕ ಅಂಗಗುಣ ಕಳೆದುಕೊಂಡು ಲಿಂಗದೊಡನೆ ಸಮರಸವಾಗುತ್ತಾನೆ

ಗುಳೇದಗುಡ್ಡ:

ಬಸವಕೇಂದ್ರ ವತಿಯಿಂದ ಹಮ್ಮಿಕೊಂಡ ಮನೆಯಲ್ಲಿ ಮಹಾಮನೆ ಕಾರ್ಯಕ್ರಮ ಶನಿವಾರ, ಕ.ಸಾ.ಪ. ಅಧ್ಯಕ್ಷರು, ವಿಶ್ರಾಂತ ಪ್ರಾಚಾರ್ಯರಾದ ಡಾ. ಸಿ. ಎಂ. ಜೋಶಿ ಅವರ ಮನೆಯಲ್ಲಿ  ಜರುಗಿತು.

ಚಿಂತನೆಗೆ ಆಯ್ದುಕೊಂಡ ಬಾಹೂರ ಬೊಮ್ಮಣ್ಣ ತಂದೆಗಳ ಈ ವಚನ –

ಕಾದ ಲೋಹದ ಮೇಲೆ ನೀರನೆರೆದಡೆ
ನೀರ ಕುಡಿದುದು ಕಾಹೊ, ಕಬ್ಬನವೊ?
ಎಂಬುದನರಿತಲ್ಲಿ, ಅಂಗಲಿಂಗ ಸಂಬಂಧಿ
ಕ್ಷೀರ ಉಕ್ಕುವಲ್ಲಿ, ಆರೈದು ನೀರನೆರೆದಡೆ
ಆ ನೀರ ಕುಡಿದುದು ಹಾಲೊ, ಹಂಚೊ?
ಎಂಬುದ ಕಡೆಗಣಿಸಿದಲ್ಲಿ
ಕ್ರೀ ಜ್ಞಾನ ಆತ್ಮಲಿಂಗ ಸಂಬಂಧಿ
ಕ್ರೀಗೆ ವರ್ತನೆ, ಅರಿವಿಂಗೆ ಕೂಟ
ಈ ಗುಣ ಆಟ ಬ್ರಹ್ಮೇಶ್ವರಲಿಂಗದ
ಒಳಗನರಿದವರಾಟ.

ಪ್ರಾರಂಭದಲ್ಲಿ ಮಾತನಾಡಿದ ನಿವೃತ್ತ ಶಿಕ್ಷಕರಾದ ಶರಣ ಚವ್ಹಾಣ ಅವರು–ಈ ಮಹಾಮನೆ ಕಾರ್ಯಕ್ರಮದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಹೆಣ್ಣುಮಕ್ಕಳು ಸೇರಿರುವುದಕ್ಕೆ ಬಸವಾದಿ ಶರಣರ ಕ್ರಾಂತಿಯೇ ಕಾರಣ.

ಶರಣರು ಕೇವಲ ಲೌಕಿಕ ಬದುಕಿಗಾಗಿ ಚಿಂತಿಸದೇ ಅಲೌಕಿಕ ಬದುಕಿಗೆ ಒತ್ತು ನೀಡಿದರು. ಅದಕ್ಕೆ ಕಾರಣ ಈ ಇಷ್ಟಲಿಂಗ. ಪೂಜೆ ಎಂದರೆ ಜ್ಞಾನ ಗಳಿಸುವುದು. ಈ ಲಿಂಗ, ಅಂಗವನ್ನು ಲಿಂಗವನ್ನಾಗಿ ಪರಿವರ್ತಿಸುವ ಸಾಧನ.  ಇದನ್ನು ಶರಣರೇ ಅರಿಯಬಲ್ಲರು ಎಂದು ಹೇಳಿದರು.

ವಚನದ ಮಥನವನ್ನು ಮುಂದುವರೆಸಿದ ಶರಣ ಪ್ರೊ. ಸುರೇಶ ರಾಜನಾಳ ಅವರು – ಈ ವಚನವನ್ನು ಬಾಹೂರ ಬ್ರಹ್ಮಯ್ಯ ಶರಣರು ರಚಿಸಿದ್ದಾರೆ. ಅವರ 41 ವಚನಗಳು ಉಪಲಬ್ಧವಿವೆ.  ಬ್ರಹ್ಮೇಶ್ವರ ಲಿಂಗ ಎಂಬುದು ಅವರ ಅಂಕಿತವಾಗಿದ್ದು, ಕೃಷಿ ಕಾಯಕದ ಶರಣ. ಹರಿಹರ ಕವಿಯು ಇವರನ್ನು ಕುರಿತು ಒಂದು ರಗಳೆಯನ್ನು ರಚಿಸಿದ್ದಾನೆ.

ಅಂಗಭಾವ ಅಳಿದು, ಲಿಂಗಭಾವ ಉಳಿಯಬೇಕು.  ಈ ಮಾತು ಹೇಳಲು ಸುಲಭವಾದರೂ ಆಚರಿಸಲು ಕಠಿಣವಾಗಿದೆ. ಅಂಗ-ಲಿಂಗದ ಸಂಬಂಧದ ನಡುವಣ ಸಕೀಲವನ್ನು ಅರಿಯಲು ಬಲ್ಲವರೇ ಬಲ್ಲರು. ಅರಿವು, ಆಚಾರ, ಅನುಭಾವ ಇವು ಕ್ರಮವಾಗಿ ಗುರು ಲಿಂಗ  ಜಂಗಮ ಎಂಬುದಕ್ಕೆ ಸಂವಾದಿಯಾಗಿವೆ. ಲಿಂಗ ಪೂಜೆಯನ್ನು ಮನಸ್ಸುಗೊಟ್ಟು ಮಾಡಬೇಕು. ಮಾಡುತ್ತ ಮಾಡುತ್ತ ಲಿಂಗವೇ ಆಗಬೇಕೆಂಬುದು ಈ ವಚನದ ಸಾರವಾಗಿದೆ ಎಂದು ತಿಳಿಸಿದರು.

ನಿವೃತ್ತರಾದ ಪ್ರೊ. ಮಹಾದೇವಯ್ಯಸ್ವಾಮಿ ನೀಲಕಂಠಮಠ ಅವರು, ಸದರಿ ವಚನದ ಚಿಂತನೆಯಲ್ಲಿ ತೊಡಗಿ ಲೌಕಿಕ ಕ್ರಿಯೆಗಳನ್ನೇ ತಾತ್ವಿಕ ಮಟ್ಟಕ್ಕೇರಿಸಿದವರು ಶರಣರು. ಯಾವುದೇ ಕ್ರಿಯೆ ನಡೆಯಲು ಸಾಧನವೊಂದು ಬೇಕಾಗುತ್ತದೆ. ಆ ಮೂಲಕ ಫಲವನ್ನು ಪಡೆಯುತ್ತೇವೆ.  ಇಲ್ಲ ತವೆ-ಬೆಂಕಿಯ ಸಂಪರ್ಕದಿಂದ ಕ್ರಿಯೆ ನಡೆಯುತ್ತದೆ.

ಅಂಗ-ಲಿಂಗ ಸಮಾನವಾಗಿದ್ದರೂ, ಅವುಗಳು ಒಂದಕ್ಕೊಂದು ಹೊಂದಿಕೊಂಡು ಹೋಗಬೇಕಾಗುತ್ತದೆ.  ಅವೆರಡೂ ಒಂದನ್ನು ಬಿಟ್ಟು ಒಂದಿಲ್ಲ.  ಇವನ್ನು ಅರಿತೇ  ಅಂದಿನ ಜನಸಾಮಾನ್ಯ ಜ್ಞಾನಿಗಳಾದರು. ವಚನಗಳನ್ನು ಬರೆದರು. ಅವರಲ್ಲಿ ಬಾಹೂರು ಬೊಮ್ಮಯ್ಯ ಶರಣರು ಒಬ್ಬರು.  ಇಲ್ಲಿ ಅವರು ಎರಡು ಉದಾಹರಣೆಗಳ ಮೂಲಕ ಅವೆರಡರ ನಡುವಣ ಅವಿನುಭಾವ ಸಂಬಂಧವನ್ನು ಹೇಳಿದ್ದಾರೆ ಎಂದು ವಿಮರ್ಶಿಸಿದರು.

ನಂತರ ಮಾತನಾಡಿದ ಅನುಭಾವಿಗಳಾದ ಪ್ರೊ. ಸಿದ್ಧಲಿಂಗಪ್ಪ ಬರಗುಂಡಿಯವರು, ವಚನವನ್ನು ನಿರ್ವಚನಗೈಯುತ್ತ–ಈ ವಚನದಲ್ಲಿ ಬಾಹೂರ ಬ್ರಹ್ಮಯ್ಯನವರು ಶರಣಧರ್ಮದ ತಾತ್ವಿಕ ಚಿಂತನೆಯೊಂದನ್ನು ಜನಸಾಮಾನ್ಯರು ನಿತ್ಯವೂ ಕಾಣುವ ಉದಾಹರಣೆಗಳನ್ನು ಬಳಸಿಕೊಂಡು ಅರ್ಥೈಸಲು ಯತ್ನಿಸಿದ್ದಾರೆ.

ಯಾವುದೇ ವ್ಯಕ್ತಿ ಲಿಂಗವಾಗಬೇಕಾದರೆ ತನ್ನ ತನು, ಮನ, ಭಾವಗಳನ್ನು ಇಷ್ಟ, ಪ್ರಾಣ, ಭಾವಲಿಂಗಕ್ಕೆರ್ಪಿಸಿ, ಅರಿವು, ಆಚಾರ, ಅನುಭಾವಗಳ ಮೂಲಕ ಶರಣನಾಗಿ, ಲಿಂಗದಲ್ಲಿ ಐಕ್ಯನಾಗಿ, ಮಹಾಲಿಂಗವೇ ಆಗಬೇಕಾಗುತ್ತದೆ.

ಪ್ರಾರಂಭದಲ್ಲಿ ಈ ಕ್ರಿಯೆ ತನ್ನನ್ನು ಇದಿರಿಟ್ಟು ನಡೆಯುವಾಗ ಬೇದವೆನಿಸುತ್ತದೆ. ಅದರಲ್ಲಿ ಲೀನವಾಗುತ್ತ ಹೋದಾಗ ತಾನು ಅದೇ (ಲಿಂಗ) ಆದಾಗ ಅಲ್ಲಿ ಹೇಳಲು, ಕೇಳಲು ಏನೂ ಇಲ್ಲ.  ಇದನ್ನು ಹೇಳಲು ಎರಡು ಉದಾಹರಣೆಗಳನ್ನು ಕೊಟ್ಟಿದ್ದಾರೆ. ಒಂದು ಕಾದ ಕಬ್ಬಿಣದ ಮೇಲೆ ನೀರು ಹಾಕಿದಾಗ ನೀರು ಸುಟ್ಟು ಆವಿಯಾಗಿ ಹೋಗುತ್ತದೆ.  ಜನಸಾಮಾನ್ಯರಿಗೆ ನೀರು ಮಾತ್ರ ಮಾಯವಾದಂತಾಗುತ್ತದೆ.  ಇಲ್ಲಿ ನೀರನ್ನು ಕುಡಿದದ್ದು ಕೆಂಪಾಗಿ ಕಾಯ್ದ ಕಬ್ಬಿಣ ಕುಡಿಯಿತೊ ಇಲ್ಲ. ಆ ಬೆಂಕಿ (ಕಾಹು) ಕುಡಿಯಿತೊ? ಎಂಬ ಸಂದೇಹ ಉಂಟಾಗುತ್ತದೆ.

ಇದೇ ಅಂಗ-ಲಿಂಗ ಸಂಬಂಧಿ.  ಇದು ಎರಡರ ಕೂಟ, ಬಿಸಿ-ಕೆಂಪು ಇವನ್ನು ಬೇರ್ಪಡಿಸಲಾಗದು. ಅದು ಅರ್ಥವಾದಲ್ಲಿ ಆತ ಅಂಗ-ಲಿಂಗ ಸಂಬಂಧಿಯೆಂದೇ ತಿಳಿಯಬೇಕು. ಹಾಗೆಯೇ ಹಾಕಿದ ನೀರು ಮಾಯವಾಗುವದು ಮನಸ್ಸಿನ ಸ್ಥಿತಿ ಅಲ್ಲಿನ ಕಲ್ಮಶವೆಲ್ಲ ಕರಗಿ ಹೋಗುತ್ತದೆ. ಒಟ್ಟಾರೆ ಹಾಲು ಶುದ್ಧವಾಗಿರುತ್ತದೆ. ಇದು ಮನದ ಸ್ಥಿತಿ. ಕ್ರೀಯ ವರ್ತನೆ, ಅರಿವಿನ ಕೂಟ. ಇವೆರಡು ಭಾವಲಿಂಗದ ಸ್ಥಿತಿ.

ಒಬ್ಬ ಸಾಧಕ ಶರಣ ತನ್ನ ತನು, ಮನ, ಭಾವಗಳ ಶುದ್ಧಿಯಿಂದ ಅಂಗಗುಣಗಳನ್ನು ಕಳೆದುಕೊಂಡು ಲಿಂಗದೊಡನೆ ಸಮರಸವಾಗುತ್ತದೆ. ಇದೇ ಬ್ರಹ್ಮೇಶ್ವರ ಲಿಂಗದ ಸ್ಥಿತಿ. ಒಳಗನರಿತವರ (ಲಿಂಗಾನುಭಾವಿಯ ಸ್ಥಿತಿ) ಆಟ ಎಂದು ಬಾಹೂರ ಬ್ರಹ್ಮಯ್ಯನವರು ಹೇಳಿದ್ದಾರೆ ಎಂದು ಅಭಿಪ್ರಾಯಪಟ್ಟರು. 

ಶರಣೆ ಜಯಶ್ರೀ ಬರಗುಂಡಿ ಹಾಗೂ ಸಂಗಡಿಗರಿಂದ ವಚನ ಪ್ರಾರ್ಥನೆಯೊಂದಿಗೆ ಪ್ರಾರಂಭವಾಗಿ, ಅನುಭಾವದ ನಂತರ ವಚನ ಮಂಗಲವಾಯಿತು.  ಮಹಾಮನೆ ಜರುಗಲು ಅವಕಾಶ ಮಾಡಿಕೊಟ್ಟ ಮಹಾಮನೆಯ ಕುಟುಂಬದವರಿಗೆ ಹಾಗೂ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದವರೆಲ್ಲರಿಗೂ ಕಾರ್ಯಕ್ರಮದ ಆಯೋಜಕರು ಸ್ವಾಗತಿಸಿ ಕೊನೆಯಲ್ಲಿ ಶರಣು ಸಮರ್ಪಣೆಯನ್ನು ಗೈದರು.

ಮಹಾಮನೆಯ ಈ ಕಾರ್ಯಕ್ರಮಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳೆಯರು ಆಗಮಿಸಿದ್ದರು. ರಾಚಣ್ಣ ಕೆರೂರ, ಮಹಾಲಿಂಗಪ್ಪ ಕರನಂದಿ, ಅನ್ನಪೂರ್ಣ ಕೆರೂರ, ಕವಿತಾ ಬರಗುಂಡಿ, ಸುರೇಖಾ ಗೆದ್ದಲಮರಿ, ಮಂಜುನಾಥ ನಾಯಿನೇಗಲಿ, ನಿರ್ಮಲಾ ಬರಗುಂಡಿ, ಪುತ್ರಪ್ಪ ಬೀಳಗಿ, ಪಾಂಡಪ್ಪ ಕಳಸಾ, ಚಂದ್ರಶೇಖರ ತೆಗ್ಗಿ, ಪ್ರೊ. ಸುರೇಶ ರಾಜನಾಳ, ಮಹಾಮನೆಯ ಕುಟುಂಬದ ಬಂಧುಗಳಲ್ಲದೆ ನೆರೆಹೊರೆಯವರು ಸೇರಿದಂತೆ ಬಸವ ಭಾಂಧವರಲ್ಲದೆ ಪಟ್ಟಣದ ಹೊರವಲಯದ ಬಸವ ಕೇಂದ್ರದ ಸದಸ್ಯರು google meet ಮೂಲಕ ಭಾಗವಹಿಸಿ ಕಾರ್ಯಕ್ರಮ ಯಶಸ್ವಿಗೊಳಿಸಿದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/JjqqFwfw2jf2WxG5glPZ0O