ಬಸವಕಲ್ಯಾಣ:
ಬಸವಕಲ್ಯಾಣದಲ್ಲಿ ನಡೆಯುವ ೪೬ನೆಯ ಶರಣ ಕಮ್ಮಟ ಹಾಗೂ ಅನುಭವಮಂಟಪ ಉತ್ಸವ-೨೦೨೫ ಎರಡು ದಿವಸಗಳ ಪರ್ಯಂತ ನಡೆಯಲಿರುವ ಸಮಾರಂಭದ ಉದ್ಘಾಟನಾ ಸಮಾರಂಭದ ಸಾನಿಧ್ಯವನ್ನು ಆದಿಚುಂಚನಗಿರಿ ಮಹಾಸಂಸ್ಥಾನಮಠ, ಬೆಂಗಳೂರಿನ ಪೂಜ್ಯ ಡಾ. ನಿರ್ಮಲಾನಂದನಾಥ ಮಹಾಸ್ವಾಮಿಗಳು, ನಾಡೋಜ ಪೂಜ್ಯ ಡಾ. ಬಸವಲಿಂಗ ಪಟ್ಟದ್ದೇವರು ವಹಿಸಿದರು.
ಹಾರಕೂಡದ ಪೂಜ್ಯ ಡಾ.ಚನ್ನವೀರ ಶಿವಾಚಾರ್ಯ ಮಹಾಸ್ವಾಮಿಗಳು, ಹಿರೇಮಠ ಸಂಸ್ಥಾನದ ಪೂಜ್ಯ ಗುರುಬಸವ ಪಟ್ಟದ್ದೇವರು, ಹುಲಸೂರಿನ ಪೂಜ್ಯ ಡಾ. ಶಿವಾನಂದ ಸ್ವಾಮಿಗಳು, ಬೀದರ ಡಾ. ಗಂಗಾಂಬಿಕಾ ಅಕ್ಕ ಸಮ್ಮುಖ ವಹಿಸಿದರು.
ಬಸವಗುರು ಪೂಜೆ ಮಾಡಿ ರಾಷ್ಟ್ರಗೀತೆ ಹಾಗೂ ಬಸವಗೀತೆಯ ಮೂಲಕ ಕಾರ್ಯಕ್ರಮ ಪ್ರಾರಂಭವಾಯಿತು.
ಕಾರ್ಯಕ್ರಮದ ಉದ್ಘಾಟನೆಯನ್ನು ಆಂಧ್ರಪ್ರದೇಶದ ರಾಜ್ಯಪಾಲರಾದ ಎಸ್. ಅಬ್ದುಲ್ ನಜೀರ್ ಅವರು ಮಾಡಿ, ವಿಶ್ವಗುರು ಬಸವಣ್ಣನವರು ಅನುಭವಮಂಟಪದ ಮೂಲಕ ಜಗತ್ತಿನ ಮೊದಲನೆಯ ಸಂಸತ್ತು ಸ್ಥಾಪಿಸಿದರು. ಅನುಭವಮಂಟಪದಲ್ಲಿ ನೆರೆದ ೭೭೦ ಶರಣ ಶರಣೆಯರು ಕೂಡಿ ಅನುಭಾವ ನಡೆಸಿ, ಜನಭಾಷೆಯಲ್ಲಿ ವಚನಗಳನ್ನು ಬರೆದರು.
ಕಾಯಕವೇ ಕೈಲಾಸ ಎಂದು ಆರ್ಥಿಕ ಸಮಾನತೆಯ ಸಂದೇಶ ನೀಡಿದರು. ದಯವೇ ಧರ್ಮದ ಮೂಲವೆಂದು ಹೇಳುವ ಮೂಲಕ ಧಾರ್ಮಿಕ ಮೌಲ್ಯಗಳನ್ನು ತಿಳಿಸಿದರು. ಆಚಾರವೇ ಸ್ವರ್ಗ ಅನಾಚಾರವೇ ನಗರ ಎಂದು ಹೇಳಿ ಮನುಷ್ಯನಿಗೆ ನೈತಿಕ ಆಚರಣೆಯ ಬೋಧನೆ ಮಾಡಿದರು.
ನಾವೆಲ್ಲರೂ ಬಸವಣ್ಣನವರು ಬೋಧಿಸಿದ ಕಳಬೇಡ, ಕೊಲಬೇಡ ಹುಸಿಯ ನುಡಿಯಲು ಬೇಡ ತನ್ನ ಬಣ್ಣಿಸಬೇಡ, ಅನ್ಯರಿಗೆ ಅಸಹ್ಯ ಪಡಬೇಡ ಇದೇ ಅಂತರಂಗ ಶುದ್ಧಿ, ಇದೇ ಬಹಿರಂಗ ಶುದ್ಧಿ ಇದೇ ನಮ್ಮ ಕೂಡಲಸಂಗಮದೇವರನೊಲಿಸುವಪರಿ ಈ ವಚನದ ಸಪ್ತ ಸೂತ್ರಗಳು ಆಚರಣೆಯಲ್ಲಿ ತಂದರೆ ನಮಗೆ ಪೊಲೀಸ್ ಇಲಾಖೆ ಮತ್ತು ನ್ಯಾಯಾಲದ ಕೆಲಸ ಕಡಿಮೆ ಆಗುತ್ತದೆ. ಜೊತೆಗೆ ನಮ್ಮ ಸಮಾಜ ಮತ್ತು ದೇಶ ಅಭಿವೃದ್ಧಿಯಾಗುತ್ತದೆ.
ಆ ದಿಶೆಯಲ್ಲಿ ಡಾ.ಬಸವಲಿಂಗ ಪಟ್ಟದ್ದೇವರ ಸಾನಿಧ್ಯದಲ್ಲಿ ನಡೆಯುತ್ತಿರುವ ಈ ಉತ್ಸವ ಅರ್ಥಪೂರ್ಣವಾದದ್ದು. ಪೂಜ್ಯರು ಈ ಭಾಗದಲ್ಲಿ ಶೈಕ್ಷಣಿಕ ಕ್ರಾಂತಿಯನ್ನು ಮಾಡಿದ್ದಾರೆ. ಕರ್ನಾಟಕದ ಆಚೆಗೆ ಮಹಾರಾಷ್ಟ್ರ ತೆಲಂಗಾಣ ರಾಜ್ಯಗಳಲ್ಲಿ ಹೋಗಿ ಬಸವತತ್ವ ಪ್ರಸಾರ ಮಾಡಿ ಆ ಭಾಷೆಗಳಲ್ಲಿ ಗ್ರಂಥಗಳು ಪ್ರಕಟಿಸಿರುವುದು ಮಹತ್ವದ ಸಾಧನೆಯಾಗಿದೆ. ಅವರ ಕರಸಂಜಾತರಾದ ಪೂಜ್ಯ ಗುರುಬಸವ ಪಟ್ಟದ್ದೇವರು ಕ್ರಿಯಾಶೀಲರಾಗಿ ಕಾರ್ಯ ಮಾಡುವ ಮೂಲಕ ಶ್ರೀಮಠದ ಕೀರ್ತಿ ಹೆಚ್ಚಿಸುತ್ತಿದ್ದಾರೆ ಎಂದು ನುಡಿದರು.
ಅರಣ್ಯ ಸಚಿವರಾದ ಈಶ್ವರ ಖಂಡ್ರೆ ಅವರು ಅಧ್ಯಕ್ಷತೆ ವಹಿಸಿದ್ದರು. ಬಸವಕಲ್ಯಾಣ ಶಾಸಕ ಶರಣು ಸಲಗರ ಅವರು ಸ್ವಾಗತಿದರು. ಸಮಾರಂಭದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿದ ಸಿ.ಬಿ. ಸೋಮಶೆಟ್ಟಿ, ಡಾ.ಕೆ. ರವೀಂದ್ರನಾಥ, ಬಸವರಾಜ ಬೆಂಗೇರಿ, ಡಾ.ಎಸ್.ಜಿ. ಸುಶೀಲಮ್ಮ ಅವರಿಗೆ ಪ್ರಶಸ್ತಿ ಪ್ರದಾನ ಮಾಡಲಾಯಿತು.
ಶಶಿಧರ ಕೋಸಂಬೆ ಶರಣು ಸಮರ್ಪಣೆ ಮಾಡಿದರು. ನವಲಿಂಗ ಪಾಟೀಲ ನಿರೂಪಣೆ ಮಾಡಿದರು. ಶಿವಕುಮಾರ ಪಾಂಚಾಳ ತಂಡದವರಿಂದ ವಚನ ಸಂಗೀತ ಜರುಗಿತು. ನೂಪುರ ಕಲಾತಂಡದವರಿಂದ ವಚನ ನೃತ್ಯ ನೋಡುಗರ ಮನ ರಂಚಿಸಿತು.
ಗುರುಬಸವ ಪೂಜೆ, ಷಟ್‌ಸ್ಥಲ ಧ್ವಜಾರೋಹಣ, ವಚನ ಪಠಣ
೪೬ನೇ ಶರಣ ಕಮ್ಮಟ ಅನುಭವಮಂಟಪ ಉತ್ಸವ-೨೦೨೫ ಬಸವಗುರುಪೂಜೆ ಹಾಗೂ ವಚನ ಪಠಣದೊಂದಿಗೆ ಪ್ರಾರಂಭಗೊಂಡಿತು.
ಸಾನಿಧ್ಯ ಪೂಜ್ಯ ನಾಡೋಜ ಡಾ. ಬಸವಲಿಂಗ ಪಟ್ಟದ್ದೇವರು ಹಾಗೂ ಪೂಜ್ಯ ಗುರುಬಸವ ಪಟ್ಟದ್ದೇವರು ವಹಿಸಿಕೊಂಡಿದ್ದರು.
ಲಿಂಗಾಯತ ಧರ್ಮಿಯರಿಗೆ ಅಷ್ಟಾವರಣ, ಪಂಚಾಚಾರ, ಷಟ್‌ಸ್ಥಲಗಳು ಪ್ರಮುಖವಾದ ತತ್ವಸಿದ್ಧಾಂತಗಳಿವೆ. ಅಂತಹ ತತ್ವಗಳು ಕೊಟ್ಟ ಬಸವಾದಿ ಶರಣರು ನಮಗೆಲ್ಲ ಪರಮಪೂಜ್ಯರು.
ಆ ಸಂಕೇತವಾಗಿ ಷಟ್‌ಸ್ಥಲ ಧ್ವಜಾರೋಹಣ ಪ್ರೊ. ಸಿದ್ಧಣ್ಣ ಲಂಗೋಟಿ ಅವರು ನೆರವೇರಿಸಿಕೊಟ್ಟರು. ಗುರುಬಸವ ಪೂಜೆಯನ್ನು ಸಹಾಯಕ ಆಯುಕ್ತರಾದ ಶರಣ ಮುಕುಲ್ ಜೈನ್ ಅವರು ಮಾಡಿದರು. ಶರಣ ಮಾದಾರ ಚೆನ್ನಯ್ಯ ವೇದಿಕೆಯನ್ನು ತಹಸೀಲ್ದಾರರಾದ ಶರಣ ದತ್ತಾತ್ರೇಯ ಗಾದಾ ಅವರು ಉದ್ಘಾಟನೆ ಮಾಡಿದರು.
ಪೂಜ್ಯ ಜಗದ್ಗುರು ಲಿಂಗಾನಂದ ಮಹಾಸ್ವಾಮಿಗಳ ಮಹಾದ್ವಾರ ಉದ್ಘಾಟನೆ ಡಿ.ವೈ.ಎಸ್.ಪಿ. ಮಡಿವಾಳಪ್ಪ ಅವರು ಮಾಡಿದರು. ಲಿಂ. ಸುಶೀಲಾದೇವಿ ಡಾ.ಬಿ.ವಿ. ಪಟೇಲ್ ಪ್ರಸಾದ ಮಂಟಪವನ್ನು ನಗರಸಭೆ ಅಧ್ಯಕ್ಷರಾದ ಎಂ.ಡಿ. ಸಂಗೀರೊದ್ದಿನ್ ಅವರು ಉದ್ಘಾಟನೆ ಮಾಡಿದರು.
ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/H81yNL3dGRcHb7EBxL5oqr
