ಶಹಾಪುರ :
ಹನ್ನೆರಡನೆಯ ಶತಮಾನ ವಿಶ್ವದಲ್ಲಿ ಸುವರ್ಣ ಯುಗವೊಂದು ಜರುಗಿ ಹೋಯಿತು. ಕನ್ನಡದ ನೆಲದಲ್ಲಿ ಬಸವಣ್ಣನವರು ಮಾಡಿದ ಕ್ರಾಂತಿ ಅವಿಸ್ಮರಣೀಯ ಎಂದು ಬಸವಮಾರ್ಗ ಪ್ರತಿಷ್ಠಾನ ಸತ್ಯಂಪೇಟೆ ಮತ್ತು ತಾಲೂಕು ಜಾಗತಿಕ ಲಿಂಗಾಯತ ಮಹಾಸಭೆ ಏರ್ಪಡಿಸಿದ್ದ ತಿಂಗಳ ಬಸವ ಬೆಳಕು -೧೨೭ ರ ಕಾರ್ಯಕ್ರಮದಲ್ಲಿ ಭಾಗವಹಿಸಿದ ಶರಣ ಚಿಂತಕ ಲಕ್ಷ್ಮಣ ಲಾಳಸೇರಿ ಅಭಿಪ್ರಾಯ ವ್ಯಕ್ತಪಡಿಸಿದರು.
ಶ್ರವಣ ಮತ್ತು ಸಿದ್ಧಾರೂಢ ಆನೇಗುಂದಿ ಅವರ ಸ್ಮರಣೆಯಲ್ಲಿ ಏರ್ಪಡಿಸಿದ ಸಭೆಯಲ್ಲಿ ‘ಅಪರೂಪದ ಶರಣರು’ ಎಂಬ ವಿಷಯ ಕುರಿತು ಮಾತನಾಡಿದರು.
ಮೇಲು ಕೀಳು, ಹೆಣ್ಣು ಕನಿಷ್ಠ ಗಂಡು ಶ್ರೇಷ್ಠ ಎಂಬ ಸಾಮಾಜಿಕ ತಾರತಮ್ಯಗಳ ಸತ್ಯವನ್ನು ಶರಣರು ತಿಳಿಸುತ್ತ ಸಾರಾಸಗಟಾಗಿ ಅವನ್ನು ಅಲ್ಲಗಳೆದರು. ಮೌಢ್ಯಗಳು ಇಂದು ಅಕ್ಷರಸ್ಥರ ತಲೆ ಹೊಕ್ಕಿವೆ. ಅರಿವಿನ ಪ್ರಜ್ಞೆ ಇಲ್ಲದ ಯುವ ಜನತೆ ಜಿಹಾದ್, ಗೋವು ಸಂರಕ್ಷಣೆಯನ್ನೆ ಧರ್ಮವೆಂದು ಭಾವಿಸಿದ್ದಾರೆ. ಯಾರನ್ನಾದರೂ ಕೊಲ್ಲುವುದು, ಅವಮಾನಿಸುವುದು ಧರ್ಮವೆ ? ಎಂದು ಮಾರ್ಮಿಕವಾಗಿ ಪ್ರಶ್ನಿಸಿದರು.
ವೈಚಾರಿಕರಾಗದ, ವೈಜ್ಞಾನಿಕ ಮನಸ್ಸನ್ನು ಬೆಳೆಸಿಕೊಳ್ಳದ ಓದು ವ್ಯರ್ಥ. ಮಂತ್ರಕ್ಕೆ ಮಾವಿನ‌ಕಾಯಿ ಉದುರುವುದಿಲ್ಲ ಎಂದು ಗೊತ್ತಿದ್ದರೂ ಜನ ಮಂತ್ರಗಳ, ಮಂತ್ರವಾದಿಗಳ ಬೆನ್ನ ಬಿದ್ದಿದ್ದಾರೆ. ಧರ್ಮ ಜಾತಿ ದೇವರುಗಳ ಹೆಸರಿನಲ್ಲಿ ಶೋಷಣೆ ಮಾಡಬಾರದು. ಶರಣ ಹೆಸರಿನಲ್ಲಿ ಶೋಷಣೆ ಅಪಚಾರ ಮಾಡಬಾರದು. ಜನರ ಅಜ್ಞಾನವನ್ನೆ ಬಂಡವಾಳ ಮಾಡಿಕೊಂಡ ರಾಜಕಾರಣಿ ಮತ್ತು ಧಾರ್ಮಿಕ ನಾಯಕರು ಸುಲಿಗೆಗೆ ಇಳಿದಿದ್ದಾರೆ ಎಂದು ಖೇದ ವ್ಯಕ್ತ ಪಡಿಸಿದರು.
ಪ್ರಾಸ್ತಾವಿಕವಾಗಿ ಮಾತನಾಡಿದ ಸಂಸ್ಥೆಯ ಅಧ್ಯಕ್ಷ ವಿಶ್ವಾರಾಧ್ಯ ಸತ್ಯಂಪೇಟೆ ಸದುವಿನಯವೆ ಸದಾಶಿವನ ಒಲುಮೆ ಎಂಬ ಮಾತನ್ನು ಮರೆತು ಮಠಾಧೀಶರೊಬ್ಬರು ಲಿಂಗಾಯತ ಮಠಾಧೀಶರ ಒಕ್ಕೂಟದವರ ಮೇಲೆ ಇಲ್ಲ ಸಲ್ಲದ ಅನಾಗರಿಕ ಮಾತುಗಳನ್ನಾಡುತ್ತಿದ್ದಾರೆ ಇದು ಖಂಡನೀಯ ಎಂದರು.
ಯಾರ ಆಶಿರ್ವಾದ, ಶಾಪಗಳಿಂದ ಬದುಕನ್ನು ಕಟ್ಟಿಕೊಳ್ಳಲು ಸಾಧ್ಯವಿಲ್ಲ. ನಮ್ಮ ಬದುಕಿಗೆ ನಾವೇ ರೂವಾರಿಗಳು. ಶರಣ ವಚನಗಳು ನಮ್ಮ ಬದುಕಿನ ಕೀಲುಗಳು. ಎಲ್ಲ ಧರ್ಮಕ್ಕಿಂತಲೂ ಮನುಷ್ಯ ಧರ್ಮ ಅತ್ಯಂತ ಶ್ರೇಷ್ಠ. ಭಯವಿಲ್ಲದ ನಿರ್ಭಯವಾದ ಮಾನವೀಯ ಧರ್ಮವನ್ನು ಶರಣರು ಕಟ್ಟಿಕೊಟ್ಟಿದ್ದಾರೆ. ಅವನ್ನು ಪಾಲಿಸುವ ಹೊಣೆ ಎಲ್ಲರ ಮೇಲಿದೆ ಎಂದು ವಿವರಿಸಿದರು.
ಮಾಜಿ ಕ.ಸಾ.ಪ. ಅಧ್ಯಕ್ಷ ಸಿದ್ದಲಿಂಗಪ್ಪ ಆನೇಗುಂದಿ ಸಸಿಗೆ ನೀರೆರೆಯುವ ಮೂಲಕ ಸಭೆಯನ್ನು ಉದ್ಘಾಟಿಸಿದರು. ಶರಾವತಿ ಸತ್ಯಂಪೇಟೆ, ಕಾವೇರಿ ಲಾಳಸೇರಿ ವಚನ ಪ್ರಾರ್ಥನೆ ಮಾಡಿದರು. ಡಾ.ಎಸ್.ಎಸ್. ನಾಯಕ ಸ್ವಾಗತಿಸಿದರು. ಶಿವಣ್ಣ ಇಜೇರಿ ಕಾರ್ಯಕ್ರಮ ನಿರೂಪಿಸಿದರು. ಕೊನೆಯಲ್ಲಿ ಅಮೋಘ ಸತ್ಯಂಪೇಟೆ ವಂದಿಸಿದರು. ಸಭೆಯ ಅಧ್ಯಕ್ಷತೆಯನ್ನು ಖಾಸಾ ಮಠದ ಶಾಂತವೀರ ಮಹಾಸ್ವಾಮೀಜಿ ವಹಿಸಿದ್ದರು.
ಇದೇ ಸಂದರ್ಭದಲ್ಲಿ ವೈಜ್ಞಾನಿಕ ಪರಿಷತ್ ರಾಜ್ಯ ಸಮ್ಮೇಳನ ಸರ್ವಾಧ್ಯಕ್ಷರಾಗಿ ಆಯ್ಕೆಯಾದ ವಿಶ್ವಾರಾಧ್ಯ ಸತ್ಯಂಪೇಟೆ ದಂಪತಿಗೆ ಸನ್ಮಾನಿಸಲಾಯಿತು.
ವೇದಿಕೆಯ ಮೇಲೆ ಶೋಭಾ ಬಸವರಾಜ, ಶರಣಮ್ಮ ಸಿದ್ಧಾರೂಡ ಆನೇಗುಂದಿ, ಗುಂಡಪ್ಪ ಕಲಬುರ್ಗಿ ಇದ್ದರು.
ಸಭೆಯಲ್ಲಿ ಮುಕ್ತಾ ನರಕಲದಿನ್ನಿ, ರಮೇಶ ಮೇದಾ, ಗೀತಾ ರಾಜಶೇಖರ ವಾಗಾ, ರಾಮರಾವ ಕುಲ್ಕರ್ಣಿ, ದೇವೇಂದ್ರಪ್ಪ ಬಡಿಗೇರ, ಶರಣು ಬೀರನೂರ, ಶಿವಕುಮಾರ ಕರದಳ್ಳಿ, ಸಿದ್ಧರಾಮ ಹೊನ್ಕಲ್, ನೀಲಾಂಬಿಕ ಸತ್ಯಂಪೇಟೆ, ಮಹಾಂತೇಶ ಆವಂಟಿ ಶಹಾಬಾದ, ಶಿವಕುಮಾರ ಆವಂಟಿ, ರಕ್ಷಿತಾ ಅರವಿಂದ ರಡ್ಡಿ, ಬಸವರಾಜ ಕುಂಬಾರ, ಅಡಿವೆಪ್ಪ ಜಾಕಾ, ಫಜಲುದ್ಧೀನ್ ಖಾಜಿಸಾಬ, ಸಂಗಮ್ಮ ಹರನೂರ, ಆನೇಗುಂದಿ ಸಮಸ್ತ ಪರಿವಾರ ಮತ್ತು ಶಹಾಪುರ ಪಟ್ಟಣದ ಶರಣ ಸಮೂಹ ಸಭೆಯಲ್ಲಿ ಸೇರಿತ್ತು.
ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/H81yNL3dGRcHb7EBxL5oqr
