ಬಡ ವಿದ್ಯಾರ್ಥಿಗಳಿಗೆ ಬೆಳಕಾಗಿದ್ದ ಬಸವ ತತ್ವ ಪ್ರಚಾರಕ ಶಿವಣ್ಣ ಸಣ್ಣಪ್ಪನವರ

ಸಿಂಧನೂರು:

ಲಿಂಗೈಕ್ಯ ಶಿವಣ್ಣ ಸಣ್ಣಪ್ಪನವರ ನನಗೆ ಬಸವ ಕೇಂದ್ರದ ಸ್ಥಾಪನೆಯ ಸಂದರ್ಭದಲ್ಲಿ ಪರಿಚಿತರಾದರು. ಅವರು ವೃತ್ತಿ ಮತ್ತು ಪ್ರವೃತ್ತಿಗೆ ನ್ಯಾಯ ಒದಗಿಸಿದವರು. ವೃತ್ತಿಯಲ್ಲಿ ಶಿಕ್ಷಕರಾಗಿ ಅಪಾರ ಜನಪ್ರಿಯತೆಯನ್ನು ಗಳಿಸಿದರು. ಎಷ್ಟೋ ವಿದ್ಯಾರ್ಥಿಗಳಿಗೆ ಉಚಿತವಾಗಿ ಟ್ಯೂಷನ್ ತರಗತಿಗಳನ್ನು ಹೇಳಿಕೊಟ್ಟರು. ಬಡಮಕ್ಕಳಿಗೆ ತಮ್ಮ ಮನೆಯಲ್ಲಿ ವಸತಿ ಸೌಲಭ್ಯವನ್ನು ಕಲ್ಪಿಸಿ ಕೊಡುವುದರ ಜೊತೆಗೆ ಮಕ್ಕಳ ಪ್ರತಿಭೆಗೆ ಸೂಕ್ತ ಮಾರ್ಗದರ್ಶನ ನೀಡಿ ಅವರನ್ನು ಉನ್ನತ ಹುದ್ದೆಗೆ ಏರುವಂತೆ ಪ್ರೋತ್ಸಾಹಿಸಿದರು ಎಂದು ರೈತ ಮುಖಂಡ ಹನುಮನಗೌಡ ಬೆಳಗುರ್ಕಿ ನುಡಿನಮನ ಸಲ್ಲಿಸಿದರು.

ನೀಲಾಂಬಿಕ ಪ್ರಸಾದ ನಿಲಯದಲ್ಲಿ ಏರ್ಪಡಿಸಿದ್ದ ಲಿಂಗೈಕ್ಯ ಶಿವಣ್ಣ ಹ. ಸಣ್ಣಪ್ಪನವರ ಅವರ ನುಡಿನಮನ ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದರು.

ಶಾಲಾ ಸಮಯದ ನಂತರ ಸಂಪೂರ್ಣವಾಗಿ ತಮ್ಮನ್ನು ತಾವು ಬಸವತತ್ವ ಪ್ರಚಾರಕ್ಕೆ ತೊಡಗಿಸಿಕೊಂಡಿದ್ದರು. ನಗರದ ಬಹಳಷ್ಟು ಮನೆಗಳಲ್ಲಿ ಮಹಾಮನೆ ಕಾರ್ಯಕ್ರಮವನ್ನು ಮಾಡಿದ ಕೀರ್ತಿ ಶ್ರೀಯುತರಿಗೆ ಸಲ್ಲುತ್ತದೆ. ಅವರಿಗೆ ಸಮಾಜದ ಕಟ್ಟಕಡೆಯ ವ್ಯಕ್ತಿಯ ಬಗ್ಗೆ ಅಪಾರ ಪ್ರೀತಿ, ನಗರದಲ್ಲಿ ಬಸವ ವೃತ್ತ ಹಾಗೂ ಬಸವ ಮೂರ್ತಿ ಪ್ರತಿಷ್ಠಾಪನೆಗೆ ಅವರು ಬಹಳಷ್ಟು ಶ್ರಮಿಸಿದರು. ಒಬ್ಬ ಶಿಕ್ಷಕ ಏನೆಲ್ಲ ಮಾಡಬಹುದು ಎನ್ನುವುದನ್ನು ಸಮಾಜಕ್ಕೆ ತೋರಿಸಿಕೊಟ್ಟ ಬಹುಮುಖ ವ್ಯಕ್ತಿತ್ವ ಅವರದು ಎಂದು ನುಡಿದರು.

ಮುದಗಲ್ಲಿನ ಪೂಜ್ಯ ಮಹಾಂತ ಸ್ವಾಮಿಗಳು ಮಾತನಾಡುತ್ತಾ, ಸಣ್ಣಪ್ಪನವರ ಸಿಂಧನೂರನ್ನು ಕರ್ಮಭೂಮಿಯನ್ನಾಗಿ ಮಾಡಿಕೊಂಡು ಬಸವತತ್ವ ಪ್ರಚಾರ ಮಾಡಿದರು. ತಮ್ಮ ಪಾಲಿನ ಮಣಿಹವನ್ನ ಸಂಪೂರ್ಣಗೊಳಿಸಿದ್ದಾರೆ. ಶರಣರು ಹೇಳುವಂತೆ ನಾವು ಬಂದ ಕಾರ್ಯಕ್ಕೆ ನೀವು ಬಂದಿರಯ್ಯ. ನೀವು ಬಂದ ಕಾರ್ಯಕ್ಕೆ ನಾವು ಬಂದೆವಯ್ಯ ಎನ್ನುವ ಹಾಗೆ ತಾವು ಬಂದ ಕಾರ್ಯವನ್ನು ಮುಗಿಸಿ ಹೋಗಿದ್ದಾರೆ.

ನಮಗೆ ಸಮಾಜದಲ್ಲಿ ಒಳ್ಳೆಯ ಪ್ರಶಸ್ತಿ ಸಿಗುವುದು ನಾವು ಸಮಾಜಮುಖಿಯಾಗಿ ಕೆಲಸ ಮಾಡಿದಾಗ ಮಾತ್ರ. ಸಣ್ಣಪ್ಪನವರ ಆ ಕೆಲಸವನ್ನು ಮಾಡುವ ಮೂಲಕ ಇಂದು ಆದರ್ಶಪ್ರಾಯರಾಗಿ ನಿಂತಿದ್ದಾರೆ.

ಅವರಿಗೆ ಇಷ್ಟಲಿಂಗ ಧಾರಣೆ ಮಾಡುವ ಅವಕಾಶ ನನಗೆ ದೊರೆಯಿತು. ಆ ಮೂಲಕ ಅಂದು ಅವರು ಬಸವತತ್ವಕ್ಕೆ ಕಾಲಿಟ್ಟರು. ಬಸವತತ್ವವನ್ನು ಉಸಿರಾಗಿಸಿಕೊಂಡು ಬದುಕಿದರು ಎಂದು ನುಡಿದರು.

 ಅವರ ಆತ್ಮೀಯರು ಹಾಗೂ ಜೊತೆಜೊತೆಗೆ ತತ್ವ ಪ್ರಚಾರ ಮಾಡಿದ ಹೆಚ್. ಜಿ. ಹಂಪಣ್ಣನವರ ಮಾತನಾಡುತ್ತಾ, ಸಣ್ಣಪ್ಪನವರ ಬದುಕಿದಾಗಲೂ ಸಾರ್ಥಕ ಬದುಕು ಸಾಗಿಸಿದರು. ಲಿಂಗೈಕ್ಯರಾದ ಮೇಲೂ ತಮ್ಮ ದೇಹವನ್ನು ವೈದ್ಯಲೋಕಕ್ಕೆ ಬರೆದುಕೊಡುವ ಮೂಲಕ ಸಾರ್ಥಕತೆ ಮೆರೆದರು. ಅವರು ತಮ್ಮ ವಿದ್ಯಾರ್ಥಿಗಳ ಮನೆ ಮನೆಗಳಲ್ಲಿ ಮಹಾಮನೆ ಕಾರ್ಯಕ್ರಮ ಮಾಡುವ ಮೂಲಕ ನೂರಾರು ಜನರನ್ನು ಬಸವ ತತ್ವದ ವಾಹಿನಿಗೆ ತಂದರು ಎಂದು ನುಡಿದರು.

 ಸಣ್ಣಪ್ಪನವರ ಅವರ ವಿದ್ಯಾರ್ಥಿಯಾದ ಬಳ್ಳಾರಿ ವಿಮ್ಸ್ ನ ಡಾ. ದುರ್ಗೇಶ ಅವರು ಮಾತನಾಡುತ್ತಾ, ಗುರುಗಳ ದೃಷ್ಟಿ ನನ್ನ ಮೇಲೆ ಆಕಸ್ಮಿಕವಾಗಿ ಬಿತ್ತು, ನನ್ನ ಕಲಿಕಾ ಆಸಕ್ತಿಯನ್ನು ಗುರುತಿಸಿ ನನ್ನನ್ನು ತಮ್ಮ ಹಿರಿಯ ಮಗನಂತೆ ಕಂಡರು. ನಾನು ಇಂದು ಶ್ರೇಷ್ಠ ಹುದ್ದೆಯಲ್ಲಿರಲು ಅವರೇ ಕಾರಣ.

ಅಷ್ಟೇ ಅಲ್ಲ ನಮ್ಮ ಕುಟುಂಬದ ಇಪ್ಪತ್ತಕ್ಕೂ ಹೆಚ್ಚು ಮಕ್ಕಳಿಗೆ ಉಚಿತವಾಗಿ ಶಿಕ್ಷಣ ನೀಡುವ ಮೂಲಕ ನಮ್ಮನ್ನು ಸರಕಾರದ ವಿವಿಧ ಹುದ್ದೆಗಳಲ್ಲಿ ಇರುವಂತೆ ಮಾಡಿದ ಶ್ರೇಯಸ್ಸು ಅವರಿಗೆ ಸಲ್ಲುತ್ತದೆ ಎಂದು ನುಡಿದರು.

ಅವರ ಸಹೋದ್ಯೋಗಿಗಳಾದ ಗಂಗನಗೌಡ ಪಾಟೀಲ, ವೆಂಕನಗೌಡ, ಶರಣಪ್ಪ ತೆಂಗಿನಕಾಯಿ, ಬಸವರಾಜ ಹಣಗಿ, ಡಾ. ಸುಂಕದ ಹಾಗೂ ಅವರ ವಿದ್ಯಾರ್ಥಿಗಳಾದ ಭಾಸ್ಕರ್ ಮತ್ತು ಡಾ. ನಾಗರಾಜ ಕಾಟವಾ ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡು ನಮನ ಸಲ್ಲಿಸಿದರು.

ನಾರಾಯಣಪ್ಪ ಮಾಡಶಿರವಾರ ಅವರ ವಚನ ಪ್ರಾರ್ಥನೆಯೊಂದಿಗೆ ಕಾರ್ಯಕ್ರಮ ಆರಂಭವಾಯಿತು. ಪಿ ಬಸವರಾಜ ಸ್ವಾಗತಿಸಿದರು.

ಈಚೆಗೆ ಲಿಂಗೈಕ್ಯರಾದ ಐಎಎಸ್ ಅಧಿಕಾರಿ ಮಹಾಂತೇಶ ಬೀಳಗಿ ಮತ್ತು ಸಣ್ಣಪ್ಪನವರ ಅವರಿಗೆ ಕಾರ್ಯಕ್ರಮದಲ್ಲಿ ಸೇರಿದ ಬಸವಭಕ್ತರು ಮೌನಾಚರಣೆ ಮಾಡಿ ಅವರ ದಿವ್ಯಚೇತನಕ್ಕೆ ಗೌರವ ಸಲ್ಲಿಸಿದರು.

ಚಂದ್ರೇಗೌಡ ಹರಟನೂರು ಶರಣು ಸಮರ್ಪಣೆ, ಹನುಮನಗೌಡ ಕಾಸರೆಡ್ಡಿ ವಚನಮಂಗಲ, ನಿರೂಪಣೆಯನ್ನು ಬಸವಲಿಂಗಪ್ಪ ಬಾದರ್ಲಿ ಮಾಡಿದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/JjqqFwfw2jf2WxG5glPZ0O