ವಿಶ್ವವಾಣಿ: ಸಾಣೆಹಳ್ಳಿ ಶ್ರೀಗಳ ಕಹಿ ಗುಳಿಗೆಯನ್ನು ಅರಗಿಸಿಕೊಳ್ಳಿ

ವಿಶ್ವೇಶ್ವರ ಭಟ್ಟರೇ,

ಸಾಣೆಹಳ್ಳಿ ಶ್ರೀಗಳ ಆಲೋಚನೆ ನಿಮಗೆ ಗೊಡ್ಡು ಪುರಾಣ ಆಯಿತು. ಆದರೆ, ಲಾಗಾಯ್ತನಿಂದ ಆಚರಿಸಿಕೊಂಡು ಬರುತ್ತಿರುವ ಮೌಡ್ಯ ಹಾಗು ಗೊಡ್ಡು ಸಂಪ್ರದಾಯಗಳು ಜನರ ನಂಬುಗೆ ಶೃದ್ಧೆಯ ಹೆಸರಲ್ಲಿ ಸ್ಥಾಪಿತ ಮೌಲ್ಯವೆಂದು ಋಜುವಾತಪಡಿಸಲು ಹೊರಟ ನಿಮ್ಮ ಪ್ರಯತ್ನ ಯಾರಿಗೂ ತಿಳಿಯುವುದಿಲ್ಲ ಅಂತ ಭಾವಿಸಬೇಡಿ.

ಗಣಪತಿಯ ಕುರಿತು ಅವರು ಹೇಳಿದ ಮಾತನ್ನು ಯಾರೂ ಗಂಭೀರವಾಗಿ ತೆಗೆದುಕೊಳ್ಳಲಿಲ್ಲ ಎಂದಾದರೆ ದಿನಗಳಗಟ್ಟಲೆ ಬರೆದುದು ಯಾಕೆ? ಹೋಂವರ್ಕ್ ಮಾಡದ ಮಕ್ಕಳು ಶಾಲೆಯಲ್ಲಿ ಶಿಕ್ಷಕರಿಂದ ಬಡಿಯಿಸಿಕೊಂಡು, ನನಗೆ ಪೆಟ್ಟು ಬೀಳಲಿಲ್ಲ ಅಂತ ಹೇಳಿದ ಹಾಗಿದೆ.

ಹೀಗೆ ಹೇಳುವ ಅಧಿಕಾರವನ್ನು ಸ್ವಾಮಿಗಳಿಗೆ ಯಾರು ನೀಡಿದರು ಎಂಬ ನಿಮ್ಮ ಪ್ರಶ್ನೆಗೆ, ಶರಣ ಪರಂಪರೆಯ ಚಿಂತನೆಗಳ ಮೂಲಕ ಜನಜಾಗೃತಿಯ ಜವಾಬ್ದಾರಿಯನ್ನು ಶರಣ ಪರಂಪರೆಯ ಅನುಯಾಯಿಗಳು ನೀಡಿರುತ್ತಾರೆ, ಹೀಗಾಗಿ ಅದು ಸಮುದಾಯದ ಆದೇಶ. ಅದನ್ನು ಗುರುಗಳು ಪಾಲಿಸಬೇಕಾಗುತ್ತದೆ. ಇನ್ನು ಶರಣಧರ್ಮದ ಅಧ್ಯಯನ ಆಚರಣೆ ಸಾಮಾನ್ಯ ಜ್ಞಾನವೂ ಇಲ್ಲದೆ ಷರಾ ಬರೆಯುವ ಅಧಿಕಾರವನ್ನು ನಿಮಗೆ ಯಾರು ನೀಡಿದರು? ಎಂಬುದನ್ನು ನೀವೂ ಹೇಳಬೇಕಾಗುತ್ತದೆ.

ಕೊನೆಗೆ ಚಿತ್ರದುರ್ಗದಲ್ಲಿ ಹೇಳಿದರೆನ್ನಲಾದ ಅಪ್ರಭುದ್ಧ ಸ್ವಾಮಿಯೋರ್ವರ ಬಾಲಿಶ ಮಾತುಗಳು ನಿಮಗೆ ಆಪ್ಯಾಯಮಾನ ಎನಿಸುತ್ತವೆ. ಅದನ್ನು ಉದಾಹರಿಸುವ ಮೂಲಕ ನಮ್ಮ ಬೆರಳನ್ನೇ ನಮ್ಮ ಕಣ್ಣಲ್ಲಿ ಚುಚ್ಚುವ ದೂರ್ತತನದ ಜಾಣ್ಮೆಯನ್ನು ಸಂಧರ್ಭೋಚಿತವಾಗಿ ಬಳಸಿಕೊಳ್ಳುವ ನಿಮ್ಮ ರೀತಿಯನ್ನು ಗಮನಿಸಿದಾಗ, ಗುಣ ಸ್ವಭಾವಗಳು ವಂಶವಾಹಿನಿಗಳಲ್ಲಿ ಉಳಿದುಕೊಂಡು ಬಂದಿರುತ್ತವೆ ಎಂಬ ಮಾತನ್ನು ನಂಬುವಂತಾಗುತ್ತದೆ.

ಸಾಣೆಹಳ್ಳಿ ಶ್ರೀಗಳು ಹೇಳುವ ತಾತ್ವಿಕ ಸತ್ಯಗಳು ಉದ್ಧಟತನ ಉಪದ್ಯಾಪಿಯಾಗಿ ನಿಮಗೆ ಕಂಡಿರಬಹುದು. ನೀವು ಮೂಲಭೂತವಾದಿಗಳು, ಅದು ಅಧರಕ್ಕೆ ಕಹಿ, ಉದರಕ್ಕೆ ಸಿಹಿಯಾಗಿದೆ. ಕಾರಣ ಸತ್ಯ ಕಹಿ ಎನಿಸುತ್ತದೆ. ಆದರೆ ನೀವು ಹೇಳುವ ಹಸಿಸುಳ್ಳುಗಳು ಆಕರ್ಷಕ ಸಿಹಿಯಾಗಿರುತ್ತವೆ ಗೋಕಾಕದ ಕರದಂಟಿನಂತೆ. ಯಾಕೆಂದರೆ ಸುಳ್ಳಿಗೆ ಅಲಂಕಾರ ಇರುತ್ತದೆ, ಮಸಾಲೆ ಬಿದ್ದಿರುತ್ತೆ. ಅದು ತತ್ವನಿಷ್ಟರ ಆಚಾರನಿಷ್ಠರ ಸತ್ಯಪ್ರಿಯರ ಮನಸ್ಸಿಗೆ ನೋವುಂಟು ಮಾಡುತ್ತದೆ ಎಂಬುದನ್ನು ನೆನಪಿಸಬಯಸುತ್ತೇವೆ.

ಲಿಂಗಾಯತ ಕುರಿತಾದ ಹೇಳಿಕೆಗಳನ್ನು ಲಿಂಗಾಯತರೇ ಗಂಭೀರವಾಗಿ ತೆಗೆದುಕೊಳ್ಳುವುದಿಲ್ಲ ಎಂದು ಹೇಳುತ್ತ, ಲಿಂಗಾಯತೇತರಾದ ನೀವು ಅಂಕಣ ಬರೆಯುವ ಅಗತ್ಯವೇನಿತ್ತು?

ಒಟ್ಟಾರೆ ಬರಹವನ್ನು ಸೂಕ್ಷ್ಮವಾಗಿ ಗಮನಿಸಿದಾಗ ಸಾಣೇಹಳ್ಳಿ ಶ್ರೀಗಳ ಕಹಿ ಗುಳಿಗೆ ನಿಮ್ಮ ಮೇಲೆ ಉತ್ತಮ ಪರಿಣಾಮ ಬೀರಿದೆ ಎನಿಸುತ್ತದೆ.