ಯುವ ಸ್ವಾಮೀಜಿಯಿಂದ ವಿಶಿಷ್ಟ ನಿಜಾಚರಣೆ ಸ್ಮರಣೋತ್ಸವ

ತಮ್ಮ ಎಲ್ಲಾ ಕಾರ್ಯಕ್ರಮಗಳಲ್ಲಿ ಶ್ರೀ ಇಮ್ಮಡಿ ಉದ್ದಾನ ಸ್ವಾಮೀಜಿ ಮನೆಯವರಿಗೆ ಒಂದು ಗಿಡವನ್ನು ಅದನ್ನು ಜೋಪಾನವಾಗಿ ಬೆಳೆಸಲು ಹೇಳುತ್ತಾರೆ.

ನಂಜನಗೂಡು

ಮೂಡಗೂರು ಶ್ರೀ ಇಮ್ಮಡಿ ಉದ್ದಾನ ಸ್ವಾಮೀಜಿ ಲಿಂಗೈಕಾರಾಗಿರುವ ಲೇ. ಕಾಟಿ ಬಸವರಾಜುರವರ ಧರ್ಮಪತ್ನಿ ಶ್ರೀಮತಿ ಸರೋಜರವರ ಮಗ ರಾಜಶೇಖರರ ಸ್ಮರಣೋತ್ಸವವನ್ನು ಇಷ್ಟಲಿಂಗ ಪೂಜೆಯನ್ನು ಮಾಡಿಸುವ ಮೂಲಕ ನೆರವೇರಿಸಿದರು.

ಜೊತೆಗೆ ವಿಶ್ವಗುರು ಸಾಂಸ್ಕೃತಿಕ ನಾಯಕ ಬಸವಣ್ಣರವರ ಭಾವಚಿತ್ರಕ್ಕೆ ಗುರುಗಳು ಮತ್ತು ಮನೆಯವರು ಪುಷ್ಪಾರ್ಚನೆಯನ್ನು ಮಾಡಿದರು.

ದುಃಖದಲ್ಲಿದ್ದ ಮನಯೆವರಿಗೆ ಶ್ರೀಗಳು ಲಿಂಗಾಯಿತರಲ್ಲಿ ಮರಣವೆ ಮಹಾನವಮಿ ತತ್ವವಿರುವುದರಿಂದ ಯಾರೂ ಸಂತಾಪಿಸಬಾರದು. ಲಿಂಗೈಕ್ಯರಾದವರನ್ನು ಲಿಂಗದಲ್ಲಿ ನೆನೆಯುತ್ತಾ ಬದುಕನ್ನು ನಡೆಸಬೇಕು. ಬದುಕಿನಲ್ಲಿ ಬರಬಹುದಾದ ಕಷ್ಟ ಸುಖಗಳೆಲ್ಲವನ್ನು ಸಮಾನವಾಗಿ ಸ್ವೀಕರಿಸಿ ಸಂತೋಷವಾಗಿ ಬದುಕುವುದೇ ಲಿಂಗಾಯತ ತತ್ವ ಎಂದು ಹೇಳಿದರು. ಶ್ರೀಗಳು ಇಷ್ಟಲಿಂಗದ ಮಹತ್ವದ ಬಗ್ಗೆಯೂ ತಿಳಿಸಿದರು.

ಕಾರ್ಯಕ್ರಮದ ಕೊನೆಯಲ್ಲಿ ಶ್ರೀಗಳು ‘ಮರವನ್ನು ಬೆಳೆಸಿ ಧರೆಯನ್ನು ಉಳಿಸಿ’ ಎಂದು ಹೇಳಿ ಒಂದು ಗಿಡವನ್ನು ಮನೆಯವರಿಗೆ ಕೊಟ್ಟರು. ತಮ್ಮ ಎಲ್ಲಾ ಕಾರ್ಯಕ್ರಮಗಳಲ್ಲಿ ಮನೆಯವರಿಗೆ ಶ್ರೀಗಳು ಒಂದು ಗಿಡವನ್ನು ಅದನ್ನು ಜೋಪಾನವಾಗಿ ಬೆಳೆಸಲು ಹೇಳುತ್ತಾರೆ.

ಗುಂಡ್ಲುಪೇಟೆ ತಾಲ್ಲೂಕಿನ ಮೂಡಗೂರು ಗ್ರಾಮದ ಉದ್ದಾನೇಶ್ವರ ವಿರಕ್ತ ಮಠದ 27 ವರ್ಷದ ಶ್ರೀ ಇಮ್ಮಡಿ ಉದ್ದಾನ ಸ್ವಾಮೀಜಿ ಚಿಕ್ಕ ವಯಸ್ಸಿನಲ್ಲಿಯೇ ಬಸವ ತತ್ವಕ್ಕೆ ದುಡಿಯುತ್ತಿದ್ದಾರೆ. 50 ಮಕ್ಕಳು ಕಲಿಯುತ್ತಿರುವ ಒಂದು ವಚನ ಶಾಲೆಯನ್ನು ತೆರೆದಿದ್ದಾರೆ. ಎಲ್ಲಾ ಬಸವಾದಿ ಶರಣರ ಜಯಂತಿಗಳನ್ನು ಮಠದಲ್ಲಿ ನಡೆಸಲು ಶುರು ಮಾಡಿದ್ದಾರೆ.

ಒಂದು ವಚನ ಗ್ರಂಥಾಲಯ ಮತ್ತು ವಿಭೂತಿ ಘಟಕಗಳನ್ನು ಸ್ಥಾಪಿಸುವ ಯೋಜನೆಯನ್ನೂ ಹೊಂದಿದ್ದಾರೆ.

ಸ್ವಾಮೀಜಿ ಎಂ.ಸಿ.ಎ (Master of Computer Applications) ಪದವೀಧರರು.