ಅರವಿಂದ ಜತ್ತಿ ಹಿರಿಯರು, ಆದರೆ ಅವರ ಮೌನಕ್ಕೆ ಕಾರಣವೇನು?

24X7X365 ಬಸವ ನಾಮ ಪಠಿಸುವ ಬಸವ ಸಮಿತಿಯ ಅರವಿಂದ ಜತ್ತಿ ಅವರ ಮೌನ ಹಲವು ಪ್ರಶ್ನೆಗಳನ್ನು ಹುಟ್ಟು ಹಾಕಿದೆ.

ಕಲಬುರ್ಗಿ

ಜೋಳವಾಳಿಯಾನಲ್ಲ, ವೇಳೆವಾಳಿಯವ ನಾನಯ್ಯಾ:
ಹಾಳುಗೆಟ್ಟೋಡುವ ಆಳು ನಾನಲ್ಲಯ್ಯಾ;
ಕೇಳು, ಕೂಡಲಸಂಗಮದೇವಾ,
ಮರಣವೇ ಮಹಾನವಮಿ!

• ವಿಶ್ವಗುರು ಬಸವಣ್ಣನವರು

ಮಂಗಳೂರಿನ ರಾಜ್ಯಮಟ್ಟದ ವಚನ ಸಾಹಿತ್ಯ ಸಮ್ಮೇಳನದಲ್ಲಿ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ ಮಾತನಾಡಿ ವೈದಿಕ ಧರ್ಮದ ಶಾಸ್ತ್ರಗಳಲ್ಲಿರುವ ವಿಚಾರಗಳನ್ನು ವಚನಗಳು ಸುಲಭ ಕನ್ನಡದಲ್ಲಿ ಮನೆಮನೆಗೆ ತಲುಪಿಸಿದವು ಎಂದು ಹೇಳಿದ್ದು ಆಶ್ಚರ್ಯ ಅಲ್ಲ. ಅದರೆ ಅವರ ಹೇಳಿಕೆಯ ಬಗ್ಗೆ ವಿಷಾದವಿದೆ.

ಅವರಿಗೆ 12ನೆಯ ಶತಮಾನದಲ್ಲಿ ಬಸವಣ್ಣ, ಅಲ್ಲಮಪ್ರಭು, ಸಿದ್ಧರಾಮೇಶ್ವರ, ಛಲವಾದಿ ನಾಮದೇವ, ಅಕ್ಕಮಹಾದೇವಿ, ಡೋಹರ ಕಕ್ಕಯ್ಯ, ಅಂಬಿಗರ ಚೌಡಯ್ಯ ಮತ್ತು ಇತರ ಶರಣರು ಈ ನೆಲದಲ್ಲಿ ಮಾಡಿದ ಶೈಕ್ಷಣಿಕ, ಧಾರ್ಮಿಕ, ಸಾಮಾಜಿಕ ಕ್ರಾಂತಿಯ ಅರಿವಿದೆ. ಆದರೆ ಅದನ್ನು ಮರೆಮಾಚಲು ಈ ಹೇಳಿಕೆ ನೀಡಿದ್ದಾರೆ.

ಅದರೆ, ದುರ್ದೈವ ಅಂದರೆ, ಅದೇ ವೇದಿಕೆಯ ಮೇಲಿದ್ದ 24X7X365 ಬಸವ ನಾಮ ಪಠಿಸುವ ಬಸವ ಸಮಿತಿಯ ಅರವಿಂದ ಜತ್ತಿ ಅವರ ಮೌನವು ಹಲವು ಪ್ರಶ್ನೆಗಳನ್ನು ಹುಟ್ಟು ಹಾಕಿದೆ.

ಅವರೇಕೆ ವೇದಿಕೆಯ ಮೇಲೆ ಸ್ವಾಮೀಜಿ ಅವರ ಮಾತಿಗೆ ಪ್ರತಿಕ್ರಿಯೆ ಕೊಡಲಿಲ್ಲ? ಬಿಜೆಪಿ, ಆರೆಸ್ಸೆಸ್ ಮನ ಒಲಿಸಲು ಮಂಗಳೂರಲ್ಲಿ ಈ ವಚನ ಸಾಹಿತ್ಯ ಸಮ್ಮೇಳನ ಆಯೋಜಿಸಲಾಗಿತ್ತೆ? ಅವರ ವೈಯಕ್ತಿಕ ಹಿತಾಸಕ್ತಿಗೆ ಬಸವ ತತ್ವವನ್ನು ಗಾಳಿಗೆ ತೂರಿದರೆ?

ಸೈದ್ಧಾಂತಿಕವಾಗಿ ವಿರೋಧಿಗಳು ಎಂಬ ಕಾರಣಕ್ಕೆ ಪೇಜಾವರ ಮಠದ ಶ್ರೀಗಳು ವಚನ ಸಮ್ಮೇಳನಕ್ಕೆ ಬರಬಾರದು ಅಂತಲ್ಲ. ಅದರೆ ಆ ಸಮ್ಮೇಳನದಲ್ಲಿ ಕಳಬೇಡ ಕೊಲಬೇಡ… ವಚನ ಹೇಳಿ, ಅದು ಬಸವಣ್ಣನವರ ರಚನೆ ಅನ್ನೋದನ್ನು ಉದ್ದೇಶಪೂರ್ವಕವಾಗಿ ಕೈಬಿಟ್ಟಿದ್ದನ್ನು ಪ್ರಶ್ನಿಸಬೇಕಿತ್ತು.

ಬಸವಣ್ಣ ಮತ್ತು ಬಸವಾದಿ ಶರಣರು ಸನಾತನ/ಹಿಂದುತ್ವದ ಭಾಗ ಎಂಬಂತೆ ಬಿಂಬಿಸಿ ಶರಣರಿಗೆ ಅವಮಾನ ಮಾಡಿರುವ ಪೇಜಾವರ ಶ್ರೀಗಳ ಹೇಳಿಕೆಯನ್ನೂ ಪ್ರಶ್ನಿಸಬೇಕಿತ್ತು. ಆದರೆ ಜತ್ತಿ ಅವರು ಅದನ್ನು ಮಾಡದಿರಲು ಕಾರಣವೇನು?

ವಚನಗಳು ಹಾಗೂ ಅವುಗಳಲ್ಲಿನ ಸತ್ಯ, ಶುದ್ಧ, ಸಚ್ಚಾರಿತ್ರ್ಯ ತತ್ವಗಳು ಬಾಯಿ ಪಾಠ ಮಾಡಿಕೊಂಡು ವೇದಿಕೆಯ ಮೇಲೆ ಹೇಳುವ ಗಿಳಿಪಾಠ ಆಗದೇ, ಬಸವ ತತ್ವಕ್ಕೆ, ಬಸವಾದಿ ಶರಣರ ಘನತೆಗೆ ಚ್ಯುತಿ ಬಂದಾಗ ಅದಕ್ಕೆ ಪ್ರತಿಕ್ರಿಯಿಸಿ ತಿಳಿ ಹೇಳಬೇಕಾಗುತ್ತದೆ ಎಂದು ಅರವಿಂದ ಜತ್ತಿ ಅವರಿಗೆ ಬುದ್ಧಿ ಹೇಳುವಷ್ಟು ನಾನು ದೊಡ್ಡವನಲ್ಲ.

ಅದರೆ, ಆ ಕಾರ್ಯಕ್ರಮದಲ್ಲಿ ಪೇಜಾವರ ಶ್ರೀಗಳ ಹೇಳಿಕಿಗೆ ಪ್ರತಿಕ್ರಿಯೆ ನೀಡದೆ ಮೌನವಾಗಿ ಉಳಿದಿರುವ ಜತ್ತಿ ಅವರ ನಡೆಯು ಬಸವ ತತ್ವಕ್ಕೆ ಮಾಡುವ ಅಪಚಾರ ಆಗಿದೆ. ಅವರಿಂದ ತಕ್ಷಣವೇ ಸ್ಪಷ್ಟನೆ ಬರಲಿ.