ವೀರಶೈವ ಮಹಾಸಭಾ ಹೆಸರಿನ ಗೊಂದಲದಿಂದ ಹೊರಬರಲಿ

ಬೆಂಗಳೂರು

ಕಳೆದ ಮೂರು–ನಾಲ್ಕು ದಶಕಗಳಿಂದ ಕರ್ನಾಟಕದಲ್ಲಿ ಜನಗಣತಿಯಲ್ಲಿ ಧರ್ಮದ ಅಂಕಣದಲ್ಲಿ ಲಿಂಗಾಯತ ಎಂದು ಬರೆಸಬೇಕೋ ಅಥವಾ ವೀರಶೈವ ಎಂದು ವರದಿ ಮಾಡಬೇಕೋ ಅಥವಾ ವೀರಶೈವ ಲಿಂಗಾಯತ ಎಂದು ಬರೆಸಬೇಕೋ ಎಂಬುದರ ಬಗ್ಗೆ ಇನ್ನಿಲ್ಲದ ವಿವಾದ ನಡೆಯುತ್ತಾ ಬಂದಿದೆ. ಈಗ ಈ ವಿವಾದ ಕೊನೆಗೊಳ್ಳುವ ಸೂಚನೆ ಕೇಳಿ ಬರುತ್ತಿದೆ.

ಇತ್ತೀಚೆಗೆ ಅಖಿಲ ಭಾರತ ವೀರಶೈವ ಮಹಾಸಭೆ ನಾಯಕರು ಮುಂಬರುವ ಜನಗಣತಿಯಲ್ಲಿ ಎಲ್ಲರೂ ಧರ್ಮದ ಕಾಲಮ್ಮಿನಲ್ಲಿ ಲಿಂಗಾಯತ ‘ಅಥವಾ’ ವೀರಶೈವ ಎಂದು ಹಾಗೂ ಜಾತಿಯ ಕಾಲಂನಲ್ಲಿ ಒಳಪಂಗಡದ ಹೆಸರನ್ನು ಬರೆಸಬೇಕು ಎಂಬ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ.

ಈ ಅಭಿಪ್ರಾಯವು ಅನೇಕ ದೃಷ್ಟಿಯಿಂದ ಮಹತ್ವದ್ದಾಗಿದೆ.

(೧) ಮಹಾಸಭೆಯು ಲಿಂಗಾಯತ/ವೀರಶೈವ/ವೀರಶೈವ ಲಿಂಗಾಯತ ಎಂಬ ಗೋಂದಲವನ್ನು ಬಗೆಹರಿಸಿಕೊಂಡಿದೆ. ‘ಒಂದು ಧರ್ಮಕ್ಕೆ ಎರಡು ಹೆಸರುಗಳಿರುವುದು ಸಾಧ್ಯವಿಲ್ಲ’ ಎಂಬ ಪ್ರಸಿದ್ಧ ವಚನ ಸಾಹಿತ್ಯ ಚಿಂತಕ ಡಾ. ವೀರಣ್ಣ ರಾಜೂರ ಅವರ ಹೇಳಿಕೆ ಹಿನ್ನೆಲೆಯಲ್ಲಿ ಮಹಾಸಭೆಯು “ವೀರಶೈವ ಲಿಂಗಾಯತ” ಎಂಬ ಎಡಬಿಡಂಗಿ ಹೆಸರಿನ ಬಗ್ಗೆ ತಾನು ಹುಟ್ಟು ಹಾಕಿದ್ದ ಗೊಂದಲವನ್ನು ಈಗ ಕೈಬಿಟ್ಟಂತೆ ಕಾಣುತ್ತದೆ.

(೨) ವೀರಶೈವ ಬೇರೆ, ಲಿಂಗಾಯತ ಬೇರೆ ಎಂಬುದನ್ನು ವೀರಶೈವ ಮಹಾಸಭಾ ಒಪ್ಪಿಕೊಂಡಂತೆ ಕಾಣುತ್ತದೆ. ಇದು ‘ಕಾಣುತ್ತದೆ’ ಎಂದು ಹೇಳಬೇಕೇ ವಿನಃ ಈ ಬಗ್ಗೆ ಅದು ಅಧಿಕೃತ ತೀರ್ಮಾನಕ್ಕೆ ಬಂದಿಲ್ಲ. ಅದಿನ್ನೂ ಗೊಂದಲದಲ್ಲಿದೆ.

(೩) “ವೀರಶೈವ ಲಿಂಗಾಯತ” ಎಂಬ ಎಡಬಿಡಂಗಿ ಶೀರ್ಷಿಕೆಯನ್ನು ಅದು ಏಕೆ ಕೈ ಬಿಡುತ್ತಿದೆ ಎಂಬುದು ಕುತೂಹಲದ ಪ್ರಶ್ನೆ. ಬಸವಣ್ಣ ಪ್ರಣೀತ ಲಿಂಗಾಯತ ಸ್ವತಂತ್ರ ಧರ್ಮದ ಚಳುವಳಿಯ ಪ್ರಭಾವ ವೀರಶೈವ ಮಹಾಸಭೆಯ ಮೇಲಾಗಿರುವುದನ್ನು ಸದರಿ ಅಭಿಪ್ರಾಯ ಬಹಿರಂಗ ಪಡಿಸುತ್ತದೆ.

(೪) ರಾಜ್ಯದಲ್ಲಿ ಇಂದು ಮಾಧ್ಯಮದಲ್ಲಿ, ಚರ್ಚೆಗಳಲ್ಲಿ, ವರದಿಗಳಲ್ಲಿ, ಬಸವಣ್ಣನವರನ್ನು, ವಚನ ಸಾಹಿತ್ಯವನ್ನು ಕುರಿತ ಕಾರ್ಯಕ್ರಮಗಳಲ್ಲಿ, ಸಮಾವೇಶಗಳಲ್ಲಿ, ವಿಚಾರ ಸಂಕಿರಣಗಳಲ್ಲಿ, ಲಿಂಗಾಯತ ಎಂಬುದನ್ನು ಬಳಸುತ್ತಿದ್ದಾರೆಯೇ ವಿನಃ ವೀರಶೈವ ಎನ್ನುವುದನ್ನು ಬಳಸದೇ ಇರುವುದನ್ನು ಮಹಾಸಭೆಯು ಗಮನಿಸಿದಂತೆ ಕಾಣುತ್ತದೆ.

(೫) ಕುಂಕುಮಧಾರಿ ಆರ್‌ಎಸ್‌ಎಸ್ ವೀರಶೈವ ಲಿಂಗಾಯತರ ನಿಯಂತ್ರಣದಿಂದ ಮಹಾಸಭೆಯು ಸದರಿ ನಿರ್ಣಯದ ಮೂಲಕ ಹೊರಬಂದಂತೆ ಕಾಣುತ್ತದೆ!

(೬) ರಾಜ್ಯದಲ್ಲಿ ಬಹುತೇಕ ಜನರು ಬಸವಣ್ಣ ಪ್ರಣೀತ ಲಿಂಗಾಯತವನ್ನು ಒಪ್ಪಿಕೊಂಡಿರುವುದನ್ನು, ಮಹಾಸಭೆಯು ಗಮನಿಸಿದಂತೆ ಕಾಣುತ್ತದೆ.

ವೀರಶೈವ ಲಿಂಗಾಯತ ಎಂಬ ಎಡಬಿಡಂಗಿ ಹೆಸರನ್ನು ಬಳಸುವುದಕ್ಕೆ ಮಹಾಸಭೆಯು ಹಿಂಜರಿದಂತೆ ಕಾಣುತ್ತದೆ. ಜನರ ಒಲವನ್ನು ಕಳೆದುಕೊಳ್ಳುವ ಸಾಧ್ಯತೆಯನ್ನು ಗಮನಿಸಿ “ವೀರಶೈವ ಲಿಂಗಾಯತ” ಎಂಬುದನ್ನು ಕೈಬಿಟ್ಟು ಲಿಂಗಾಯತ ‘ಅಥವಾ’ ವೀರಶೈವ ಎನ್ನುವಲ್ಲಿಗೆ ಅದು ಈಗ ಬಂದು ನಿಂತಿದೆ. ಮುಂದೆ ಅದು ವೀರಶೈವವನ್ನು ಬಿಟ್ಟು ಲಿಂಗಾಯತಕ್ಕೆ ಮನ್ನಣೆ ನೀಡುವ ದಿನಗಳು ದೂರವಿಲ್ಲ ಎಂದು ಕಾಣುತ್ತದೆ.

(೭) ಕಳೆದ ಬಸವ ಜಯಂತಿ ಸಂದರ್ಭದಲ್ಲಿ ಮಹಾಸಭೆಯ ರಾಜ್ಯಾಧ್ಯಕ್ಷ ಶಂಕರ ಬಿದರಿ ಅವರು ಹೊರಡಿಸಿದ್ದ “ಬಸವಣ್ಣ ಮತ್ತು ರೇಣುಕಾಚಾರ್ಯ” ಜಯಂತಿಗಳನ್ನು ಕೂಡಿಸಿ ಮಾಡಬೇಕು ಎಂಬ ಆದೇಶಕ್ಕೆ ಮತ್ತು ರೇಣಕಾಚಾರ್ಯರು ೭೭೧ನೆಯ ಅಮರಗಣಂಗಳು ಎಂಬ ಬಾಲಿಶ ಸಲಹೆಗೆ ಜನರಿಂದ ಹಾಗೂ ಮಹಾಸಭೆಯ ಸದಸ್ಯರುಗಳಿಂದ ತೀವ್ರ ಆಕ್ರೋಶ ಬಂದಿತ್ತು. ಅದಕ್ಕೆ ಮಣಿದು ಆ ಅದೇಶವನ್ನು ಹಾಗೂ ಅಮರಗಣಂಗಳ ಬಗೆಗಿನ ಅವರ ಅಜ್ಞಾನ-ಕ್ಷಲ್ಲಕ ಸಲಹೆಗೆ ಬಂದ ವ್ಯಾಪಕ ಪ್ರತಿಕ್ರಿಯೆಯನ್ನು ಮಹಾಸಭೆಯು ಗಮನಿಸಿ ವೀರಶೈವ ಲಿಂಗಾಯತವನ್ನು ಕೈಬಿಟ್ಟಂತೆ ಕಾಣುತ್ತದೆ.

(೮) ಕಾಂತರಾಜು ಆಯೋಗದ ಜಾತಿಗಣತಿ ವರದಿಯ ಭಾಗವಾಗಿ ಲಿಂಗಾಯತದ ಜನಸಂಖ್ಯೆಯು ಅರ್ಧಕ್ಕಿಂತ ಕಡಿಮೆ ವರದಿಯಾಗಿರುವುದನ್ನು ಮಹಾಸಭೆಯು ಗಮನಿಸಿದೆ. ಇದಕ್ಕೆ ಕಾರಣವು ಅದೇ ಹುಟ್ಟು ಹಾಕಿರುವ ವೀರಶೈವ ಲಿಂಗಾಯತ ಎಂಬ ಗೊಂದಲ ಮತ್ತು ಲಿಂಗಾಯತ ಒಳಪಂಗಡಗಳನ್ನು ದೂರವಿಟ್ಟಿರುವುದರ ಪರಿಣಾಮ.

(೯) ಕೊನೆಯದಾಗಿ ವೀರಶ್ಯವ ಲಿಂಗಯತ ಎಂಬ ಪ್ರಣಾಳಿಕೆಯ ಪ್ರಮುಖ ಪ್ರತಿಪಾದಕ ಹಾಗೂ ಕರ್ನಾಟಕದ ಒಂದು ಪ್ರಸಿದ್ಧ ಮಠದ ಭಾಗವಾಗಿರುವ ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ಡಾ. ಸಿ. ಸೋಮಶೇಖರ ಅವರು ಇತ್ತೀಚಿಗೆ ಬಸವ ಸಂಸ್ಕೃತಿ ಅಭಿಯಾನದ ಸಿದ್ಧತೆಯ ಸಭೆಯಲ್ಲಿ “ಎಲ್ಲರೂ ಜನಗಣತಿಯಲ್ಲಿ ಹಾಗೂ ಜಾತಿಗಣತಿಯಲ್ಲಿ “ಲಿಂಗಾಯತ” ಎಂದೇ ಬರೆಸಬೇಕು ಎಂದು ಘೋಷಿಸಿದ್ದಾರೆ. ಇದೂ ಕೂಡ ಮಹಾಸಭೆಯ ಮೇಲ್ಕಂಡ ನಿರ್ಣಯಕ್ಕೆ ಕಾರಣವಾಗಿರಬಹುದು.

ಈಗ ಬಸವಣ್ಣ ಪ್ರಣೀತ ಲಿಂಗಾಯತ ಧರ್ಮಕ್ಕೆ ಅನುಕೂಲಕರವಾದ ವಾತಾವರಣ ಸಿದ್ಧವಾಗಿದೆ. ಸೆಪ್ಟಂಬರಿನಲ್ಲಿ ಆರಂಭವಾಗುವ “ಬಸವ ಸಂಸ್ಕೃತಿ ಅಭಿಯಾನ’ ಕರ್ನಾಟಕದ ೩೧ ಜಿಲ್ಲೆಗಳಲ್ಲಿಯೂ ನಡೆಯುತ್ತದೆ.

ಈ ಅಭಿಯಾನ ಕಾರ್ಯಕ್ರಮಗಳಲ್ಲಿ ಪ್ರಧಾನವಾಗಿ ವೀರಶೈವ ಲಿಂಗಾಯತ ಅಥವಾ ವೀರಶೈವ ಎಂಬದನ್ನು ಕೈಬಿಟ್ಟು “ಲಿಂಗಾಯತ” ಎಂದೇ ಬರೆಸಬೇಕು ಎಂಬ ಸಕಲ ಲಿಂಗಾಯತ ಮಠಾಧೀಶರುಗಳು ಕೈಗೊಂಡಿರುವ ಲಿಂಗಾಯತ ಧರ್ಮ ಜಾಗೃತಿ ಕಾರ್ಯಕ್ರಮವು ರಾಜ್ಯದಲ್ಲಿ ಲಿಂಗಾಯತಕ್ಕೆ ಹೊಸ ಚೈತನ್ಯವನ್ನು ಹುಟ್ಟು ಹಾಕುತ್ತದೆ.

ಇದನ್ನು ನಾವು ಸದುಪಯೋಗ ಮಾಡಿಕೊಳ್ಳಬೇಕಾಗಿದೆ. ಈ ವಾತಾವರಣವನ್ನು ಬಸವ ಸಂಘಟನೆಗಳು ಬಳಸಿಕೊಳ್ಳಬೇಕು. ಇಂತಹ ಅವಕಾಶ ಮತ್ತೊಮ್ಮೆ ಬರುವುದಿಲ್ಲ. ಮಠಾಧೀಶರ ಕರೆಯು ಸಮಾಜದಲ್ಲಿ ದೊಡ್ಡ ಅಂಗೀಕಾರ ಪಡೆಯುತ್ತದೆ.

ಕೊನೆಯದಾಗಿ ಅಖಿಲ ಭಾರತ ವೀರಶೈವ ಮಹಾಸಭೆಯು ಒಂದು ದೊಡ್ಡ ಹೆಜ್ಜೆಯನ್ನಿಟ್ಟು ಜನಗಣತಿಯಲ್ಲಿ ಹಾಗೂ ಜಾತಿಗಣತಿಯಲ್ಲಿ ಧರ್ಮದ ಕಾಲಂನಲ್ಲಿ ಲಿಂಗಾಯತ ಎಂದು ಮತ್ತು ಜಾತಿಯ ಕಾಲಂಮಿನಲ್ಲಿ ಒಳಪಂಗಡವನ್ನು ಬರೆಸುವ ಬಗ್ಗೆ ದಿಟ್ಟ-ಧೀರ-ಮಹತ್ವದ ನಿರ್ಣವನ್ನು ತೆಗೆದುಕೊಳ್ಳಬೇಕು.

ಲಿಂಗಾಯತರು ಹಿಂದೂಗಳಲ್ಲ, ಬಸವಣ್ಣನವರೇ ಲಿಂಗಾಯತ ಧರ್ಮ ಸ್ಥಾಪಕ ಎಂಬುದನ್ನು ಮಹಾಸಭೆಯು ಒಪ್ಪಿಕೊಂಡಿದೆ. ಈಗ ಅದು ದೊಡ್ಡ ಹೆಜ್ಜೆಯನ್ನಿಡಬೇಕಾಗಿದೆ.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/KVCwk6IT1VBLPSuFiyKvN1