ಲಿಂಗಾಯತರು ಪ್ರತೇಕ ಧರ್ಮವಾದರೆ ಹಿಂದುತ್ವಕ್ಕೆ ದೊಡ್ಡ ಪೆಟ್ಟು
ಬೆಂಗಳೂರು
ಬಸವ ಸಂಸ್ಕೃತಿ ಅಭಿಯಾನದ ಯಶಸ್ಸಿನ ನಂತರ ಹಿಂದುತ್ವ ಸಂಘಟನೆಗಳು ಚಿಗುರುತ್ತಿರುವ ಲಿಂಗಾಯತ ಧರ್ಮವನ್ನು ಚಿವುಟಲು ಮುಂದಾಗಿವೆ.
ಲಿಂಗಾಯತ ಪೂಜ್ಯರ, ಮುಖಂಡರ, ಸಮಾಜದ ಮೇಲೆ ವ್ಯವಸ್ಥಿತ ದಾಳಿ ಶುರುವಾಗಿದೆ. ಬಸವ ಸಂಸ್ಕೃತಿ ಅಭಿಯಾನಕ್ಕೆ ವಿರುದ್ಧವಾಗಿ ತಾಲೂಕು ಮಟ್ಟದಲ್ಲಿ ‘ಬಸವಾದಿ ಶರಣರ ಹಿಂದೂ ಸಮಾವೇಶ’ ಮಾಡಲು ಆರೆಸ್ಸೆಸ್ ಜನ ಸಜ್ಜಾಗುತ್ತಿದ್ದಾರೆ.
ಈ ಬೆಳವಣಿಗೆಗಳನ್ನು ಅರ್ಥೈಸಲು ನಾಡಿನ ಪ್ರಮುಖ ಚಿಂತಕ, ಹೋರಾಟಗಾರರಿಗೆ ಬಸವ ಮೀಡಿಯಾ ಕೆಲವು ಪ್ರಶ್ನೆಗಳನ್ನು ಕೇಳಿದೆ. ಇಂದು ಬಸವ ಬ್ರಿಗೇಡ್ ಅಧ್ಯಕ್ಷ ಸುನಿಲ್ ಕಾಂದೆ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
ಗಮನಿಸಿ – ಈ ಚರ್ಚೆಯಲ್ಲಿ ಹೊಮ್ಮುವ ಅಭಿಪ್ರಾಯಗಳು ಆಯಾ ಲೇಖಕರದು. ಬಸವ ಮೀಡಿಯಾ ಅವುಗಳನ್ನು ಪ್ರಕಟಿಸಲು ಒಂದು ವೇದಿಕೆಯಷ್ಟೆ.
1) ಅಭಿಯಾನದ ಮೇಲೆ, ಲಿಂಗಾಯತ ಪೂಜ್ಯರ, ಮುಖಂಡರ ಮೇಲೆ ಹಿಂದುತ್ವವಾದಿಗಳಿಗೆ ಇಷ್ಟೊಂದು ಉದ್ವೇಗ ಬಂದಿರುವುದು ಯಾಕೆ?
ಲಿಂಗಾಯತ ಪೂಜ್ಯರು ಮತ್ತು ಮುಖಂಡರು ಒಗ್ಗೂಡಿ ನಡೆಸಿರುವ ‘ಬಸವ ಸಂಸ್ಕೃತಿ ಅಭಿಯಾನ’ ಇಷ್ಟು ದೊಡ್ಡ ಮಟ್ಟದಲ್ಲಿ ಯಶಸ್ವಿಯಾಗುತ್ತದೆ ಮತ್ತು ಜನಜಾಗೃತಿಯನ್ನು ಮೂಡಿಸುತ್ತದೆ ಎಂದು ವಿರೋಧಿಗಳು ನಿರೀಕ್ಷಿಸಿರಲಿಲ್ಲ. ಇದೇ ಹಾದಿಯಲ್ಲಿ ಮುಂದುವರೆದು ಲಿಂಗಾಯತ ಪ್ರತೇಕ ಧರ್ಮವಾಗಿ ಹೊರನಡೆದರೆ, ಇದು ರಾಜಕೀಯವಾಗಿ ಮತ್ತು ಸಾಮಾಜಿಕವಾಗಿ ಹಿಂದುತ್ವದ ಆಧಾರ ಸ್ತಂಭಕ್ಕೆ ದೊಡ್ಡ ಪೆಟ್ಟು ಬೀಳುತ್ತದೆ ಎಂಬ ಚಿಂತೆ ಕಾಡುತ್ತಿರಬಹುದು.
2) ಲಿಂಗಾಯತರ ಮೇಲೆ ಕೆಲವು ಸ್ವಾಮೀಜಿಗಳನ್ನು, ನಾಯಕರನ್ನು ಛೂ ಬಿಟ್ಟಿದ್ದಾರೆ. ಲಿಂಗಾಯತರ ವಿರುದ್ಧ ಸಮಾವೇಶ, ಹೋರಾಟ ಮಾಡುವ ಬೆದರಿಕೆ ಹಾಕಿದ್ದಾರೆ. ಇವರ ಉದ್ದೇಶವೇನು?
ಲಿಂಗಾಯತ ಸಮುದಾಯದೊಳಗೆ ಒಡಕನ್ನು ಉಂಟುಮಾಡುವುದು ಮತ್ತು ಗೊಂದಲ ಸೃಷ್ಟಿಸುವುದು ಮತ್ತು ಬಸವಪರ ಪೂಜ್ಯರು ಮತ್ತು ಮುಖಂಡರನ್ನು ಬೆದರಿಸುವ ಮೂಲಕ, ಸಾರ್ವಜನಿಕವಾಗಿ ಅವರು ತಮ್ಮ ಬೇಡಿಕೆಗಳ ಪರವಾಗಿ ನಿಲ್ಲುವುದನ್ನು ತಡೆಯಬಹುದು ಎಂಬ ಕೆಟ್ಟ ಆಲೋಚನೆ ಅವರದು.
3) ಲಿಂಗಾಯತ ಪೂಜ್ಯರ ಹಾಗೂ ಮುಖಂಡರ ಮೇಲೆ ಬಳಕೆಯಾಗುತ್ತಿರುವ ಭಾಷೆಗೆ ನಿಮ್ಮ ಪ್ರತಿಕ್ರಿಯೆ ಏನು?
ಬಳಕೆಯಾಗುತ್ತಿರುವ ಭಾಷೆ ಖಂಡನೀಯ ಮತ್ತು ಅಸಭ್ಯತೆಯ ಪರಮಾವಧಿ. ಇದು ಆರೋಗ್ಯಕರ ಪ್ರಜಾಪ್ರಭುತ್ವದ ಸಂವಾದಕ್ಕೆ ವ್ಯತಿರಿಕ್ತವಾಗಿದೆ, ವಿರೋಧಿಗಳು ಆಡಿದ ಕೆಟ್ಟ ಮಾತುಗಳನ್ನು ದಾಖಲಿಸಿ, ಅವರ ವಿರುದ್ಧದ ಕಾನೂನು ಹೋರಾಟದಲ್ಲಿ ಸಾಕ್ಷ್ಯಗಳಾಗಿ ಬಳಸಬೇಕು.
4) ಈ ಸಂದರ್ಭದಲ್ಲಿ ಲಿಂಗಾಯತ ಪೂಜ್ಯರ ಹಾಗೂ ಮುಖಂಡರ ಪರವಾಗಿ ಬಸವ ಸಂಘಟನೆಗಳು ನಿಲ್ಲಬೇಕೆ? ಅವರೇನು ಮಾಡಬೇಕು?
ಎಲ್ಲಾ ಬಸವಪರ ಸಂಘಟನೆಗಳು ಒಂದಾಗಿ ಪೂಜ್ಯರು ಮತ್ತು ಮುಖಂಡರಿಗೆ ಸಂಪೂರ್ಣ ಬೆಂಬಲ ಕೊಡಬೇಕು, ಬಸವಪರ ಸಂಘಟನೆಗಳ ಮೂಲ ಉದ್ದೇಶವೇ ಶರಣರ ತತ್ವಗಳನ್ನು ಮತ್ತು ಶರಣ ಸಮುದಾಯದ ಅಸ್ಮಿತೆಯನ್ನು ರಕ್ಷಿಸುವುದು.
5) ಈ ಬೆಳವಣಿಗೆಗೆಳಿಂದ ಲಿಂಗಾಯತರ ಧಾರ್ಮಿಕ ಸ್ವಾತಂತ್ರ್ಯಕ್ಕೆ ದಕ್ಕೆ ಬಂದಿದೆಯೇ? ಅದನ್ನು ಉಳಿಸಿಕೊಳ್ಳುವುದು ಹೇಗೆ?
ಖಂಡಿತವಾಗಿಯೂ ಧಾರ್ಮಿಕ ಸ್ವಾತಂತ್ರ್ಯಕ್ಕೆ ಧಕ್ಕೆ ಆಗಿದೆ.
ಎಲ್ಲ ಬಸವಪರ ಸಂಘಟನೆಗಳ ಪ್ರಮುಖರನ್ನು ಒಳಗೊಂಡ ಒಂದು ಏಕೀಕೃತ ಸಮನ್ವಯ ಸಮಿತಿ ರಚಿಸಬೇಕು ಪ್ರತ್ಯೇಕವಾಗಿ ಒಂದು ಕಾನೂನು ತಜ್ಞರ ಸಮಿತಿಯನ್ನು ರಚಿಸಬೇಕು.
6) ಸಾರ್ವಜನಿಕ ಸಂವಾದದಲ್ಲಿ ನಾವೂ ಸಭ್ಯತೆ ಕಳೆದುಕೊಳ್ಳಬೇಕೇ? ನಮ್ಮ ಸೈದ್ಧಾಂತಿಕ ವಿರೋಧಿಗಳ ಮೇಲೆ ಇದೇ ಭಾಷೆ ಬಳಸಬೇಕೇ?
ಖಂಡಿತವಾಗಿಯೂ ಬೇಡ. ನಮ್ಮ ಭಾಷೆಯನ್ನು ನಮ್ಮ ಶಕ್ತಿಯಾಗಿ ಬಳಸಬೇಕು. ಸಭ್ಯ, ಸ್ಪಷ್ಟ ಮತ್ತು ಸೈದ್ಧಾಂತಿಕವಾಗಿ ಬಲವಾದ ಭಾಷೆಯನ್ನು ಬಳಸಿ ವಿರೋಧಿಗಳ ಆಕ್ರಮಣಕಾರಿ ಭಾಷೆಗೆ ಉತ್ತರ ನೀಡಬೇಕು.
ವೈಯಕ್ತಿಕ ಟೀಕೆಗಿಂತ ಶರಣರ ತತ್ವಗಳ ಮಹತ್ವ ಮತ್ತು ವೈಜ್ಞಾನಿಕತೆಯನ್ನು ಪ್ರತಿಪಾದಿಸುವುದರತ್ತ ಗಮನಹರಿಸಬೇಕು.
7) ಈ ಸಮಯದಲ್ಲಿ ಬಸವಾದಿ ಶರಣರಿದ್ದರೆ ಏನು ಮಾಡುತ್ತಿದ್ದರು?
ಶರಣರು ಖಂಡಿತವಾಗಿಯೂ ಈ ಬೆದರಿಕೆಗಳಿಗೆ ಬೆಚ್ಚಿ ಬೀಳುತ್ತಿರಲಿಲ್ಲ. ಅವರು “ಸತ್ಯದ ಕ್ರಾಂತಿಗೆ” ಕರೆ ನೀಡುತ್ತಿದ್ದರು ಮತ್ತು ಹಿಂದಿನ ಆಡಳಿತಶಾಹಿ ವರ್ಗದಂತೆಯೇ ಇಂದು ಸೈದ್ಧಾಂತಿಕ ದಾಳಿ ನಡೆಯುತ್ತಿದೆ ಎಂದು ಗುರುತಿಸಿ, ಮತ್ತೆ ಶೋಷಿತ ಮತ್ತು ಅವಕಾಶ ವಂಚಿತ ವರ್ಗಗಳನ್ನು ಈ ಹೋರಾಟದ ಮುಂಚೂಣಿಗೆ ತರುತ್ತಿದ್ದರು.
ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/H81yNL3dGRcHb7EBxL5oqr
