ಶಾಂತಮಲ್ಲ ಸ್ವಾಮೀಜಿ ಲಿಂಗೈಕ್ಯ, ಸಂಜೆ ಅಂತ್ಯಕ್ರಿಯೆ

ಮಾನವಿ:

ತಾಲ್ಲೂಕಿನ ಅಡವಿಅಮರೇಶ್ವರ ಸುವರ್ಣಗಿರಿ ವಿರಕ್ತಮಠದ ಪೂಜ್ಯ ಶಾಂತಮಲ್ಲ ಮಹಾಸ್ವಾಮಿಗಳು ಶುಕ್ರವಾರ ಸಂಜೆ ಸಾಯಂಕಾಲ ಲಿಂಗೈಕ್ಯರಾಗಿದ್ದಾರೆ. ಅವರಿಗೆ 86 ವರ್ಷ ವಯಸ್ಸಾಗಿತ್ತು. ಕಳೆದ ನಾಲ್ಕಾರು ತಿಂಗಳಿಂದ ವಯೋಸಹಜ ಕಾಯಿಲೆಯಿಂದ ಬಳಲುತ್ತಿದ್ದರು.

ಪೂಜ್ಯರ ಅಂತಿಮ ವಿಧಿ ವಿಧಾನಗಳು ಶನಿವಾರ ಸಂಜೆ 4 ಗಂಟೆಗೆ ಅಡವಿಅಮರೇಶ್ವರ ಮಠದ ಆವರಣದಲ್ಲಿ ಜರುಗಲಿದೆ ಎಂದು ಮಠದ ಮೂಲಗಳು ತಿಳಿಸಿವೆ.

ಲಿಂಗೈಕ್ಯ ಶ್ರೀಗಳಿಗೆ ಸಿಂಧನೂರಿನ ಶಾಸಕರಾದ ಹಂಪನಗೌಡ ಬಾದರ್ಲಿ, ಮಾನ್ವಿ ಶಾಸಕರಾದ ಹಂಪಯ್ಯ ನಾಯಕ, ಸಚಿವರಾದ ಎನ್. ಎಸ್. ಬೋಸರಾಜ ಅವರು, ವಿಧಾನ ಪರಿಷತ್ ಸದಸ್ಯರಾದ ಬಸನಗೌಡ ಬಾದರ್ಲಿ, ಸಮಾಜದ ಹಿರಿಯರಾದ ಅಮರೇಗೌಡ ಕಾರಲಕುಂಟೆ, ಮಾಜಿ ಕೇಂದ್ರ ಸಚಿವರಾದ ಬಸವರಾಜ ಪಾಟೀಲ ಅನ್ವರಿ, ಹಾಗೂ ಭಕ್ತರು ಸಂತಾಪ ವ್ಯಕ್ತಪಡಿಸಿದ್ದಾರೆ.

ಲಿಂಗೈಕ್ಯ ಪೂಜ್ಯರು 2023ರಲ್ಲಿ ತಮಗೆ ವಯಸ್ಸಾಯ್ತು ಎಂದು ಶ್ರೀಮಠಕ್ಕೆ ಉತ್ತರಾಧಿಕಾರಿಗಳನ್ನಾಗಿ ತೋಂಟದಾರ್ಯ ಸ್ವಾಮಿಗಳನ್ನು ನೇಮಿಸಿದರು.

ಹುಟ್ಟೂರು ಬಳ್ಳಾರಿ ಜಿಲ್ಲೆ ಹೂವಿನಹಡಗಲಿ ತಾಲೂಕು ಮಾಗಳಿ ಗ್ರಾಮ. ಎರಡು ವರ್ಷದ ಮಗುವಿದ್ದಾಗ ತಾಯಿಯನ್ನು ಕಳೆದುಕೊಂಡು ಬೇರೆಯವರ ಮನೆಯಲ್ಲಿ ಬೆಳೆದಿದ್ದರು. ಆರು ವರ್ಷದ ಮಗುವಾಗಿದ್ದಾಗ ಶಿವಯೋಗ ಮಂದಿರದಲ್ಲಿ ಇವರನ್ನು ಬಿಡಲಾಗಿತ್ತು. ಅಲ್ಲಿಯೇ ಅವರು ವಿದ್ಯಾಭ್ಯಾಸವನ್ನು ಪೂರೈಸಿದ್ದರು.

1964 ರಲ್ಲಿ ಒಳಬಳ್ಳಾರಿಯ ಲಿಂಗೈಕ್ಯ ಪರಮಪೂಜ್ಯ ಚನ್ನಬಸವ ಮಹಾಶಿವಯೋಗಿಗಳು ಇವರನ್ನು ಒಳಬಳ್ಳಾರಿ ಶ್ರೀ ಮಠಕ್ಕೆ ಕರೆತಂದರು. 1979ರಲ್ಲಿ ಅಡವಿ ಅಮರೇಶ್ವರ ವಿರಕ್ತಮಠದ ಪೀಠಾಧಿಪತಿಗಳನ್ನಾಗಿ ಇವರನ್ನು ನೇಮಿಸಲಾಗಿತ್ತು.

ಶ್ರೀಗಳು ಉತ್ತಮ ಯೋಗಪಟುಗಳಾಗಿದ್ದರು. 86 ಯೋಗಾಸನಗಳನ್ನು ಮಾಡುವ ಕೌಶಲ್ಯವನ್ನು ಹೊಂದಿದ್ದರು. ಅಡವಿ ಅಮರೇಶ್ವರ ಗ್ರಾಮದ ಸುತ್ತಮುತ್ತಲು ಶಾಲೆಗಳು ಇಲ್ಲದ ಸಂದರ್ಭದಲ್ಲಿ ತಾವೇ ಮಠದ ವತಿಯಿಂದ ಶಾಲೆಯನ್ನು ಪ್ರಾರಂಭಿಸಿದ್ದರು. ಮುಂದೆ ಸರಕಾರ ಪ್ರೌಢಶಾಲೆಯನ್ನು ಮಂಜೂರಿ ಮಾಡಿದಾಗ ನಾಲ್ಕು ಎಕರೆ ಜಮೀನನ್ನು ಸರ್ಕಾರಿ ಶಾಲೆಗೆ ಬಿಟ್ಟುಕೊಟ್ಟರು. ಅವರ ಮೊದಲ ಶಾಲೆಯಲ್ಲಿದ್ದ ಮುದ್ದತಿ ಠೇವಣಿಯನ್ನು ಸರ್ಕಾರಿ ಶಾಲೆಗೆ ದಾನ ಮಾಡಿದರು.

ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡದ ವಿದ್ಯಾರ್ಥಿಗಳಿಗೆ ಅನುಕೂಲವಾಗಲೆಂದು ಅರ್ಧ ಎಕರೆ ಜಮೀನನ್ನು ದಾನ ಮಾಡುವ ಮೂಲಕ ವಸತಿ ನಿಲಯಕ್ಕೆ ಅನುಕೂಲ ಮಾಡಿಕೊಟ್ಟಿದ್ದರು. ಪ್ರತಿ ವರ್ಷ ಬಡವರಿಗೆ ಅನುಕೂಲವಾಗಲೆಂದು ಸಾಮೂಹಿಕ ವಿವಾಹಗಳನ್ನು ಮಾಡುತ್ತಿದ್ದರು. 1976 ರಲ್ಲಿ ಭಸ್ಮ ತಯಾರಿಸುವ ವಿಧಾನವನ್ನು ಶಾಂತಮಲ್ಲ ಸ್ವಾಮೀಜಿ ಭಕ್ತರಿಗೆ ತಿಳಿಸಿಕೊಟ್ಟಿದ್ದರು.