ಅಭಿಯಾನ: ಉಪನ್ಯಾಸದ ವಿಷಯಗಳ ಮರುಚಿಂತನೆ ಅಗತ್ಯ

ಅನೇಕ ವಿಷಯಗಳು ಎದ್ದಿರುವ ಲಿಂಗಾಯತರನ್ನು ಮಲಗಿಸುವಂತಿವೆ.

ಬೆಂಗಳೂರು

ಬಸವ ಸಂಸ್ಕೃತಿ ಅಭಿಯಾನ ಎಲ್ಲಾ ಲಿಂಗಾಯತ ಸ್ವಾಮಿಗಳು ಹಾಗೂ ಬಸವ ಸಂಘಟನೆಗಳು ಸೇರಿ ನಡೆಸುತ್ತಿರುವ ಬೃಹತ್ ಕಾರ್ಯಕ್ರಮ. ಸಮಾಜದಲ್ಲಿ ಬಸವ ಪ್ರಜ್ಞೆ ಬಿತ್ತಲು, ಲಿಂಗಾಯತ ಧರ್ಮ ಪುನರುತ್ಥಾನಗೊಳಿಸಲು ಇದೊಂದು ಚಾರಿತ್ರಿಕ ಅವಕಾಶ.

ರಾಜ್ಯದ ೩೨ ಜಿಲ್ಲೆಗಳಲ್ಲಿ ನಡೆಯಲಿರುವ ಈ ಆಂದೋಲನಕ್ಕೆ ನಾಡಿನ ಲಿಂಗಾಯತ ಸಮಾಜವು ಸಂಪೂರ್ಣ ಬೆಂಬಲ ನೀಡುತ್ತಿದೆ. ಇಂತಹ ಅವಕಾಶ-ಜನಬಲ ಮತ್ತೊಮ್ಮೆ ಬರುವುದು ಕಷ್ಟ. ಬಸವ ತತ್ವದ ಮೇಲೆ, ವಚನ ಸಾಹಿತ್ಯದ ಮೇಲೆ, ಲಿಂಗಾಯತದ ಮೇಲೆ ನಡೆಯುತ್ತಿರುವ ವೈದಿಕರ ದಾಳಿಗೆ ಇದು ಲಿಂಗಾಯತ ಸಮಾಜವು ನೀಡುತ್ತಿರುವ ಉತ್ತರವಾಗಿದೆ.

ಅಭಿಯಾನದಲ್ಲಿ ಹಲವಾರು ಕಾರ್ಯಕ್ರಮಗಳಿದ್ದರೂ ಅದರ ಕೇಂದ್ರಬಿಂದುವೆಂದರೆ ವೇದಿಕೆಯಿಂದ ನಡೆಯಲಿರುವ ಎರಡು ಉಪನ್ಯಾಸಗಳು. ಬಸವ ತತ್ವವನ್ನು, ಲಿಂಗಾಯತ ಧರ್ಮವನ್ನು, ನಿಜಾಚರಣೆಗಳನ್ನು, ಸಮಾಜದ ಮುಂದಿರುವ ಸವಾಲುಗಳನ್ನು ಲಕ್ಷಾಂತರ ಜನರ ಮುಂದಿಡುವ ಅಪರೂಪದ ಅವಕಾಶ.

ಅಪ್ರಸ್ತುತ ವಿಷಯಗಳು

ಮೊನ್ನೆ ಅಭಿಯಾನದ ಉಪನ್ಯಾಸಗಳ ಪಟ್ಟಿಯನ್ನು ಲಿಂಗಾಯತ ಮಠಾಧಿಪತಿಗಳ ಒಕ್ಕೊಟ ಬಿಡುಗಡೆ ಮಾಡಿತು. ಅದನ್ನು ನೋಡಿದಾಗ ಯಾರೋ ಅವಸರದಲ್ಲಿ ಅಥವಾ ಸಮಯ, ಸಂದರ್ಭದ ಅರಿವಿಲ್ಲದೆ ಈ ಪಟ್ಟಿಯನ್ನು ಸಿದ್ದಪಡಿಸಿದ್ದಾರೆ ಎಂದು ಅನಿಸಿತು. ಬಹಳಷ್ಟು ವಿಷಯಗಳು ಸಪ್ಪೆಯಾಗಿವೆ. ಕೆಲವು ವಿಷಯಗಳು ಅಪ್ರಸ್ತುತ, ಅಸಂಬದ್ಧವೂ ಆಗಿವೆ. ಉಪನ್ಯಾಸದ ವಿಷಯಗಳನ್ನು ನೋಡಿ ನಮ್ಮ ಉತ್ಸಾಹ ಸರಕ್ಕನೆ ತಣ್ಣಗಾಗಿದೆ ಎಂದು ಕೇಳಿಬರುತ್ತಿರುವ ಮಾತು.

ಯಾರೋ ಅವಸರದಲ್ಲಿ ಅಥವಾ ಸಮಯ, ಸಂದರ್ಭದ ಅರಿವಿಲ್ಲದೆ ಈ ಪಟ್ಟಿಯನ್ನು ಸಿದ್ದಪಡಿಸಿದ್ದಾರೆ ಎಂದು ಅನಿಸಿತು.

ಇಲ್ಲಿ ಆಯ್ಕೆ ಮಾಡಿರುವ ಅನೇಕ ವಿಷಯಗಳಲ್ಲಿ ವಚನ ಪರಿಭಾಷೆ – ಬಸವ ಸ್ಪರ್ಶವೇ ಇಲ್ಲದಂತಾಗಿದೆ. ಕೆಲವು ಪ್ರವಚನಗಳ ಮಾಲೆಯಂತಿವೆ.

ಬಸವ ಸಂಸ್ಕೃತಿ ಅಭಿಯಾನವು ಪ್ರವಚನದ ಅಭಿಯಾನವಾಗಬಾರದು. “ದೇವ – ಮಾನವ’, ‘ಗೃಹಸ್ಥ ಧರ್ಮ’, ‘ಸೂತಕದ ವಿವರಣೆ’, ‘ಪಾಪ ಪುಣ್ಯ’ ಮುಂತಾದವು ಅಭಿಯಾನದಲ್ಲಿ ಚರ್ಚಿಸುವ ವಿಷಯಗಳೇ? ಇವುಗಳಲ್ಲಿ ವಚನ ಪರಿಭಾಷೆಯ ಸ್ಪರ್ಶವೂ ಕಾಣುವುದಿಲ್ಲ.

‘ಗೃಹಸ್ಥಾಶ್ರಮ’ ಎನ್ನುವುದು ವಚನ ಪರಿಭಾಷೆಯಲ್ಲ. ಇದು ಆಶ್ರಮ ಪರಿಭಾಷೆ. “ವಚನಕಾರ್ತಿಯರ ಜೀವನ ಮೌಲ್ಯಗಳು”, “ಶಿವಶರಣೆಯರ ಜೀವನಾದರ್ಶ” ಮುಂತಾದವು ಯಾವುದನ್ನು ಇಂಗ್ಲೀಷಿನಲ್ಲಿ ‘ಎಸೆನ್ಸಿಯಲಿಸ್ಟ್’ ಎನ್ನುತ್ತೇವೆಯೋ ಅದರ ಚೌಕಟ್ಟಿನಲ್ಲಿವೆ.

ಮಹಿಳೆಯರಿಗೆ ಒಂದು, ಪುರುಷರಿಗೆ ಮತ್ತೊಂದು ಎಂಬ ರೀತಿಯಲ್ಲಿ ಬಸವಾದಿ ಶರಣರು ಜೀವನ ಮೌಲ್ಯಗಳನ್ನು, ಜೀವನಾದರ್ಶಗಳನ್ನು ಬೋಧಿಸಿದರೆ? ಇವು ಪುರಷರಿಗೆ ಸಲ್ಲುವುದಿಲ್ಲವೋ? ಮಹಿಳೆಯರು ಮಾತ್ರ ಪಾಲಿಸಬೇಕಾದವು ಮೌಲ್ಯಗಳು, ಆದರ್ಶಗಳು ವಚನ ಸಂವಿಧಾನದಲ್ಲಿಲ್ಲ. ಮಹಿಳೆಯರನ್ನು ಚಾತುರ್ವರ್ಣದ ಸಂಕೋಲೆಯಿಂದ ಬಿಡುಗಡೆ ನೀಡಿದ ವಚನ ಸಂವಿಧಾನದಲ್ಲಿ ಲಿಂಗ ಭೇದದ ಲವಶೇಷವೂ ಕಾಣುವುದಿಲ್ಲ.

‘ಆಧ್ಯಾತ್ಮಿಕತೆ ಮತ್ತು ಅನನ್ಯತೆ’ ಎಂಬ ವಿಷಯವೊಂದಿದೆ. ಇದೇನಿದು? ಅಭಿಯಾನದಲ್ಲಿ ಇದು ಅಸಂಗತವಾಗಿ ಕಾಣುತ್ತದೆ. ‘ವ್ಯಕ್ತಿತ್ವ ವಿಕಾಸ’ ಎನ್ನುವುದು ಲಯನ್ಸ್ ಕ್ಲಬಿನಲ್ಲಿ, ರೋಟರಿ ಕ್ಲಬಿನಲ್ಲಿ ನಡೆಯುವ ಚರ್ಚೆ. ವಚನ ಸಂವಿಧಾನದಲ್ಲಿರುವುದು ‘ಸೂತಕದ ನಿರಾಕರಣೆ’ಯೇ ವಿನಾ ಅದರ ವಿವರಣೆಯಲ್ಲ. ‘ದೇವ–ಮಾನವ’ – ಏನಿದು ವಿಷಯ? ಬಸವ ಸಂವಿಧಾನವು ಮಾನವ ಜಗತ್ತಿಗೆ ಸಂಬಂಧಿಸಿದೆ ವಿನಾ ಯಾವುದೇ ದೇವ ಲೋಕಕ್ಕೆ ದಾರಿ ತೋರಿಸುವುದಿಲ್ಲ.

ನಿಜಾಚರಣೆಗಳ, ಸವಾಲುಗಳ ಸುಳಿವಿಲ್ಲ

ಇಂದು ಲಿಂಗಾಯತ ಧರ್ಮ ಬೆಳೆಯುತ್ತಿರುವುದು ನಿಜಾಚರಣೆಗಳ ಮೂಲಕ. ಅವುಗಳ ಬಗ್ಗೆ ಜನರಲ್ಲಿ ರಾಜ್ಯಮಟ್ಟದಲ್ಲಿ ಜಾಗೃತಿ ಮೂಡಿಸಲು ಅಭಿಯಾನಕ್ಕಿಂತ ಒಳ್ಳೆ ಅವಕಾಶ ಸಿಗುತ್ತದೆಯೇ? ಆದರೆ ಇಡೀ ಪಟ್ಟಿಯಲ್ಲಿ ನಿಜಾಚರಣೆಗಳ ಮೇಲೆ ಇರುವುದು ಒಂದೇ ಒಂದು ಉಪನ್ಯಾಸ.

ಇಡೀ ಪಟ್ಟಿಯಲ್ಲಿ ನಿಜಾಚರಣೆಗಳ ಮೇಲೆ ಇರುವುದು ಒಂದೇ ಒಂದು ಉಪನ್ಯಾಸ.

ಇಂದು ಲಿಂಗಾಯತವು ಅನೇಕ ಬಗೆಯ ವಿರೋಧ, ದಾಳಿಗಳನ್ನು ಒಳಗಿನಿಂದಲೂ, ಹೊರಗಿನಿಂದಲೂ ಎದುರಿಸುತ್ತಿದೆ. ಸಂಘಟಿತವಾಗಿ ಹಣಬಲ, ಅಧಿಕಾರ ಬಲ, ಬುಜಬಲದ ಮೂಲಕ ವೈದಿಕವು ಬಸವ ಸಂವಿಧಾನದ ಮೇಲೆ, ವಚನ ಸಾಹಿತ್ಯದ ಮೇಲೆ ದಾಳಿ ಮಾಡುತ್ತಿದೆ.

ಈ ದಾಳಿಗಳನ್ನು ಬಸವ ಅನುಯಾಯಿಗಳು ಕಳೆದ ‘ಸಂಘರ್ಷದ ಒಂದು ವರ್ಷ’ದಲ್ಲಿ ದಿಟ್ಟವಾಗಿ ಎದುರಿಸಿದ್ದಾರೆ. ಅನುಭವ ಮಂಟಪದ ವಿವಾದ, ತಾಲಿಬಾನಿಗಳು ಎಂಬ ಕುಹಕ, ಕಟ್ಟರ್ ಲಿಂಗಾಯತರು ಎಂಬ ಮಾತು, ಬಸವಣ್ಣನವರ ಜೊತೆ ಕಾಲ್ಪನಿಕ ವ್ಯಕ್ತಿಯ ಸಮೀಕರಿಸುವ ಪ್ರಯತ್ನ, ಬಸವಣ್ಣನವರ ಅವಹೇಳನ — ಮುಂತಾದ ವಿಷಯಗಳ ಸುಳಿವೂ ಕಾಣುತಿಲ್ಲ.

ಲಿಂಗಾಯತವು ಅನೇಕ ಬಗೆಯ ವಿರೋಧ, ದಾಳಿಗಳನ್ನು ಒಳಗಿನಿಂದಲೂ, ಹೊರಗಿನಿಂದಲೂ ಎದುರಿಸುತ್ತಿದೆ.

ಪ್ರಚಲಿತ ವಿಷಯಗಳಿರಲಿ

ಡಾ. ಬಿ. ಆರ್. ಅಂಬೇಡ್ಕರ್ ಪ್ರಣೀತ ಭಾರತೀಯ ಸಂವಿಧಾನ ಮತ್ತು ಬಸವ ಸಂವಿಧಾನಗಳು ಬೇರೆ ಬೇರೆಯಲ್ಲ. ಇವೆರಡೆರ ನಡುವೆ ಅನೇಕ ಸಮಾನ ಅಂಶಗಳಿವೆ, ತತ್ವಗಳಿವೆ. ಉದಾ: ಮಾನವ ಹಕ್ಕುಗಳು, ಒಕ್ಕೂಟ ತತ್ವ, ಬಹು ಸಂಸ್ಕೃತಿ, ಬೌದ್ಧಿಕ ಸ್ವಾತಂತ್ರ್ಯ ಮುಂತಾದವು. ಇವುಗಳ ಮೇಲೂ ಉಪನ್ಯಾಸದ ವಿಷಯಗಳಿರಬೇಕಾಗಿತ್ತು.

ಯಾಕೆ ಇಂತಹ ಪ್ರಚಲಿತ ವಿಷಯಗಳನ್ನು ಇಲ್ಲಿ ಕೈಬಿಡಲಾಗಿದೆ ಎಂಬ ಪ್ರಶ್ನೆ ಅನೇಕರನ್ನು ಕಾಡುತ್ತಿದೆ.

‘ಲಿಂಗಾಯತ ಮತ್ತು ಜನಗಣತಿ’ ಸಮಸ್ಯೆಯ ಬಗ್ಗೆ ಅಭಿಯಾನದ ಪತ್ರದ ಒಂದು ಮೂಲೆಯಲ್ಲಿ ಬರೆಯಲಾಗಿದೆ. ನಾಲ್ಕು ಪುಟಗಳ ಅಭಿಯಾನದ ಕಾರ್ಯಸೂಚಿ ಪತ್ರದ ಕೊನೆಯ ಪುಟದ ತಳಭಾಗದಲ್ಲಿ ಇದರ ಬಗ್ಗೆ ಒಂದು ಸಾಲು ಬರಹವಿದೆ. ಆದರೆ ಇದು ‘ಮೂಲೆ’ಯಲ್ಲಿಡಬೇಕಾದ ವಿಷಯವಲ್ಲ. ಇದು ಲಿಂಗಾಯತದ ಅಸ್ತಿತ್ವದ ಪ್ರಶ್ನೆ. ಇದು ಅಭಿಯಾನದಲ್ಲಿ ಪ್ರಮುಖ ವಿಷಯವಾಗಬೇಕು.

ಜಾಗೃತಿ ಮೂಡಿಸಿ

ನಮ್ಮ ಯುವಕ–ಯುವತಿಯರಿಗೆ ಪ್ರೇರಣೆ, ಅರಿವು ನೀಡುವಂತಹ ವಿಷಯಗಳ ಬಗ್ಗೆ ಸಂವಾದ – ಚರ್ಚೆ ನಡೆಯಬೇಕು. ಇಲ್ಲಿ ಪಟ್ಟಿ ಮಾಡಿರುವ ಅಭಿಯಾನದ ವಿಷಯಗಳು ಸಭೆಯಲ್ಲಿ ತೂಕಡಿಕೆ ಉಂಟು ಮಾಡುವಂತಿವೆಯೇ ವಿನಾ ಅವರಲ್ಲಿ ಜಾಗೃತಿಯನ್ನು, ಬಸವ(ಸಾತ್ವಿಕ) ರೋಷವನ್ನು ಸೃಷ್ಟಿಸುವುದಿಲ್ಲ.

ಅಭಿಯಾನ ನಿದ್ದೆಯಲ್ಲಿರುವ ಲಿಂಗಾಯತರನ್ನು ಬಡಿದೆಬ್ಬಿಸಬೇಕು. ಆದರೆ ಬಹಳಷ್ಟು ವಿಷಯಗಳು ಎದ್ದಿರುವ ಲಿಂಗಾಯತರನ್ನು ಮಲಗಿಸುವಂತಿವೆ.

ಅಭಿಯಾನ ನಿದ್ದೆಯಲ್ಲಿರುವ ಲಿಂಗಾಯತರನ್ನು ಬಡಿದೆಬ್ಬಿಸಬೇಕು.

ಈಗಲೂ ಸಮಯವಿದೆ. ಇದನ್ನು ಪ್ರತಿಷ್ಟೆಯ ವಿಷಯವನ್ನಾಗಿ ಮಾಡದೆ ಉಪನ್ಯಾಸದ ವಿಷಯಗಳನ್ನು ಪರಿಷ್ಕರಿಸಬೇಕು. ಇದು ಲೋಪ-ದೋಷಗಳನ್ನು ಹುಡುಕುವುದಕ್ಕಾಗಿಯೆ ಮಾಡುತ್ತಿರುವ ಆಗ್ರಹವಲ್ಲ.

ಇದು ಲೋಪ-ದೋಷದ ಪ್ರಶ್ನೆಯಲ್ಲ. ಪ್ರಸ್ತುತತೆಯ ಪ್ರಶ್ನೆ- ಸಮಕಾಲೀನತೆಯ ಪ್ರಶ್ನೆ. ಇದರ ಬಗ್ಗೆ ಜರೂರಾಗಿ ಕ್ರಮ ತೆಗೆದುಕೊಳ್ಳಬೇಕೆಂದು ಲಿಂಗಾಯತ ಮಠಾಧಿಪತಿಗಳ ಒಕ್ಕೂಟವನ್ನು ಹಾಗೂ ಜಾಗತಿಕ ಲಿಂಗಾಯತ ಮಹಾಸಭೆಯನ್ನು ವಿನಯಪೂರ್ವಕವಾಗಿ ಕೇಳಿಕೊಳ್ಳುತ್ತೇನೆ.

ಉಪನ್ಯಾಸದ ವಿಷಯಗಳನ್ನು ಪರಿಷ್ಕರಿಸಲು ಒಂದು ಸಮಿತಿ ರಚನೆಯಾದರೆ ಒಳ್ಳೆಯದು. ಯಾವ ವಿಷಯಗಳ ಮೇಲೆ ಒತ್ತು ಕೊಡಬೇಕೆಂದು ಅದಕ್ಕೆ ಸ್ಪಷ್ಟ ನಿರ್ದೇಶನ ಒಕ್ಕೊಟವು ನೀಡಲಿ. ಜಿಲ್ಲೆಗಳಲ್ಲಿ ದುಡಿಯುತ್ತಿರುವವರ ಅಭಿಪ್ರಾಯವನ್ನೂ ಪಡೆದು ಸಮಿತಿ ಒಂದು ವಾರದಲ್ಲಿ ಪಟ್ಟಿಯನ್ನು ಅಂತಿಮಗೊಳಿಸಲಿ. ಇದರಿಂದ ಅಭಿಯಾನವು ತನ್ನ ಗುರಿ ಮುಟ್ಟಲು ಸಾಧ್ಯ.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/CPORn7EbNfEBlG1MCXUuM