ಅಭಿಯಾನಕ್ಕೆ ವಿರೋಧ: ಮತ್ತಷ್ಟು ಚುರುಕಾದ ಬಸವ ಸಂಘಟನೆಗಳು

ಬಸವ ಸಂಘಟನೆಗಳ ಉತ್ಸಾಹ, ಹುಮ್ಮಸ್ಸು ಹೆಚ್ಚಿಸಿದ ಬಹಿಷ್ಕಾರ ಕರೆ

ಬಾಗಲಕೋಟೆ

ನಾಳೆ ನಗರದಲ್ಲಿ ನಡೆಯುತ್ತಿರುವ ಅಭಿಯಾನಕ್ಕೆ ಕೆಲವು ವೀರಶೈವ ಪರ ಸ್ವಾಮೀಜಿಗಳಿಂದ ವಿರೋಧ ಬಂದ ಮೇಲೆ ಬಸವ ಸಂಘಟನೆಗಳು ಮತ್ತಷ್ಟು ಹುರುಪಿನಿಂದ ಕಾರ್ಯನಿರತವಾಗಿವೆ.

ಗುಳೇದಗುಡ್ಡದಲ್ಲಿ ಭಾನುವಾರ ಸುದ್ದಿಗೋಷ್ಠಿ ನಡೆಸಿ ಮುರುಘಾಮಠದ ಕಾಶೀನಾಥ ಶ್ರೀಗಳು ಬಾಗಲಕೋಟೆ ಅಭಿಯಾನಕ್ಕೆ ಹೋಗಬಾರದೆಂದು ಭಕ್ತರಿಗೆ ಕರೆ ನೀಡಿದರು.

ಮಠದ ಆವರಣದಲ್ಲಿ ಪತ್ರಕರ್ತರೊಂದಿಗೆ ಮಾತನಾಡುತ್ತ ಅಭಿಯಾನದಲ್ಲಿ ವೀರಶೈವ ಲಿಂಗಾಯತ ಸಮುದಾಯ ಒಡೆಯುವ ಪಿತೂರಿ ನಡೆದಿದೆ. ವೀರಶೈವ ಎನ್ನುವ ಪದ ಬಳಸದೇ ಕೇವಲ ಲಿಂಗಾಯತ ಪದ ಬಳಸಿ ಎಂದು ಎಲ್ಲರಲ್ಲಿ ಸಂಕುಚಿತ ಮನೋಭಾವ ಮೂಡಿಸುತ್ತಿದ್ದಾರೆ ಎಂದು ಆಪಾದಿಸಿದರು.

ಮರಡಿಮಠದ ಅಭಿನವ ಕಾಡಸಿದ್ದೇಶ್ವರ ಶ್ರೀಗಳು ಮಾತನಾಡಿ ವೀರಶೈವರು ಬೇರೆ ಅಲ್ಲ, ಲಿಂಗಾಯತರು ಬೇರೆ ಅಲ್ಲ. ಆದರೆ ಅಭಿಯಾನದಲ್ಲಿ ಸಮಾಜ ಒಡೆಯುವ ಹುನ್ನಾರ ನಡೆದಿದೆ. ಬಸವನ ಬಾಗೇವಾಡಿಯಲ್ಲಿ ವೀರಶೈವ ಮಠಾಧೀಶರನ್ನು ಅವಹೇಳನ ಮಾಡಿದ್ದಾರೆ ಎಂದು ಆಪಾದಿಸಿದರು. ಮಠದ ಕೆಲವು ಭಕ್ತರು ಹಾಗೂ ರಾಜಕಾರಣಿಗಳು ಸುದ್ದಿಗೋಷ್ಠಿಯಲ್ಲಿ ಪಾಲ್ಗೊಂಡರು.

ವಿರೋಧ ಬರುತ್ತಿದ್ದಂತೆಯೇ ಚುರುಕಾದ ಲಿಂಗಾಯತ ಪೂಜ್ಯರು ಹಾಗೂ ಬಸವ ಸಂಘಟನೆಗಳು ಭಾನುವಾರ ರಾತ್ರಿಯೇ ಗುಳೇದಗುಡ್ಡದಲ್ಲಿ ಅಭಿಯಾನಕ್ಕೆ ಸಿದ್ಧವಾಗುತ್ತಿದ್ದವರನ್ನು ಸಂಪರ್ಕಿಸಿದರು.

ವಿರೋಧದ ಕರೆಗೆ ಯಾವುದೇ ಬೆಂಬಲವಿಲ್ಲವೆಂದು ಖಚಿತವಾದರೂ ಸೋಮವಾರ ಬೆಳಗ್ಗೆ ಬಾಗಲಕೋಟೆಯಲ್ಲಿ ಹಾಗೂ ಸಂಜೆ ಗುಳೇದಗುಡ್ಡದಲ್ಲಿಯೇ ಅಭಿಯಾನಕ್ಕೆ ಬರಲು ಕರೆ ನೀಡಿ ಸುದ್ದಿಗೋಷ್ಠಿ ನಡೆಸಿದರು.

ಚರಂತಿಮಠದ ಡಾ ಪ್ರಭು ಸ್ವಾಮೀಜಿ, ಭೋವಿ ಗುರುಪೀಠದ ಇಮ್ಮಡಿ ಶ್ರೀ ಸಿದ್ದರಾಮೇಶ್ವರ ಸ್ವಾಮೀಜಿ, ಗುಳೇದಗುಡ್ಡದ ಗುರುಸಿದ್ದೇಶ್ವರ ಬ್ರಹನ್ಮಠದ ಶ್ರೀ ಬಸವರಾಜಪಟ್ಟದಾರ್ಯ ಸ್ವಾಮೀಜಿ, ಕೂಡಲಸಂಗಮ ಲಿಂಗಾಯತ ಪಂಚಮಸಾಲಿ ಪೀಠದ ಜಗದ್ಗುರು ಶ್ರೀಬಸವಜಯ ಮೃತ್ಯುಂಜಯ ಸ್ವಾಮೀಜಿ ಮಾತನಾಡಿ ಅಭಿಯಾನದ ಬಗ್ಗೆ ಜಾಗೃತಿ ಮೂಡಿಸಿದರು.

ಸಂಜೆ ಗುಳೇದಗುಡ್ಡದ ಎಲ್ಲ ಸಮಾಜಗಳ ಸಭೆ ನಡೆಸಿ ಇಳಕಲ್‌ನ ಗುರುಮಹಾಂತ ಶ್ರೀಗಳು, ನಿಡಸೋಶಿ ಸಿದ್ದ ಮಠದ ಪಂಚಮ ಶಿವಲಿಂಗೇಶ್ವರ ಸ್ವಾಮಿಗಳು, ಗುರುಸಿದ್ದ ಪಟ್ಟದಾರ್ಯ ಸ್ವಾಮಿಗಳು, ಇರಕಲ್ ಮಠದ ಬಸವಪ್ರಸಾದ ಶರಣರು, ಬಸವರಾಜ ಪಟ್ಟದಾರ್ಯ ಶ್ರೀಗಳು, ಭೋವಿ ಗುರುಪೀಠದ ಇಮ್ಮಡಿ ಸಿದ್ಧರಾಮೇಶ್ವರ ಸ್ವಾಮಿಗಳು ಮಾತನಾಡಿದರು.

ಎಲ್ಲ ಶ್ರೀಗಳು ಸಮಾಜದಿಂದ ಜಾತಿ ಭೇದಭಾವ ನಿವಾರಿಸುವ ಉದ್ದೇಶದಿಂದ ಅಭಿಯಾನ ಆರಂಭಿಸಿದ್ದೇವೆ ಎಂದು ಹೇಳಿ ಕಾರ್ಯಕ್ರಮಕ್ಕೆ ಬರಲು ನೀಡಿದ ಕರೆಯನ್ನು ಸಭಿಕರು ಚಪ್ಪಾಳೆ ತಟ್ಟಿ ಸ್ವಾಗತಿಸಿದರು.

ಬಸವ ಕೇಂದ್ರದ ಕಾರ್ಯದರ್ಶಿ ಅಣ್ಣಪ್ಪ ಜಗದೇವ ಅಭಿಯಾನಕ್ಕೆ ಎಲ್ಲರೂ ತನು, ಮನ, ಧನದಿಂದ ದುಡಿದಿದ್ದಾರೆ. ಜಿಲ್ಲೆಯಲ್ಲೆಲ್ಲಾ ಕರ ಪತ್ರ ಹಂಚಲಾಗಿದೆ, ಅಕ್ಕನ ಬಳಗದವರು ಮನೆ ಮನೆಗೆ ಹೋಗಿ ಜಾಗೃತಿ ಮೂಡಿಸಿದ್ದಾರೆ.

ವಿರೋಧ ಬಂದ ಮೇಲೆ ಸಂಘಟಕರ ಉತ್ಸಾಹ ಹೆಚ್ಚಾಗಿದೆ. ನಾಲ್ಕು ಬಸ್, 10 ಜೀಪ್ ಗಳಿಂದ ಗುಳೇದ ಗುಡ್ಡದಿಂದಲೇ ಜನ ಬರಲಿದ್ದಾರೆ, ಎಂದು ಹೇಳಿದರು.

ಜಾಗತಿಕ ಲಿಂಗಾಯತ ಮಹಾಸಭಾದ ಪ್ರಧಾನ ಕಾರ್ಯದರ್ಶಿ ರವಿ ಯಡಹಳ್ಳಿ ಅಭಿಯಾನದ ಮೇಲೆ ವಿರೋಧದ ಪರಿಣಾಮವಿಲ್ಲ. ವಿರೋಧ ಮಾಡಿದವರೇ ಸಣ್ಣವರಾದರು. ವಿರೋಧ ಬಂದ ಮೇಲೆ ಬಸವ ಸಂಘಟನೆಗಳು ಮತ್ತಷ್ಟು ಒಗ್ಗಟ್ಟಾಗಿವೆ. ಎಲ್ಲ ಜೀವಿಗಳನ್ನು ಸಮಾನವಾಗಿ ನೋಡುವ ಧರ್ಮ ಲಿಂಗಾಯತ ಧರ್ಮ. ಅವರು ಒಂದು ಜಾತಿಗೆ ಸೀಮಿತವಾಗಿದ್ದಾರೆ ಎಂದು
ಹೇಳಿದರು.

ಕಾಶೀನಾಥ ಶ್ರೀಗಳು ಮೊದಲು ಕಾರ್ಯಕ್ರಮಕ್ಕೆ ಬರಲು ಒಪ್ಪಿದ್ದರು. ಅವರ ಹೆಸರು ಕೂಡ ಆಮಂತ್ರಣ ಪತ್ರಿಕೆಯಲ್ಲಿ ಮುದ್ರಣವಾಗಿತ್ತು. ಈಗ ಪಂಚಪೀಠಗಳ ಹಾಗೂ ಸಂಘ ಪರಿವಾರದ ಒತ್ತಡದಿಂದ ಮನಸ್ಸು ಬದಲಾಯಿಸಿದ್ದಾರೆ. ಮೊದಲು ಐದು ಸಾವಿರ ಜನ ಅಭಿಯಾನಕ್ಕೆ ಬರುವ ನಿರೀಕ್ಷೆಯಿತ್ತು. ಈಗ ಅದಕ್ಕಿಂತ ಹೆಚ್ಚಿನ ಜನ ಬರಲಿದ್ದಾರೆ, ಎಂದು ಇಲ್ಲಿನ ರಾಜಕಾರಣಿಯೊಬ್ಬರು ಹೇಳಿದರು.

ಗುಳೇದಗುಡ್ಡದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಜಾಗತಿಕ ಲಿಂಗಾಯತ ಮಹಾಸಭಾದ ಜಿಲ್ಲಾಧ್ಯಕ್ಷ ಅಶೋಕ ಬರಗುಂಡಿ, ಪ್ರಧಾನ ಕಾರ್ಯದರ್ಶಿ ರವಿ ಯಡಹಳ್ಳಿ, ರಾಚಣ್ಣ ಕೆರೂರ, ಬಸವರಾಜ ಅನಗವಾಡಿ, ಮುಖಂಡರಾದ ಸಂಜಯ ಬರಗುಂಡಿ, ಹನಮಂತ ಮಾವಿನಮರದ, ಸಂಗಪ್ಪ ಹಡಪದ, ಸಂಗನಬಸಪ್ಪ ಚಿಂದಿ, ಚಂದ್ರಶೇಖರ ಹರವಿ, ಸಿದ್ದಿಂಗಪ್ಪ ಬರಗುಂಡಿ, ಶಿವಾನಂದ ಎಣ್ಣೆ, ಮುಪ್ಪಣ್ಣ ಶೀಲವಂತ, ಎಸ್‌. ಎಸ್.ಸೋಮನಾಳ, ಬಸವರಾಜ ಬರಗುಂಡಿ ಸೇರಿದಂತೆ ಪಟ್ಟಣದ ಅನೇಕ ಸಮಾಜಗಳ ಮುಖಂಡರು, ಹಿರಿಯರು ಭಾಗವಹಿಸಿದ್ದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/BC3ULQcPxmhAhKS4XV9R1G