ಅಂತರ್ಜಾತಿ ವಿವಾಹ ಯಶಸ್ವಿಯಾಗಲು ಮೊದಲು ಜಾತಿ ಭಾವನೆ ಹೋಗಬೇಕು

ಕಾನೂನು ಭಯ ಹುಟ್ಟಿಸುತ್ತವೆ, ಸಮಾಜದ ಕೊಳಕ ತೆಗೆಯಲಾರದು

ಸಿಂಧನೂರು

ಕಳೆದ ಹತ್ತು ದಿನಗಳಿಂದ ಹುಬ್ಬಳ್ಳಿ ತಾಲೂಕಿನ ಇನಾಂ ವೀರಾಪುರ ಗ್ರಾಮದಲ್ಲಿ ನಡೆದುಹೋದ ಹೃದಯವಿದ್ರಾವಕ ಘಟನೆ ಕುರಿತು ನಾನು ನನ್ನ ಪ್ರತಿಕ್ರಿಯೆಯನ್ನು ಹಂಚಿಕೊಳ್ಳಬೇಕೆಂದು ಅನಿಸುತ್ತಿದೆ. ಈ ಘಟನೆ ಮನುಷ್ಯನ ಕ್ರೌರ್ಯದ ಪರಮಾವಧಿಯನ್ನು ತೋರಿಸುವುದಲ್ಲದೆ, ಜಾತಿಯ ಜಿಡ್ಡು ಮನುಷ್ಯನ ಮನಸ್ಸಿನಲ್ಲಿ ಎಷ್ಟು ಗಟ್ಟಿಯಾಗಿದೆ ಎನ್ನುವುದನ್ನು ತೋರಿಸುತ್ತದೆ.

ಕೊಲೆ ಮಾಡುವ ಪ್ರತಿವ್ಯಕ್ತಿಗೂ ಗೊತ್ತಿರುತ್ತದೆ ಈ ನೆಲದ ಕಾನೂನಿನ ಬಗ್ಗೆ ಹಾಗೂ ಮುಂದೆ ಎದುರಾಗುವ ಶಿಕ್ಷೆಗಳ ಬಗ್ಗೆ. ಆದರೂ ನಾಗರಿಕ ಸಮಾಜ ತಲೆತಗಿಸುವಂತಹ ಘಟನೆಗಳು ಸಂಭವಿಸುತ್ತಲೇ ಇರುತ್ತವೆ. ಇನಾಂ ವೀರಾಪುರದಲ್ಲಿ ನಡೆದಂತಹ ಘಟನೆಗಳು ಈ ದೇಶದಲ್ಲಿ ನೂರಾರು ನಡೆದಿವೆ. ಕೆಲವು ಬೆಳಕಿಗೆ ಬಂದಿವೆ ಇನ್ನು ಹಲವು ಬೇರೆ ಬೇರೆ ರೂಪ ಪಡೆದು ಅಂದರೆ ಆತ್ಮಹತ್ಯೆ ಅಂತಲೊ, ಅಪಘಾತ ಸಂಭವಿಸಿತು ಅಂತಲೋ, ಇನ್ನೇನೋ ಬಣ್ಣ ಕಟ್ಟಿ ಮುಚ್ಚಿ ಹೋಗಿವೆ.

ಅದೇನಿದ್ದರೂ ಈ ಘಟನೆಯನ್ನು ನಾನು ಅಷ್ಟೇ ಅಲ್ಲ ಎಲ್ಲಾ ಬಸವಪರ ಸಂಘಟನೆಗಳು ಉಗ್ರವಾಗಿ ಖಂಡಿಸುತ್ತವೆ. ಜಾತಿ ತೊಲಗದ ಹೊರತು ಕಲ್ಯಾಣ ರಾಜ್ಯ ಸಾಧ್ಯವಿಲ್ಲ! ನಾನು ಕೂಡ ಈ ಘಟನೆಯನ್ನು ಉಗ್ರವಾಗಿ ಖಂಡಿಸುತ್ತೇನೆ. ನನ್ನ ನಿಲುವು ಮಾನ್ಯ ಹಾಗೂ ವಿವೇಕಾನಂದರ ಪರ.

ಇಂತಹ ಮರ್ಯಾದೆ ಹತ್ಯೆಗಳನ್ನು ಕಾನೂನಾತ್ಮಕವಾಗಿ ತಡೆಯಬಹುದೇ? ಅಂತರ್ಜಾತಿ ವಿವಾಹಗಳಿಂದ ಜಾತಿ ನಿರ್ಮೂಲನೆ ಮಾಡಬಹುದೇ ? ಬಸವಾದಿ ಶರಣರ ವಿಚಾರಗಳು ಈ ನೆಲದಲ್ಲಿ ಪರಿಣಾಮಕಾರಿಯಾಗಿ ಪ್ರಭಾವ ಬೀರುತ್ತಿಲ್ಲವೇ ? ಎಂದು ನನ್ನಷ್ಟಕ್ಕೆ ನಾನು ಪ್ರಶ್ನೆ ಹಾಕಿಕೊಂಡಾಗ ಆ ಎರಡು ಯುವ ಜೋಡಿಗಳ ಮುಖದಲ್ಲಿನ ಭಾವನೆ ಅದೇನೋ ಭರವಸೆಯ ಭಾವನೆಯ ಹೊಂದಿದ ಕಣ್ಣುಗಳು ನನ್ನ ಮನಸ್ಸು ಮತ್ತು ಹೃದಯವನ್ನು ಅಕ್ಷರಶಃ ಅಲುಗಾಡಿಸಿದ್ದು ಸತ್ಯ.

ಮನುಷ್ಯ ಪ್ರಾಣದ ಹಂಗು ತೊರೆದರೆ, ಮಾನವೀಯತೆಯನ್ನು ಬದಿಗಿಟ್ಟರೆ ಯಾವ ಕಾನೂನು ಕೂಡ ಆ ಕ್ಷಣದಲ್ಲಿ ಸಂಭವಿಸುತ್ತಿರುವ ದುರ್ಘಟನೆಯನ್ನು ತಡೆಯಲು ಸಾಧ್ಯವಿಲ್ಲ. ಆಮೇಲೆ ಆ ಕ್ರೂರಿಗೆ ಜೀವಾವಧಿ ಶಿಕ್ಷೆಯೋ, ಗಲ್ಲು ಶಿಕ್ಷೆಯೋ ಆಗಬಹುದು. ಅಂದ ಮಾತ್ರಕ್ಕೆ ಇಂತಹ ಘಟನೆಗಳು ಮರುಕಳಿಸುವುದಿಲ್ಲವೆಂದು ಅರ್ಥವಲ್ಲ.

ಮುಂದುವರೆದು ಬುದ್ಧಿಜೀವಿಗಳು, ರಾಜಕೀಯ ಧುರೀಣರು ಎನಿಸಿಕೊಂಡವರು ಅಂತರ್ಜಾತಿ ವಿವಾಹದಿಂದ ಜಾತಿ ನಿರ್ಮೂಲನೆ ಯಾಗುತ್ತದೆ, ಸಮಸಮಾಜ ನಿರ್ಮಾಣವಾಗುತ್ತದೆ ಎಂದು  ಪುಂಖಾನುಪುಂಖವಾಗಿ ಭಾಷಣ ಮಾಡುತ್ತಾರೆ. ಇದು ಸಾಧ್ಯವೇ? ನೂರಕ್ಕೆ ನೂರರಷ್ಟು ಸಾಧ್ಯವಿಲ್ಲ! ಹಾಗಾದರೆ ಏನು ಮಾಡಬೇಕು. ಬಸವಾದಿ ಶರಣರ ವಿಚಾರಗಳನ್ನು ಸರಕಾರ ಮತ್ತು ಸಮಾಜ ಯಥಾವತ್ತಾಗಿ ಜಾರಿಗೆ ತರಬೇಕು. ಅದರಿಂದ ಮಾತ್ರ ಸಮ ಸಮಾಜದ ನಿರ್ಮಾಣ ಸಾಧ್ಯವಾಗುತ್ತದೆ.

ಬಸವಣ್ಣನವರು ಅಂತರ್ಜಾತಿ ವಿವಾಹ ಮಾಡಿದರು ಎಂದು ಎಲ್ಲರೂ ಹೇಳುತ್ತಾರೆ. ಪುಸ್ತಕದಲ್ಲಿ ಬರೆದಿದ್ದಾರೆ. ಮಸ್ತಕದಲ್ಲಿ ತುಂಬಿದ್ದಾರೆ. ಆದರೆ ಬಸವಣ್ಣನವರು ಅಂತರ್ಜಾತಿ ವಿವಾಹ ಮಾಡಿಲ್ಲ. ಅವರು ತುಂಬಾ ಬುದ್ಧಿವಂತರು. ಅವರು ಮೊದಲು ಮಾಡಿದ್ದು ಮನಸ್ಸಿನಲ್ಲಿದ್ದ ಜಾತಿಯ ಕಸವನ್ನು, ಜಾತಿಯ ಜಿಡ್ಡನ್ನು, ವರ್ಣ ಸಂಕರವನ್ನು ತೊಲಗಿಸಿದ್ದು. ವಿವಾಹಕ್ಕಿಂತ ಮೊದಲು ಬಸವಣ್ಣನವರು ಆ ಎರಡು ಕುಟುಂಬದ ಸದಸ್ಯರ ಮನದ ಮೈಲಿಗೆಯನ್ನು ಸ್ವಚ್ಛವಾಗಿ ತೊಳೆದರು. ಅಂತರ್ಜಾತಿ ವಿವಾಹ ಯಶಸ್ವಿಯಾಗಬೇಕೆಂದರೆ ಮೊದಲು ಜಾತಿಯ ಭಾವನೆ ನಿರ್ಮೂಲನೆಯಾಗಬೇಕು.

ಮದುವೆ ಆಗುವವರು ಮತ್ತು ಆ ಎರಡು ಕುಟುಂಬದ ಸದಸ್ಯರು ಜಾತಿಯಿಂದ ಒಂದಾಗಬೇಕು. ಆಮೇಲೆ ವಿವಾಹ, ಇದು ಬಸವಣ್ಣನವರ ಯೋಚನೆ ಆಗಿತ್ತು ಎನ್ನುವುದನ್ನು ನಾವು ತಿಳಿಯಬೇಕು.

ಬ್ರಾಹ್ಮಣರ ಮಧುವರಸ ಆತನ ಮಗಳು ಲಾವಣ್ಯವತಿ ಮತ್ತು ಸಮಾಗಾರ ಹರಳಯ್ಯ, ಕಲ್ಯಾಣಮ್ಮ ತಾಯಿ ಮತ್ತು ಶೀಲವಂತ ಇವರೆಲ್ಲರೂ ತಮ್ಮ ತಮ್ಮ ಪೂರ್ವಾಶ್ರಮವನ್ನು ತೊರೆದು ತಾತ್ವಿಕವಾಗಿ ಒಂದಾದರು. ಅವರು ಲಿಂಗವಂತರಾದರು ಸಮಾನತೆಯ ಪ್ರತೀಕವಾದ ಲಿಂಗವನ್ನು ಧರಿಸಿದರು. ಆ ಎರಡು ಕುಟುಂಬಗಳು ಆಚಾರ ವಿಚಾರಗಳಲ್ಲಿ ಹಾಗೂ ಸಿದ್ಧಾಂತ ಮತ್ತು ಯೋಚನೆಗಳಲ್ಲಿ ಒಂದಾದವು. ನಾನು ಬ್ರಾಹ್ಮಣ ನಾನು ಶ್ರೇಷ್ಠ ಎನ್ನುವ ಭಾವನೆ ಮಧುವರಸರಿಗೆ ಇರದೇ ಹೋಯಿತು. ನಾನು ಸಮಗಾರ ನಾನು ಕನಿಷ್ಠ ಎನ್ನುವ ಭಾವನೆ ಹರಳಯ್ಯ, ಕಲ್ಯಾಣಮ್ಮರಿಗೆ ಇರದೇ ಹೋಯಿತು. ಎರಡು ಕುಟುಂಬಗಳು ಲಿಂಗವಂತ ಕುಟುಂಬಗಳಾದವು.

 ಲೋಕದ ಚೇಷ್ಟೆಗೆ ರವಿ ಬೀಜವಾದಂತೆ ಕರ್ಣಂಗಳ ಚೇಷ್ಟೆಗೆ ಮನವೇ  ಬೀಜ ” ಇಲ್ಲಿ ಬಸವಣ್ಣನವರ ವಿಚಾರವನ್ನು ಅರ್ಥಮಾಡಿಕೊಳ್ಳಬೇಕು. ಜಾತಿಯ ಮದ, ಅಧಿಕಾರದ ಮದ, ಶ್ರೀಮಂತಿಕೆಯ ಮದ, ಸೌಂದರ್ಯದ ಮದ ಹುಟ್ಟುವುದೇ ಮೊದಲು ಮನಸ್ಸಿನಲ್ಲಿ. ಅವುಗಳನ್ನ ಹುಟ್ಟಿದ ಜಾಗದಿಂದಲೇ ತೆಗೆಯಬೇಕು. ಅದಕ್ಕಾಗಿ ಬಸವಣ್ಣನವರು ಕೈ ಹಾಕಿದ್ದು ಮನುಷ್ಯನ ಮೆದುಳಿಗೆ ಹೊರತು ಬಿಜ್ಜಳನ ಅಲಿಖಿತ ಕಾನೂನಿಗಲ್ಲ ಎನ್ನುವುದನ್ನು ನಾವು ತಿಳಿಯಬೇಕಿದೆ.

ಕಾನೂನುಗಳು ಭಯವನ್ನು ಹುಟ್ಟಿಸುತ್ತವೆ ಹೊರತು ಬೇರುಸಹಿತ ಸಮಾಜದ ಕೊಳಕನ್ನು ತೆಗೆಯಲಾರವು. ಎಲ್ಲಾ ಭಾವನೆಗಳ ಮತ್ತು ದುರ್ಭಾವನೆಗಳ ಮೂಲ ಮನಸ್ಸು. ಇದನ್ನು ಚೆನ್ನಾಗಿ ಅರ್ಥೈಸಿಕೊಂಡಿದ್ದ ಬಸವಣ್ಣನವರು ಕುಲಸೂತಕ, ಛಲಸೂತಕ, ತನುಸೂತಕ, ಮನಸೂತಕ, ನೆನಹುಸೂತಕ, ಭಾವಸೂತಕ ಅರಹುಮರಹಿನ ಸಂದು ಸಂಶಯದ ಸೂತಕಗಳನ್ನು ಮೊದಲು ಬಿಡಿಸಿದರು. ನಾನು ಹಾರವನಲ್ಲ. ಎನ್ನನೇತಕ್ಕೆ ಅರಿಯರಿ ? ಎಂದು ಪ್ರಶ್ನಿಸಿದರು. ಬಸವಣ್ಣನವರು ಶೀಲವಂತ ಹಾಗೂ ಲಾವಣ್ಯವತಿ ಕಲ್ಯಾಣ ಮಹೋತ್ಸವವನ್ನು ನೆರವೇರಿಸಿದರು.

ಎರಡು ಕುಟುಂಬಗಳು ಯಾವುದೇ ಭಿನ್ನಾಭಿಪ್ರಾಯವಿಲ್ಲದೆ, ವಿರೋಧ ಪ್ರತಿರೋಧವಿಲ್ಲದೆ ಆ ಮದುವೆಯನ್ನು ಒಪ್ಪಿಕೊಂಡವು. ಆ ನವಜೋಡಿಗಳನ್ನು ಆಶೀರ್ವದಿಸಿದವು. ಆ ಕಲ್ಯಾಣ ಮಹೋತ್ಸವಕ್ಕೆ ಬಸವಾದಿ ಶರಣರು ಸಾಕ್ಷಿಯಾದರು. ಆದರೆ ಮನಸ್ಸಿನಲ್ಲಿ ಜಾತಿಯ ಜಿಡ್ಡು ಹತ್ತಿಸಿಕೊಂಡಿದ್ದ ಪಟ್ಟಭದ್ರ ಶಕ್ತಿಗಳು ರಾಜಪ್ರಭುತ್ವದ ಕಿವಿ ಕಚ್ಚಿದವು. ಈಗಿನಂತೆ ಪ್ರಜಾಪ್ರಭುತ್ವ ಇದ್ದಿದ್ದರೆ ಆಂದಿನ ವಿವಾಹ ಯಶಸ್ವಿಯಾಗಿ ಕಲ್ಯಾಣ ರಾಜ್ಯ ನಿರ್ಮಾಣವಾಗುತ್ತಿತ್ತು. ಬದಲಾಗಿ ” ಎಳೆಯೂಟೆ ” ಸಂಭವಿಸುತ್ತಿರಲಿಲ್ಲ. ಮಧುವರಸ, ಹರಳಯ್ಯ, ಶೀಲವಂತರ ಕಣ್ಣುಗಳನ್ನು ಕಿತ್ತು ಅವರನ್ನು ಆನೆಯ ಕಾಲುಗಳಿಗೆ ಕಟ್ಟಿ ರಾಜ ಬೀದಿಯಲ್ಲಿ ಎಳೆದೊಯ್ಯುವ ಉಗ್ರವಾದ ಎಳೆಯೂಟೆ ಘನ ಘೋರ ಶಿಕ್ಷೆ ಜರುಗುತ್ತಿರಲಿಲ್ಲ.

ಹನ್ನೆರಡನೆಯ ಶತಮಾನದ ಆ ಕಹಿ ಘಟನೆಗೆ ಕಾರಣ ಆ ಎರಡು ಕುಟುಂಬಗಳಲ್ಲ  ಅಂದಿನ ಪಟ್ಟಭದ್ರರು. ಇಂದಿನ ಇನಾಂವೀರಾಪುರ ಘಟನೆಗೆ ಮಾನ್ಯಳ ಕುಟುಂಬ ಕಾರಣ. ಹಾಗಾದರೆ ಈ ವರ್ಣಸಂಕರ ವ್ಯವಸ್ಥೆ ಅಳಿಯಬೇಕಾದರೆ, ಜಾತಿ ನಿರ್ಮೂಲನೆಯಾಗಬೇಕಾದರೆ ಏನು ಮಾಡಬೇಕು ಓದುಗರೆ, ನೀವೇ ಯೋಚಿಸಿ.

ಈ ಜಾತಿಯ ಜಿಡ್ಡು ಎಲ್ಲಾ ಜಾತಿಗಳಲ್ಲಿವೆ. ತಳ ಸಮುದಾಯದ ಒಳಪಂಗಡಗಳಲ್ಲಿ, ಎಡಬಲಗಳಲ್ಲಿ ಇದೆ. ಮೇಲ್ಜಾತಿ ಎನಿಸಿಕೊಂಡವರ ಒಳಪಂಗಡಗಳಲ್ಲಿಯೂ ಇದೆ. ಮೊದಲು ಕುಟುಂಬದಲ್ಲಿ ಸಮಾನತೆ ಬರಬೇಕು ಬಸವಾದಿ ಶರಣರ ಆಶಯಗಳು ಎಲ್ಲರಲ್ಲಿಯೂ ಅಳವಡಬೇಕು. ಹಾಗಾದಾಗ ಮಾತ್ರ ಇನಾಂವೀರಾಪುರದಂತಹ ಘಟನೆಗಳಿಗೆ ವಿದಾಯ ಹೇಳಲು ಸಾಧ್ಯವಾಗುತ್ತದೆ.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/HxAWJ403uVgK5HFZlxTVut