ಧರ್ಮ ಕಾಲಂನಲ್ಲಿ ಲಿಂಗಾಯತ ಬರೆಯಿಸಿ : ಪಂಚಮಸಾಲಿ ಟ್ರಸ್ಟನ ನಿರ್ಣಯ

ನಮ್ಮದು ಬಸವತತ್ವದ ಪೀಠ; ಸ್ವತಂತ್ರ ಧರ್ಮ ನಮ್ಮ ಗುರಿ; ವೀರಶೈವ ಒಳಪಂಗಡ

ಕೂಡಲಸಂಗಮ

ನಾಳೆಯಿಂದ ನಡೆಯುತ್ತಿರುವ ಜನಗಣತಿಯಲ್ಲಿ ಲಿಂಗಾಯತ ಪಂಚಮಸಾಲಿ ಸಮುದಾಯದ ಜನ ಧರ್ಮ ಕಾಲಂ ನಲ್ಲಿ ‘ಲಿಂಗಾಯತ’, ಜಾತಿ ಕಾಲಂನಲ್ಲಿ ಪಂಚಮಸಾಲಿ ಎಂದು ಮಾತ್ರ ಬರೆಸಬೇಕು ಎಂದು ಅಖಿಲ ಭಾರತ ಲಿಂಗಾಯತ ಪಂಚಮಸಾಲಿ ಟ್ರಸ್ಟನ ಅಧ್ಯಕ್ಷ ವಿಜಯಾನಂದ ಕಾಶಪ್ಪನವರ ಹೇಳಿದರು.

ಕೂಡಲಸಂಗಮ ಲಿಂಗಾಯತ ಪಂಚಮಸಾಲಿ ಪೀಠದಲ್ಲಿ ಭಾನುವಾರ ನಡೆದ ಟ್ರಸ್ಟ್ ಸಭೆಯಲ್ಲಿ ನಿರ್ಣಯ ಕೈಗೊಂಡಿದ್ದು, ಸಮಾಜದ ಜನ ಜನಗಣತಿಯಲ್ಲಿ ಟ್ರಸ್ಟ್ ಸೂಚಿಸಿದಂತೆ ಬರೆಸಬೇಕು.

ಬಸವಜಯಮೃತ್ಯುಂಜಯ ಸ್ವಾಮೀಜಿ ಧರ್ಮ ಕಾಲಂನಲ್ಲಿ ಹಿಂದೂ, ಜಾತಿ ಕಾಲಂನಲ್ಲಿ ಪಂಚಮಸಾಲಿ ಬರೆಸುವಂತೆ ಕರೆಕೊಟ್ಟಿರುವುದು ಸಮಾಜದ ಜನರಲ್ಲಿ ಗೊಂದಲ ಉಂಟುಮಾಡಿತ್ತು.

ಗೊಂದಲಗಳ ನಿವಾರಣೆಗಾಗಿ ಇಂದು ಟ್ರಸ್ಟ್ ಸಭೆ ಕೈಗೊಂಡು ಟ್ರಸ್ಟನ ಎಲ್ಲ ಧರ್ಮದರ್ಶಿಗಳು, ಸಮಾಜದ ಮುಖಂಡರು ಸೇರಿಕೊಂಡು ಚರ್ಚಿಸಿ, ಸಮಾಜ ಬಾಂಧವರು ಧರ್ಮ ಕಾಲಂನಲ್ಲಿ ಲಿಂಗಾಯತ, ಜಾತಿ ಕಾಲಂನಲ್ಲಿ ಲಿಂಗಾಯತ ಪಂಚಮಸಾಲಿ ಎಂದು ಬರೆಸುವಂತೆ ನಿರ್ಣಯ ಕೈಗೊಂಡಿದೆ. ಎಲ್ಲರೂ ಅದೇ ರೀತಿ ಬರೆಸಬೇಕು ಎಂದರು.

ನಮ್ಮ ಪೀಠ ಬಸವತತ್ವ, ಸಿದ್ದಾಂತದ ಮೇಲೆ ನಡೆಯುತ್ತಿದೆ. ಲಿಂಗಾಯತ ಸ್ವತಂತ್ರ ಧರ್ಮ ಪಡೆಯುವುದೇ ನಮ್ಮ ಗುರಿ. ವೀರಶೈವ ಎನ್ನುವುದು ಲಿಂಗಾಯತದ ಒಂದು ಒಳಪಂಗಡವಾಗಿದೆ. ಲಿಂಗಾಯತದಲ್ಲಿ ೧೧೨ ಒಳಪಂಗಡಗಳು ಬರುವವು.

ಹಿಂದೂ ಎಂದು ಬರೆಸುವುದರಿಂದ ಯಾವ ಸೌಲಭ್ಯಗಳು ನಮಗೆ ದೊರೆಯುವುದಿಲ್ಲ. ಲಿಂಗಾಯತ ಎಂದು ಬರೆಸಿದರೆ ಮಾತ್ರ ಸೌಲಭ್ಯಗಳು ದೊರೆಯುತ್ತವೆ ಎಂದರು.

ಹುನಗುಂದದ ನ್ಯಾಯವಾದಿ ಮಹಾಂತೇಶ ಅವಾರಿ ಮಾತನಾಡಿ, ಬಸವ ಸಂಸ್ಕೃತಿ ಅಭಿಯಾನ ಬಾಗಲಕೋಟೆಯಲ್ಲಿ ನಡೆದಾಗ ಬಸವಜಯಮೃತ್ಯುಂಜಯ ಸ್ವಾಮೀಜಿ ಎಲ್ಲ ಮಠಾಧೀಶರಿಗೆ ಧರ್ಮ ಕಾಲಂನಲ್ಲಿ ಲಿಂಗಾಯತ, ಜಾತಿ ಕಾಲಂನಲ್ಲಿ ಪಂಚಮಸಾಲಿ ಬರೆಸುವ ಭರವಸೆ ನೀಡಿ, ಹಿಂದೂ ಬರೆಸುವಂತೆ ಕರೆ ಕೊಟ್ಟಿರುವುದನ್ನು ಸಮಾಜದ ಜನರಿಗೆ ನೋವು ಉಂಟುಮಾಡಿದೆ, ಈ ಕಾರ್ಯವನ್ನು ಖಂಡಿಸುತ್ತೇವೆ.

ನಮ್ಮ ಸಮಾಜಕ್ಕೆ ಪ್ರಚಾರಪ್ರಿಯ ಸ್ವಾಮೀಜಿ ಬೇಕಾಗಿಲ್ಲ, ಸಮಾಜದ ಹಿತ ಕಾಪಾಡುವವರು ಬೇಕು. ರಾಜಕಾರಣೀಗಳ ರಕ್ಷಣೆ ಮಾಡುವ ಸ್ವಾಮೀಜಿ ಅಗತ್ಯ ಇಲ್ಲ, ರಾಜಕಾರಣಿಗಳು ಅವರ ರಕ್ಷಣೆ ಅವರು ಮಾಡಿಕೊಳ್ಳುತ್ತಾರೆ, ಸಮಾಜದ ಕಟ್ಟಕಡೆಯ ವ್ಯಕ್ತಿಯನ್ನು ರಕ್ಷಿಸುವವರು ಬೇಕು ಎಂದರು.

ಸಭೆಯಲ್ಲಿ ಟ್ರಸ್ಟನ ೨೦ಕ್ಕೂ ಅಧಿಕ ಧರ್ಮದರ್ಶಿಗಳು, ಮುಖಂಡರು, ವಿವಿಧ ಜಿಲ್ಲೆಯ ಸಮಾಜದ ಮುಖಂಡರು ಇದ್ದರು.

ಆರಂಭದಲ್ಲಿ ಕೂಡಲಸಂಗಮ ಲಿಂಗಾಯತ ಪಂಚಮಸಾಲಿ ಪೀಠದಲ್ಲಿ ನಡೆದ ಅಖಿಲ ಭಾರತ ಲಿಂಗಾಯತ ಪಂಚಮಸಾಲಿ ಟ್ರಸ್ಟ್ ಕಾರ್ಯಕಾರಿಣಿ ಸಭೆಯನ್ನು ಟ್ರಸ್ಟ್ ಅಧ್ಯಕ್ಷ ವಿಜಯಾನಂದ ಕಾಶಪ್ಪನವರ ಉದ್ಘಾಟಿಸಿದರು.

ಪಂಚಮಸಾಲಿ ಪೀಠದಿಂದ ಮೃತ್ಯುಂಜಯ ಶ್ರೀ ಉಚ್ಚಾಟನೆ

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/LeqMgqmTFRYEVSrkuQhpeJ