ನಾನು ಲಿಂಗಾಯತ, ಧರ್ಮದ ಕಾಲಂನಲ್ಲಿ ಲಿಂಗಾಯತ ಬರೆಸ್ತೀನಿ: ಎಂ.ಬಿ ಪಾಟೀಲ್‌

‘ವೀರಶೈವರು ಲಿಂಗಯತದ ಒಂದು ಭಾಗ. ಆದರೆ ವೀರಶೈವರ ಆಚರಣೆಗಳು ಬೇರೆ ಲಿಂಗಾಯತರ ಆಚರಣೆಗಳು ಬೇರೆ.’

ಬೆಂಗಳೂರು

ನಾನು ಬಸವ ಧರ್ಮದ ಪರ ಇರುವವನು, ಧರ್ಮದ ಕಾಲಂ ನಲ್ಲಿ ಲಿಂಗಾಯತ ಧರ್ಮ ಅಂತನೇ ಬರೆಸ್ತೀನಿ ಎಂದು ಸಚಿವ ಎಂ.ಬಿ ಪಾಟೀಲ್‌ ಶನಿವಾರ ಹೇಳಿದರು.

ನಗರದಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು ನಾವು ಲಿಂಗಾಯತರು. ನಾನು ಯಾವತ್ತೂ ಕೂಡ differ ಆಗಿಲ್ಲ (ಬೇರೆ ಕರೆದುಕೊಂಡಿಲ್ಲ), ಆಗುವುದೂ ಇಲ್ಲ, ಎಂದರು.

“ವೀರಶೈವರು ಲಿಂಗಾಯತದ ಒಂದು ಭಾಗ. ನಾವು ಹೇಗೆ ಬಸವ ಧರ್ಮ ಸ್ವೀಕಾರ ಮಾಡಿದ್ದೇವೆ ಅವರೂ ಸ್ವೀಕಾರ ಮಾಡಿದ್ದಾರೆ. ಆದರೆ ಲಿಂಗಾಯತರು ವೀರಶೈವರ ಮಧ್ಯ ಸೈದ್ಧಾಂತಿಕ ಭಿನ್ನಾಭಿಪ್ರಾಯಗಳಿವೆ. ವೀರಶೈವರ ಆಚರಣೆಗಳು ಬೇರೆ ಲಿಂಗಾಯತರ ಆಚರಣೆಗಳು ಬೇರೆ. ಬಸವಣ್ಣ ಹೇಳಿದ್ದು ಬೇರೆ, ಇವರು ಹೇಳೋದು ಬೇರೆ… ಬ್ರಾಹ್ಮಣರಲ್ಲೂ ನೂರೆಂಟು ಭಿನ್ನಾಭಿಪ್ರಾಯಗಳಿವೆ,” ಎಂದು ಹೇಳಿದರು.

“2017-18ರಲ್ಲಿ ಸ್ವತಂತ್ರ ಧರ್ಮದ ಹೋರಾಟ ನಡೆದಾಗ ಲಿಂಗಾಯತರ ಮತ್ತು ವೀರಶೈವರ ಬಗ್ಗೆ ಜನರಿಗೆ ಹೆಚ್ಚು ತಿಳಿದಿರಲಿಲ್ಲ. ಈಗ ಜನರಿಗೆ ಅರ್ಥವಾಗುತ್ತಿದೆ.

ಮೈಸೂರಿನ 1871 ಸೆನ್ಸಸ್ ಲಿಂಗಾಯತರು ಹಿಂದೂ ಚಾತುರ್ವರ್ಣದ ಭಾಗವಾಗಿರಲಿಲ್ಲ ಎಂದು ಹೇಳಿದೆ. ಮದ್ರಾಸ್ ಸೆನ್ಸಸ್ ನಲ್ಲಿ ಶೈವರು, ವೈಷ್ಣವರು ಮತ್ತು ಲಿಂಗಾಯತರು ಎಂದು ಪ್ರತ್ಯೇಕವಾಗಿ ಪಟ್ಟಿ ಮಾಡಲಾಗಿದೆ. ಸಿಖ್, ಜೈನ, ಬೌದ್ಧರಂತೆ ಲಿಂಗಾಯತರೂ ಪ್ರತ್ಯೇಕ ಧರ್ಮೀಯರು. ಸ್ವಾತಂತ್ರ್ಯ ನಂತರ ಇಂಡಿಕ್‌ ರಿಲೀಜಿಯನ್ಸ್ ಗಳಿಗೆ ಮಾನ್ಯತೆ ಸಿಕ್ಕಿದೆ. ಜೈನರಿಗೆ ಯುಪಿಎ ಸರ್ಕಾರದ ಅವಧಿಯಲ್ಲೇ ಮಾನ್ಯತೆ ಸಿಕ್ಕಿದೆ ಎಂದು ವಿವರಿಸಿದರು.

ಪ್ರತಾಪ ಸಿಂಹ

ಮೈಸೂರಿನ ಮಾಜಿ ಸಂಸದ ಪ್ರತಾಪ ಸಿಂಹ ಅವರ ಮೇಲೆ ಬಂದ ಪ್ರಶ್ನೆಯನ್ನು ಉತ್ತರಿಸುತ್ತಾ, ಪ್ರತಾಪ ಸಿಂಹ ಅವರದು ನೋಡಿಕೊಳ್ಳಲಿ, ನಮ್ಮದರಲ್ಲಿ ಯಾಕೆ ತಲೆ ಹಾಕ್ತಾರೆ, ಎಂದು ಕೇಳಿದರು.

ಪ್ರತ್ಯೇಕ ಧರ್ಮ ಕೇಳುತ್ತಿರುವ ಲಿಂಗಾಯತರ ಸ್ವಾಮಿಗಳ ದೇವರು ಯಾರು ಅಂತ ಪ್ರತಾಪ ಸಿಂಹ ಪ್ರಶ್ನಿಸಿದ್ದು ದೊಡ್ಡ ವಿವಾದವಾಗಿದೆ.

ಆ ಪ್ರಶ್ನೆಗೆ ಉತ್ತರಿಸುತ್ತಾ ನಮಗೆ ಬಸವವಣ್ಣನವರು ತೋರಿಸಿದಂತೆ ಇಷ್ಟ ಲಿಂಗವೇ ದೇವರು, ದೇಹವೇ ದೇಗುಲ. ದೇವಸ್ಥಾನಕ್ಕೆ ಹೋಗೋದಿಕ್ಕೆ ಜನರಿಗೆ ಅವಕಾಶವಿರಲಿಲ್ಲ. ಅದಕ್ಕೆ ಬಸವಣ್ಣ ಪ್ರತ್ಯೇಕ ಧರ್ಮ ಸ್ಥಾಪನೆ ಮಾಡಿದರು. ಪ್ರತಾಪ ಸಿಂಹರಿಗೆ ಇಷ್ಟೂ ಗೊತ್ತಿಲ್ಲ ಅಂದರೆ ಹೇಗೆ, ಎಂದು ಎಂ.ಬಿ ಪಾಟೀಲ್‌ ಕೇಳಿದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/BvguxN7Z0AG9g7Il7l5Lzh