ನಾವು ಬಸವಣ್ಣನವರ ಉತ್ತರಾಧಿಕಾರಿಗಳು: ಶಂಕರ ಬಿದರಿ

ರಾಯಚೂರು

ಮಹಾತ್ಮ ಬಸವೇಶ್ವರರಿಗೆ ಮನುಕುಲದ ಕಲ್ಯಾಣ ಮುಖ್ಯವಾಗಿತ್ತು. ನಾವುಗಳು ಬಸವಣ್ಣನವರ ಶರಣ ಪರಂಪರೆಯ ಉತ್ತರಾಧಿಕಾರಿಗಳು. ನಾವು ಶರಣರ ಅಮೂಲ್ಯ ತತ್ವವಾದರ್ಶಗಳನ್ನು ಮರೆತರೆ ಸಮಾಜದಲ್ಲಿ ಗೌರವ ಪಡೆಯಲು ಸಾಧ್ಯವಾಗುವುದಿಲ್ಲ. ಭಾರತ ದೇಶದಲ್ಲಿ ನಮಗೆ ಗೌರವವಿದ್ದರೆ ಅದು ಬಸವಾದಿ ಶರಣರ ಆದರ್ಶಗಳಿಂದ ಮಾತ್ರ ಎಂದು ಅಖಿಲ ಭಾರತ ವೀರಶೈವ ಲಿಂಗಾಯತ ಮಹಾಸಭಾ ರಾಜ್ಯಾಧ್ಯಕ್ಷ ಶಂಕರ ಬಿದರಿ ಹೇಳಿದರು.

ಜಿಲ್ಲಾ ಬಸವ ಕೇಂದ್ರಕ್ಕೆ ಪ್ರಥಮ ಭಾರಿ ಆಗಮಿಸಿದ ಸಂದರ್ಭದಲ್ಲಿ ಬಸವ ಕೇಂದ್ರದ ಪದಾಧಿಕಾರಿಗಳು, ಮಹಾಸಭಾದ ರಾಯಚೂರು ಜಿಲ್ಲಾ ಮತ್ತು ತಾಲೂಕು ಘಟಕಗಳ ಪದಾಧಿಕಾರಿಗಳು ನೀಡಿದ ಗೌರವಸನ್ಮಾನ ಸ್ವೀಕರಿಸಿ ಅವರು ಮಾತನಾಡಿದರು.

ಬುದ್ಧ-ಬಸವ-ಅಂಬೇಡ್ಕರ್ ಅವರುಗಳು ಸಮಾಜಕ್ಕೆ ನೀಡಿದ ತತ್ವಾದರ್ಶಗಳನ್ನು ತಿಳಿದುಕೊಂಡು, ನಾವು ಜಾತಿ, ಮತ, ಪಂಥಗಳನ್ನು ಬದಿಗಿಟ್ಟು ಸಂಘಟಿತರಾಗಿ ಬಾಳಲು ಏನು ಮಾಡಬೇಕೆಂಬ ಆತ್ಮಾವಲೋಕನವನ್ನು ಮಾಡಿಕೊಳ್ಳಬೇಕಾಗಿದೆ. ಯಾವ ತತ್ವದಲ್ಲಿ ಸತ್ಯ-ಸತ್ವ ಇದೇ ಎಂಬುದನ್ನು ಅರಿತುಕೊಂಡು ಜೀವನ ಸಾಗಿಸಿದಲ್ಲಿ ಮಾತ್ರ ಬದುಕು ಸಾರ್ಥಕ. ಮಕ್ಕಳಿಗೆ ಉತ್ತಮ ಶಿಕ್ಷಣ, ನೈತಿಕ ಮೌಲ್ಯಗಳನ್ನು ಹೇಳಿಕೊಟ್ಟು ಉತ್ತಮ ಪ್ರಜೆಗಳನ್ನಾಗಿ ಮಾಡುವ ಹೊಣೆ ನಮ್ಮೆಲ್ಲರ ಮೇಲಿದೆಯೆಂದು ಬಿದರಿ ಹೇಳಿದರು.

ಪರಮೇಶ್ವರ ಸಾಲಿಮಠ ಅವರು ಬಿದರಿ ಅವರಿಗೆ ನೀಡಿದ ಸನ್ಮಾನ ಪತ್ರ ಓದಿದರು.

ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದ ಮಾಜಿ ಸಚಿವ ಅಮರೇಗೌಡ ಬಯ್ಯಾಪೂರ, ಮಹಾಸಭಾ ಉಪಾಧ್ಯಕ್ಷರು ಹಾಗೂ ಶ್ರೀ ಚಂದ್ರಶೇಖರ ಮಿರ್ಜಾಪುರ, ಜಿಲ್ಲಾಧ್ಯಕ್ಷರು, ಮಹಾಸಭಾ ಇವರುಗಳು ಮಾತನಾಡಿ, ಶರಣರ ಆಶಯದಂತೆ ನಾವೆಲ್ಲ ಸಂಘಟಿತರಾದಲ್ಲಿ ಮಾತ್ರ ಜಾಗತಿಕಮಟ್ಟದಲ್ಲಿ ನಮ್ಮನ್ನು ಗುರುತಿಸಿಕೊಳ್ಳಲು ಸಾಧ್ಯವೆಂದರು.

ಅಧ್ಯಕ್ಷತೆಯನ್ನು ಶ್ರೀ ರಾಚನಗೌಡ ಕೋಳೂರ ವಹಿಸಿದ್ದರು. ಕಾರ್ಯಕ್ರಮದಲ್ಲಿ ಮಹಾಸಭಾದ ಎಲ್ಲಾ ತಾಲೂಕುಗಳ ಪದಾಧಿಕಾರಿಗಳು, ಬಸವ ಕೇಂದ್ರದ ಸದಸ್ಯರು, ಅಭಿಮಾನಿಗಳು ಉಪಸ್ಥಿತರಿದ್ದರು.

ವಚನ ಪ್ರಾರ್ಥನೆಯನ್ನು ಚಿದಾನಂದ ನುಲಿ ಅವರು ಮಾಡಿದರು. ಜೆ. ಬಸವರಾಜ, ವಕೀಲರು ಸ್ವಾಗತಿಸಿದರು. ಸಿ. ಬಿ. ಪಾಟೀಲ ವಕೀಲರು ಪ್ರಾಸ್ತಾವಿಕ ನುಡಿಗಳನ್ನಾಡಿದರು. ಚನ್ನಬಸವಣ್ಣ ಮಹಾಜನಶೆಟ್ಟಿ ನಿರೂಪಿಸಿದರು. ಚನ್ನಬಸವ ಇಂಜಿನಿಯರ್ ವಂದಿಸಿದರು.