ರಾಜ್ಯದ ಮೂಲೆ ಮೂಲೆಗಳಲ್ಲಿ ಬಸವ ಭಕ್ತರ ಅಭಿಯಾನ ನಡೆಸಲು ಪೂಜ್ಯರ ನಿರ್ಣಯ

“2017ರಲ್ಲಿ ಏನಾಯಿತು ಎಂದು ಎಲ್ಲರೂ ಸ್ಮರಿಸಿಕೊಳ್ಳುವಂತೆ ಮಾಡುವ ಸಮಯ ಬಂದಿದೆ”

ಧಾರವಾಡ

ಲಿಂಗಾಯತ ಸಮಾಜದ ಮೇಲೆ ನಡೆಯುತ್ತಿರುವ ನಿರಂತರ ಸಾಂಸ್ಕೃತಿಕ ದಾಳಿಯನ್ನು ತಡೆಯಲು ಬೀದರಿನಿಂದ ಚಾಮರಾಜನಗರದವರೆಗೆ, ಎಲ್ಲಾ ಜಿಲ್ಲೆಗಳಲ್ಲಿ, ರಾಜ್ಯದ ಮೂಲೆ ಮೂಲೆಗಳಲ್ಲಿ ಬಸವ ಭಕ್ತರ ಅಭಿಯಾನ ನಡೆಸಲು ಲಿಂಗಾಯತ ಮಠಾಧೀಶರ ಒಕ್ಕೊಟ ಒಮ್ಮತದ ನಿರ್ಣಯ ತೆಗೆದುಕೊಂಡಿದೆ.

ಪ್ರತಿ ಜಿಲ್ಲೆಯಲ್ಲಿ ಕನಿಷ್ಠ 10,000 ಜನರನ್ನು ಸೇರಿಸಿ ಬ್ರಹತ್ ಅಭಿಯಾನಗಳ ಮೂಲಕ ಬಸವ ಭಕ್ತರಲ್ಲಿ ಜಾಗೃತಿ ಮೂಡಿಸಲು ಇಂದು ಧಾರವಾಡದಲ್ಲಿ ನಡೆದ ಸಭೆಯಲ್ಲಿ ಒಕ್ಕೊಟ ಕರೆ ಕೊಟ್ಟಿದೆ.

ಈ ಅಭಿಯಾನ ಸಾಣೇಹಳ್ಳಿಯ ಪೂಜ್ಯ ಪಂಡಿತಾರಾಧ್ಯ ಶಿವಾಚಾರ್ಯ ಶ್ರೀಗಳು ಆಯೋಜಿಸಿದ್ದ ‘ಮತ್ತೆ ಕಲ್ಯಾಣ’ದ ಮಾದರಿಯಲ್ಲಿಯೇ ನಡೆಯಲಿದೆ. ಅಭಿಯಾನದ ಸ್ವರೂಪ, ಹೆಸರು, ಚಟುವಟಿಕೆಗಳು, ದಿನಾಂಕ, ಸಂಘಟನಾತ್ಮಕ ಬೆಂಬಲಗಳಂತಹ ವಿವರಗಳನ್ನು ನಿರ್ಧರಿಸಲು ಒಂದು ಉನ್ನತ ಸಮಿತಿ ರಚಿಸಲಾಗಿದೆ.

ಅಭಿಯಾನದ ಸ್ವರೂಪ, ಹೆಸರು, ಚಟುವಟಿಕೆಗಳು, ದಿನಾಂಕ, ಸಂಘಟನಾತ್ಮಕ ಬೆಂಬಲಗಳಂತಹ ವಿವರಗಳನ್ನು ನಿರ್ಧರಿಸಲು ಒಂದು ಉನ್ನತ ಸಮಿತಿ ರಚಿಸಲಾಗಿದೆ.

ಗದಗಿನ ತೋಂಟದ ಸಿದ್ಧರಾಮ ಶ್ರೀಗಳು, ಭಾಲ್ಕಿ ಹಿರೇಮಠದ ಶ್ರೀ ಬಸವಲಿಂಗ ಪಟ್ಟದ್ದೇವರು,
ಸಾಣೇಹಳ್ಳಿಯ ಪೂಜ್ಯ ಪಂಡಿತಾರಾಧ್ಯ ಶಿವಾಚಾರ್ಯ ಶ್ರೀಗಳು, ಹಂದಿಗುಂದ ವಿರಕ್ತಮಠದ ಪೂಜ್ಯ ಶಿವಾನಂದ ಮಹಾಸ್ವಾಮಿಗಳು, ಜಾಗತಿಕ ಲಿಂಗಾಯತ ಮಹಾಸಭಾದ ಪ್ರಧಾನ ಕಾರ್ಯದರ್ಶಿ ಎಸ್ ಎಂ ಜಾಮದಾರ್ ಈ ಸಮಿತಿಯ ಸದಸ್ಯರು. ನಾಡಿನ ಬಸವ ಭಕ್ತರಿಂದ ಮುಕ್ತವಾಗಿ ಸಲಹೆಗಳನ್ನು ಪಡೆದು ಅಭಿಯಾನವನ್ನು ಸಮಿತಿ ರೂಪಿಸಲಿದೆ ಎಂದು ತಿಳಿದು ಬಂದಿದೆ.

ಸಾಣೇಹಳ್ಳಿ ಶ್ರೀಗಳು ಏಕಾಂಗಿಯಾಗಿ ರೂಪಿಸಿ ಪರಿಣಾಮಕಾರಿಯಾಗಿ ನಡೆಸಿದ್ದ ‘ಮತ್ತೆ ಕಲ್ಯಾಣ’ ಅಭಿಯಾನ ಇನ್ನೂ ಜನರ ನೆನಪಿನಲ್ಲಿದೆ. ಈಗ ಬಹಳಷ್ಟು ಸ್ವಾಮೀಜಿಗಳು, ಸಂಘಟನೆಗಳು ಕೈ ಜೋಡಿಸುತ್ತಿರುವುದರಿಂದ ಅಭಿಯಾನವನ್ನು ಇನ್ನೂ ದೊಡ್ಡ ಪ್ರಮಾಣದಲ್ಲಿ, ರಾಜ್ಯದ ಲಿಂಗಾಯತ ಸಮುದಾಯದ ಸಾಮರ್ಥ್ಯವನ್ನು ಪ್ರಶ್ನಾತೀತವಾಗಿ ಪ್ರಕಟಿಸುವ ರೀತಿಯಲ್ಲಿ ರೂಪಿಸಬೇಕೆಂದು ನಿರ್ಧರಿಸಲಾಗಿದೆ.

ಇಂದು ಸಭೆಯಲ್ಲಿ ಅನೇಕ ಪೂಜ್ಯರು ಬಸವಣ್ಣನವರ ಹೆಸರಿನ ದುರ್ಬಳಕೆ ಮಾಡಿಕೊಂಡು RSSನವರು ಜನರ ದಾರಿ ತಪ್ಪಿಸುತ್ತಿದ್ದಾರೆ ಎಂದು ಕಳವಳ ವ್ಯಕ್ತ ಪಡಿಸಿದರು. ಯಾರಾದರು ಬಸವಣ್ಣನವರ ಹೆಸರನ್ನು ಹೇಳಿಕೊಂಡು ಕಾರ್ಯಕ್ರಮಗಳನ್ನು ಮಾಡುವಾಗ ಶರಣ ತತ್ವಗಳನ್ನು ತಿರಚುವ ಸಾಹಸಕ್ಕೆ ಕೈ ಹಾಕಿದಲ್ಲಿ ಯಾವ ಅನುಮತಿಗೂ ಕಾಯದೆ ಬಸವ ಭಕ್ತರು ಪ್ರತಿಭಟಿಸಬೇಕೆಂದು ಕರೆ ಕೊಟ್ಟರು.

ಸಂಘ ಪರಿವಾರದ ವಚನ ದರ್ಶನ ಪುಸ್ತಕಕ್ಕೆ ಪ್ರತಿಯಾಗಿ ಮಹಾಸಭಾ ಪ್ರಕಟಿಸಿರುವ ‘ವಚನ ದರ್ಶನ – ಮಿಥ್ಯ-ಸತ್ಯ’ಪುಸ್ತಕದ ಬಿಡುಗಡೆ ಕಾರ್ಯಕ್ರಮಗಳಲ್ಲಿ ಭಾಗವಹಿಸಲು ಒಕ್ಕೊಟ ನಿರ್ಧರಿಸಿದೆ.

ಹಲವಾರು ಪ್ರಮುಖರು ಸಭೆಯಲ್ಲಿ ಮಾತನಾಡಿದರು. ಎಲ್ಲಾ ನಿರ್ಣಯಗಳಿಗೆ ಸಭೆಯಲ್ಲಿದ್ದವರು ಚಪ್ಪಾಳೆ ಹೊಡೆದು ಸ್ವಾಗತಿಸಿದರೆಂದು ತಿಳಿದು ಬಂದಿದೆ.

ಈ ತರಹದ ಸಭೆಗಳಲ್ಲಿ ಬೇರೆ ಬೇರೆ ಅಭಿಪ್ರಾಯಗಳು ಬರುತ್ತವೆ. ಆದರೆ ಇಂದು ಯಾವುದೇ ಭಿನ್ನಾಭಿಪ್ರಾಯವಿಲ್ಲದ ಒಮ್ಮತ ಅಲ್ಲಿದವರಲ್ಲಿ ಕಂಡು ಬಂದಿತು, ಎಂದು ಸಭೆಯಲ್ಲಿ ಭಾಗವಹಿಸಿದ ಪ್ರಮುಖರೊಬ್ಬರು ಹೇಳಿದರು.

2017ರಲ್ಲಿ ಏನಾಯಿತು ಎಂದು ಎಲ್ಲರೂ ಸ್ಮರಿಸಿಕೊಳ್ಳುವಂತೆ ಮಾಡುವ ಸಮಯ ಬಂದಿದೆ, ಎಂದರು.

2017ರಲ್ಲಿ ಏನಾಯಿತು ಎಂದು ಎಲ್ಲರೂ ಸ್ಮರಿಸಿಕೊಳ್ಳುವಂತೆ ಮಾಡುವ ಸಮಯ ಬಂದಿದೆ, ಎಂದರು.