ಶಾಸ್ತ್ರಗಳಲ್ಲಿ ಇರುವುದನ್ನೇ ವಚನಗಳು ಸರಳ ಕನ್ನಡದಲ್ಲಿ ಹೇಳಿದವು: ಪೇಜಾವರ ಶ್ರೀ

ಬಸವಣ್ಣನವರ ಪ್ರಸಿದ್ಧ ವಚನವನ್ನು ಉಲ್ಲೇಖಿಸಿದರೂ, ಸುಮಾರು ಐದು ನಿಮಿಷ ಮಾತನಾಡಿದ ಪೇಜಾವರ ಶ್ರೀಗಳು ಒಮ್ಮೆಯೂ ಬಸವಣ್ಣನವರ ಹೆಸರನ್ನು ಹೇಳಲಿಲ್ಲ.

ಮಂಗಳೂರು

ವೈದಿಕ ಧರ್ಮದ ಶಾಸ್ತ್ರಗಳಲ್ಲಿರುವ ವಿಚಾರಗಳನ್ನು ವಚನಗಳು ಸುಲುಭ ಕನ್ನಡದಲ್ಲಿ ಮನೆಮನೆಗೆ ತಲುಪಿಸಿದವು, ಎಂದು ಉಡುಪಿ ಪೇಜಾವರ ಮಠದ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ ಶನಿವಾರ ಹೇಳಿದರು.

ಅಕ್ಕಮಹಾದೇವಿ ವೀರಶೈವ ಮಹಿಳಾ ಸಂಘದ ನೇತೃತ್ವದಲ್ಲಿ ನಗರದ ಕುದ್ಮುಲ್ ರಂಗರಾವ್ ಪುರಭವನದಲ್ಲಿ ನಡೆದ ರಾಜ್ಯಮಟ್ಟದ ವಚನ ಸಾಹಿತ್ಯ ಸಮ್ಮೇಳನದ ಸಾನಿಧ್ಯ ವಹಿಸಿ ಮಾತನಾಡಿದರು.

ಶಿವನ ತಲೆಯ ಮುಡಿಯಲ್ಲಿ ಅಡಗಿದ್ದ ಗಂಗೆಯನ್ನು ಭಗೀರಥ ಭೂಮಿಗೆ ತಂದಂತೆ, ಶಾಸ್ತ್ರಗಳಲ್ಲಿ ಇರುವುದನ್ನು ವಚನಕಾರರು ಮತ್ತು ದಾಸರು ಸರಳ ಕನ್ನಡದಲ್ಲಿ ಮನೆಮನೆಗೆ ಹಂಚಿದರು, ಎಂದು ಪೇಜಾವರ ಶ್ರೀಗಳು ಹೇಳಿದರು.

ಶಿವನ ತಲೆಯ ಮುಡಿಯಲ್ಲಿ ಅಡಗಿದ್ದ ಗಂಗೆಯನ್ನು ಭಗೀರಥ ಭೂಮಿಗೆ ತಂದಂತೆ, ಶಾಸ್ತ್ರಗಳಲ್ಲಿ ಇರುವುದನ್ನು ವಚನಕಾರರು ಮತ್ತು ದಾಸರು ಸರಳ ಕನ್ನಡದಲ್ಲಿ
ಮನೆಮನೆಗೆ ಹಂಚಿದರು

ಶಾಸ್ತ್ರಗಳಿಂದ ಬಂದ ವಚನಗಳು

ವಚನಗಳು ವೈದಿಕ ಶಾಸ್ತ್ರಗಳಿಂದ ಉಗಮಿಸಿದವು ಎಂದು ಸೂಚಿಸಲು ಕೆಲವು ಉದಾಹರಣೆಗಳನ್ನು ಪೇಜಾವರ ಶ್ರೀಗಳು ನೀಡಿದರು. ಮೊದಲು ಸಂಸ್ಕೃತ ಶ್ಲೋಕ ಹೇಳಿ ಆ ಸಂದೇಶಗಳು ಅಡಕವಾಗಿರುವ ವಚನಗಳನ್ನು ಉಲ್ಲೇಖಿಸಿದರು.

ಕರ್ಮಣ್ಯೇ ವಾಧಿಕಾರಸ್ತೇ
ಮಾ ಫಲೇಷು ಕದಾಚನ
ಮಾ ಕರ್ಮಫಲ ಹೇತುರ್ಭೂ
ಮಾ ತೇ ಸಂಗೋಸ್ತ್ವ ಕರ್ಮಣಿ

ಈ ಭಗವದ್ಗೀತೆಯ ಶ್ಲೋಕವನ್ನೇ ಶರಣರು ಸುಲುಭವಾಗಿ ‘ಕಾಯಕವೇ ಕೈಲಾಸ’ ಎಂದು ಕರೆದರು, ಎಂದು ಹೇಳಿ ಪೇಜಾವರ ಶ್ರೀಗಳು ಮತ್ತೊಂದು ಉದಾಹರಣೆ ಕೊಟ್ಟರು.

ದೇವರ ಆರಾಧನೆಯನ್ನು ನಾವು ಶುಚಿಸಂಭೂತರಾಗಿ ಮಾಡಬೇಕು ಎಂದು ಮತ್ತೊಂದು ಸಂಸ್ಕೃತ ಶ್ಲೋಕ ಹೇಳುತ್ತದೆ.

ಅಹಿಂಸಾ ಪ್ರಥಮಂ ಪುಷ್ಪಂ ಪುಷ್ಪಮಿನ್ದ್ರಿಯ ನಿಗ್ರಹಃ
ಸರ್ವಭೂತದಯಾಪುಷ್ಪಂ ಸತ್ಯಪುಷ್ಪಂ ವಿಶೇಷತಃ
ಜ್ಞಾನಪುಷ್ಪಂ ತಪಃಪುಷ್ಪಂ ಕ್ರಿಯಾಪುಷ್ಪಂ ತಥೈವ ಚ
ಧ್ಯಾನಂಚೈವಾಷ್ಟಮಂ ಪುಷ್ಪಂ ಏಭಿಸ್ತುಷ್ಯತಿ ಕೇಶವಃ

ಅದನ್ನೇ ತೆಗೆದುಕೊಂಡು ಕಳಬೇಡ, ಕೊಲಬೇಡ, ಹುಸಿಯ ನುಡಿಯಲು ಎಂದು ಒಂದು ವಚನ ಹೇಳುತ್ತದೆ. ಶಾಸ್ತ್ರಗಳಲ್ಲಿ ಅಡಕವಾಗಿದ್ದ ತತ್ವಗಳನ್ನು ಕಾಲಕಾಲಕ್ಕೆ ಶರಣರು, ದಾಸರು ಸುಲುಭವಾದ ಕನ್ನಡದಲ್ಲಿ ಉಳಿಸಿ, ಬೆಳೆಸಿದರು ಎಂದು ಪೇಜಾವರ ಶ್ರೀಗಳು ಹೇಳಿದರು.

ಶಾಸ್ತ್ರಗಳಲ್ಲಿ ಅಡಕವಾಗಿದ್ದ ತತ್ವಗಳನ್ನು ಕಾಲಕಾಲಕ್ಕೆ
ಶರಣರು, ದಾಸರು ಸುಲುಭವಾದ ಕನ್ನಡದಲ್ಲಿ ಉಳಿಸಿ, ಬೆಳೆಸಿದರು

ಈ ತತ್ವಗಳು ಮನೆಮನೆಗೆ ಮುಟ್ಟಿ, ಬದುಕಿನಲ್ಲಿ ಆಚರಣೆಗೆ ಬಂದರೆ ಸಮ್ಮೇಳನ ಯಶಸ್ವಿಯದಂತೆ. ಆ ಯಶಸ್ಸನ್ನು ಕಾಣುವ ಭಾಗ್ಯ ನಮ್ಮೆಲ್ಲರಿಗೂ ಆ ಭಗವಂತ ಕರುಣಿಸಲಿ ಎಂದು ಹೇಳಿದರು.

ಬಸವಣ್ಣನವರ ಪ್ರಸಿದ್ಧ ವಚನವನ್ನು ಉಲ್ಲೇಖಿಸಿದರೂ, ಸುಮಾರು ಐದು ನಿಮಿಷ ಮಾತನಾಡಿದ ಪೇಜಾವರ ಶ್ರೀಗಳು ಒಮ್ಮೆಯೂ ಬಸವಣ್ಣನವರ ಹೆಸರನ್ನು ಹೇಳಲಿಲ್ಲ.

ಪೇಜಾವರ ಶ್ರೀಗಳ ಭಾಷಣಕ್ಕೆ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಬಂದಿತು. ಸಮಾವೇಶದ ಅಧ್ಯಕ್ಷತೆ ವಹಿಸಿದ್ದ ಬಸವ ಸಮಿತಿ ಅಧ್ಯಕ್ಷ ಡಾ.ಅರವಿಂದ ಜತ್ತಿ ಪೇಜಾವರ ಶ್ರೀಗಳ ಪಕ್ಕದಲ್ಲಿಯೇ ಕುಳಿತು ಅವರ ಮಾತಿಗೆ ನಯವಾಗಿ ಚಪ್ಪಾಳೆ ತಟ್ಟಿದರು.

ಅರವಿಂದ ಜತ್ತಿ

ಸಮಾವೇಶದಲ್ಲಿ ಮಾತನಾಡುತ್ತ ಅರವಿಂದ ಜತ್ತಿ ಅವರು ‘ವಚನಗಳು ಕೇವಲ ಒಂದು ಸಾಹಿತ್ಯಿಕ ಪ್ರಕಾರವಲ್ಲ. ಪ್ರಜಾಪ್ರಭುತ್ವದ ತಾಯಿಬೇರು, ಅಂಗದಿಂದ ಲಿಂಗದೆಡಗೆ ಸಾಗುವ ಧರ್ಮ, ಜಾತಿ, ವರ್ಗ, ವರ್ಣ, ಲಿಂಗ, ತಾರತಮ್ಯಗಳನ್ನು ನಿರಾಕರಿಸುವ ಧರ್ಮ, ಚತುರ್ಮುಖ ಸಿದ್ಧಾಂತವಾಗಿದೆ ಎಂದರು.

ವಚನಗಳು ಒಂದು ಧರ್ಮಕ್ಕೆ ಸೀಮಿತವಲ್ಲ. ವಚನ ಸಾಹಿತ್ಯದಲ್ಲಿ ಬದುಕಿನ ಧರ್ಮ ಅಡಕವಾಗಿದೆ. ವಚನ ರಚನೆ ಕನ್ನಡ ಸಾಹಿತ್ಯದಲ್ಲಿಯೇ ಒಂದು ವಿಶಿಷ್ಟ ಘಟನೆ. ಸಾಮನ್ಯಾ ಸ್ತ್ರೀಯರು ಮತ್ತು ಕಾರ್ಯಜೀವಿಗಳೇ ಹೆಚ್ಚು ಸಂಖ್ಯೆಯಲ್ಲಿ ವಚನ ರಚನೆಕಾರರಾಗಿರುವುದು ಒಂದು ವಿಶೇಷ ಎಂದರು.

ಸುತ್ತೂರು ಶ್ರೀ

ಆಶೀರ್ವಚನ ನೀಡಿದ ಮೈಸೂರಿನ ಸುತ್ತೂರು ಮಠದ ಮಠಾಧೀಶ ಡಾ.ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ ‘ ಬಸವಣ್ಣನವರ ವಚನ ಎಲ್ಲ ಧರ್ಮಗಳ ಸೂತ್ರ ರೂಪದಲ್ಲಿದೆ. ಎಂದರು.

ಮಂಗಳೂರಿನಲ್ಲಿ ವಚನ ಸಾಹಿತ್ಯ ಸಮ್ಮೇಳನ ಆಯೋಜಿಸಿದ ಸಂಘಟಕರನ್ನು ಸ್ವಾಮೀಜಿ ಅಭಿನಂದಿಸಿದರು. ಗುರುಪುರದ ಜಂಗಮ ಮಠದ ಶ್ರೀ ರುದ್ರಮುನಿ ಮಹಾಸ್ವಾಮಿ ಸಾನ್ನಿಧ್ಯ ವಹಿಸಿದ್ದರು.

ಶಾಸಕ ವೇದವ್ಯಾಸ ಕಾಮತ್ ಸಮ್ಮೇಳನದ ಧ್ವಜಾರೋಹಣ ನೆರವೇರಿಸಿದರು. ಮಾಜಿ ಸಚಿವೆ ಲೀಲಾದೇವಿ ಪ್ರಸಾದ್ ಸಭೆಯ ಅಧ್ಯಕ್ಷತೆ ವಹಿಸಿದ್ದರು. ಕಟೀಲು ಹರಿನಾರಾಯಣ ಆಸ್ರಣ್ಣ ಅವರು ಸ್ಮರಣ ಸಂಚಿಕೆ ಬಿಡುಗಡೆಗೊಳಿಸಿದರು.

ಸಮ್ಮೇಳನದ ಸ್ವಾಗತ ಸಮಿತಿ ಅಧ್ಯಕ್ಷ ಎಸ್.ಪ್ರದೀಪ ಕುಮಾರ ಕಲ್ಕೂರ , ತುಳು ಸಾಹಿತ್ಯ ಅಕಾಡೆಮಿಯ ಮಾಜಿ ಅಧ್ಯಕ್ಷ ಎ.ಸಿ.ಭಂಡಾರಿ, ಮಂಗಳೂರು ವಿ.ವಿ. ಸಿಂಡಿಕೇಟ್ ಸದಸ್ಯರಾದ ಡಾ.ಕೆ.ಸಿ.ಮಹದೇಶ್, ಡಾ.ಎಸ್.ಬಿ.ಎಂ. ಪ್ರಸನ್ನ, ಅಕ್ಕಮಹಾದೇವಿ ವೀರಶೈವ ಮಹಾಸಂಘದ ಅಧ್ಯಕ್ಷೆ ಸುಮಾ ಮಾನ್ವಿ ಉಪಸ್ಥಿತರಿದ್ದರು.

ಸಮ್ಮೇಳನದ ಪ್ರಧಾನ ಸಂಚಾಲಕ ಸುರೇಂದ್ರ ರಾವ್ ಸ್ವಾಗತಿಸಿ, ಸುರೇಖಾ ಯಳವಾರ ವಂದಿಸಿದರು. ಡಾ.ಎಸ್.ಎಂ.ಶಿವಪ್ರಕಾಶ್ ಕಾರ್ಯಕ್ರಮ ನಿರೂಪಿಸಿದರು.

ಸನ್ಮಾನ

ವಿವಿಧ ಕ್ಷೇತ್ರಗಳ ಸಾಧಕರಾದ ಡಾ.ಹರಿಕೃಷ್ಣ ಪುನರೂರು, ಡಾ.ದೇವದಾಸ್ ಕಾಪಿಕಾಡ್, ಡಾ.ಗುರುಕಿರಣ್ , ಡಾ.ಶಾಲಿನಿ ನಾಲ್ವಾಡ್ ಬೆಂಗಳೂರು, ರಾಜೇಶ್ವರಿ ಹಿರೇಮಠ್ ಜಮಖಂಡಿ, ಮಲ್ಲಮ್ಮ ಯಳವಾರ ವಿಜಯಪುರ, ಮಹಮ್ಮದ್ ಯಾಸಿರ್ ಕಲ್ಲಡ್ಕ, ಜನಾರ್ದನ ಬುಡೋಳಿ, ಕೆ.ಯುವರಾಜ್ ಶಿವಮೊಗ್ಗ, ಎಂಆರ್‌ಪಿಎಲ್‌ನ ಬಿ.ಸುದರ್ಶನ್, ಶಶಿಕುಮಾರ್ ಭಟ್ ಇವರುಗಳಿಗೆ ಕಾಯಕ ರತ್ನ ಪ್ರಶಸ್ತಿ ನೀಡಿ ಗೌರವಿಸಲಾಯಿತು.

ಮಂಗಳೂರು ತಾಲೂಕು ಮಹಿಳಾ ಮಂಡಲಗಳ ಒಕ್ಕೂಟ ಮತ್ತು ಜನಸ್ನೇಹಿ ಚಾರಿಟೇಬಲ್ ಟ್ರಸ್ಟ್ ಸಂಸ್ಥೆಗಳನ್ನು ಗೌರವಿಸಲಾಯಿತು.