ಸೇಡಂ ರಥಕ್ಕೆ ಚಾಲನೆ: ಅಕ್ಕ ಗಂಗಾಂಬಿಕೆ ವಿರುದ್ಧ ವ್ಯಾಪಕ ಆಕ್ರೋಶ

“ಹಣ, ಜನ ಜಾಸ್ತಿ ಇದ್ದಕಡೆ ಹೋಗೋದು, ಬದ್ಧತೆ ಇಲ್ಲ ಎಂಬುದನ್ನು ತೋರಿಸುತ್ತದೆ.”

ಬೀದರ

ಸೇಡಂನಲ್ಲಿ ಸಂಘ ಪರಿವಾರ ಆಯೋಜಿಸಿರುವ ಭಾರತೀಯ ಸಂಸ್ಕೃತಿ ಉತ್ಸವಕ್ಕೆ ಪ್ರಚಾರ ನೀಡಲು ‘ಬಸವ ರಥ’ ಮಂಗಳವಾರ ಬೀದರದಿಂದ ಹೊರಟಿತು.

ಆ ಕಾರ್ಯಕ್ರಮದಲ್ಲಿ ಕಾಣಿಸಿಕೊಂಡು ಬೆಂಬಲ ಸೂಚಿಸಿದ ಅಖಿಲ ಭಾರತ ಲಿಂಗವಂತ ಹರಳಯ್ಯ ಪೀಠದ ಡಾ. ಅಕ್ಕ ಗಂಗಾಂಬಿಕೆ ಅಕ್ಕನವರ ವಿರುದ್ಧ ಬಸವ ಭಕ್ತರು ವ್ಯಾಪಕವಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಇದರ ಬಗ್ಗೆ ಮಾತನಾಡಲು ಪ್ರಯತ್ನಿಸಿದ ಬಸವ ಮೀಡಿಯಾದ ಹಲವಾರು ಕರೆಗಳನ್ನು ಅಕ್ಕ ಗಂಗಾಂಬಿಕೆ ಸ್ವೀಕರಿಸಲಿಲ್ಲ. ವಾಟ್ಸ್ ಆಪ್ ಸಂದೇಶಗಳಿಗೂ ಸ್ಪಂದಿಸಲಿಲ್ಲ.

ಅವರ ಪರವಾಗಿ ಮಾತನಾಡಿದ ಬೀದರಿನ ಬಸವಕೇಂದ್ರದ ಮುಖ್ಯಸ್ಥ ಟೋಕ್ರೆ ಶಿವಶಂಕರ
ನಾನು ಮತ್ತು ಅಕ್ಕ ಮಂಗಳವಾರ ಒಂದು ಪ್ರತಿಭಟನೆಯಲ್ಲಿ ಪಾಲ್ಗೊಂಡು ನಂತರ ಅವರ ಕಾರ್ಯಕ್ರಮಕ್ಕೆ ಹೋದೆವು.

“ಅಕ್ಕ ಸಂಘ ಪರಿವಾರದ ರಥಕ್ಕೆ ಚಾಲನೆ ನೀಡಿಲ್ಲ, ಯಾವುದೇ ವೇದಿಕೆ ಹಂಚಿಕೊಂಡಿಲ್ಲ, ಬರೀ ಶುಭ ಹಾರೈಸಿದರು. ಅಲ್ಲಿ ನಮ್ಮವರೇ (ಲಿಂಗಾಯತರು) ಇದ್ದರು, ಅವರೇ ಕರೆದಿದ್ದರಿಂದ ಹೋದೆವು,” ಎಂದು ಟೋಕ್ರೆ ಹೇಳಿದರು.

ಬಸವರಾಜ ಪಾಟೀಲ ಸೇಡಂ ‘ನಮ್ಮವರಾದರೂ’ RSS ಪರವಾಗಿ ದಶಕಗಳಿಂದ ಈ ಭಾಗದಲ್ಲಿ ಕೆಲಸ ಮಾಡಿರುವುದು ಅಕ್ಕನವರಿಗೆ ಗೊತ್ತಿಲ್ಲವೇ ಎಂದು ಕೇಳಿದಾಗ ಅದನ್ನು ಅವರನ್ನೇ ಕೇಳಿ, ಎಂದು ಟೋಕ್ರೆ ಹೇಳಿದರು.

ಇತ್ತೀಚೆಗೆ ಕಲಬುರ್ಗಿಯಲ್ಲಿ ನಡೆದ ಸೌಹಾರ್ದ ಕರ್ನಾಟಕ ಸಂಘಟನೆ ಆಯೋಜಿಸಿದ್ದ ‘ಬಹುತ್ವ ಸಂಸ್ಕೃತಿ ಭಾರತೋತ್ಸವ’ ಸಮಾವೇಶದಲ್ಲಿ ಅಕ್ಕ ಗಂಗಾಂಬಿಕೆ ಭಾಗವಹಿಸಿ ಮಾತನಾಡಿದರು.

“ಶೋಷಣಕಾರಿಗಳು ಭಾರತೀಯ ಸಮಾಜವನ್ನು ಧರ್ಮದ ವ್ಯವಸ್ಥೆಯಲ್ಲಿ ವಿಭಾಗಿಸಿ ಬಹು ಸಮಾಜದ ಮೇಲೆ ಅನ್ಯಾಯ ಎಸಗಿದ್ದಾರೆ. ವಿದೇಶಿಯರನ್ನು ಎದುರಿಸಿ ತಡೆಯುವ ಶಕ್ತಿಯೂ ಅವರಲ್ಲಿ ಇರಲಿಲ್ಲ,” ಎಂದು ಸೇಡಂ ಉತ್ಸವದ ಆಯೋಜಕರ ವಿರುದ್ಧ ಭಾಷಣವೂ ಮಾಡಿದ್ದರು.

RSSನವರು ಬಸವಣ್ಣನವರನ್ನ ಹೆಸರನ್ನು ಬಳಸಿಕೊಂಡು ತಮ್ಮ ಸಿದ್ದಾಂತವನ್ನು ಹೇರುವ ಪ್ರಯತ್ನ ನಿರಂತರವಾಗಿ ಮಾಡುತ್ತಿದ್ದರೂ ಅಕ್ಕನಂತವರು ಅದನ್ನು ಬೆಂಬಲಿಸುತ್ತಿರುವುದು ಶೋಚನೀಯ ಸಂಗತಿ ಎಂಬ ಅಭಿಪ್ರಾಯ ಸಾಮಾಜಿಕ ಜಾಲತಾಣಗಳಲ್ಲಿ ಕೇಳಿಬರುತ್ತಿದೆ.

ಅಕ್ಕ ಗಂಗಾಬಿಕೆಯ ವಿರುದ್ಧ ಬಂದಿರುವ ಕೆಲವು ಪ್ರತಿಕ್ರಿಯೆಗಳು

ಮೀನಾಕ್ಷಿ ಬಾಳಿ: ಆಘಾತವಾಗಿದೆ

ಅಕ್ಕ ಗಂಗಾಂಬಿಕಾ ಅವರು ಕೋಮುವಾದಿಗಳ ರಥಕ್ಕೆ ಚಾಲನೆ ನೀಡಿದ್ದು ನೋಡಿ ಆಘಾತವಾಗಿದೆ. ಬಸವಾದಿ ಶರಣರ ವಚನಗಳನ್ನು ನಿಜವಾಗಿ ಅರ್ಥ ಮಾಡಿಕೊಂಡವರಾರು ಹೀಗೆ ಮಾಡಲು ಸಾಧ್ಯವಿಲ್ಲ.

ಸೇಡಂ ಪಾಟೀಲನಂಥ ಆಷಾಢಭೂತಿಗಳೊಂದಿಗೆ ಗುರುತಿಸಿಕೊಳ್ಳುವ ಅನಿವಾರ್ಯತೆ ಇವರಿಗೇನಿದೆಯೋ ನನಗಂತೂ ಅರ್ಥವಾಗುತ್ತಿಲ್ಲ. ಇವರಿಗೆ ನಾನು ವೈಯಕ್ತಿಕವಾಗಿಯೂ ಆರ್.ಎಸ್. ಎಸ್ ನವರ ಬಹುರೂಪಗಳ ಕುರಿತು ತಿಳಿಸಿ ಹೇಳುವ ಪ್ರಯತ್ನ ಮಾಡಿದ್ದೇನೆ. ಆದಾಗ್ಯೂ ಅವರಲ್ಲಿ ಅರಿವಿನ ಕಿರಣ ಸ್ಫುರಿಸುತ್ತಿಲ್ಲವಾದರೆ ಬಸವ ಭಕ್ತರೆ ಅವರಿಗೆ ಪಾಠ ಕಲಿಸಬೇಕು ಅಷ್ಟೇ.
(ಸೌಹಾರ್ದ ಕರ್ನಾಟಕ)

ಪ್ರಭುಲಿಂಗ ಮಹಾಗಾಂವ್ಕರ್: ಬದ್ಧತೆ ಇಲ್ಲದವರು

ಹೋದ್ರೆ ವಿಷ ಕೊಟ್ಟು ಹೋಗಿ, ಲಿಂಗ ಬಿಚ್ಚಿಟ್ಟು ಹೋಗಿ ಎಂದು ಹೇಳಿದ್ದರೂ ಇವರು ಹೋಗಿದ್ದಾರೆ. ಇವರಿಗೆ ಏನು ಹೇಳಬೇಕು, ಇದಕ್ಕಿಂತ ಹೆಚ್ಚಿಗೇನು ಹೇಳಬೇಕು.

ಅಕ್ಕಾ ಅವರನ್ನು ನಾವು ಪ್ರಶ್ನಿಸಿದರೆ, ಆರೆಸ್ಸೆಸ್ ನವರು ನಮ್ಮ ಮಠದವರೆಗೂ ಬಂದರೆ ನಾವು ಏನು ಮಾಡಬೇಕು, ಬಂದವರಿಗೆ ಹಾಗೇ ಕಳಿಸಬಾರದೆಂದು ಚಾಲನೆ ಕೊಟ್ಟು ಕಳಿಸಿದ್ದೇನೆ ಎಂದು ಅವರು ನೆಪ ಹೇಳಿ ಸರಿದುಕೊಂಡು ಬಿಡುತ್ತಾರೆ.

ಹಣ, ಜನ ಜಾಸ್ತಿ ಇದ್ದಕಡೆ ಹೋಗೋದು, ಬದ್ಧತೆ ಇಲ್ಲ ಎಂಬುದನ್ನು ತೋರಿಸುತ್ತದೆ.
(ಜಿಲ್ಲಾಧ್ಯಕ್ಷರು, ಜಾಗತಿಕ ಲಿಂಗಾಯತ ಮಹಾಸಭಾ, ಕಲಬುರಗಿ)

ಬಾಲಾಜಿ ಕುಂಬಾರ: ಸೈದ್ಧಾಂತಿಕ ಬದ್ಧತೆಯಿಲ್ಲ

ಬಹುತೇಕರು ಬಸವಣ್ಣನಿಗೆ ಗುರುವಾಗಿ ಸ್ವೀಕರಿಸಿದರೂ‌ ‘ವಚನತತ್ವ’ ಆಶಯಗಳನ್ನು ಒಪ್ಪಿಕೊಂಡು ಮುನ್ನಡೆಸಲು ಸಿದ್ಧರಿಲ್ಲ, ಸೈದ್ಧಾಂತಿಕ ಬದ್ಧತೆ ಎಂಬುದು ಮೊದಲೇ ಇಲ್ಲ.

‘ಕರೆದ ಕಡೆಗೆ ಹೋಗಿ ಡುಂ ಡುಂ ಬಾರಿಸುತ್ತಾರೆ, ಕೇಳಿದ್ರೆ ನಮ್ಗೆ ಎಲ್ಲರೂ ಬೇಕ್ರಿ, ಅವ್ರೂ ನಮ್ಮವ್ರೇ’ ಎಂದು ಸಮರ್ಥಿಸಿಕೊಳ್ಳುತ್ತಾರೆ.

ಒಟ್ಟಿನಲ್ಲಿ ‘ನಾ ಬೇಳಿಬೇಕು’ ಅಷ್ಟೇ!
(ಪತ್ರಕರ್ತ)

ಸಿದ್ದಪ್ಪ ಮೂಲಗೆ: ಬೆನ್ನಿಗೆ ಚೂರಿ

ಬಸವಣ್ಣನವರನ್ನು ಹೀಗೂ ಅವಮಾನಿಸಿ ಕೊಲ್ಲಬಹುದು. ಛೇ!

ಆರೆಸ್ಸೆಸ್ ಕಾಲಾಳು ಬಸವರಾಜ ಪಾಟೀಲ ಸೇಡಂ ಅವರು ಹೊರಡಿಸಿರುವ ಬಸವ ರಥಕ್ಕೆ (ಭಾಗವತ್ ರಥ) ಬೀದರಿನ ಅಕ್ಕ ಗಂಗಾಂಬಿಕೆ ಪಾಟೀಲ ಶುಭ ಹಾರೈಸಿದರು.

ಎಂ.ಎಂ. ಕಲಬುರ್ಗಿಯವರ ಎದೆಯಿಂದ ಚಿಮ್ಮಿದ ರಕ್ತ ಇನ್ನೂ ಆರಿಲ್ಲ. ಒಂದೆಡೆ ಲಿಂಗಾಯತ ತತ್ವ ಉಳಿಸಲು ಪ್ರಾಣದ ಹಂಗು ತೊರೆದು ಹೊರಾಡುತ್ತಿರುವ ನಿಜಗುಣಾನಂದ ಸ್ವಾಮೀಜಿ, ಸಾಣೇಹಳ್ಳಿ ಶ್ರೀಗಳು, ಇತರರು. ಮತ್ತೊಂದು ಕಡೆ ಗಂಗಾಂಬಿಕೆ ಪಾಟೀಲ ಮತ್ತು ಇತರರು ಬಸವಣ್ಣನವರ ಬೆನ್ನಿಗೆ ಚೂರಿ ಹಾಕುತ್ತಿದ್ದಾರೆ.

ಒಂದು ಸ್ಪಷ್ಟತೆಯಾಗಲಿ, ಬದ್ಧತೆಯಾಗಲಿ, ಕನಿಷ್ಠ ಕಾಳಜಿಯಾಗಲಿ ಇಲ್ಲದವರಿಂದ ಇದಲ್ಲದೇ ಇನ್ನೇನು ನಿರೀಕ್ಷಿಸಲು ಸಾಧ್ಯ?
(ಪತ್ರಕರ್ತ)

ಓಂಕಾರೇಶ್ವರ ಶ್ರೀ: ಬಸವ ದ್ರೋಹ

ಬಸವಣ್ಣ ಅವರ ತತ್ವ ಸಿದ್ದಾಂತ ಮೇಲೆ ಆಗುತ್ತಿರುವ ದಾಳಿ ತಪ್ಪಿಸಲು ಬಸವಪರ ಭಕ್ತರು ಹೋರಾಟ ಮಾಡ್ತಾ ಇದ್ರೆ, ಅಕ್ಕಾ ಅವರು ಮನುವಾದಿಗಳು ನಡೆಸುವ ರಥಯಾತ್ರೆಗೆ ಚಾಲನೆ ಕೊಡುತ್ತಾರಂದ್ರೆ ಏನು ಅರ್ಥ …

ಮನುವಾದಿಗಳಿಂದ ಬಸವಣ್ಣನವರ ವಿಚಾರಗಳ ಮೇಲೆ ಸತತ ದಾಳಿ ನಡೆಯುತ್ತಿದೆ. ಮನುವಾದಿ ಆರೆಸ್ಸೆಸ್ ಬಸವ ಧರ್ಮಕ್ಕೆ ಅಪಚಾರ ಮಾಡುತ್ತಿದೆ. ಅವರ ಕಾರ್ಯಕ್ಕೆ ಚಾಲನೆ ನೀಡಿರುವ ಬಸವಗಿರಿಯ ಗಂಗಾಬಿಕ ಅಕ್ಕ ಅವರು ದಯವಿಟ್ಟು ಇಷ್ಟಲಿಂಗ ತೊರೆದು, ಲಿಂಗಾಯತ ಧರ್ಮ ಬಿಟ್ಟು ಮನುವಾದಿ ಸಂಘ ಸೇರಬೇಕು. ಅಕ್ಕ ಅವರದು ಬಸವದ್ರೋಹ ಅದಕ್ಕಾಗಿ ಅವರಿಗೆ ಧಿಕ್ಕಾರ, ಧಿಕ್ಕಾರ.

ಅಕ್ಕ ಅವರು ಮಾಡಲು ಹೊರಟಿರುವದು ವಚನ ವಿಜಯೋತ್ಸವ ಅಲ್ಲ, ಅದು ಮನುವಾದಿ ಉತ್ಸವ. ಯಾವುದೇ ಕಾರಣಕ್ಕೂ ಬಸವ ಧರ್ಮದ ಮಠಾಧಿಪತಿಗಳು, ಶರಣರು ಅಲ್ಲಿಗೆ ಹೋಗಬಾರದು.
(ಸಂಚಾರಿ ಜಂಗಮ)

ಶ್ರೀಶೈಲ ಜಿ. ಮಸೂತೆ: ತೋರಿಕೆಯ ಬಸವತತ್ವ

ಕಲಬುರಗಿಯಲ್ಲಿ ಏಕಸಂಸ್ಕೃತಿ ಹೇರಿಕೆ ವಿರುದ್ಧ ಬಹುತ್ವ ಸಂಸ್ಕೃತಿ ಕಾರ್ಯಕ್ರಮದಲ್ಲೂ ಅವರು ಪಾಲ್ಗೊಂಡದ್ದು ಯಾಕೆ? ಇದೆಂಥ ಎಡಬಿಡಂಗಿತನ.

ಮನಸಾಕ್ಷಿ ಇದ್ದರೆ ಬಸವಗುರು ಕೊಟ್ಟ ಇಷ್ಟಲಿಂಗವನ್ನು ಬಿಚ್ಚಿಡಬೇಕು. ಗಂಗಾಂಬಿಕೆಯವರು ನಡೆಸುವ ಎಲ್ಲಾ ಕಾರ್ಯಕ್ರಮಗಳನ್ನು ಲಿಂಗಾಯತ ಧರ್ಮೀಯರು ಬಹಿಷ್ಕರಿಸಬೇಕು.
(ಲಿಂಗಾಯತ ಧರ್ಮ ಅಧ್ಯಯನ ಕೇಂದ್ರ ಬೆಂಗಳೂರು)