ಲಿಂಗಾಯತ ಯಾವುದೇ ಉದ್ಭವಲಿಂಗಿಗಳು ಸ್ಥಾಪಿಸಿದ ಧರ್ಮವಲ್ಲ

ಸಮುದಾಯವನ್ನು ಅಜ್ಞಾನದಲ್ಲಿರಿಸಿ ಬದುಕು ಕಟ್ಟಿಕೊಳ್ಳುವ ಹುನ್ನಾರ

ಗಂಗಾವತಿ

ಕಾವಿಕಾಷಾಂಬರವ ಹೊದ್ದು ಕಾಯವಿಕಾರಕ್ಕಾಗಿ ತಿರುಗುವ ಕರ್ಮಿಗಳ ಮುಖವ ನೋಡಲಾಗದು.

ಸೆಪ್ಟಂಬರ್ 19 ರಂದು ವೀರಶೈವ ಲಿಂಗಾಯತ ಏಕತಾ ಸಮಾವೇಶದ ಪೂರ್ವಭಾವಿ ಸಭೆಯಲ್ಲಿ ದಿಂಗಾಲೇಶ್ವರ ಸ್ವಾಮಿಗಳು ಮಾತಾಡಿರುವುದು ನೋಡಿದರೆ ಕುಂಬಳಿ ಕಾಯಿ ಕಳ್ಳ ಯಾರು ಅಂದ್ರೆ ನಾವು ಅಂತ ಹೆಗಲ ಮುಟ್ಟಿ ನೋಡಿಕೊಂಡಂತೆ ಆಗಿದೆ.

ಬಸವಣ್ಣನವರು ಈ ನೆಲದ ಶ್ರಮಿಕ ಜೀವಿಗಳಿಗಾಗಿ ಕಟ್ಟಿದ ಈ ನೆಲದ ಧರ್ಮ ಲಿಂಗಾಯತ. ಇದಾವುದೆ ಉದ್ಭವಲಿಂಗಿಗಳು ಸ್ಥಾಪಿಸಿದ ಧರ್ಮವಲ್ಲ. ಈ ನೆಲದ ಮೂಲ ನಿವಾಸಿಗಳಿಗೆ ತಮ್ಮದೆ ದೇವರು ಧರ್ಮವಿಲ್ಲದ ಸಂಧರ್ಭದಲ್ಲಿ ಆ ಶೋಷಿತ ಸಮುದಾಯಕ್ಕಾಗಿ ಹುಟ್ಟಿದ್ದು ಲಿಂಗಾಯತ ಧರ್ಮ.

ಲಿಂಗಾಯತ ಪ್ರತ್ಯೇಕ ಧರ್ಮವೆಂದು ಈಗಾಗಲೆ ಎಲ್ಲಾ ಸಂಶೋಧನೆಗಳಿಂದ ಸಾಬೀತಾಗಿದೆ. ಆದರೂ ವೀರಶೈವ ಎಂದು ಎಂದೂ ಜನರಲ್ಲಿ ಗೊಂದಲ ಮೂಡಿಸುವ ಪ್ರಯತ್ನಕ್ಕೆ ಕಾರಣವೇನು?

“ದೇಶದೇಶವ ತಿರುಗಿ ಮಾತುಗಳ ಕಲಿತು
ಗ್ರಾಸಕ್ಕೆ ತಿರುಗುವ ದಾಸಿವೇಸಿಯ ಮಕ್ಕಳ ವಿರಕ್ತನೆಂಬೆನೆ
ತನುವಿನಲಿಪ್ಪ ತಾಮಸ ಕಳೆಯದೆ
ಕಾಬವರ ಕಂಡು ವಿರಕ್ತರೆಂದಡೆ ಕುಂಭೀಪಾಕ ನಾಯಕನರಕ ತಪ್ಪದು ಅಮುಗೇಶ್ವರಾ “

ಎನ್ನುವ ಅಮುಗೆ ರಾಯಮ್ಮನ ವಚನ ಇಂತವರನ್ನೆ ನೋಡಿ ಬರೆದಿರಬೇಕು ಎನಿಸುತ್ತದೆ.

ಇಂದು ಲಿಂಗಾಯತರು ಮತ್ತು ಲಿಂಗಾಯತ ಸಮುದಾಯ ಏಚ್ಚರಗೊಂಡಿರುವ ಪರಿ ನೋಡಿ ತಮ್ಮ ಭವಿಷ್ಯದ ಗತಿ ಏನೂ ಎಂದು ದಿಂಗು ಬಡಿಸಿಕೊಂಡವರಂತಾಗಿದೆ ದಿಂಗಾಲೇಶ್ವರ ಮತ್ತು ಪಟಾಲಂ ಸ್ವಾಮಿಗಳ ಸ್ಥಿತಿ. ಇಂದು ಲಿಂಗಾಯತ ಸಮುದಾಯಗಳಲ್ಲಿ ಬಸವಾದಿ ಶರಣರ ವಿಚಾರಧಾರೆಗಳು ಶರವೇಗದಂತೆ ಮನೆ ಮನಗಳನ್ನು ತಲುಪುತ್ತಿವೆ. ಒಂದು ವೇಳೆ ಈ ಸಮುದಾಯಗಳು ಶರಣರ ವಿಚಾರಗಳಿಂದ ಏಚ್ಚೆತ್ತುಕೊಂಡರೆ ತಮ್ಮ ಉದರ ಪೋಷಣೆಯ ಗತಿ ಏನು ಇಂದು ಬಹುತೇಕ ಸ್ವಾಮಿಗಳಿಗೆ ಕಾಡುತ್ತಿರುವುದು ಮಾತ್ರ ಸತ್ಯ.

ಸನಾತನ ಧರ್ಮ ಎಂದರೆ ಕೇವಲ ಹಳೆಯದನ್ನು ಹೇಳುತ್ತಾ ಹೋಗುವುದೆ ಆಗಿದೆ. ಜನರನ್ನು ಬರೀ ಪೂಜೆ, ಭಜನೆ, ಜೈಕಾರಕ್ಕೆ ಸೀಮಿತ ಮಾಡಿ ತಮ್ಮ ಬದುಕು ಕೊಟ್ಟಿಕೊಂಡಿರುವ ಬಹುತೇಕ ಪರೋಪಜೀವಿಗಳಿಗೆ ಇಂದು ತಮ್ಮ ಅಸ್ಥಿತ್ವದ ಪ್ರಶ್ನೆಯಾಗಿದೆ. ಮತ್ತೆ ಮತ್ತೆ ಹೊಸತನವನ್ನು ನೀಡುವ ಶರಣರ ತತ್ವ ಸಿದ್ದಾಂತಗಳಿಗೆ ಭಂಡ ಧೈರ್ಯದಿಂದ ದಾಳಿ ಮಾಡುವ ಪ್ರಯತ್ನ ಭಾಗ ಈ ದಿಕೆಟ್ಟ ದಿಂಗಾಲೇಶ್ವರ ಸ್ವಾಮಿಗಳ ಇಂದಿನ ಮಾತುಗಳು.

“ಅರಿವಂ ಪೊಸಯಿವೂದೆ ಧರ್ಮಂ
ಅದಂ ಕೆಡಿಪುದೇ ಅಧರ್ಮಂ”

ಎನ್ನುವ ಆದಿ ಕವಿ ಪಂಪನ ಈ ಮಾತುಗಳು ದಿಂಗಾಲೇಶ್ವರ ಸ್ವಾಮಿಗಳಿಗೆ ನೆನಪಾಗಲಿಲ್ಲವೆ?

ಇಂದಿಗೂ ಜನಸಾಮಾನ್ಯರಲ್ಲಿ ಅರಿವು ಮೂಡಿಸುವ ಕೆಲಸ ಮಾಡದೆ ಕೇವಲ ತಮ್ಮ ಸ್ವಾರ್ಥಕ್ಕಾಗಿ ಸಮಾಜ ಮತ್ತು ಸಮುದಾಯವನ್ನು ಅಜ್ಞಾನದ ಕತ್ತಲೆಯಲ್ಲಿಟ್ಟು ಅವರನ್ನು ವಿಚಾರ ಶೂನ್ಯರನ್ನಾಗಿಸಿ ತಾವು ಬದುಕು ಕಟ್ಟಿಕೊಂಡ ಕೆಲವೊಬ್ಬ ಮಠಾಧೀಶರಿಗೆ ಇಂದು ಬಸವಣ್ಣ ಅವರ ಅಳಿವು ಉಳಿವಿನ ಪ್ರಶ್ನೆಯಾಗಿದ್ದಾರೆ.

ಬಸವಣ್ಣನವರ ಧರ್ಮ ಜನಸಾಮಾನ್ಯರ ಧರ್ಮ. ಇಲ್ಲಿ ಖಾವಿ ತೊಟ್ಟ ಯಾವ ಗುರು ವಿರಕ್ತರ ಮಠಗಳ ಕುರಿತಾಗಿ ಇಡಿಯಾಗಿ ವಚನ ಸಾಹಿತ್ಯದಲ್ಲಿ ಎಲ್ಲಿಯೂ ಹೇಳಿಲ್ಲ, ವಚನಗಳನ್ನು ಬರೆದಿಲ್ಲ. ಇಂದಿನ ಬಹುತೇಕ ವಿರಕ್ತ ಪರಂಪರೆಯ ಸ್ವಾಮಿಗಳು ಬಸವಣ್ಣನೆ ಧರ್ಮ ಗುರು, ವಚನಗಳೆ ಧರ್ಮ ಗ್ರಂಥ, ಲಿಂಗಾಯತ ಸ್ವತಂತ್ರ ಧರ್ಮವೆಂದು ಒಪ್ಪಿಕೊಂಡು ನಡೆದಿದ್ದಾರೆ ಅದರಂತೆ ಬದುಕುತ್ತಿದ್ದಾರೆ.

ಆದರೆ ಜಾತಿ ಶ್ರೇಷ್ಠತೆಯ ವ್ಯಸನ ತುಂಬಿಕೊಂಡಂತ ದಿಂಗಾಲೇಶ್ವರರು ಮತ್ತವರ ಪಟಲಾಂ ಮತ್ತೆ ಸಮಾಜದಲ್ಲಿ ಗೊಂದಲ ಹರಡಲು ‘ವೀರಶೈವ ಲಿಂಗಾಯತ ಏಕತಾ ಸಮಾವೇಶ’ ಗೊಂದಲದ ಸಮಾವೇಶವನ್ನು ಮಾಡಲು ಹೊರಟಿದ್ದಾರೆ.

ವೀರಶೈವ ಮತ್ತು ಲಿಂಗಾಯತ ತದ್ವಿರುದ್ದ

*ಇತಿಹಾಸ ಪುರುಷ ಬಸವಣ್ಣ ಲಿಂಗಾಯತಕ್ಕೆ ಧರ್ಮಗುರು.
ವೀರಶೈವಕ್ಕೆ ಲಿಂಗೋದ್ಭವ ರೇಣುಕಾಚಾರ್ಯ ಧರ್ಮ ಗುರು.

*ಲಿಂಗಾಯತದಲ್ಲಿ 770 ಅಮರಗಣಂಗಳೆಲ್ಲ ನಾಯಕರು.
ವೀರಶೈವದಲ್ಲಿ 770 ಅಮರಗಣಂಗಳನ್ನು ಲೆಕ್ಕಕ್ಕೆ ತೆಗೆದುಕೊಳ್ಳುವುದಿಲ್ಲ.

*ಲಿಂಗಾಯತರು ಏಕದೇವೋಪಾಸಕರು. ಇಷ್ಟಲಿಂಗಯೋಗವೆ ಅವರ ಪೂಜಾ ವಿಧಾನ.
ವೀರಶವದಲ್ಲಿ ಬಹುದೇವತೋಪಾಸಕರು.

*ಲಿಂಗಾಯತದಲ್ಲಿ ಹೋಮ ಹವನ ಮತ್ತು ವೇದ ಘೋಷಗಳಿಲ್ಲ. ವೀರಶೈವರಲ್ಲಿ ಇವೆಲ್ಲ ಇವೆ.

*ಮೂಢನಂಬಿಕೆಗಳ ಅಗರಗಳಾದ ಜ್ಯೋತಿಷ್ಯ ಮತ್ತು ಪಂಚಾಂಗವನ್ನು ಲಿಂಗಾಯತರು ನಂಬುವುದಿಲ್ಲ. ವೀರಶೈವ ಇವು ಎಲ್ಲವನ್ನೂ ಒಪ್ಪುತ್ತೆ.

• ಲಿಂಗಾಯತದಲ್ಲಿ ಆಚಾರವೆ ಸ್ವರ್ಗ , ಅನಾಚಾರವೆ ನರಕ ವೆಂದು ಸ್ವರ್ಗ ನರಕಗಳ ಪರಿಕಲ್ಪನೆ ಇಲ್ಲ. ವೀರಶೈವ ಎಲ್ಲವನ್ನು ಒಪ್ಪುತ್ತಾರೆ.

*ಲಿಂಗಾಯತದಲ್ಲಿ ಕಾಯಕವೆ ಪ್ರಧಾನ ಸಿದ್ದಾಂತ. ವೀರಶೈವರಲ್ಲಿ ಕರ್ಮ ಸಿದ್ಧಾಂತವೆ ಪ್ರಧಾನ.

*ಲಿಂಗಾಯತರಿಗೆ ಅರಿವೆ ಗುರು. ವೀರಶೈವರಿಗೆ ಜಾತಿ ಜಂಗಮರೆ ಗುರು.

*ಲಿಂಗಾಯತದಲ್ಲಿ ಎನಗಿಂತ ಕಿರಿಯರಿಲ್ಲ ಎನ್ನುವ ಸಿದ್ದಾಂತ. ವೀರಶೈವರರಲ್ಲಿ ಶ್ರೇಷ್ಠತೆ ವ್ಯಸನದ ಸಿದ್ದಾಂತ.

ಹೀಗೆ ಬರೆಯುತ್ತಾ ಹೋದರೆ ಎಂದೂ ವೀರಶೈವ ಮತ್ತು ಲಿಂಗಾಯತ ಒಂದಾಗಲು ಸಾಧ್ಯವೆ ಇಲ್ಲ.

ಇಷ್ಟಾದರೂ ದಿಂಗಾಲೇಶ್ವರ ಮತ್ತವರ ಬಳಗದ ಹಿಂದಿನ ಕುತಂತ್ರಗಳನ್ನು ಲಿಂಗಾಯತ ಸಮುದಾಯ ಅರಿಯಬೇಕು. ತಮ್ಮ ಹೊಟ್ಟೆ ಪಾಡಿನ ಮತ್ತು ತಮ್ಮ ಅಸ್ಥಿತ್ವದ ಪ್ರಶ್ನೆಯಾಗಿ ಈ ಸಮಾವೇಶವನ್ನು ಮಾಡುತ್ತಿದ್ದಾರೆ. ಇದರಿಂದ ಯಾವ ಲಿಂಗಾಯತನಿಗೂ ಏನೂ ಒಳಿತಾಗುವುದಿಲ್ಲ.

ಮತ್ತೆ ಸಮುದಾಯವನ್ನು ಅಜ್ಞಾನದಲ್ಲಿರಿಸಿ ತಮ್ಮ ಬದುಕು ಕಟ್ಟಿಕೊಳ್ಳಬೇಕು ಎನ್ನುವುದರ ಹುನ್ನಾರದ ಭಾಗ. ಇಂದು ಲಿಂಗಾಯತ ಸಮುದಾಯ ಮತ್ತು ಯುವಜನತೆ ಏಚ್ಚೆತ್ತುಗೊಂಡಿದೆ. ಇವರ ಇಂತಹ ಕುತಂತ್ರಕ್ಕೆ ಲಿಂಗಾಯತ ಸಮುದಾಯ ಮತ್ತು ಯುವಜನತೆ ಬಲಿಯಾಗುವುದಿಲ್ಲ.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/BC3ULQcPxmhAhKS4XV9R1G