ಪ್ರತಿ ತಾಲೂಕಿನಲ್ಲಿ ‘ಬಸವಾದಿ ಶರಣರ ಹಿಂದೂ ಸಮಾವೇಶ’: ಸೂಲಿಬೆಲೆ

ಬಸವ ಸಂಸ್ಕೃತಿ ಅಭಿಯಾನಕ್ಕೆ ಪ್ರತಿಯಾಗಿ ಹಿಂದುತ್ವ ಸಂಘಟನೆಗಳ ಆಂದೋಲನ

ಬೆಳಗಾವಿ

ಇಂದು ಸುಪ್ರೀಂ ಕೋರ್ಟಿನಿಂದಲೂ ಛೀಮಾರಿ ಹಾಕಿಸಿಕೊಂಡಿರುವ ಕನ್ನೇರಿ ಸ್ವಾಮಿಗೆ ಬೆಂಬಲ ಸೂಚಿಸಲು ‘ಬಸವಾದಿ ಶರಣರ ಹಿಂದೂ ಸಮಾವೇಶ’ವನ್ನು ಹಿಂದೂ ಸಂಘಟನೆಗಳು ನಡೆಸಲಿವೆ ಎಂದು ಯುವ ಬ್ರಿಗೇಡ್ ನಾಯಕ ಚಕ್ರವರ್ತಿ ಸೂಲಿಬೆಲೆ ಬುಧವಾರ ಹೇಳಿದರು.

ನೇರವಾಗಿ ಹೇಳದಿದ್ದರೂ ಬಸವ ಸಂಸ್ಕೃತಿ ಅಭಿಯಾನಕ್ಕೆ ಪ್ರತಿಯಾಗಿ, ಲಿಂಗಾಯತ ಮಠಾದೀಶರ, ಮುಖಂಡರ ವಿರುದ್ಧವಾಗಿಯೂ ಆಂದೋಲನ ನಡೆಯಲಿದೆ ಎಂದು ಸ್ಪಷ್ಟವಾಗಿ ಸೂಚಿಸಿದರು.

ಇಂದು ನಗರದಲ್ಲಿ ಕನ್ನೇರಿ ಸ್ವಾಮಿ ಪರವಾಗಿ ನಡೆದ ಹಿಂದೂ ಸಂಘಟನೆಗಳ ಸಭೆಯ ನಂತರ ಮಾಧ್ಯಮಗಳ ಜೊತೆ ಕೆಲವು ಮುಖಂಡರು ಮಾತನಾಡಿದರು.

ಹಿಂದೂ ಸಮಾಜವನ್ನು ಮತ್ತು ‘ವೀರಶೈವ ಹಿಂದೂ’ ಸಮಾಜವನ್ನು ಚೂರು ಚೂರು ಮಾಡಲು ರಾಜ್ಯ ಸರಕಾರ ಪ್ರಯತ್ನಿಸುತ್ತಿದೆ, ಎಂದು ಸೂಲಿಬೆಲೆ ಆರೋಪಿಸಿದರು. ಇದಕ್ಕೆ ವಿರುದ್ಧವಾಗಿ ಹಿಂದೂ ಸಂಘಟನೆಗಳು ಎಲ್ಲಾ ತಾಲೂಕುಗಳಲ್ಲಿ ಬೃಹತ್ ಆಂದೋಲನ ಹಮ್ಮಿಕೊಳ್ಳಲಿವೆ. ಕನ್ನೇರಿ ಸ್ವಾಮಿ ಮೇಲಿನ ನಿರ್ಬಂಧವನ್ನು ರದ್ದು ಪಡಿಸಲು 5,000 ವ್ಯಕ್ತಿಗಳಿಂದ ಹಸ್ತಾಕ್ಷರ ಪಡೆಯಲಾಗುವುದು. ನಂತರ 500 ಜನರ ನಿಯೋಗ ತಹಶೀಲ್ದಾರರನ್ನು ಭೇಟಿಯಾಗಿ ಮನವಿ ಸಲ್ಲಿಸಲಾಗುವುದು.

ಜೊತೆಗೆ ಪ್ರತಿ ತಾಲೂಕಿನಲ್ಲಿ ‘ಬಸವಾದಿ ಶರಣರ ಹಿಂದೂ ಸಮಾವೇಶ’ವನ್ನೂ ಆಯೋಜಿಸಲಾಗುವುದು. ಇದರಲ್ಲಿ ‘ವೀರಶೈವ ಹಿಂದೂ’ ಸಮಾಜ ಮಾತ್ರವಲ್ಲದೆ ಇಡೀ ಹಿಂದೂ ಸಮಾಜ ಭಾಗವಹಿಸಲಿದೆ ಎಂದು ಸೂಲಿಬೆಲೆ ಹೇಳಿದರು.

ಸಚಿವ ಎಂ.ಬಿ. ಪಾಟೀಲ್ ಅವರ ಕ್ಷೇತ್ರ ಬಬಲೇಶ್ವರದಲ್ಲಿ ಶುರುವಾಗಿ ಬಸವಾದಿ ಶರಣರ ಹಿಂದೂ ಸಮಾವೇಶ ದಾವಣಗೆರೆಯಲ್ಲಿ ಸಮಾರೋಪಗೊಳ್ಳುವುದು. “ಎಲ್ಲಿ ಸಮಸ್ಯೆಗಳು ಆರಂಭವಾದವೋ ಅಲ್ಲೇ ಪರಿಹಾರ ಹುಡುಕಬೇಕು. ಈ ಕ್ಷಣದಿಂದಲೇ ಸಮಾವೇಶಕ್ಕೆ ಶುರು ಮಾಡಲಾಗುವುದು,” ಎಂದು ಸೂಲಿಬೆಲೆ ಹೇಳಿದರು.

ಎಲ್ಲೆಡೆ ಸಮಾವೇಶದಲ್ಲಿ ಭಾವಹಿಸುವಂತೆ ಕನ್ನೇರಿ ಸ್ವಾಮಿಗೂ ಆಹ್ವಾನಿಸಲಾಗುವುದು. ನಂತರದ ದಿನಗಳಲ್ಲಿ ಬಸವಾದಿ ಶರಣರ ತತ್ವವನ್ನು intellectual ಆಗಿ ಜನರಿಗೆ ತಿಳಿಸಲು ಪ್ರತ್ಯೇಕ ಪ್ರಯತ್ನ ಮಾಡಲಾಗುವುದು ಎಂದು ಸೂಲಿಬೆಲೆ ತಿಳಿಸಿದರು.

ಅದಕ್ಕೆ ಮುಂಚೆ ಮಾತನಾಡಿದ ವಕೀಲ ಎಂ.ಬಿ. ಜಿರ್ಲಿ “ಇಂದಿನ ಸಭೆಯ ಸಾನಿಧ್ಯವನ್ನು ಕನ್ನೇರಿ ಸ್ವಾಮಿ ವಹಿಸಿದ್ದರು. ಅವರ ಹಿಂದೆ ಇಡೀ ಹಿಂದೂ ಸಮಾಜವಿದೆ ಎಂದು ಧೈರ್ಯ ತುಂಬಿದ್ದೇವೆ,” ಎಂದು ಹೇಳಿದರು.

“ಬಸವಾದಿ ಶರಣರ ಮೂಲ ಚಿಂತನೆಯಲ್ಲಿ ಅದೃಶ್ಯ ಕಾಡಸಿದ್ದೇಶ್ವರ ಮಠ ನಡೆಸುತ್ತಿದ್ದಾರೆ. ಕನ್ನೇರಿ ಸ್ವಾಮಿ ಹಿಂದೂ ಸಮಾಜ ಮುಂದೆ ತೆಗೆದುಕೊಂಡು ಹೋಗುತ್ತಿರುವ ಆಧುನಿಕ ರಾಮದಾಸರು,” ಎಂದು ಜಿರ್ಲಿ ತಿಳಿಸಿದರು.

ಅಲ್ಲಿದ್ದ ಪತ್ರಕರ್ತರು ಲಿಂಗಾಯತ ಮಠಾಧೀಶರ ವಿರುದ್ಧ ಅವಾಚ್ಯ ಪದ ಬಳಸಿದ್ದರ ಬಗ್ಗೆ ನೀವು ಯಾರೂ ವಿಷಾದ ವ್ಯಕ್ತ ಪಡಿಸುತ್ತಿಲ್ಲ ಎಂದು ಕೇಳಿದರು.

ಅದಕ್ಕೆ ಸೂಲಿಬೆಲೆ ಲಿಂಗಾಯತ ಸ್ವಾಮೀಜಿಗಳು ಹಿಂದೂ ದೇವರನ್ನು ಅವ್ಯಾಚ ಪದಗಳಲ್ಲಿ ನಿಂದಿಸಿದ್ದಾರೆ. ಅದಕ್ಕೆ ಕನ್ನೇರಿ ಸ್ವಾಮಿ ಸಹಜವಾದ ಸಾತ್ವಿಕ ಆಕ್ರೋಶದಿಂದ ಮಾತನಾಡಿದ್ದಾರೆ, ಎಂದು ಹೇಳಿದರು.

ಯಾವ ಯಾವ ಕಾಲದಲ್ಲೋ ನಡೆದ ಘಟನೆಗಳನ್ನು ಬಳಸಿಕೊಂಡು ಅಭಿಯಾನದಲ್ಲಿ ಪಾಲ್ಗೊಂಡ ಪೂಜ್ಯರನ್ನು ಯಾಕೆ ಟಾರ್ಗೆಟ್ ಮಾಡುತ್ತಿದೀರ ಎಂದು ಹಲವಾರು ಪತ್ರಕರ್ತರು ಕೇಳಿದರು.

ಸೂಲಿಬೆಲೆ ಉತ್ತರ ಕೊಡಲು ಚಡಪಡಿಸುತ್ತಿದ್ದಂತೆ, ಅದೇ ದಿಕ್ಕಿನಲ್ಲಿ ಹಲವಾರು ಪ್ರಶ್ನೆಗಳು ಬಂದು ಸುದ್ದಿಗೋಷ್ಠಿಯಲ್ಲಿ ಗೊಂದಲವಾಯಿತು. ಮುಂದುವರೆಯಲು ಸಾಧ್ಯವಾಗದೆ ಸೂಲಿಬೆಲೆ ‘ಕೇಳ್ರಪ್ಪ ಕೇಳ್ರಪ್ಪ’ ಎನ್ನುವುದು ಕೇಳಿಸಿತು.

ಪಕ್ಕದಲ್ಲಿ ಕುಳಿತಿದ್ದ ಬಸನ ಗೌಡ ಯತ್ನಾಳ್ – “ಉತ್ತರ ಕೇಳ್ತಾ ಇಲ್ಲ, ನೀವೇ ಪ್ರಶ್ನೆ ಕೇಳ್ತೀರಾ. ಪ್ರಶ್ನೆಗೆ ಉತ್ತರ ಕೊಡುವ ತನಕ ಸುಮ್ಮನಿರಬೇಕು” ಎಂದು ಪತ್ರಕರ್ತರ ಮೇಲೆ ಕಿಡಿ ಕಾರಿದರು.

“ಉತ್ತರ ಕೇಳಿಸಿಕೊಳ್ಳಲಿಲ್ಲ ಅಂತಂದ್ರೆ ನೀವು ಕನ್ನೇರಿ ಶ್ರೀಗಳಿಗಿಂತ ಕೆಟ್ಟದಾಗಿ ಮಾತಾಡುತ್ತಿದ್ದೀರಾ ಅಂತ ಅರ್ಥ,” ಎಂಬ ಮಾತೂ ಸೂಲಿಬೆಲೆ ಅವರ ಬಾಯಿಂದ ಬಂದಿತು.

ಆಗ ಮಾತನಾಡಿದ ಜಿರ್ಲಿ “ವೀರಶೈವ ಲಿಂಗಾಯತ ಸ್ವಾಮಿಗಳು ನೀವು ಮಾಂಸ ತಿನ್ನಿ, ಸೆರೆ ಕುಡೀರಿ, ದೇವರಗಳನ್ನ ಹೊಳೆಗೆ ಒಗೀರಿ, ಕುಂಕುಮ ಅರಿಶಿನ ಬಳೆ ಹಾಕೋಬೇಡ್ರಿ ಅಂತ ಹೇಳ್ತಾರೆ. ಇಲ್ಲಿಯವರಿಗೆ ಸಹಿಸಿಕೊಂಡು ಬಂದಿದ್ದೇವೆ.

ಇಲ್ಲಿಯವರೆಗೆ ಸ್ವಾಮೀಜಿಗಳು ಮಾತಾಡಿದ್ದಾರೆ, ಇನ್ನು ಮುಂದೆ ಸಮಾಜ ಮಾತನಾಡುತ್ತದೆ ಎಂದು ಎಚ್ಚರಿಕೆ ಕೊಡ್ತಾ ಇದ್ದೀವಿ. ಇಡೀ ವೀರಶೈವ ಲಿಂಗಾಯತ ಸಮಾಜದ ಆಕ್ರೋಶ ಕನ್ನೇರಿ ಸ್ವಾಮಿಯ ಬಾಯಿಂದ ಬಂದಿದೆ. ಇಲ್ಲಿಗೆ ಅವರು ನಿಲ್ಲಿಸದಿದ್ದರೆ ಇದು ಮುಂದುವರೆಯುತ್ತದೆ,” ಎಂದು ಹೇಳಿದರು.

ನಂತರ ಎಲ್ಲಾ ಮುಖಂಡರು ಎದ್ದು ನಿಂತು ಸುದ್ದಿಗೋಷ್ಠಿಯನ್ನು ಅರ್ಧದಲ್ಲಿಯೇ ಮುಗಿಸಿದರು.

ಚಕ್ರವರ್ತಿ ಸೂಲಿಬೆಲೆ, ಅರವಿಂದ ಬೆಲ್ಲದ, ಸಿ.ಸಿ. ಪಾಟೀಲ, ಶಶಿಕಲಾ ಜೊಲ್ಲೆ, ಬಸನಗೌಡ ಪಾಟೀಲ ಯತ್ನಾಳ, ರಮೇಶ್ ಕತ್ತಿ, ಅಪ್ಪು ಪಟ್ಟಣಶೆಟ್ಟಿ, ವಕೀಲ ಎಂ.ಬಿ. ಜಿರ್ಲಿ ಮತ್ತಿತರರು ಸುದ್ದಿಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.

ಕನ್ನೇರಿ ಸ್ವಾಮಿ ಸುದ್ದಿಗೋಷ್ಠಿಗೆ ಹಾಜರಾಗಲಿಲ್ಲ.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/H81yNL3dGRcHb7EBxL5oqr