ಅಧ್ಯಕ್ಷರ ಆಯ್ಕೆಗೆ ಇಂದು ವೀರಶೈವ ಮಹಾಸಭಾದ ಮಹತ್ವದ ಸಭೆ

ಬೆಂಗಳೂರು

ಅಖಿಲ ಭಾರತ ವೀರಶೈವ ಮಹಾಸಭಾದ ಕಾರ್ಯಕಾರಿ ಸಮಿತಿಯ ಸಭೆಯನ್ನು ಮಂಗಳವಾರ ನಗರದಲ್ಲಿ ಕರೆಯಲಾಗಿದೆ.

ಶಾಮನೂರು ಅವರು ಲಿಂಗೈಕ್ಯರಾದ ನಂತರ ತೆರವಾದ ರಾಷ್ಟ್ರೀಯ ಅಧ್ಯಕ್ಷರ ಸ್ಥಾನಕ್ಕೆ ಸೂಕ್ತವಾದ ವ್ಯಕ್ತಿಯನ್ನು ತರುವ ಜವಾಬ್ದಾರಿ ಸಮಿತಿಯ 65 ಸದಸ್ಯರ ಮೇಲಿದೆ.

ಸ್ಪರ್ಧೆಯ ಮುಂಚೂಣಿಯಲ್ಲಿರುವ ಸಚಿವ ಈಶ್ವರ ಖಂಡ್ರೆ ಹಾಗೂ ಪ್ರಬಲ ಸ್ಪರ್ಧಿಯೆಂದು ಬಿಂಬಿತವಾಗಿರುವ ಉದ್ಯಮಿ ಪ್ರಭಾಕರ ಕೋರೆ ಒಮ್ಮತದ ಅಭ್ಯರ್ಥಿಯ ಆಯ್ಕೆಗೆ ಕರೆ ಕೊಟ್ಟಿದಾರೆ.

ಸಮಾಜದಲ್ಲಿ ಬಿರುಕಿಗೆ ಅವಕಾಶ ಕೊಡದೆ ಎಲ್ಲರ ಸಹಮತದಿಂದ ಹೊಸ ಅಧ್ಯಕ್ಷರ ಆಯ್ಕೆಯಾಗಲಿ ಎಂದು ಕೋರೆ ಬಸವ ಮೀಡಿಯಾಗೆ ತಿಳಿಸಿದ್ದರು.

ಆದರೆ ಕೆಲವು ವೈದಿಕ ಮಾಧ್ಯಮಗಳು ಹೊಸ ಅಧ್ಯಕ್ಷರ ಆಯ್ಕೆಗೆ ಚುನಾವಣೆಯ ನಡೆಯಲಿದೆ ಎಂದು ವರದಿ ಮಾಡುತ್ತಿವೆ. ಖಂಡ್ರೆ, ಕೋರೆಯವರ ಜೊತೆ ಯಡಿಯೂರಪ್ಪ, ಸುತ್ತೂರು ಸ್ವಾಮೀಜಿ, ಕೊನೆಗೆ ದಿಂಗಾಲೇಶ್ವರ ಸ್ವಾಮೀಜಿಯ ಹೆಸರನ್ನೂ ಅವು ಸೂಚಿಸಿವೆ.

ಮಹಾಸಭಾದ ಕಾರ್ಯಕಾರಿ ಸಮಿತಿಯ ಸದಸ್ಯರೊಬ್ಬರು ಇದೆಲ್ಲಾ ಕುತಂತ್ರದ ವರದಿಗಳು. ದಿಂಗಾಲೇಶ್ವರ ಸ್ವಾಮೀಜಿಯಿರುವುದು ಭಾವೈಕ್ಯತೆಯ ಮಠ, ಅದು ಲಿಂಗಾಯತ ಮಠವಲ್ಲ. ಅವರು ಹೇಗೆ ಇಲ್ಲಿ ಅಭ್ಯರ್ಥಿಯಾಗಲು ಸಾಧ್ಯ, ಎಂದು ಪ್ರಶ್ನಿಸಿದರು.

“ಇದೆಲ್ಲಾ ಗೊಂದಲವೆಬ್ಬಿಸುವ ಪ್ರಯತ್ನ. ಒಮ್ಮತದ ಅಭ್ಯರ್ಥಿ ಆಯ್ಕೆಯಾಗಿ ಶಾಮನೂರು ಅವರ ಕೆಲಸವನ್ನು ಮುಂದುವರೆಸುವುದು ಕೆಲವು ಲಿಂಗಾಯೇತರ ಸಂಘಟನೆಗಳಿಗೆ ಇಷ್ಟವಿಲ್ಲ. ಅವರಿಗೆ ಪೂರಕವಾದ ಅಭ್ಯರ್ಥಿಯನ್ನು ತರಲು ತೆರೆಮರೆಯ ಹಿಂದೆ ಪ್ರಯತ್ನ ನಡೆದಿರಬಹುದು,” ಎಂದು ಹೇಳಿದರು.

“ಚುನಾವಣೆಯಾದರೆ ಮಹಾ ಪೋಷಕರಾಗಿರುವ ಸುಮಾರು 22,000 ಸದಸ್ಯರಿಗೆ ಮತ ಹಾಕುವ ಅವಕಾಶವಿದೆ. ಇವರ ಮೇಲೆ ಖಂಡ್ರೆ ಕುಟುಂಬದ ಪ್ರಭಾವವಿದೆ. ಆದರೆ ನಾಳೆಯ ಸಭೆಯ ನಂತರವೇ ಸ್ಪಷ್ಟ ಚಿತ್ರಣ ದೊರಕಲಿದೆ,” ಎಂದು ಅವರು ಅಭಿಪ್ರಾಯ ಪಟ್ಟರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/FoRS2gZkHkaEzqaRtWk0ZP