ಬಸವ ಜಯಂತಿಯಲ್ಲಿ ರೇಣುಕಾಚಾರ್ಯರ ಭಾವಚಿತ್ರ ಸೇರಿಸಲು ಶಂಕರ ಬಿದರಿ ಆದೇಶ

ಕಳೆದ ಒಂದು ವರ್ಷದಿಂದ ವಿಶ್ವಗುರು ಬಸವಣ್ಣನವರ ಹೆಗಲ ಮೇಲೆ ಪುರಾಣದ ರೇಣುಕಾಚಾರ್ಯರನ್ನ ಕೂರಿಸುವ ಪ್ರಯತ್ನ ನಡೆಯುತ್ತಿದೆ. ಬಿದರಿ ಸುತ್ತೋಲೆ ಇದರ ಮುಂದುವರೆದ ಭಾಗವಷ್ಟೇ.

ಬೆಂಗಳೂರು

ಬಸವ ಜಯಂತಿಯ ಸಂಭ್ರಮ ರಾಜ್ಯದಲ್ಲಿ ಹರಡುತ್ತಿರುವಂತೆಯೇ ಅಖಿಲ ಭಾರತ ವೀರಶೈವ ಮಹಾಸಭಾದ ರಾಜ್ಯಾಧ್ಯಕ್ಷ ಶಂಕರ ಬಿದರಿ ಶರಣ ಸಮಾಜದಲ್ಲಿ ದೊಡ್ಡ ಬಿರುಕು ಮೂಡಿಸುವ ಪ್ರಯತ್ನ ಮಾಡಿದ್ದಾರೆ.

ಈ ವರ್ಷದಿಂದ ಬಸವ ಜಯಂತಿ ಮೆರವಣಿಗೆಯಲ್ಲಿ ರೇಣುಕಾಚಾರ್ಯರ ಭಾವಚಿತ್ರ ಸೇರಿಸಬೇಕೆಂದು ಬಿದರಿ ಏಪ್ರಿಲ್ 2ರಂದು ಸುತ್ತೋಲೆ ಹೊರಡಿಸಿದ್ದಾರೆ.

ಮಹಾಸಭಾದ ರಾಜ್ಯ, ಜಿಲ್ಲಾ, ತಾಲೂಕು ಘಟಕಗಳಿಗೆ ಹೊರಡಿಸಿರುವ ಸುತ್ತೋಲೆಯಲ್ಲಿರುವ ಮುಖ್ಯವಾದ ನಿರ್ದೇಶನಗಳು:

1) ಏಪ್ರಿಲ್ 30 ಎಲ್ಲಾ ಜಿಲ್ಲೆಗಳಲ್ಲಿ ಮತ್ತು ರಾಜಧಾನಿಯಲ್ಲಿ ಹೊರಡುವ ಬಸವ ಜಯಂತಿ ಮೆರವಣಿಗೆಯಲ್ಲಿ ವಿಶ್ವಗುರು ಬಸವಣ್ಣನವರ ಭಾವಚಿತ್ರದೊಂದಿಗೆ ರೇಣುಕಾಚಾರ್ಯರ ಹಾಗೂ ಪ್ರಮುಖ ಶರಣರ ಭಾವಚಿತ್ರಗಳನ್ನು ಪ್ರದರ್ಶಿಸಬೇಕು.

2) ಇದಕ್ಕಾಗಿ ಮಹಾಸಭಾದ ರಾಜ್ಯ ಘಟಕದ ವತಿಯಿಂದ ಬಸವೇಶ್ವರರ, ರೇಣುಕಾಚಾರ್ಯರ ಹಾಗೂ ಪ್ರಮುಖ ಶರಣರ ಭಾವಚಿತ್ರಗಳ ಮೂರು ಪ್ರತಿಗಳನ್ನು ಪ್ರತಿ ತಾಲೂಕಿನ ಘಟಕಕ್ಕೆ ನೀಡಲಾಗುವುದು.

ಬಿದರಿಯವರು ಸಹಿ ಮಾಡಿರುವ ಈ ನಿರ್ದೇಶನ 18 ಮಾರ್ಚ ಸಭೆಯಲ್ಲಿ ರಾಜ್ಯ, ಜಿಲ್ಲಾ ಘಟಕದ ಪದಾಧಿಕಾರಿಗಳು ತೆಗೆದುಕೊಂಡ ನಿರ್ಣಯವೆಂದು ಸುತ್ತೋಲೆ ತಿಳಿಸುತ್ತದೆ.

ಬಸವ ಜಯಂತಿಯಲ್ಲಿ ರೇಣುಕಾಚಾರ್ಯರ ಭಾವಚಿತ್ರ ಸೇರಿಸುವ ಆಲೋಚನೆಯನ್ನು ಫೆಬ್ರವರಿ 27ರಂದು ಬೆಂಗಳೂರಿನಲ್ಲಿ ನಡೆದ ‘ವಚನ ದರ್ಶನ ಮಿಥ್ಯ-ಸತ್ಯ’ ಪುಸ್ತಕದ ಬಿಡುಗಡೆ ಸಮಾರಂಭದಲ್ಲಿ ಮೊದಲ ಬಾರಿಗೆ ಬಿದರಿ ಪ್ರಸ್ತಾಪಿಸಿದರು. ಅದಕ್ಕೆ ತಕ್ಷಣ ಸಭಿಕರು ಎದ್ದು ಪ್ರತಿಭಟಿಸಿದ ಮೇಲೆ ಅವರು ಕೆಲವು ನಿಮಿಷಗಳು ಭಾಷಣ ನಿಲ್ಲಿಸಬೇಕಾಯಿತು.

ಕಳೆದ ಒಂದು ವರ್ಷದಿಂದ ರೇಣುಕಾಚಾರ್ಯರನ್ನು ಮುನ್ನೆಲೆಗೆ ತರುವ, ಬಸವಣ್ಣನವರ ಹೆಗಲ ಮೇಲೆ ಅವರನ್ನು ಕೂರಿಸುವ ಪ್ರಯತ್ನಗಳು ವ್ಯವಸ್ಥಿತವಾಗಿ ನಡೆಯುತ್ತಾ ಬಂದಿವೆ.

ಈ ಘಟನೆಗಳನ್ನು ಗಮನಿಸಿ:

ಮಂಡ್ಯ, ನವೆಂಬರ್ 2024

ವೀರಶೈವ ಸಂಘಟನೆಗಳು ರೇಣುಕಾಚಾರ್ಯರ ಮತ್ತು ಬಸವಣ್ಣನವರ ಜಯಂತೋತ್ಸವವನ್ನು ನವಂಬರ್ 19 ಆಚರಿಸಿದವು. ಇದನ್ನು ಜಾಗತಿಕ ಲಿಂಗಾಯತ ಮಹಾಸಭಾ, ರಾಷ್ಟ್ರೀಯ ಬಸವ ದಳ, ಲಿಂಗಾಯತ ಮಹಾಸಭಾ ಮುಂತಾದ ಬಸವ ಪರ ಸಂಘಟನೆಗಳು ನೇರವಾಗಿ ವಿರೋಧಿಸಿದ್ದವು.

ಅಹ್ವಾನ ಪತ್ರಿಕೆಯಲ್ಲಿ ಹೆಸರು ಹಾಕಿದ್ದ ಮೂರು ವಿರಕ್ತ ಮಠಗಳ ಸ್ವಾಮೀಜಿಗಳೂ ಜಂಟಿ ಜಯಂತೋತ್ಸವಕ್ಕೆ ಹೋಗಲು ನಿರಾಕರಿಸಿದರು.

ಗಜೇಂದ್ರಗಡ, ಡಿಸೆಂಬರ್ 2024

ಪಟ್ಟಣದಲ್ಲಿ ನಡೆಯುತ್ತಿದ್ದ ಬಸವ ಪುರಾಣದ ಪ್ರವಚನದಲ್ಲಿ ಕಾಣಿಸಿಕೊಂಡ ಶ್ರೀಶೈಲ ಪಂಚಪೀಠದ ಡಾ. ಚನ್ನಸಿದ್ದರಾಮ ಶಿವಾಚಾರ್ಯರು ಬಸವಣ್ಣನವರು, ಪಂಚಪೀಠಗಳು ಶತ್ರುಗಳಲ್ಲ ಎಂದು ಹೇಳಿದರು.

ಬಸಣ್ಣನವರಿಗೂ ಪಂಚಪೀಠಗಳು ಬೇಕು, ಪಂಚಪೀಠಗಳಿಗೆ ಬಸವಣ್ಣನವರೂ ಬೇಕು ಎನ್ನುವದಕ್ಕೆ ಈ ಕಾರ್ಯಕ್ರಮಕ್ಕೆ ನಾವು ದಯಮಾಡಿಸಿರುವುದು ಪ್ರತ್ಯಕ್ಷ ಸಾಕ್ಷಿ, ಎಂದು ಹೇಳಿದರು.

ನಂತರ ತೇರದಾಳದಲ್ಲಿ ನಡೆದ ಇನ್ನೊಂದು ಕಾರ್ಯಕ್ರಮದಲ್ಲಿ ಲಿಂಗಾಯತರು ವೀರಶೈವರು, ಬಸವಣ್ಣ ಪಂಚಪೀಠಗಳು ಒಂದೇ ಎಂದೂ ಹೇಳಿದರು.

ಜಮಖಂಡಿ, ಜನವರಿ 2025

ಜಮಖಂಡಿ ಬಳಿಯ ತುಂಗಳ ಗ್ರಾಮದಲ್ಲಿ ಬಸವೇಶ್ವರರ ಪುತ್ಥಳಿಯನ್ನು ಶ್ರೀಶೈಲ ಪಂಚಾಚಾರ್ಯ ಪೀಠದ ಚನ್ನಸಿದ್ಧರಾಮ ಶ್ರೀಗಳು ಅನಾವರಣಗೊಳಿಸಿದರು. ಜತೆಗೆ ಶ್ರೀಗಳ ಅಡ್ಡಪಲ್ಲಕ್ಕಿ ಮೆರವಣಿಗೆಯೂ ಗ್ರಾಮದಲ್ಲಿ ನಡೆಯಿತು. ಶ್ರೀಗಳ ಅಡ್ಡಪಲ್ಲಕ್ಕಿ ಮುಂದೆ ಹೋದಂತೆ ಅವರ ಹಿಂದೆ ಸ್ವಲ್ಪ ದೂರದಲ್ಲಿ ಬಸವಣ್ಣನವರ ಭಾವಚಿತ್ರವನ್ನೂ ಕೂಡ ಮೆರವಣಿಗೆಯಲ್ಲಿ ತೆಗೆದುಕೊಂಡು ಹೋಗಲಾಯಿತು.

ಆಶೀರ್ವಚನ ನೀಡಿದ ಶ್ರೀಗಳು ಪಂಚ ಪೀಠದ ಜಗದ್ಗುರುಗಳೊಬ್ಬರ ಮೂಲಕವೇ ಬಸವೇಶ್ವರರ ಪುತ್ಥಳಿ ಅನಾವರಣಗೊಂಡಿದೆ. ಇದು ಬಸವ ತತ್ವದ ಮತ್ತು ಪಂಚ ಪೀಠಗಳ ನಡುವೆ ಯಾವುದೇ ಕಂದಕವಿಲ್ಲ ಎಂದು ತೋರಿಸುತ್ತದೆ ಎಂದು ಹೇಳಿದರು. ಬಸವಣ್ಣನವರು ಎಲ್ಲರನ್ನು ಸೇರಿಸಿ ಒಂದು ಸಮಾಜವನ್ನು ಕಟ್ಟಿದರು, ಇಂದು ಅವರ ಹೆಸರಿನಲ್ಲಿಯೇ ಅದನ್ನು ಒಡೆಯುವ ಕೆಲಸವಾಗುತ್ತಿದೆ ಎಂದೂ ಹೇಳಿದರು.

ಮಾರ್ಚ್ 2025

ರಾಜ್ಯ ಸರಕಾರದ ವತಿಯಿಂದ ನಡೆದ ರೇಣುಕಾಚಾರ್ಯ ಜಯಂತಿಯ ಜತೆಗೆ ಹಲವಾರು ಜಿಲ್ಲೆಗಳಲ್ಲಿ ವೀರಶೈವ ಮತ್ತು ಸಂಘ ಪರಿವಾರದ ಸಂಘಟನೆಗಳಿಂದಲೂ ಜಯಂತೋತ್ಸವವನ್ನು ಆಚರಿಸಲಾಯಿತು. ಬಹಳಷ್ಟು ಕಡೆ ರೇಣುಕಾಚಾರ್ಯರ ಚಿತ್ರದೊಂದಿಗೆ ವಿಶ್ವಗುರು ಬಸವಣ್ಣನವರ ಭಾವಚಿತ್ರವನ್ನೂ ಮೆರವಣಿಗೆಯಲ್ಲಿ ತೆಗೆದುಕೊಂಡು ಹೋಗಲಾಯಿತು.

ಬೆಳಗಾವಿಯಲ್ಲಿ ತಮ್ಮನ್ನು ಕೇಳದೇ ರೇಣುಕಾ ಜಯಂತಿ ಪ್ರಚಾರಕ್ಕೆ ತಮ್ಮ ಹೆಸರು ಭಾವಚಿತ್ರ ಹಾಕಿದ್ದಾರೆಂದು ನಾಗನೂರು ಶ್ರೀಗಳು ಹೇಳಿಕೆ ನೀಡಿದರು.

ರೇಣುಕಾ ಜಯಂತಿಯ ಅಬ್ಬರ ಹೆಚ್ಚಿದಂತೆ, ಪಂಚಪೀಠಗಳು ವೀರಶೈವರು ಲಿಂಗಾಯತರು ಒಂದೇ ಎಂದು ಒತ್ತಿ ಹೇಳಿದಷ್ಟೂ ಎರಡು ಸಮುದಾಯಗಳ ನಡುವೆ ಘರ್ಷಣೆ ಹೆಚ್ಚಾಗಿದೆ ಎನ್ನುವುದೂ ಇಲ್ಲಿ ಗಮನಿಸಬೇಕು.

ಮಿಥ್ಯ ಸತ್ಯ ಬಿಡುಗಡೆಯಲ್ಲಿ ಬಿದರಿ ಭಾಷಣಕ್ಕೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿದ ಹಿರಿಯ ಸಾಹಿತಿ ಗೊ ರು ಚನ್ನಬಸಪ್ಪ “ಇನ್ನು ಮೂರು ನಾಲ್ಕು ವರ್ಷಗಳಲ್ಲಿ ‘ವೀರಶೈವ’ ಅನ್ನೋ ಪದ ಹೋಗಿ, ‘ಲಿಂಗಾಯತ’ ಅನ್ನೋ ಒಂದೇ ಪದ ಉಳಿಯಬೇಕು,” ಎಂದು ನೇರವಾಗಿ ಹೇಳಿದರು.

ರಾಯಚೂರಿನಲ್ಲಿ ಕಳೆದ ತಿಂಗಳು ನಡೆದ ನಿಜಾಚರಣೆ ಕಮ್ಮಟದಲ್ಲಿ ರೇಣುಕಾಚಾರ್ಯರ ಭಾವಚಿತ್ರದ ವಿಷಯದಲ್ಲಿ ದೊಡ್ಡ ಒಡಕು ಮೂಡಿತು. ಕೊನೆ ಗಳಿಗೆಯಲ್ಲಿ ಕಮ್ಮಟದ ಸ್ಥಳ ಬದಲಾಯಿತು, ವೀರಶೈವ ಸಂಘಟನೆಗಳು ಕಾರ್ಯಕ್ರಮದಿಂದ ದೂರವುಳಿದವು.

ಈ ವಿಷಯದ ಮೇಲೆ ಬಸವ ಮೀಡಿಯಾದ ಓದುಗರ ಜತೆ ತಮ್ಮ ಅಭಿಪ್ರಾಯ ಹಂಚಿಕೊಂಡ ಹಲವಾರು ಚಿಂತಕರು ಬಸವಣ್ಣನವರ ಪ್ರಭಾವ ಬೆಳೆಯುತ್ತಿರುವುದರಿಂದ ಪರ್ಯಾಯವಾಗಿ ರೇಣುಕಾಚಾರ್ಯರ ಜಯಂತಿಯನ್ನು ಆಚರಿಸಲು ಪ್ರಾರಂಭಿಸಿದ್ದಾರೆ ಎಂದು ಹೇಳಿದರು.

ಬಸವಣ್ಣನವರ ಅನುಯಾಯಿಗಳನ್ನು ಆಕರ್ಷಿಸಲು ಜಯಂತಿಯ ಸಂದರ್ಭದಲ್ಲಿ ಬಸವಣ್ಣನವರ ಭಾವಚಿತ್ರಗಳನ್ನು ಬಳಸಿಕೊಳ್ಳುತ್ತಿದ್ದಾರೆ, ಎಂದು ನ್ಯಾಯವಾದಿ ಬಸವರಾಜ ರೊಟ್ಟಿ ಹೇಳಿದರೆ, ಪಂಚಾಚಾರ್ಯರಿಗೆ ತಮಗೆ ಭಕ್ತರೇ ಇಲ್ಲದ ಕಾಲ ಬಂದಿತೇನೋ ಎಂಬ ಆತಂಕ ಕಾಡತೊಡಗಿದೆ ಎಂದು ಶರಣ ತತ್ವ ಚಿಂತಕ ನಿಂಗನಗೌಡ ಹಿರೇಸಕ್ಕರಗೌಡ್ರ ಹೇಳಿದರು.

ಈಗ ಬಿದರಿಯವರು ಹೊರಡಿಸಿರುವ ಸುತ್ತೋಲೆ ಬಸವಣ್ಣನವರ ಹೆಗಲಮೇಲೆ ರೇಣುಕಾಚಾರ್ಯರನ್ನು ಕೂರಿಸುವ ಪ್ರಯತ್ನಗಳ ಮುಂದುವರೆದ ಭಾಗವಷ್ಟೇ.

ಇದರ ಬಗ್ಗೆ ಮಾತನಾಡುತ್ತ ಉತ್ತರ ಕರ್ನಾಟಕದ ವೀರಶೈವ ಮಹಾಸಭಾದ ಜಿಲ್ಲಾಧ್ಯಕ್ಷರೊಬ್ಬರು ಪಂಚಪೀಠಗಳು ರೇಣುಕಾಚಾರ್ಯ ಜಯಂತಿಯನ್ನು ಆಚರಿಸುವಲ್ಲಿ ಅವರ ಅಸ್ತಿತ್ವದ ಪ್ರಶ್ನೆಯಿದೆ. ಆದರೆ ಬಿದರಿಯವರಿಗೆ ಈ ಸೂಕ್ಷ್ಮ ಸನ್ನಿವೇಶದಲ್ಲಿ ಇಂತಹ ಸುತ್ತೋಲೆ ಹೊರಡಿಸುವ ಒತ್ತಡವೇನಿತ್ತು ಅರ್ಥವಾಗುತ್ತಿಲ್ಲ. ವೀರಶೈವ ಮಹಾಸಭಾದಲ್ಲಿಯೂ ಬಹಳಷ್ಟು ಜನ ಬಸವ ಭಕ್ತರೇ ಆಗಿದ್ದಾರೆಂಬುದು ಅವರು ಮರೆಯಬಾರದು ಎಂದು ಹೇಳಿದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ_
https://chat.whatsapp.com/FEOgQepEXSP8R5OtHvcD7O