ಇವರು ನಮ್ಮ ಲಿಂಗಾಯತ ನಾಯಕರು!

ಬಸವ ಸಂಘಟನೆಗಳು ಲಿಂಗಾಯತ ನಾಯಕರಿಗೆ ಮೂಗುದಾರ ಹಾಕುವ ಸಮಯ ಬಂದಿದೆ

ಬೆಂಗಳೂರು

ಒಂದು ವರ್ಷದ ಹಿಂದೆ ಸಚಿವ ಎಂ ಬಿ ಪಾಟೀಲ್ ಲಿಂಗಾಯತರ ವಿರುದ್ಧ ಲಿಂಗಾಯತರನ್ನು, ದಲಿತರ ವಿರುದ್ಧ ದಲಿತರನ್ನು ಛೂ ಬಿಡುವುದು ಆರೆಸ್ಸೆಸ್‌ನವರ ಚಾಳಿ ಎಂದು ಹೇಳಿದ್ದರು.

ಪ್ರತಿಯೊಂದು ಸಮುದಾಯವನ್ನು ಕಾಡುತ್ತಿರುವ ಹಲವಾರು ವಿಷಯಗಳ ಬಗ್ಗೆ ಆರೆಸ್ಸೆಸ್‌ನವರಿಗೆ ತಮ್ಮದೇ ನಿಲುವಿರುತ್ತದೆ. ಸಾಮಾನ್ಯವಾಗಿ ಆ ನಿಲುವನ್ನು ಬಿಂಬಿಸಲು ಆಯಾ ಸಮುದಾಯಗಳ ಮುಖಂಡರನ್ನೇ ಬಳಸುಕೊಳ್ಳುತ್ತಾರೆ. ಅದರಿಂದ ಏನೇ ಗೊಂದಲ, ಗಲಾಟೆಯಾದರೂ ಅದು ಸಮುದಾಯದೊಳಗೆಯೇ ನಡೆಯುತ್ತದೆ. ಯಾವ ಪ್ರಸಂಗದಲ್ಲಿಯೂ ತಮ್ಮ ಕೈ ಸುಡದಂತೆ ನೋಡಿಕೊಳ್ಳುತ್ತಾರೆ.

ಆದರೆ ಕಳೆದ ವಾರ ಮೊದಲ ಬಾರಿಗೆ ಆರೆಸ್ಸೆಸ್ ನಾಯಕ ಬಿ ಎಲ್ ಸಂತೋಷ್ ಲಿಂಗಾಯತ ಸಮಾಜದ ಕುತ್ತಿಗೆಗೆ ನೇರವಾಗಿ ಕೈ ಹಾಕಿ ಕನ್ನೇರಿ ಸ್ವಾಮಿಯ ಬೆಂಬಲಕ್ಕೆ ಬಂದಿದ್ದಾರೆ. ಕನ್ನೇರಿ ಸ್ವಾಮಿಯನ್ನು ವಿಜಯಪುರದಿಂದ ನಿರ್ಬಂಧಿಸಿರುವುದು ಸಿದ್ದರಾಮಯ್ಯ ಸರಕಾರದ ಅತ್ಯಂತ ಕ್ರೂರ ನಡೆ ಎಂದು ಬಹಿರಂಗ ಹೇಳಿಕೆ ನೀಡುವ ಧೈರ್ಯ ತೋರಿಸಿದ್ದಾರೆ.

ಮೊದಲ ಬಾರಿಗೆ ಬಿ ಎಲ್ ಸಂತೋಷ್ ಲಿಂಗಾಯತ ಸಮಾಜದ ಕುತ್ತಿಗೆಗೆ ನೇರವಾಗಿ ಕೈ ಹಾಕಿದ್ದಾರೆ

ಕನ್ನೇರಿ ಸ್ವಾಮಿಯನ್ನು ಸಮರ್ಥಿಸಿಕೊಳ್ಳುವ ಭರದಲ್ಲಿ ಯಾವ ಕಾರಣಕ್ಕೆ ಅವರನ್ನು ವಿಜಯಪುರ ಮತ್ತು ಬಾಗಲಕೋಟೆಯಿಂದ ಓಡಿಸಲಾಗಿದೆ ಎನ್ನುವುದು ಬಿ. ಎಲ್. ಸಂತೋಷ್ ರಂತಹ ಹಿಂದೂ ತಾಲಿಬಾನಿಗಳ ತಲೆಗೆ ಹೊಳೆಯುವ ಪ್ರಶ್ನೆಯಲ್ಲ.

ಸಂತೋಷ್ ಹೇಳಿಕೆ ಬರುತ್ತಿದ್ದಂತೆಯೇ ವಿಜಯೇಂದ್ರ, ಜಗದೀಶ್ ಶೆಟ್ಟರ್, ಬಸವರಾಜ ಬೊಮ್ಮಾಯಿಯಂತಹ ಲಿಂಗಾಯತ ಮುಖಂಡರು ಸಾಲುಸಾಲಾಗಿ ಕನ್ನೇರಿ ಸ್ವಾಮಿ ಬೆಂಬಲಕ್ಕೆ ಬಂದು ನಿಂತರು.

ಲಿಂಗಾಯತರ ಮತಗಳ ಮೂಲಕವೇ ಹೊಟ್ಟೆ ಹೊರೆದುಕೊಳ್ಳುವ ಇವರಿಗೂ ಲಿಂಗಾಯತ ಮಠಾಧೀಶರ ಮೇಲೆ ಬಳಕೆಯಾಗಿರುವ ಭಾಷೆ ಮುಖ್ಯವಾಗಲಿಲ್ಲ. ಸಂತೋಷ್ ಹೇಳಿಕೊಟ್ಟ ಗಿಳಿಪಾಠವನ್ನೇ ಮುದ್ದಾಗಿ ಉಲಿದು ಸುಮ್ಮನಾದರು.

ಲಿಂಗಾಯತರ ನಾಯಕರಿಗೂ ನಮ್ಮ ಮಠಾಧೀಶರ ಮೇಲೆ ಬಳಕೆಯಾಗಿರುವ ಭಾಷೆ ಮುಖ್ಯವಾಗಲಿಲ್ಲ.

ಬಿಜೆಪಿಯಲ್ಲಿರುವ ಯಾವ ಲಿಂಗಾಯತನಿಗೂ ಸ್ವಂತ ಬುದ್ದಿ ಬಳಸುವ ಅಥವಾ ಸಂತೋಷ್ ಹಾಕುವ ಗೆರೆಯನ್ನು ದಾಟಲಾಗುವುದಿಲ್ಲ ಎನ್ನುವುದು ಇದರ ಒಳಾರ್ಥ. ಇವರುಗಳಿಗೆ ಬೀಳುವ ಲಿಂಗಾಯತ ಮತಗಳೂ ಕೊನೆಗೆ ತಲುಪುವುದು ಬಿಜೆಪಿಯನ್ನು ಕಾಲಿನಡಿ ಇಟ್ಟುಕೊಂಡಿರುವ ಸಂತೋಷರಂತಹ ಆರೆಸ್ಸೆಸ್ ನಾಯಕರನ್ನೇ.

ಅದಕ್ಕೆ ಇನ್ನು ಮೇಲೆ ಲಿಂಗಾಯತ ನಾಯಕರ ನಾಯಕ ಬಿ ಎಲ್ ಸಂತೋಷನ್ನೂ ಕೂಡ ‘ಲಿಂಗಾಯತ ನಾಯಕ’ ಎಂದು ಕರೆಯುವುದು ಸರಿ ಎಂದು ಅನಿಸುತ್ತದೆ.

ಇದನ್ನು ಹಾಸ್ಯಕ್ಕೆ ಹೇಳುತ್ತಿಲ್ಲ. ನಮ್ಮ ನಾಯಕರನ್ನು ಬಳಸಿಕೊಂಡು ಇಡೀ ಲಿಂಗಾಯತ ಸಮಾಜವನ್ನು ಹಿಡಿತದಲ್ಲಿ ಇಟ್ಟುಕೊಳ್ಳಲು ಬಿ ಎಲ್ ಸಂತೋಷ್ ನಡೆಸುತ್ತಿರುವ ಪ್ರಯತ್ನ ಎಲ್ಲರಿಗೂ ಗೊತ್ತಿರುವ ವಿಷಯ. ಇದಕ್ಕೆ ತಡೆಗೋಡೆಯಾಗಿದ್ದ ಯಡಿಯೂರಪ್ಪನವರನ್ನು ಕೆಳಗಿಳಿಸಲು ಇದೂ ಒಂದು ಮುಖ್ಯ ಕಾರಣ.

ಮೆದುಳು, ಬೆನ್ನೆಲುಬು ಎರಡೂ ಇರದ ಈ ಲಿಂಗಾಯತ ನಾಯಕರ ವರ್ತನೆ ಎಲ್ಲರ ಕಣ್ಣಿಗೂ ಬಿದ್ದಿದೆ. ಶುಕ್ರವಾರ ನಡೆದ ಲಿಂಗಾಯತ ಮಠಾದೀಶರ ಒಕ್ಕೂಟದ ಸುದ್ದಿಗೋಷ್ಠಿಯಲ್ಲೂ ಇದು ಚರ್ಚೆಯ ವಿಷಯವಾಯಿತು.

ನಿರ್ಬಂಧದ ಹಿಂದಿನ ಕಾರಣವನ್ನು ಕೇಳದೆ ಅದನ್ನು ವಿರೋಧಿಸುತ್ತಿರುವ ಬಿಜೆಪಿ ನಾಯಕರಿಗೆ ತಾಯಂದರಿಲ್ಲವೇ ಎಂದು ಒಕ್ಕೂಟದ ಕಾರ್ಯದರ್ಶಿ ಪೂಜ್ಯ ಶಿವಾನಂದ ಸ್ವಾಮಿಗಳು ಪ್ರಶ್ನಿಸಿದರು. ನಮ್ಮ ಪೂಜ್ಯರಿಂದ ಇಂತಹ ನೋವಿನ ಮಾತು ನಾನು ಕೇಳಿದ್ದು ಇದೇ ಮೊದಲು.

ನಿರ್ಬಂಧದ ಕಾರಣ ಕೇಳದೆ ವಿರೋಧಿಸುತ್ತಿರುವ ಬಿಜೆಪಿ ನಾಯಕರಿಗೆ ತಾಯಂದರಿಲ್ಲವೇ?

​​​ಇದು ಯಡಿಯೂರಪ್ಪ ಯುಗವಲ್ಲ

ತಮ್ಮದು ಹೋರಾಟದ ಬದುಕು, ಇಡೀ ಜೀವನವನ್ನು ಸಂಘರ್ಷದಲ್ಲಿಯೇ ಕಳೆದಿದ್ದೇನೆ ಎಂದು ಯಡಿಯೂರಪ್ಪ ಆವಾಗವಾಗ ಹೇಳುತ್ತಿರುತ್ತಾರೆ. ಅವರು ಅತೀ ಹೆಚ್ಚು ಹೋರಾಡಿದ್ದು ಕಾಲಿನಲ್ಲಿ ಸದಾ ಮುಳ್ಳಾಗಿಯೇ ಇದ್ದ ಆರೆಸ್ಸೆಸ್ ಜೊತೆ ಎನ್ನುವುದು ಇಲ್ಲಿ ಗಮನಿಸಬೇಕು.

ನಾಲ್ಕು ಭಾರಿ ಮುಖ್ಯಮಂತ್ರಿಯಾದರೂ ಒಂದು ಭಾರಿಯೂ ಪೂರ್ಣಾವಧಿ ಅಧಿಕಾರ ನಡೆಸದ ದಾಖಲೆ ಯಡಿಯೂರಪ್ಪನವರದು. ಇದರಲ್ಲಿ ಎರಡು ಭಾರಿ ಅಧಿಕಾರ ಕಳೆದುಕೊಂಡಾಗಲೂ ನೇರವಾಗಿ ಆರೆಸ್ಸೆಸ್ ಪಾತ್ರವಿತ್ತು ಎನ್ನುವುದೂ ಗಮನಿಸಬೇಕು.

ಎರಡು ಭಾರಿ ಯಡಿಯೂರಪ್ಪನವರನ್ನು ಅಧಿಕಾರದಿಂದ ತೆಗೆದಿದ್ದು ಆರೆಸ್ಸೆಸ್

2021ರಲ್ಲಿ 75 ವರ್ಷವಾದ ಮೇಲೆ ಒಲ್ಲದ ಯಡಿಯೂರಪ್ಪನವರನ್ನು ಕೆಳಗಿಳಿಸಿದ್ದು ಇದೇ ಆರೆಸ್ಸೆಸ್. ಈ ವರ್ಷ ಪ್ರಧಾನಿ ಮೋದಿಗೆ 75 ವರ್ಷವಾದ ಮೇಲೆ ಅದೇ ವಯಸ್ಸಿನ ನಿಯಮ ಸಡಿಲಿಸಿದ್ದು ಇದೇ ಆರೆಸ್ಸೆಸ್.

“ನಮಗೆ ಅಧಿಕಾರಕ್ಕಿಂತ ಸಿದ್ದಾಂತ ಮುಖ್ಯ. ಯಡಿಯೂರಪ್ಪ ಸರಕಾರ ನಮ್ಮ ಅಜೆಂಡಾ ಅನುಷ್ಠಾನಗೊಳಿಸಲು ಪೂರಕವಾಗಿರಲಿಲ್ಲ. ವಾಜಪೇಯಿ ಪ್ರಧಾನಿಯಾಗಿದ್ದಾಗಲೂ ಇದೇ ಸಮಸ್ಯೆಯಿತ್ತು,” ಎಂದು ಕೆಲವು ವರ್ಷಗಳ ಹಿಂದೆ ಆರೆಸ್ಸೆಸ್ ನಾಯಕರೊಬ್ಬರು ಹೇಳಿದ್ದರು.

“ಯಡಿಯೂರಪ್ಪ ಎಲ್ಲಾ ಅಧಿಕಾರ ತಮ್ಮ ಕೈಯಲ್ಲಿಟ್ಟುಕೊಂಡಿದ್ದರು. ಆರೆಸ್ಸೆಸ್ ನವರಿಗೆ ಅವರ ಕೈಯಿಂದ ಕೆಲಸ ಮಾಡಿಸಿಕೊಳ್ಳುವುದು ಸುಲುಭವಾಗಿರಲಿಲ್ಲ. ಬಿ ಎಲ್ ಸಂತೋಷನ್ನೂ ಬಹಳ ಹೊತ್ತು ಕಾಯಿಸಿದ್ದನ್ನು ನೋಡಿದ್ದೇನೆ,” ಎಂದು ಅಧಿಕಾರಿಯೊಬ್ಬರು ಹೇಳಿದ್ದರು.

ಬಾಲಂಗೋಚಿಗಳು

ಯಡಿಯೂರಪ್ಪನವರ ವರ್ಚಸ್ಸು, ಸಾಮರ್ಥ್ಯದ ಹತ್ತಿರಕ್ಕೂ ಬರಲು ಈಗಿನ ಲಿಂಗಾಯತ ನಾಯಕರಿಗೆ ಸಾಧ್ಯವಾಗಿಲ್ಲ. ಅದಕ್ಕೆ ಅವರು ಸಂತೋಷರಂತವರ ಬಾಲಂಗೋಚಿಗಳಾಗಿ ಜೀವನ ನಡೆಸುವ ಅನಿವಾರ್ಯತೆ ಸೃಷ್ಟಿಯಾಗಿದೆ.

ಕಳೆದ ಡಿಸೆಂಬರ್ ನಲ್ಲಿ ಬೆಂಗಳೂರಿನಲ್ಲಿ ನಡೆದ ಹವ್ಯಕ ಮಹಾಸಭೆಯ ಸಮಾವೇಶದಲ್ಲಿ ಜಗದೀಶ ಶೆಟ್ಟರ್ ಭಾಗವಹಿಸಿದ್ದರು. ಅಲ್ಲಿ ಕ್ಷೀಣಿಸುತ್ತಿರುವ ಹವ್ಯಕ ಜನಸಂಖ್ಯೆಯ ಬಗ್ಗೆ ಕಣ್ಣೀರು ಹಾಕಿಕೊಂಡು ಹವ್ಯಕರು ಹೆಚ್ಚು ಮಕ್ಕಳು ಮಾಡಲು ಕರೆ ಕೊಟ್ಟಿದ್ದರು. ಇಂತಹ ಸಾಮಾಜಿಕ ತುಡಿತವಿರುವ ಶೆಟ್ಟರ್ ಗೆ ಲಿಂಗಾಯತ ಪೂಜ್ಯರಿಗೆ ಆಗಿರುವ ಅಪಮಾನ, ಅದರ ವಿರುದ್ದ ವ್ಯಕ್ತವಾಗುತ್ತಿರುವ ಆಕ್ರೋಶ ಎರಡೂ ಕಾಣಿಸುತ್ತಿಲ್ಲದಿರುವುದು ವಿಚಿತ್ರ.

ಬಸವಣ್ಣ, ಲಿಂಗಾಯತ ವಿಷಯಗಳ ಬಗ್ಗೆ ವಿಜಯೇಂದ್ರ ಯಾವತ್ತಾದರೂ ಮಾತನಾಡಿದ್ದು ನೆನಪಿದೆಯಾ? ಇದೇ ವ್ಯಕ್ತಿ ಹಿಂದೂ, ಹಿಂದುತ್ವದ, ಆರೆಸ್ಸೆಸ್ ವಿಷಯ ಬಂದಾಗ ಎಲ್ಲರಿಗಿಂತ ಮೊದಲು ಬೊಬ್ಬಿಡಲು ಶುರುಮಾಡುವುದು ಯಾಕೆ?

ವಿಜಯೇಂದ್ರರ ಕೆಲವು ಹೇಳಿಕೆಗಳನ್ನು ಗಮನಿಸಿ:

ಬೀದರ್, ಶಿವಮೊಗ್ಗದಲ್ಲಿ ಸಿಇಟಿ ಪರೀಕ್ಷೆಗಳಲ್ಲಿ ಇಬ್ಬರು ಬ್ರಾಹ್ಮಣ ಹುಡುಗರ ಜನಿವಾರ ತೆಗೆಸಿದ್ದು “ಹೇಯ” “ಬೌದ್ಧಿಕ ವಿಕೃತಿ” “ಮನುಷ್ಯತ್ವ ಇಲ್ಲದ ನಡೆ” ಎಂದು ಹೇಳಿದ್ದು ವಿಜಯೇಂದ್ರ.

ಇತ್ತೀಚೆಗೆ ಸರಕಾರಿ ಕಾರ್ಯಕ್ರಮಕ್ಕೆ ಆರೆಸ್ಸೆಸ್ ವೇಷದಲ್ಲಿ ಬಂದಿದ್ದ ಶಾಸಕ ಮುನಿರತ್ನರನ್ನು ಡಿ ಕೆ ಶಿವಕುಮಾರ್ ‘ಏಯ್ ಕರಿಟೋಪಿ’ ಎಂದು ಕರೆದಿದ್ದರು.

“ಡಿ.ಕೆ.ಶಿವಕುಮಾರ್ ಅವರಿಗೆ ಕನಿಷ್ಠ ಸೌಜನ್ಯವೂ ಇಲ್ಲ, ಅಪಮಾನ ಮಾಡಿದ್ದು ಮುನಿರತ್ನ ಅವರಿಗಲ್ಲ… ಮುಂಬರುವ ದಿನದಲ್ಲಿ ಪಕ್ಷಕ್ಕೆ ಕರಿಟೋಪಿ ಬೆಲೆ ಏನೆಂದು ತೋರಿಸುತ್ತೇವೆ, ಎಂದು ಹೇಳಿದ್ದು ವಿಜಯೇಂದ್ರ.

ಕರಿ ಟೋಪಿ ಅಂತ ಜೋರಾಗಿ ಕರೆದರೆ ಆರೆಸ್ಸೆಸ್‌ನವರಿಗೆ ಅಪಮಾನವಂತೆ. ನಮಗೆ ಅಕ್ಕ, ಅಮ್ಮ ಅಂದರೂ ಲೆಕ್ಕಕಿಲ್ಲವಂತೆ. ಈ ವ್ಯಕ್ತಿ ಯಡಿಯೂರಪ್ಪ ಪೀಠದ ಉತ್ತರಾಧಿಕಾರಿಯಂತೆ!

ಆರೆಸ್ಸೆಸ್‌ಗೆ ರಕ್ಷಣೆಗೆ ನಿಂತಿರುವ ಇವರಿಗೆ ನಮಗೆ ಅಕ್ಕ, ಅಮ್ಮ ಅಂದರೂ ಲೆಕ್ಕಕಿಲ್ಲ

ಇದೇ ರೀತಿ ಹಿಂದೂ ಕಾರ್ಯಕರ್ತರು, ಹಿಂದೂ ಮುಖಂಡರನ್ನು, ಧರ್ಮಸ್ಥಳದ ವೀರೇಂದ್ರ ಹೆಗಡೆಯನ್ನು ರಕ್ಷಿಸಲು ವಿಜಯೇಂದ್ರ ಲೆಕ್ಕವಿಲ್ಲದಷ್ಟು ಭಾರಿ ತೊಡೆ ತಟ್ಟಿದ್ದಾರೆ.

ಲಿಂಗಾಯತ ಕೋಟಾದಲ್ಲಿ ಮುಖ್ಯಮಂತ್ರಿಯಾದವರು ಬೊಮ್ಮಾಯಿ. ಕನ್ನೇರಿ ಸ್ವಾಮಿಯ ವಿರುದ್ಧ ಲಿಂಗಾಯತ ಸಮಾಜ ಸಿಡಿಯುತ್ತಿದ್ದಂತೆಯೇ ಹಿಂದುತ್ವದ ಟಿವಿ ಚಾನೆಲ್ಲುಗಳು ಅವರ ಬೆಂಬಲಕ್ಕೆ ಬಂದವು.

ವಿವಾದವೆದ್ಧ ಮರುದಿನವೇ ರಿಪಬ್ಲಿಕ್ ಟಿವಿಯಲ್ಲಿ ಕನ್ನೇರಿ ಸ್ವಾಮಿಯ ದೀರ್ಘ ಸಂದರ್ಶನವಿತ್ತು. ಅಲ್ಲಿ ಆತ ಲಿಂಗಾಯತ ಪೂಜ್ಯರ ಮೇಲೆ ಮತ್ತೆ ಬಾಯಿಗೆ ಬಂದ ಹಾಗೆ ಮಾತನಾಡಿದಾಗೆಲ್ಲ ಮುಂದೆ ಕುಳಿತು ಚಪ್ಪಾಳೆ ತಟ್ಟಿದ್ದು ಇದೇ ಬೊಮ್ಮಾಯಿ. ವಚನ ದರ್ಶನ ಬಿಡುಗಡೆಯಲ್ಲೂ ಮುಂದಿನ ಸಾಲಿನಲ್ಲಿ ಕೂತು ಸಂಭ್ರಮಿಸಿದ್ದು ಇದೇ ವ್ಯಕ್ತಿ.

ಇವರೆಲ್ಲಾ ಆರೆಸ್ಸೆಸ್‌ನವರ ಮೇಲಿನ ಪ್ರೀತಿ, ಅಭಿಮಾನದಿಂದ ಈ ರೀತಿ ನಡೆದುಕೊಳ್ಳುತ್ತಿಲ್ಲ. ನಮಗಿಂತ ಹೆಚ್ಚಿಗೆ ಆರೆಸ್ಸೆಸ್ ಬಿಸಿ ತಟ್ಟಿರುವುದು ಇವರಿಗೆ. ಇವರ ಬುಡಕ್ಕೆ ಬೆಂಕಿ ಬಿದ್ದಾಗ ಮಾತ್ರ ಇವರು ಯಾವ ಆರೆಸ್ಸೆಸ್‌ನೂ ಇವರು ಕ್ಯಾರೇ ಎನ್ನುವುದಿಲ್ಲ.

2023ರ ಚುನಾವಣೆಯಲ್ಲಿ ಟಿಕೆಟ್ ತಪ್ಪಿದಾಗ ಶೆಟ್ಟರ್ ರಾತ್ರೋರಾತ್ರಿ ಲಿಂಗಾಯತರಾಗಿ ಬಿ ಎಲ್ ಸಂತೋಷ್ ವಿರುದ್ಧ ತಿರುಗಿ ಬಿದ್ದರು. ಸಿಕ್ಕಸಿಕ್ಕಲ್ಲಿ ಸಂತೋಷ್, ಬಿಜೆಪಿ, ಆರೆಸ್ಸೆಸ್ ಮಾನಕಳೆದು ಕಾಂಗ್ರೆಸ್ ಗೆಲುವಿಗೆ ದೊಡ್ಡ ಕೊಡುಗೆ ನೀಡಿದರು.

ಯತ್ನಾಳ್ ಹಾವಳಿ ಅತಿಯಾದಾಗ ವಿಜಯೇಂದ್ರ ಕೂಡ ಆರೆಸ್ಸೆಸ್‌ಗೆ ಗಂಭೀರವಾದ ಎಚ್ಚರಿಕೆ ನೀಡಿದರು. ಕೆಲವು ದುಷ್ಟ ಶಕ್ತಿಗಳು ಲಿಂಗಾಯತ ಸಮಾಜವನ್ನು ಕಾಡುತ್ತಿವೆ ಎಂಬ ಮಂತ್ರಗಳು ವಿಜಯೇಂದ್ರ ಬಣದಿಂದ ಬರಲು ಶುರುವಾದ ನಂತರವೇ ಯತ್ನಾಳ್ ಉಚ್ಚಾಟನೆಯಾಗಿದ್ದು.

ಅವಕಾಶವಾದಿಗಳು

ಆದರೆ ಬಿಜೆಪಿಯಲ್ಲಿ ಉಳಿಯಲು ಇವರು ಆರೆಸ್ಸೆಸ್‌ನ ಓಲೈಸುವುದು ಅನಿರ್ವಾಯ. ಇದಕ್ಕೆ ತಾವುಗಳು ಬಂದಿರುವ ಸಮಾಜವನ್ನೂ ಬಲಿ ಕೊಡಲು ಈ ಅವಕಾಶವಾದಿಗಳು ಸಿದ್ಧರಿದ್ದಾರೆ. ಇವರಿಗೆ ಲಿಂಗಾಯತರು ಹರಕೆಯ ಕುರಿಗಳಷ್ಟೇ.

ಲಿಂಗಾಯತರು ತಮ್ಮ ನಾಯಕರನ್ನು ಪ್ರಶ್ನಿಸಿದೆ ಸಡಿಲ
ಬಿಟ್ಟಿರುವುದು ಇಲ್ಲಿರೋ ಸಮಸ್ಯೆ.

ಸಮಾಜದ ಬೆಂಬಲದಿಂದ ಆಯ್ಕೆಯಾದ ಮೇಲೆ ಇವರಲ್ಲಿ ಅದೇ ಸಮಾಜಕ್ಕೆ ಬದ್ದವಾಗಿರುವ ಪ್ರಾಮಾಣಿಕತೆಯಿಲ್ಲ. ಬದಲಾಗಿ ಲಿಂಗಾಯತರ ವಿರೋಧಿಗಳ ಜೊತೆ ಮುಚ್ಚುಮರೆಯಿಲ್ಲದೆ ಕೈ ಜೋಡಿಸುವ ಧೈರ್ಯ ಎಲ್ಲಿಂದ ಬರುತ್ತದೆ?

ಆರೆಸ್ಸೆಸ್‌ನವರು ಇವರನ್ನು ಪ್ರಶ್ನಿಸಿ ಹಿಡಿತದಲ್ಲಿ ಇಟ್ಟುಕೊಂಡಿದ್ದಾರೆ. ಲಿಂಗಾಯತರು ಇವರನ್ನು ಇಲ್ಲಿಯವರೆಗೆ ಪ್ರಶ್ನಿಸಿದೆ ಸಡಿಲ ಬಿಟ್ಟಿದ್ದಾರೆ. ಇದು ಇಲ್ಲಿರೋ ಸಮಸ್ಯೆ.

ಇದಕ್ಕೆ ಪರಿಹಾರ ಹುಡುಕಬೇಕಾಗಿರುವ ಜವಾಬ್ದಾರಿ ಬಸವ ಸಂಘಟನೆಗಳದು.

ಮೂಗುದಾರ ಹಾಕುವ ಸಮಯ

ನಮ್ಮ ನಾಯಕರು ಲಿಂಗಾಯತ ಸಮಾಜದಲ್ಲಿ ಆಗುತ್ತಿರುವ ಬದಲಾವಣೆಗಳನ್ನು ಗಂಭೀರವಾಗಿ ತೆಗೆದುಕೊಂಡಿಲ್ಲ. ಇದನ್ನು ಅವರಿಗೆ ಮನವರಿಕೆ ಮಾಡುವ ಅಗತ್ಯವಿದೆ.

ಕಳೆದ 50 ವರ್ಷಗಳಲ್ಲಿ ಬಸವ ಸಂಘಟನೆಗಳು ನಾಡಿನುದ್ದಕ್ಕೂ ತಲೆಯೆತ್ತಿವೆ. ಇವರಿಗೆ ಒಂದೇ ಅಜೆಂಡಾ: ಬಸವಣ್ಣ. ಸದಾ ಜನರ ಜೊತೆ ಸಕ್ರಿಯವಾಗಿರುವ ಇವರು ಇಂದು ಶರಣ ಸಮಾಜದ ದೊಡ್ಡ ಶಕ್ತಿಯಾಗಿ ಬೆಳೆದಿದ್ದಾರೆ.

ಬಸವ ಸಂಸ್ಕೃತಿ ಅಭಿಯಾನದಲ್ಲಿ ತೋರಿಸಿದಂತೆ ಜಿಲ್ಲೆ ಜಿಲ್ಲೆಗಳಲ್ಲಿ ಸಾವಿರಾರು ಜನರನ್ನು ಸೇರಿಸುವ ಸಾಮರ್ಥ್ಯ ನಮ್ಮ ಪೂಜ್ಯರು ಹಾಗೂ ಸಂಘಟನೆಗಳಿಗಿದೆ.

ದುಡ್ಡಿಲ್ಲದೆ, ಬರೀ ಬಸವಣ್ಣನವರ ಹೆಸರಿನಲ್ಲಿ ಜನ ಸೇರಿಸಿರುವ ರೀತಿಗೆ ರಾಜಕಾರಣಿಗಳು ಬೆರಗಾಗಿದ್ದಾರೆ. ಅಭಿಯಾನದ ಯಶಸ್ಸು, ಅದರಿಂದ ಹೊಮ್ಮಿದ ಸಂದೇಶಗಳಿಂದ ನಮ್ಮ ಸೈದ್ಧಾಂತಿಕ ವಿರೋಧಿಗಳಿಗೆ ಚಳಿ ಜ್ವರ ಬಂದು ಇಷ್ಟೆಲ್ಲಾ ವಿವಾದವೆಬ್ಬಿಸುವಂತೆ ಮಾಡಿದೆ.

ಕೆಲವು ರಾಜಕಾರಣಿಗಳು ತಾವೇ ಬದಲಾಗಿದ್ದಾರೆ. ಇನ್ನೂ ಕೆಲವರನ್ನು ಬದಲಾಯಿಸೋ ಕಾಲ ಬಂದಿದೆ.

ಬಸವ ಸಂಘಟನೆಗಳು ಇಲ್ಲಿಯವರೆಗೆ ಆಧ್ಯಾತ್ಮಿಕ ಮತ್ತು ಸಾಮಾಜಿಕ ಕ್ಷೇತ್ರಗಳಿಗೆ ಮಾತ್ರ ಸೀಮಿತವಾಗಿವೆ. ಲಿಂಗಾಯತ ಧರ್ಮ ವಿರೋಧಿಸುವ ರಾಜಕಾರಣಿಗಳಿಗೆ ಮೂಗುದಾರ ಹಾಕಬೇಕಾದರೆ ಈಗ ರಾಜಕೀಯ ಪ್ರಜ್ಞೆ ಬೆಳೆಸಿಕೊಳ್ಳುವುದು ಅನಿವಾರ್ಯ.

ಬಸವ ಸಂಘಟನೆಗಳು ಈಗ ರಾಜಕೀಯ ಪ್ರಜ್ಞೆ
ಬೆಳೆಸಿಕೊಳ್ಳುವುದು ಅನಿವಾರ್ಯ

ಅಭಿಯಾನ ಬಹುತೇಕವಾಗಿ ಪಕ್ಷಾತೀತವಾಗಿ ನಡೆದದ್ದು ಅದರ ಯಶಸ್ಸಿಗೆ ಮುಖ್ಯ ಕಾರಣ. ಆ ನಿಲುವನ್ನು ಬಸವ ಸಂಘಟನೆಗಳು ಮುಂದುವರೆಸಬೇಕು.

ಲಿಂಗಾಯತ ಧರ್ಮ ಬೆಂಬಲಿಸುವ ರಾಜಕಾರಣಿಗಳನ್ನು ಯಾವ ಪಕ್ಷದಲ್ಲೇ ಇರಲಿ ಅವರನ್ನು ಬಸವ ಸಂಘಟನೆಗಳು ಜಾತ್ಯತೀತವಾಗಿ ಬೆಂಬಲಿಸಬೇಕು. ಅದೇ ರೀತಿ ಲಿಂಗಾಯತ ಧರ್ಮದ ವಿರೋಧಿಗಳಿಗೆ ಬಿಸಿಯನ್ನೂ ಮುಟ್ಟಿಸಬೇಕು.

ಇದು ನಮಗಿರುವ ಬಹಳ ದೊಡ್ಡ ಅಸ್ತ್ರ, ಇದನ್ನು ಬಳಸಿಕೊಳ್ಳಲು ಕಲಿಯಬೇಕು. ಎದ್ದೇಳು ಕರ್ನಾಟಕದಂತಹ ಪ್ರಯತ್ನಗಳು ಸಮಾಜದ ಸಂಘಟನೆಗಳು ಹೇಗೆ ಚುನಾವಣೆಯ ದಿಕ್ಕು ಬದಲಿಸಬಹುದೆಂದು ಈಗಾಗಲೇ ತೋರಿಸಿವೆ. ಅದರಲ್ಲಿ ಕೆಲಸ ಮಾಡಿದ ಅನುಭವ ಅನೇಕ ಬಸವ ಸಂಘಟನೆಗಳಿಗಿದೆ.

ಇದು ಅಷ್ಟೇನೂ ಕಷ್ಟದ ವಿಷಯವಲ್ಲ. ಒಬ್ಬ ಅಭ್ಯರ್ಥಿಯನ್ನು ಗೆಲ್ಲಿಸಬೇಕೆಂದರೆ ಅಥವಾ ಸೋಲಿಸಬೇಕೆಂದರೆ ಇಡೀ ಸಮುದಾಯದ ಮತಗಳನ್ನು ಬದಲಿಸುವ ಅಗತ್ಯವಿಲ್ಲ. ಅಲ್ಲಲ್ಲಿ ಕೆಲವು ಮತಗಳನ್ನು ತಿರುಗಿಸಿದರೆ ಸಾಕು.

ಒಬ್ಬ ಅಭ್ಯರ್ಥಿಯನ್ನು ಸೋಲಿಸಬೇಕೆಂದರೆ ಅಲ್ಲಲ್ಲಿ ಕೆಲವು ಮತಗಳನ್ನು ತಿರುಗಿಸಿದರೆ ಸಾಕು.

ಅನೇಕ ಕ್ಷೇತ್ರಗಳಲ್ಲಿ ಸೋಲು ಗೆಲುವಿನ ಅಂತರ ಕೂದಲೆಳೆಯಷ್ಟು ಮಾತ್ರವಿರುತ್ತದೆ. 2023ರ ಚುನಾವಣೆಯಲ್ಲಿ 34 ಕ್ಷೇತ್ರಗಳಲ್ಲಿ 5,000 ಮತಗಳಿಗಿಂತ ಕಡಿಮೆ ಅಂತರದಲ್ಲಿ ನಿರ್ಣಯವಾದವು. 12 ಕ್ಷೇತ್ರಗಳಲ್ಲಿ ಗೆಲುವಿನ ಅಂತರ ಸಾವಿರಕ್ಕೂ ಕಡಿಮೆಯಿತ್ತು.

ಚುನಾವಣೆಯ ಆತಂಕ ಪ್ರತಿಯೊಬ್ಬ ರಾಜಕಾರಣಿಗೂ ಇರುತ್ತದೆ. ಒಂದೊಂದು ಮತವನ್ನೂ ಲೆಕ್ಕ ಹಾಕುವ ಸಂದರ್ಭದಲ್ಲಿ ಬೇಡದ ವಿರೋಧವನ್ನು ಕಟ್ಟಿಕೊಳ್ಳುವ ಸಾಹಸಕ್ಕೆ ಯಾರೂ ಕೈ ಹಾಕುವುದಿಲ್ಲ.

16 ವರ್ಷಗಳಿಂದ ಹಿಡಿತದಲ್ಲಿ ಇಟ್ಟುಕೊಂಡಿದ್ದ ಶಿಗ್ಗಾವಿಯಲ್ಲಿ ಬೊಮ್ಮಾಯಿ ಮಗನನ್ನು ಗೆಲ್ಲಿಸಲಾಗಲಿಲ್ಲ. ಯಡಿಯೂರಪ್ಪ ಕುಟುಂಬದ ಭದ್ರಕೋಟೆ ಶಿಕಾರಿಪುರದಲ್ಲಿ ವಿಜಯೇಂದ್ರ ಗೆದ್ದಿದ್ದು 11,000 ಮತಗಳಿಂದ. ಯತ್ನಾಳ್ ಗೆಲುವಿನ ಅಂತರ 8,000 ಮತಗಳು ಮಾತ್ರ.

ಲಿಂಗಾಯತ ನಾಯಕರಿಗೆ ಬಿಸಿ ಮುಟ್ಟಿಸಲು ಚುನಾವಣೆಗೆ ಕಾಯುವ ಅವಶ್ಯಕತೆಯಿಲ್ಲ. ಅವಕಾಶ ಸಿಕ್ಕಲ್ಲಿ ಬಸವ ಸಂಘಟನೆಗಳು ಅವರನ್ನು ಪ್ರಶ್ನಿಸಬೇಕು. ಅವಕಾಶ ಸಿಗದಿದ್ದರೆ ನಮ್ಮ ಅಭಿಪ್ರಾಯವನ್ನು ತೀಕ್ಷ್ಣವಾಗಿ ಮುಟ್ಟಿಸುವ ದಾರಿ ಹುಡುಕಬೇಕು. ಆರು ತಿಂಗಳು ಇದನ್ನು ಸರಿಯಾಗಿ ಎಲ್ಲಾ ಮಾಡಿದರೆ ಇಷ್ಟು ಬೇಜವಾಬ್ದಾರಿಯಿಂದ ವರ್ತಿಸಲು ಯಾರಿಗೂ ಸಾಧ್ಯವಾಗುವುದಿಲ್ಲ.

ಇಲ್ಲಿ ಸಮಸ್ಯೆಯಿರುವುದು ಬಿಜೆಪಿಯವರಲ್ಲಿ ಮಾತ್ರವಲ್ಲ. ಕಾಂಗ್ರೆಸ್ ನಾಯಕರಲ್ಲೂ ಸಮಸ್ಯೆಗಳಿವೆ. ಸಚಿವ ಶಿವಾನಂದ ಪಾಟೀಲಗೆ ಶಾಂತಿ ಸಂಧಾನ ಮಾಡಿಸಿ ಬನ್ನಿ ಎಂದು ಕರೆದಿದ್ದವರು ಯಾರು?

ಲಿಂಗಾಯತ ನಾಯಕರಿಗೆ ಮೂಗುದಾರ ಹಾಕಿದರೆ ಆರೆಸ್ಸೆಸ್‌ನವರೂ ದಾರಿಗೆ ಬರುತ್ತಾರೆ. ಅಧಿಕಾರ ಬರಬಹುದು ಹೋಗಬಹುದು. ಮಂದಿರದ ಹವಾ ಬರಬಹುದು ಹೋಗಬಹುದು. ಕರ್ನಾಟಕದಲ್ಲಿ ಬಸವ ಶಕ್ತಿ ಮಾತ್ರ ನಿರಂತರ.

ಮಂದಿರದ ಹವಾ ಬರಬಹುದು ಹೋಗಬಹುದು.
ಕರ್ನಾಟಕದಲ್ಲಿ ಬಸವ ಶಕ್ತಿ ಮಾತ್ರ ನಿರಂತರ.

ಬಸವ ಮೀಡಿಯಾ ಯೂ ಟ್ಯೂಬ್ ಚಾನೆಲ್ ಸೇರಿ
https://www.youtube.com/@basavamedia1