ಲಿಂಗಾಯತ ಒಂದು ಪಂಥ, ಧರ್ಮ ಎನ್ನಲು ಆಗವುದಿಲ್ಲ: ಶಂಕರ್ ಬಿದರಿ

“ಬಸವಣ್ಣನವರ ಲಿಂಗಾಯತ ‘ಪಂಥ’ಕ್ಕೆ ಸೇರಿಕೊಂಡ ಜಾತಿಗಳಿಗೆ ಹಿಂದುಳಿದ ವರ್ಗಗಳ ಆಯೋಗದ ವರದಿಯಲ್ಲಿ ಅನ್ಯಾಯವಾಗಿದೆ.”

ಬೆಂಗಳೂರು

ಹಿಂದುಳಿದ ವರ್ಗಗಳ ಆಯೋಗದ ವರದಿಯಲ್ಲಿ ಲಿಂಗಾಯತರಿಗೆ ಅನ್ಯಾಯವಾಗಿದೆ ಎಂದು ಎಂದು ಅಖಿಲ ಭಾರತ ವೀರಶೈವ ಮಹಾಸಭಾದ ರಾಜ್ಯಾಧ್ಯಕ್ಷ ಶಂಕರ ಬಿದರಿ ಗುರುವಾರ ಹೇಳಿದರು.

ನಗರದಲ್ಲಿ ಕರೆದ ಸುದ್ದಿ ಗೋಷ್ಠಿಯಲ್ಲಿ ಪೀಠಿಕೆಯಾಗಿ ಮಾತನಾಡುತ್ತ ಬಿದರಿ ಅವರು ಲಿಂಗಾಯತ ಒಂದು ಪಂಥ, ಅದನ್ನು ಧರ್ಮ ಎನ್ನಲು ಆಗವುದಿಲ್ಲ ಎಂದು ಹೇಳಿದರು. ತಮ್ಮ ನಿಲುವಿಗೆ ಕೆಲವು ಕಾರಣಗಳನ್ನೂ ನೀಡಿದರು:

ಸ್ವತಂತ್ರ್ಯ ಧರ್ಮಕ್ಕೆ ಮಹಾಸಭಾ 20 ವರ್ಷದಿಂದ ಹೋರಾಡುತ್ತಿದ್ದರೂ ಇನ್ನೂ ಮಾನ್ಯತೆ ಸಿಕ್ಕಿಲ್ಲ.

1955ರ ಹಿಂದೂ ಕೋಡ್ ಬಿಲ್ಲಿನಲ್ಲಿ, 2011 ಜನಗಣತಿಯಲ್ಲಿ ಲಿಂಗಾಯತರು ಹಿಂದೂ ಧರ್ಮದ ಭಾಗ ಎಂದು ಪರಿಗಣಿಸಲಾಗಿದೆ. ಕೇಂದ್ರ ಸರಕಾರ ಕೂಡ ಈ ವಿಷಯದಲ್ಲಿ ಇದೇ ನಿಲುವು ಹೊಂದಿದೆ.

ಈ ಎಲ್ಲಾ ಕಾರಣಗಳಿಂದ ಲಿಂಗಾಯತ ಎನ್ನುವುದು ಕಾನೂನುಬದ್ದವಾಗಿ ಒಂದು ಧರ್ಮಕ್ಕಿಂತ ಪಂಥ ಎನ್ನುವುದೇ ಸೂಕ್ತ ಎಂದು ಹೇಳಿದರು.

ಲಿಂಗಾಯತ ‘ಪಂಥದ’ ಜಾತಿಗಳಿಗೆ ಅನ್ಯಾಯ

12ನೇ ಶತಮಾನದಲ್ಲಿ ಹಿಂದೂ ಧರ್ಮ ಬಿಟ್ಟು ಲಿಂಗಾಯತ ‘ಪಂಥ’ಕ್ಕೆ ಸೇರಿದ ಜಾತಿಗಳಿಗೆ ಹಿಂದುಳಿದ ವರ್ಗಗಳ ಆಯೋಗದ ವರದಿಯಲ್ಲಿ ಅನ್ಯಾಯವಾಗಿದೆ ಎಂದು ಬಿದರಿ ಸುದ್ದಿಗೋಷ್ಠಿಯಲ್ಲಿ ಹೇಳಿದರು.

12ನೇ ಶತಮಾನದಲ್ಲಿ ಬಸವಣ್ಣನವರು ಪ್ರತಿಪಾದಿಸಿದ ಲಿಂಗಾಯತ ‘ಪಂಥ’ಕ್ಕೆ 99ಕ್ಕೂ ಹೆಚ್ಚು ವೃತ್ತಿಗಳ ಜನರು ಸೇರ್ಪಡೆಯಾದರು.

ಅದೇ ವೃತ್ತಿಯ ಕೆಲವರು ಸನಾತನ ಹಿಂದೂ ಧರ್ಮದ ಭಾಗವಾಗಿಯೇ ಮುಂದುವರಿದಿದ್ದಾರೆ.
ಹಿಂದೂ ಧರ್ಮ ಹಾಗೂ ಲಿಂಗಾಯತ ಪಂಥಗಳಲ್ಲಿರುವವರ ವೃತ್ತಿಗಳೂ ಒಂದೇ ಆಗಿದ್ದರೂ ಹಿಂದುಳಿದ ಆಯೋಗ ಭೇದ ಮಾಡಿದೆ.

ಲಿಂಗಾಯತ ಪಂಥದ ಜಾತಿಗಳನ್ನು ಪ್ರವರ್ಗ 3 ‘ಬಿ’ಗೆ ಸೇರಿಸಿ, ಹಿಂದೂ ಧರ್ಮದ ಅದೇ ಜಾತಿಗಳನ್ನು ಅತ್ಯಂತ ಹಿಂದುಳಿದ, ಅತಿ ಹಿಂದುಳಿದ, ಹಿಂದುಳಿದ ಹಾಗೂ ಪರಿಶಿಷ್ಟ ಜಾತಿಯ ಪ್ರವರ್ಗಗಳಿಗೆ ಸೇರಿಸಲಾಗಿದೆ. ಈ ತಾರತಮ್ಯವನ್ನು ಖಂಡಿಸುತ್ತೇವೆ’ ಎಂದರು.

ಸುದ್ದಿಗೊಷ್ಟಿಯಲ್ಲಿ ರಾಜ್ಯ ವೀರಶೈವ ಲಿಂಗಾಯತ ಮಹಾಸಭಾದ ಯುವ ಘಟಕದ ರಾಜ್ಯಾಧ್ಯಕ್ಷ ಮನೋಹರ್ ಅಬ್ಬಿಗೇರಿ, ರಾಜ್ಯ ವೀರಶೈವ ಲಿಂಗಾಯತ ಮಹಾಸಭಾದ ಮಹಿಳಾ ರಾಜ್ಯಾಧ್ಯಕ್ಷೆ ಮುಕ್ತಾ೦ಬ, ಪ್ರಧಾನ ಕಾರ್ಯದರ್ಶಿ ನಟರಾಜ್ ಸಾಗರನಳ್ಳಿ ಉಪಸ್ಥಿತರಿದ್ದರು.

ಕಳೆದ ಅಕ್ಟೋಬರಿನಲ್ಲಿ ಮತ್ತೊಂದು ವೀರಶೈವ ಮಹಾಸಭಾದ ಕಾರ್ಯಕ್ರಮದಲ್ಲಿ ಲಿಂಗಾಯತ ಅನ್ನುವುದು ಒಂದು ಪಂಥ. ನಾವು ಈಗ ಪ್ರತ್ಯೇಕ‌ ಧರ್ಮ ಅಂತ ಹೇಳಲ್ಲ, ಎಂದು ಹೇಳಿ ಶಂಕರ ಬಿದರಿ ವಿವಾದ ಸೃಷ್ಟಿಸಿದ್ದರು.

ಆಗ ನಾನು ಹೇಳಿದ ಮಾತು ತಿರುಚಲಾಗಿದೆ ಎಂದು ಬಿದರಿ ಬಸವ ಮೀಡಿಯಾಗೆ ಹೇಳಿದ್ದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/CMDnqQbFJjwCptS1HUXnEd