ರೇಣುಕಾಚಾರ್ಯರ ಹೆಸರು ತೆಗೆದ ಶಂಕರ ಬಿದರಿ ವಿರುದ್ಧ ತಿರುಗಿ ಬಿದ್ದ ಸಭಿಕರು

“ಇನ್ನು ಮೂರು ನಾಲ್ಕು ವರ್ಷಗಳಲ್ಲಿ ‘ವೀರಶೈವ’ ಅನ್ನೋ ಪದ ಹೋಗಿ, ‘ಲಿಂಗಾಯತ’ ಅನ್ನೋ ಒಂದೇ ಪದ ಉಳಿಯಬೇಕು,” ಎಂದು ಗೊರುಚ ಹೇಳಿದರು.

ಬೆಂಗಳೂರು

ಇಂದು ನಗರದಲ್ಲಿ ನಡೆದ ‘ವಚನ ದರ್ಶನ ಮಿಥ್ಯ-ಸತ್ಯ’ ಪುಸ್ತಕದ ಬಿಡುಗಡೆ ಸಮಾರಂಭದಲ್ಲಿ ವೀರಶೈವ ಮಹಾಸಭಾ ಅಧ್ಯಕ್ಷ ಶಂಕರ ಬಿದರಿ ಸಭಿಕರ ಆಕ್ರೋಶಕ್ಕೆ ಗುರಿಯಾಗಿ ಕೆಲವು ನಿಮಿಷಗಳು ಭಾಷಣ ನಿಲ್ಲಿಸಬೇಕಾಯಿತು.

ಅವರ ಭಾಷಣಕ್ಕೆ ಜೋರಾದ ದನಿಯಿಂದ ಆಕ್ಷೇಪವೆತ್ತಿ ಎದ್ದು ನಿಂತ ಸಭಿಕರನ್ನು ಮತ್ತೆ ಕೂರಿಸಲು ಆಯೋಜಕರು ಪ್ರಯಾಸ ಪಡಬೇಕಾಯಿತು. ಬಿದರಿ ಕೂಡ ಭಾಷಣ ನಿಲ್ಲಿಸಿ ಸಿಟ್ಟಾದ ಸಭಿಕರನ್ನು ಸಮಾಧಾನ ಪಡಿಸಲು ಹಲವಾರು ಬಾರಿ ಪ್ರಯತ್ನಿಸಿ, ತಮ್ಮ ಮಾತನ್ನು ‘ಒಪ್ಪಿಕೊಳ್ಳದಿರುವ ಸ್ವಾತಂತ್ರ್ಯ ನಿಮಗೆ ಕೊಡುತ್ತೇನೆ’ ಎಂದು ಹೇಳಿದರು.

ವಿವಾದದ ನಂತರ ತಮ್ಮ ಭಾಷಣವನ್ನು ಮುಕ್ತಾಯಗೊಳಿಸುತ್ತಾ ಬಿದರಿಯವರು ಇನ್ನು ನಾಲ್ಕು ವರ್ಷಗಳಲ್ಲಿ ಹಿರಿಯರಾದ ಶಾಮನೂರು ಶಿವಶಂಕರಪ್ಪ ಅವರ ನೇತೃತ್ವದಲ್ಲಿ ಎಲ್ಲ ಲಿಂಗಾಯತ ಸಂಘಟನೆಗಳು ಒಂದೇ ಷಟ್ಸ್ಥಲ ಧ್ವಜದ ಅಡಿಯಲ್ಲಿ ಒಂದಾಗಬೇಕೆಂಬ ಆಶಯ ವ್ಯಕ್ತ ಪಡಿಸಿದರು.

ಅವರ ಭಾಷಣವನ್ನು ಜಾಗತಿಕ ಲಿಂಗಾಯತ ಮಹಾಸಭಾದ ಎಸ್ ಎಂ ಜಾಮದಾರ್ ವೇದಿಕೆಯಿಂದಲೇ ನೇರವಾಗಿ ಖಂಡಿಸಿದರು. ಗೊ ರು ಚನ್ನಬಸಪ್ಪ, ತೋಂಟದಾರ್ಯ ಮತ್ತು ಭಾಲ್ಕಿ ಶ್ರೀಗಳು ಕೂಡ ತೀಕ್ಷ್ಣವಾಗಿ ವೇದಿಕೆಯಿಂದಲೇ ಖಂಡಿಸಿದರು. ವೇದಿಕೆಯಲ್ಲಿ ಮುಂದಿನ ಸಾಲಿನಲ್ಲಿಯೇ ಕುಳಿತ್ತಿದ್ದ ಮಿಥ್ಯ-ಸತ್ಯಪುಸ್ತಕದ ಸಂಪಾದಕ ಟಿ ಆರ್ ಚಂದ್ರಶೇಖರ್ ಬಿದರಿ ಭಾಷಣವನ್ನು ಪ್ರತಿಭಟಿಸಿ ಎದ್ದು ನಡೆದರು.

ಬಿದರಿ ಭಾಷಣವನ್ನು ಜಾಗತಿಕ ಲಿಂಗಾಯತ ಮಹಾಸಭಾದ ಎಸ್ ಎಂ ಜಾಮದಾರ್ ವೇದಿಕೆಯಿಂದಲೇ ನೇರವಾಗಿ ಖಂಡಿಸಿದರು.

ಬಿದರಿ ಹೇಳಿದ್ದೇನು

ಬಿದರಿ ತಮ್ಮ ಭಾಷಣದಲ್ಲಿ 770 ಬಸವಾದಿ ಶರಣರ ಜಯಂತಿಯನ್ನು ಪ್ರತ್ಯೇಕವಾಗಿ ಆಚರಿಸಲು ಕಾಯಕ ಜೀವಿಗಳಾದ ಲಿಂಗಾಯತರಿಗೆ ಕಷ್ಟವಾಗುತ್ತದೆ. ಅದಕ್ಕೆ ಈ ವರ್ಷದಿಂದ ಎಲ್ಲಾ ಶರಣರ ಜಯಂತಿಯನ್ನು ಬಸವ ಜಯಂತಿಯಂದೇ ಸಾಮೂಹಿಕವಾಗಿ ಆಚರಿಸಬೇಕೆಂದು ಕರೆ ಕೊಟ್ಟರು.

ಅದಕ್ಕೆ ತಾವು ಎಲ್ಲಾ ಶರಣರ ಭಾವಚಿತ್ರಗಳನ್ನು ಮುದ್ರಿಸಿ ವೀರಶೈವ ಮಹಾಸಭಾದ ಜಿಲ್ಲಾ ಘಟಕಗಳಿಗೆ ಕಳಿಸುತ್ತಿದ್ದೇವೆಂದು ಹೇಳಿ, ಮುದ್ರಣ ಮಾಡಬೇಕೆಂದಿರುವ ಕೆಲವು ಶರಣರ ಹೆಸರುಗಳನ್ನು ಒಂದೊಂದಾಗಿ ಹೇಳಲು ಶುರು ಮಾಡಿದರು.

ಬಸವಣ್ಣ, ಅಲ್ಲಮ ಪ್ರಭು, ಅಕ್ಕ ಮಹಾದೇವಿ, ಹೇಮರೆಡ್ಡಿ ಮಲ್ಲಮ್ಮ, ಮಾದಾರ ಚನ್ನಯ್ಯ, ಸಿದ್ದರಾಮೇಶ್ವರ, ಜೇಡರ ದಾಸಿಮಯ್ಯ…

ಹೀಗೆ ಹೇಳುತ್ತಾ ‘ಆದಿ ಗುರು ರೇಣುಕಾಚಾರ್ಯರ ಭಾವಚಿತ್ರವನ್ನೂ ಮಾಡಿಸಿ ಕೊಡ್ತೀನಿ’ ಎಂದು ಹೇಳಿದರು.

ಸಭೆಯಲ್ಲಿ ಕೋಲಾಹಲ ಸೃಷ್ಟಿಸಿದ್ದು ಈ ಹೇಳಿಕೆ. ಅಲ್ಲಿದ್ದ ಬಸವ ಭಕ್ತರು ಎದ್ದು ನಿಂತು ವೇದಿಕೆಯತ್ತ ಧಾವಿಸುವಂತೆ ಮಾಡಿದ್ದೂ ಈ ಹೇಳಿಕೆ.

‘ಆದಿ ಗುರು ರೇಣುಕಾಚಾರ್ಯರ ಭಾವಚಿತ್ರವನ್ನೂ ಮಾಡಿಸಿ ಕೊಡ್ತೀನಿ’ ಎಂದು ಬಿದರಿ ಹೇಳಿದರು.

ಬಿದರಿ ಭಾಷಣ ಮುಗಿಸುವುದನ್ನೇ ಕಾಯುತ್ತಿದ್ದ ಜಾಮದಾರ್ ಸಿಟ್ಟಿನಿಂದ ತಕ್ಷಣವೇ ಮೈಕ್ ತೆಗೆದುಕೊಂಡು ತಮ್ಮ ಪ್ರತಿಕ್ರಿಯೆ ನೀಡಿದರು.

ರೇಣುಕಾಚಾರ್ಯರ ಹೆಸರು ಹೇಳದೆಯೇ ‘ವೀರಶೈವ ಹೆಸರು ದುರ್ಬಳಕೆ ಮಾಡಿಕೊಂಡು ಒಳಗೆ ಬಂದು ಮತ್ತೆ ವೇದ ಆಗಮ ಅಂತ ಶುರು ಮಾಡಿದರೆ ನೀವು (ಸಮಾಜದ ಒಡಕಿಗೆ) ಕಾರಣರಾಗ್ತೀರಿ,” ಎಂದು ಖಡಕ್ ಎಚ್ಚರಿಕೆ ನೀಡಿದರು.

ಬದಲಾದ ಸಭೆಯ ವಾತಾವರಣ

ಬಿದರಿ ಭಾಷಣ ಸಭೆಯ ವಾತಾವರಣವನ್ನು ಸಂಪೂರ್ಣವಾಗಿ ಬದಲಾಯಿಸಿತು. ಅಲ್ಲಿಯವರೆಗೆ ಹಾವು ಮುಂಗುಸಿಯಂತೆ ಇರುವ, ಏಕ ವಚನದಲ್ಲಿಯೇ ಪರಸ್ಪರ ತಾರೀಫು ಮಾಡಿಕೊಳ್ಳುವ ಸಮುದಾಯದ ಎರಡು ದೊಡ್ಡ ಸಂಘಟನೆಗಳು ಒಂದೇ ವೇದಿಕೆಯನ್ನು ಹಂಚಿಕೊಳ್ಳುತ್ತಿದ್ದು ಎಲ್ಲರಲ್ಲಿಯೂ ಒಂದು ಹೊಸ ಒಗ್ಗಟ್ಟಿನ ಸಂಭ್ರಮ ಮೂಡಿಸಿತ್ತು.

ಬಿದರಿ ಭಾಷಣದ ನಂತರ ಈ ಸಂಭ್ರಮ ಬಂದ ವೇಗದಲ್ಲಿಯೇ ಮಾಯವಾಯಿತು. ನಂತರ ಮಾತನಾಡಿದವರು ಶಿಷ್ಟಾಚಾರ ಬದಿಗಿಟ್ಟು ಬಿದರಿಯವರ ಮೊಂಡು ವೀರಶೈವವಾದಕ್ಕೆ ಮುಚ್ಚುಮರೆಯಿಲ್ಲದೆ ತಮ್ಮ ಪ್ರತಿಕ್ರಿಯೆ ನೀಡಿದರು.

ಹಿರಿಯ ಸಾಹಿತಿ ಗೊ ರು ಚನ್ನಬಸಪ್ಪ ಬಿದರಿ ಹೇಳಿದಂತೆ ಲಿಂಗಾಯತರೆಲ್ಲ ಒಗ್ಗಾಟಾಗಬೇಕು ಎಂದು ಹೇಳುತ್ತಾ “ಇನ್ನು ಮೂರು ನಾಲ್ಕು ವರ್ಷಗಳಲ್ಲಿ ‘ವೀರಶೈವ’ ಅನ್ನೋ ಪದ ಹೋಗಿ, ‘ಲಿಂಗಾಯತ’ ಅನ್ನೋ ಒಂದೇ ಪದ ಉಳಿಯಬೇಕು,” ಎಂದು ನೇರವಾಗಿ ಹೇಳಿದರು.

ಗೊರುಚ ಅವರನ್ನು ಅನುಮೋದಿಸಿ ಗದಗಿನ ಪೂಜ್ಯ ತೋಂಟದಾರ್ಯ ಶೀಗಳು ‘ವೀರಶೈವ’ ಶೈವದ ಶಾಖೆ, ಬಸವಾದಿ ಶರಣರಿಗೆ ಸಂಬಂಧಿಸಿದ ಪದವಲ್ಲ, ಎಂದರು.

ವೀರಶೈವ ಪದ ಬೇಕು ಎನ್ನುವ ಕೆಲವು ಲಿಂಗಾಯತರಿಗೆ ಅದು ಅಸ್ತಿತ್ವದ ಪ್ರಶ್ನೆಯಾಗಿದೆ.
ಅವರಲ್ಲಿ ಸ್ವಾರ್ಥವಿದೆ, ಸಮಾಜದ ಹಿತವಿಲ್ಲ. ಇದನ್ನು ಅಖಿಲ ಭಾರತ ವೀರಶೈವ ಮಹಾಸಭಾ ತಿಳಿದುಕೊಂಡು ಕೆಲವೇ ವ್ಯಕ್ತಿಗಳ ಸ್ವಾರ್ಥಕ್ಕೆ ಹೋರಾಡುವುದನ್ನು ನಿಲ್ಲಿಸಿ ಸಮಾಜದ ಹಿತಕ್ಕಾಗಿ ಹೋರಾಟ ಮಾಡಬೇಕು, ವೀರಶೈವ ಪದವನ್ನು ಬಿಡಬೇಕು ಎಂದು ಹೇಳಿದರು.

ವೀರಶೈವ ಮಹಾಸಭಾ ಕೆಲವೇ ವ್ಯಕ್ತಿಗಳ ಸ್ವಾರ್ಥಕ್ಕೆ ಹೋರಾಡುವುದನ್ನು ನಿಲ್ಲಿಸಿ ಸಮಾಜದ ಹಿತಕ್ಕಾಗಿ ಹೋರಾಟ ಮಾಡಬೇಕು, ವೀರಶೈವ ಪದವನ್ನು ಬಿಡಬೇಕು

ಭಾಲ್ಕಿಯ ನಾಡೋಜ ಬಸವಲಿಂಗ ಪಟ್ಟದೇವರು ಸ್ವತಂತ್ರ ಲಿಂಗಾಯತ ಧರ್ಮಕ್ಕೆ ಮಾನ್ಯತೆ ಸಿಗುವಲ್ಲಿ ವೀರಶೈವ ಮಹಾಸಭಾವೇ ದೊಡ್ಡ ತೊಡಕಾಗಿದೆ ಎಂದು ಹೇಳಿದರು.

ವೇದಿಕೆಯಲ್ಲಿದ್ದ ಗಣ್ಯರೊಬ್ಬರು ಪೌರಾಣಿಕ ವ್ಯಕ್ತಿ ರೇಣುಕಾಚಾರ್ಯರನ್ನು ಬಸವಣ್ಣನವರ ಗುರುವಾಗಿಸುವ ಕುತಂತ್ರ ಶತಮಾನಗಳಿಂದ ನಡೆದಿದೆ. ಇದರ ಬಗ್ಗೆ ಲಿಂಗಾಯತರಲ್ಲಿ ಬಹಳ ಸಿಟ್ಟಿದೆ.

ರೇಣುಕಾಚಾರ್ಯ ಕಾಲ್ಪನಿಕ ವ್ಯಕ್ತಿ. ಅವರನ್ನು ಬಸವ ಜಯಂತಿಗೆ ಜೋಡಿಸುವ ಪ್ರಯತ್ನ ಯಾರೂ ಸಹಿಸಲು ಸಾಧ್ಯವಿಲ್ಲ.

ಇಂತಹ ಕಾಲ್ಪನಿಕ ವ್ಯಕ್ತಿಯನ್ನು ಬಸವ ಜಯಂತಿಗೆ ಜೋಡಿಸುವ ಪ್ರಯತ್ನ ಯಾರೂ ಸಹಿಸಲು ಸಾಧ್ಯವಿಲ್ಲ. ಸಭೆಯಲ್ಲಿದ್ದ ಗಣ್ಯರು ಮುಚ್ಚು ಮರೆಯಿಲ್ಲದೆ ಮಾತನಾಡಲು ಇದೇ ಕಾರಣ, ಎಂದು ಹೇಳಿದರು.

ವೇದಿಕೆಯಲ್ಲಿದ್ದ ಪೂಜ್ಯರೊಬ್ಬರು ಬಿದರಿಯವರು ಶಂಕರ ಮಠಕ್ಕೆ, ಮಂತ್ರಾಲಯಕ್ಕೆ ತಾವು ಮಾಡಿರುವ ಸೇವೆಯನ್ನು ಇಲ್ಲಿ ಸ್ಮರಿಸಿಕೊಳ್ಳುವ ಅವಶ್ಯಕತೆಯಿರಲಿಲ್ಲ. ಆದರೂ ಅವರ ಭಾಷಣದಲ್ಲಿ ಕೆಲವು ಒಳ್ಳೆಯ ಅಂಶಗಳಿದ್ದವು. ಮಠಗಳಲ್ಲಿ ವಚನ ಪರಂಪರೆಯನ್ನು ಗಟ್ಟಿಗೊಳಿಸುವ ಬಗ್ಗೆ, ಸಂಸ್ಕೃತದ ಬದಲು ಕನ್ನಡದಲ್ಲಿ ಪೂಜೆಯನ್ನು ಜನಪ್ರಿಯಗೊಳಿಸುವ ಬಗ್ಗೆ ಬಿದರಿ ಚೆನ್ನಾಗಿ ಮಾತನಾಡಿದರು.

ಆದರೆ ಒಂದು ಮಾತಿಗೇಡಿತನದ ಹೇಳಿಕೆಯಿಂದ ಇಡೀ ಭಾಷಣವೇ ಎಲ್ಲರಲ್ಲಿ ಆಕ್ರೋಶ ಮೂಡಿಸಿದೆ ಎಂದು ಪೂಜ್ಯರು ಹೇಳಿದರು.