ಸರಕಾರದ ವಿರೋಧ, ಕಲಬುರಗಿ ಪ್ರತಿಭಟನೆಯಿಂದ ಸೇಡಂ ಉತ್ಸವಕ್ಕೆ ಪೆಟ್ಟು: ಶೋಭಾ ಕರಂದ್ಲಾಜೆ

ಪತ್ರಕರ್ತರ ಪ್ರಶ್ನೆಯಿಂದ ತಾಳ್ಮೆ ಕಳೆದುಕೊಂಡು ಸಿಟ್ಟಾದ ಸಚಿವೆ

ಸೇಡಂ

ಸಂಘ ಪರಿವಾರದ ಮಹತ್ವಾಕಾಂಕ್ಷೆಯ ಭಾರತೀಯ ಸಂಸ್ಕೃತಿ ಉತ್ಸವಕ್ಕೆ ಜನರಿಂದ ನೀರಸ ಪ್ರತಿಕ್ರಿಯೆ ಬಂದಿರುವುದು ದೊಡ್ಡ ಚರ್ಚೆ ಹುಟ್ಟುಹಾಕಿದೆ.

ಸೇಡಂಗೆ ಸೋಮವಾರ ಭೇಟಿ ನೀಡಿ ಭಾರತೀಯ ಸಂಸ್ಕೃತಿ ಉತ್ಸವದಲ್ಲಿ ಪಾಲ್ಗೊಂಡ ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ಜನರ ಪ್ರತಿಕ್ರಿಯೆ ನೋಡಿ ದುಃಖವಾಗಿದೆ ಎಂದು ಮಾಧ್ಯಮಗಳಿಗೆ ಹೇಳಿದರು.

ಭಾರತೀಯ ಸಂಸ್ಕೃತಿ ಉತ್ಸವ ಜನರನ್ನು ಸೆಳೆಯಲು ಸೋತಿದ್ದಕ್ಕೆ ಕರಂದ್ಲಾಜೆ ಎರಡು ಕಾರಣಗಳನ್ನು ಕೊಟ್ಟರು. ಒಂದು, ರಾಜ್ಯ ಸರಕಾರ ಶಾಲಾ ಮಕ್ಕಳು ಮತ್ತು ಅಧಿಕಾರಿಗಳು ಉತ್ಸವಕ್ಕೆ ಹೋಗದಿರಲು ಮೌಖಿಕ ಆದೇಶ ನೀಡಿದೆ ಎಂದು ಆಪಾದಿಸಿದರು.

ಎರಡನೆಯದಾಗಿ, ಕಲಬುರ್ಗಿಯಲ್ಲಿ ಸಂಸ್ಕೃತಿ ಉತ್ಸವದ ವಿರುದ್ಧ ನಡೆದ ಪ್ರತಿಭಟನೆಯೂ ಅದರ ಸೋಲಿಗೆ ಕಾರಣವಾಯಿತು ಎಂದು ಸೂಚಿಸಿದರು. “ಯಾವ ಕಾರಣಕ್ಕೆ ವಿರೋಧ ಮಾಡಿದಿರಿ, ಯಾವ ‘ಮಾನಸಿಕತೆ’ಯಿಂದ ವಿರೋಧ ಮಾಡಿದಿರಿ, ನಮ್ಮ ಸಂಸ್ಕೃತಿ, ಕೃಷಿ ಪದ್ಧತಿ, ಅರೋಗ್ಯ ಪದ್ದತಿಯನ್ನು ಜನಕ್ಕೆ ಹೇಳಿಕೊಡುವುದೇ ತಪ್ಪಾ,” ಎಂದು ಪ್ರಶ್ನಿಸಿದರು.

ಮುಖ್ಯಮಂತ್ರಿ ಸಿದ್ದರಾಮಯ್ಯ ಉತ್ಸವಕ್ಕೆ ಬಾರದಿರುವ ಬಗ್ಗೆ ಅವರು ನೀಡಿದ ಹೇಳಿಕೆಯನ್ನು ಪತ್ರಕರ್ತರೊಬ್ಬರು ಪ್ರಶ್ನಿಸಿದ ಮೇಲೆ ತಟ್ಟನೆ ಸಿಟ್ಟಿಗೆದ್ದು “ನಾನು ಆ ಚರ್ಚೆಗೆ ಹೋಗುವದಿಲ್ಲ,” ಎಂದು ಹೇಳಿದರು.

ನಂತರ ಮಾತು ಕೇಂದ್ರ ಬಜೆಟಿನ ಬಗ್ಗೆ ತಿರುಗಿದರೂ ಸಿಟ್ಟಿನಲ್ಲಿಯೇ ಇದ್ದ ಕರಂದ್ಲಾಜೆ ಅಲ್ಲಿ ಬಂದ ಪ್ರಶ್ನೆಗಳಿಂದಲೂ ರೊಚ್ಚಿಗೆದ್ದು ಸಂವಾದವನ್ನು ಅರ್ಧಕ್ಕೆ ಬಿಟ್ಟು ತೆರಳಿದರು.