ಲಿಂಗಾಯತ ಧರ್ಮವಲ್ಲ, ‘ಮಿಥ್ಯ ಸತ್ಯ’ ಸಮಾರಂಭದಲ್ಲಿ ವೀರಶೈವಕ್ಕೆ ಅಪಚಾರ: ರಂಭಾಪುರಿ ಶ್ರೀ

“ಆ ಸಮಾರಂಭದಲ್ಲಿ ಪಾಲ್ಗೊಂಡ ಒಬ್ಬ ವಯೋವೃದ್ಧ ಗೊರುಚನ್ನಬಸಪ್ಪ…ಅವನಿಗೆ ಧರ್ಮದ ಇತಿಹಾಸವೇ ಗೊತ್ತಿಲ್ಲ ಅನಿಸುತ್ತಿದೆ.”

ತಾಳಿಕೋಟಿ

ಇತ್ತೀಚೆಗೆ ನಡೆದ ‘ವಚನ ದರ್ಶನ ಮಿಥ್ಯ ಸತ್ಯ’ ಪುಸ್ತಕ ಬಿಡುಗಡೆ ಸಮಾರಂಭದಲ್ಲಿ ವೀರಶೈವ ಧರ್ಮಕ್ಕೆ ಅಪಚಾರವಾಗಿದೆ. ಲಿಂಗಾಯತ ಧರ್ಮವೇ ಅಲ್ಲ, ಆದರೂ ಬಸವಣ್ಣನವರ ಹೆಸರಿನಲ್ಲಿ ಧರ್ಮ ಒಡೆಯುವ ಕೆಲಸವಾಗುತ್ತಿದೆ ಎಂದು ಬಾಳೆಹೊನ್ನೂರು ರಂಭಾಪುರಿ ವೀರಸೋಮೇಶ್ವರ ಸ್ವಾಮೀಜಿ ಸೋಮವಾರ ಹೇಳಿದರು.

‘ಮಿಥ್ಯ ಸತ್ಯ’ ಕಾರ್ಯಕ್ರಮದಲ್ಲಿ ಮಾತನಾಡುತ್ತ ಅಖಿಲ ಭಾರತ ವೀರಶೈವ ಮಹಾಸಭಾ ರಾಜ್ಯಾಧ್ಯಕ್ಷ ಶಂಕರ ಬಿದರಿ ಬಸವ ಜಯಂತಿಗೆ ರೇಣುಕಾಚಾರ್ಯರ ಭಾವಚಿತ್ರ ಮುದ್ರಿಸಿ ಹಂಚುತ್ತೇನೆ ಎಂದು ಹೇಳಿ ದೊಡ್ಡ ವಿವಾದವೆಬ್ಬಿಸಿದ್ದರು.

ಇದಕ್ಕೆ ಪ್ರತಿಕ್ರಿಯೆಯಾಗಿ ಗೊರು ಚನ್ನಬಸಪ್ಪ, ಗದುಗಿನ ಡಾ. ತೋಂಟದಾರ್ಯ ಸಿದ್ದರಾಮ ಶ್ರೀಗಳು, ಎಸ್ ಎಂ ಜಾಮದಾರ್ ಮುಂತಾದವರು ಲಿಂಗಾಯತದ ಒಳಗೆ ವೀರಶೈವವನ್ನು ತುರುಕುವ ಬಿದರಿಯವರ ಪ್ರಯತ್ನವನ್ನು ಖಂಡಿಸಿದ್ದರು.

ಇನ್ನು ನಾಲ್ಕು ವರ್ಷದಲ್ಲಿ ವೀರಶೈವ ಪದ ಮಾಯವಾಗುತ್ತದೆ ಎಂದು ಗೊರುಚ ಹೇಳಿದರೆ ಗದುಗಿನ ಶ್ರೀಗಳು ‘ವೀರಶೈವ’ ಬಸವಾದಿ ಶರಣರಿಗೆ ಸಂಬಂಧಿಸಿದ ಪದವಲ್ಲ, ಎಂದರು. ಸಮಾಜದ ಒಡಕಿಗೆ ನೀವು ಕಾರಣರಾಗ್ತೀರಾ ಎಂದು ಜಾಮದಾರ್ ಬಿದರಿಯವರನ್ನು ಎಚ್ಚರಿಸಿದ್ದರು.

ರಂಭಾಪುರಿ ಶ್ರೀ, ಕೇದಾರ ಶ್ರೀ ಸುದ್ದಿಗೋಷ್ಠಿ

ಸೋಮವಾರ ಪಟ್ಟಣದಲ್ಲಿ ಕರೆದ ಸುದ್ದಿಗೋಷ್ಠಿಯಲ್ಲಿ ರಂಭಾಪುರಿ ಶ್ರೀ ಮತ್ತು ಕೇದಾರ ಪೀಠದ ಶ್ರೀ ಭೀಮಾಶಂಕರಲಿಂಗ ಶಿವಾಚಾರ್ಯ ಭಗವತ್ಪಾದರು ಮಾತನಾಡಿದರು.

ತಮ್ಮ ಹೇಳಿಕೆಯಲ್ಲಿ ಅವರು ‘ಮಿಥ್ಯ ಸತ್ಯ’ ಕಾರ್ಯಕ್ರಮದ ಮೇಲೆ, ಅದನ್ನು ಆಯೋಜಿಸಿದ್ದ ಜಾಗತಿಕ ಲಿಂಗಾಯತ ಮಹಾಸಭೆಯ ಮೇಲೆ ಕಿಡಿಕಾರಿ, ಶಂಕರ ಬಿದರಿಯವರನ್ನು ಬೆಂಬಲಿಸಿದರು.

ಬಿದರಿಗೆ ಬೆಂಬಲ

ಬಿದರಿಯವರು ತಮ್ಮ ಭಾಷಣದಲ್ಲಿ ಶರಣರ ಮತ್ತು ರೇಣುಕಾಚಾರ್ಯರ ಭಾವಚಿತ್ರಗಳನ್ನು ಸಮುದಾಯಕ್ಕೆ ತಲುಪಿಸುವ ಮಾತನಾಡಿದರು, ಎಂದು ರಂಭಾಪುರಿ ಶ್ರೀಗಳು ಹೇಳಿದರು.

ಆದರೆ ಅಲ್ಲಿದ್ದ “ಒಂದೇ ವರ್ಗದ” ಜನ ಮೂಲ ಧರ್ಮದ ಆಚಾರ್ಯರ ಭಾವಚಿತ್ರವನ್ನು ಬಿಡುಗಡೆ ಮಾಡಲು ವಿರೋಧಿಸಿದರು. ಕೆಲವು ಮಠಾಧೀಶರು ಮತ್ತು ವ್ಯಕ್ತಿಗಳು ಸೇರಿ ಧರ್ಮದ ಪ್ರಾಚೀನ ಇತಿಹಾಸವನ್ನು ಅಣಕಿಸುವ ಮತ್ತು ಗುರು ಪರಂಪರೆಗೆ ಚ್ಯುತಿಯುಂಟು ಮಾಡುವ ದುರುದ್ದೇಶದಿಂದ ಕೆಲಸ ಮಾಡುತ್ತಿದ್ದಾರೆ ಎಂದು ಅವರು ಆರೋಪಿಸಿದರು.

ಗೊರುಚನ್ನಬಸಪ್ಪ…ಅವನಿಗೆ…

ರಂಭಾಪುರಿ ಶ್ರೀಗಳು ಹಿರಿಯ ಶರಣ ಸಾಹಿತಿ ತೊಂಬತ್ತು ನಾಲ್ಕು ವರ್ಷದ ಗೊರುಚನ್ನಬಸಪ್ಪನವರನ್ನು ಏಕವಚನದಲ್ಲಿ ಖಂಡಿಸಿದರು.

“ಆ ಸಮಾರಂಭದಲ್ಲಿ ಪಾಲ್ಗೊಂಡ ಒಬ್ಬ ವಯೋವೃದ್ಧ ಗೊರುಚನ್ನಬಸಪ್ಪ…ಅವನಿಗೆ ಧರ್ಮದ ಇತಿಹಾಸವೇ ಗೊತ್ತಿಲ್ಲ ಅನಿಸುತ್ತಿದೆ.

ಇನ್ನು ನಾಲ್ಕೈದು ವರ್ಷಕ್ಕೆ ವೀರಶೈವ ಪದ ಹೊರಟು ಹೋಗುತ್ತದೆ, ಬರಿ ಲಿಂಗಾಯತ ಅಂತ ಬಳಸಿ ಅಂತ ಹೇಳಿದ್ದು ಕೇಳಿ ಮನಸ್ಸಿಗೆ ಖೇದವಾಯಿತು. ಈ ವಯಸ್ಸಿನಲ್ಲಿ ಧರ್ಮದ ಪರಿಜ್ಞಾನವಿಲ್ಲದೆ ವರ್ತಿಸುವುದು, ಅದರ ಪರಿಣಾಮವನ್ನರಿಯದೆ ಮಾತನಾಡುವುದು ಒಳ್ಳೆಯದಲ್ಲ,” ಎಂದು ಹೇಳಿದರು.

ಜಾಗತಿಕ ಲಿಂಗಾಯತ ಮಹಾಸಭೆ

ರಂಭಾಪುರಿ ಶ್ರೀಗಳು ತಮ್ಮ ಹೇಳಿಕೆಯಲ್ಲಿ ಅಖಿಲ ಭಾರತ ವೀರಶೈವ ಮಹಾಸಭೆಯನ್ನು ಪ್ರಶಂಸಿಸಿ, ಜಾಗತಿಕ ಲಿಂಗಾಯತ ಮಹಾಸಭೆಯನ್ನು ಖಂಡಿಸಿದರು.

ಜಾತಿಯ ಹೆಸರಿನಲ್ಲಿ ಧರ್ಮ ಒಡೆಯಬಾರದು ಎನ್ನುವ ದೂರದೃಷ್ಟಿಯಿಂದ 2017ರಲ್ಲಿ ಅಖಿಲ ಭಾರತ ವೀರಶೈವ ಮಹಾಸಭೆಗೆ ಲಿಂಗಾಯತ ಹೆಸರನ್ನೂ ಜೋಡಿಸಲಾಯಿತು.

ಆದರೆ ಜಾಗತಿಕ ಲಿಂಗಾಯತ ಮಹಾಸಭೆ ವೀರಶೈವ ಲಿಂಗಾಯತ ಎನ್ನುವ ಭೇದ ಹುಟ್ಟಿಸಲು ಹೋರಾಟಕ್ಕೆ ಇಳಿಯಿತು. ಅದಕ್ಕೆ ಹಿನ್ನಡೆಯಾದ ಮೇಲೆ ಮೌನಕ್ಕೆ ಶರಣಾಗಿದ್ದರೂ ಇತ್ತೀಚಿನ ದಿನಗಳಲ್ಲಿ ಮತ್ತೆ ಧರ್ಮ ಒಡೆಯುವ ಮತ್ತು ಜನರ ಮನಸ್ಸುಗಳನ್ನು ಕಲುಷಿತಗೊಳಿಸುವ ಕೆಲಸ ಮಾಡುತ್ತಿದ್ದಾರೆ.

ಅಖಿಲ ಭಾರತ ವೀರಶೈವ ಮಹಾಸಭೆಗೆ ನೂರಾರು ವರ್ಷಗಳ ಇತಿಹಾಸವಿದ್ದರೆ, ಜಾಗತಿಕ ಲಿಂಗಾಯತ ಮಹಾಸಭೆ ಇತ್ತೀಚೆಗೆ ಹುಟ್ಟಿರುವ ಸಂಸ್ಥೆ ಎನ್ನುವುದನ್ನು ಮರೆಯಬಾರದು, ಎಂದು ರಂಭಾಪುರಿ ಶ್ರೀಗಳು ಹೇಳಿದರು.

ಲಿಂಗಾಯತ ಧರ್ಮವಲ್ಲ

ತಮ್ಮ ಹೇಳಿಕೆಯಲ್ಲಿ ರಂಭಾಪುರಿ ಶ್ರೀಗಳು ಲಿಂಗಾಯತ ಒಂದು ಧರ್ಮವಲ್ಲ ಎಂದು ಹೇಳಿದರು.

ವೀರಶೈವ ಒಂದು ಸೈದ್ಧಾಂತಿಕ ಮತ್ತು ಧರ್ಮವಾಚಕ ಪದ. ವೀರಶೈವದಲ್ಲಿ ಲಿಂಗ ಪೂಜೆ ಒಂದು ಕ್ರಮ. ಲಿಂಗಾಯತ ರೂಢಿಯಿಂದ ಬಂದಿರುವ ಆಡು ಭಾಷೆಯ ಪದ ಮಾತ್ರ. ಅದು ಧರ್ಮದ ಯಾವುದೇ ಸ್ವರೂಪ ಪಡೆದುಕೊಳ್ಳಲು ಸಾಧ್ಯವಿಲ್ಲ, ಎಂದು ಅವರು ಹೇಳಿದರು.

ಬಸವ ತತ್ವಕ್ಕೂ ಅಪಚಾರ

ಬಸವಣ್ಣನವರು ಇವ ನಮ್ಮವ ಎನ್ನುತ್ತಾ ಎಲ್ಲ ಜಾತಿಗಳನ್ನು ಒಂದುಗೂಡಿಸುವ ಕೆಲಸ ಮಾಡಿದರು. ಆದರೆ ಇವರು ಬಸವಣ್ಣನವರ ಹೆಸರಿನಲ್ಲಿ ಒಂದುಗೂಡಿರುವ ಸಮಾಜವನ್ನ ಮತ್ತೆ ಛಿದ್ರಛಿದ್ರ ಮಾಡುವ ಕೆಲಸಮಾಡುತ್ತಿದ್ದಾರೆ. ಇದು ಬಸವಣ್ಣನವರ ವಿಚಾರಗಳಿಗೂ ವ್ಯತಿರಿಕ್ತ ಎಂದು ಹೇಳಿದರು.

ಕೇದಾರ ಶ್ರೀ

ಕೇದಾರ ಶ್ರೀಗಳು ಮಾತನಾಡಿ ವೀರಶೈವ ಧರ್ಮಕ್ಕೆ ಭದ್ರ ಬುನಾದಿ ಇದೆ, ಇದೊಂದು ಜಾಗತಿಕ ಧರ್ಮವಾಗಿದೆ, ಇದರ ಕುರಿತು ನಮ್ಮ ಬಳಿ ದಾಖಲೆ ಪತ್ರಗಳಿವೆ.

ಸುಧೀರ್ಘವಾದ ಗುರು ಪರಂಪರೆ ಇರುವ ಈ ಧರ್ಮದ ಕುರಿತು ಮಾತನಾಡುವಾಗ ಬಹಳ ಎಚ್ಚರ ಇರಬೇಕು, ಯಾವುದೇ ದಾಖಲೆಗಳು ಇಲ್ಲದೆ ಮಾತನಾಡುವುದು ಸರಿಯಲ್ಲ, ನಾನು ಇಂಥವರಿಗೆ ಪಂಥಾಹ್ವಾನ ನೀಡುತ್ತೇನೆ ಅವರು ಯಾವ ವಿಷಯದ ಕುರಿತು ಟೀಕೆಯನ್ನು ಮಾಡುತ್ತಿದ್ದರೋ ಅದರ ಕುರಿತು ದಾಖಲೆ ನಮಗೆ ನೀಡಬೇಕು, ಇಲ್ಲದಿದ್ದಲ್ಲಿ ನಾವು ಇದರ ಕುರಿತು ಗಂಭೀರವಾಗ ಬೇಕಾಗುತ್ತದೆ ಎಂದರು.

ಸುದ್ದಿಗೋಷ್ಠಿಯಲ್ಲಿ ಮನಗೂಳಿ ಹಿರೇಮಠದ ಪೂಜ್ಯ ಶ್ರೀ ಅಭಿನವ ಸಂಗನಬಸವ ಶಿವಾಚಾರ್ಯರು, ಜಿಪಂ ಮಾಜಿ ಸದಸ್ಯ ಬಸನಗೌಡ ವಣಿಕ್ಯಾಳ ಮತ್ತಿತರರು ಇದ್ದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ

https://chat.whatsapp.com/IxxC2m7AXyW84KPf73t5iL