ಮಹಾಂತೇಶ ಅಗಡಿ 1960-2025: ಕಳಚಿದ ದಾವಣಗೆರೆಯ ಬಸವ ತತ್ವದ ಕೊಂಡಿ

ದಾವಣಗೆರೆ

ದಾವಣಗೆರೆಯ ಬಸವಾನುಯಾಯಿಗಳಿಗೆ ಸಿಡಿಲಾಘಾತದ ಸುದ್ದಿ ಇಂದು ಮಧ್ಯಾಹ್ನ ತಲುಪಿದೆ.

ಒಂದು ಗಂಟೆ ಸುಮಾರಿಗೆ ಶರಣ ಮಹಾಂತೇಶ ಅಗಡಿ, 64, ಅಂಗಡಿಯಲ್ಲಿದ್ದಾಗ ಹೃದಯಾಘಾತವಾಗಿ, ಬಾಪೂಜಿ ಆಸ್ಪತ್ರೆಯಲ್ಲಿ ಲಿಂಗೈಕ್ಯರಾದರು. ತಾಯಿ, ಮಡದಿ, ಮಗ, ಮಗಳು, ಮೊಮ್ಮಗನ ಜೊತೆಗೆ ನಾಡಿನ ಅಸಂಖ್ಯಾತ ಶರಣ ಬಳಗವನ್ನು ಅಗಲಿದ್ದಾರೆ.

ಅಗಡಿ ಅವರು ಉದ್ಯಮಿಗಳಾಗಿ ಕಾಯಕಶೀಲರಾಗಿ ಬಸವಾದಿ ಶರಣರ ವಿಚಾರಗಳನ್ನು ಪಾಲಿಸುತ್ತಿದ್ದರು. ಶರಣರ ವಿಚಾರಗಳಿಗೆ ಅಗೌರವ ಆದಾಗ ಗಟ್ಟಿಯಾಗಿ ನಿಂತು ಪ್ರತಿಭಟಿಸುವ ಅಪ್ಪಟ ಅಭಿಮಾನಿಯಾಗಿದ್ದರು.

ದಾವಣಗೆರೆ ಭಾಗದಲ್ಲಿ ಬಸವ ತತ್ವ ಬೆಳೆಸುವಲ್ಲಿ ಬಹಳ ಶ್ರಮಿಸುತ್ತಿದ್ದರು. ಸದಾ ಕಾಯಕ ಶೀಲರಾಗಿದ್ದ ಅವರ ನೊಸಲ ಮೇಲೆ ವಿಭೂತಿ ಸದಾ ರಾರಾಜಿಸುತ್ತಿತ್ತು.

ಎಲ್ಲಾ ಬಸವಪರ ಸಂಘಟನೆಗಳನ್ನು ಒಗ್ಗೂಡಿಸಿ ದಾವಣಗೆರೆ ನಗರದಲ್ಲಿ ಪ್ರಪ್ರಥಮ ಬಾರಿಗೆ ಬಸವ ಜಯಂತಿ ಆಚರಣೆ ಮಾಡಿರುವುದರಲ್ಲಿ ಇವರ ಪಾತ್ರ ಬಹುಮುಖ್ಯವಾದುದಾಗಿತ್ತು.

ದಾವಣಗೆರೆ ಜಿಲ್ಲೆಯಲ್ಲಿ ಎಲ್ಲಾ ಲಿಂಗಾಯತ ಕಾಯಕ ಜೀವಿಗಳ ಒಕ್ಕೂಟ ಮಾಡುವ ಆಸೆಯನ್ನು ವ್ಯಕ್ತಪಡಿಸಿದ್ದರು, ಆಸೆ ಕೈಗೂಡುವ ಮೊದಲೇ, ಕಾಯಕದಲ್ಲಿ ನಿರತರಾಗಿಯೇ ಲಿಂಗೈಕ್ಯರಾಗಿ ಬಸವಾಭಿಮಾನಿಗಳಿಗೆ ತುಂಬಲಾರದ ನಷ್ಟ ಆಗಿದೆ.

ಇಂತಹ ಮಹನೀಯರಾದ ಮಹಾಂತೇಶ ಅಗಡಿ ಅವರ ಕುಟುಂಬದವರಿಗೆ ಬಸವಾದಿ ಶರಣರು ದುಃಖ ಭರಿಸುವ ಶಕ್ತಿ ನೀಡಲಿ ಎಂದು ಪ್ರಾರ್ಥಿಸುತ್ತೇನೆ.

ಬುಧವಾರ 1 ಗಂಟೆಗೆ ದಾವಣಗೆರೆಯ ಶಾಮನೂರ ರುದ್ರಭೂಮಿಯಲ್ಲಿ ಅಂತಿಮ ಸಂಸ್ಕಾರ ನಡೆಯಲಿದೆ.

ಸಾಣೇಹಳ್ಳಿ ಶ್ರೀಗಳಿಂದ ಶೋಕ ಸಂದೇಶ

ದಾವಣಗೆರೆ ಜಿಲ್ಲೆಯ ಜಾಗತಿಕ ಲಿಂಗಾಯತ ಮಹಾಸಭೆಯ ಸಕ್ರಿಯ ಸದಸ್ಯ. ಬಸವತತ್ವದ ಬಗ್ಗೆ ಅಪಾರ ಕಾಳಜಿಯುಳ್ಳ ಉತ್ಸಾಹಿಗಳು. ಬಸವ ಸಂದೇಶ ಸಾರುವ ಕಾರ್ಯಕ್ರಮಗಳು ಎಲ್ಲೇ ನಡೆದರೂ ಹಾಜರಿರುತ್ತಿದ್ದರು.

ಹಣೆಯ ಮೇಲೆ ಸದಾ ಭಸ್ಮ, ಕೊರಳಲ್ಲಿ ಇಷ್ಟಲಿಂಗ, ಬಾಯಲ್ಲಿ ವಚನ ಸಾಹಿತ್ಯ ಅವರ ಬದುಕಿನ ವಿಧಾನ. ಅಂತಹ ಶರಣ ಮಹಾಂತೇಶ ಅಂಗಡಿ ಅವರು ಹೃದಯಾಘಾತದಿಂದ ಲಿಂಗೈಕ್ಯರಾಗಿದ್ದು, ಅವರ ಮನೆತನಕ್ಕೆ ಮಾತ್ರವಲ್ಲದೆ ಸಮಾಜಕ್ಕೂ ನಷ್ಟ. ಅವರ ಅಗಲುವಿಕೆಯಿಂದ ಆಗಿರುವ ದುಃಖವನ್ನು ಸಹಿಸುವ ಶಕ್ತಿಯನ್ನು ಬಸವಾದಿ ಶರಣರು ಕರುಣಿಸಲಿ ಎಂದು ಹಾರೈಸುತ್ತೇವೆ.

• ಶ್ರೀ ಪಂಡಿತಾರಾದ್ಯ ಶಿವಾಚಾರ್ಯ ಸ್ವಾಮಿಗಳು, ಸಾಣೇಹಳ್ಳಿ