ಧಾರವಾಡ:
ಎಂ.ಎಂ. ಕಲಬುರ್ಗಿ ಪ್ರತಿಷ್ಠಾನ ವತಿಯಿಂದ ಎಂ.ಎಂ. ಕಲಬುರ್ಗಿ ಅವರ 87ನೇ ಜನ್ಮದಿನದ ಪ್ರಯುಕ್ತ ಆಲೂರು ವೆಂಕಟರಾವ್ ಭವನದಲ್ಲಿ ಕಲಬುರ್ಗಿ ಅವರ ಸಮಗ್ರ ಸಾಹಿತ್ಯ 40 ಸಂಪುಟಗಳನ್ನು ಸಾಹಿತಿ ಹಂ.ಪ. ನಾಗರಾಜಯ್ಯ ಮರುಬಿಡುಗಡೆ ಮಾಡಿದರು.
ಬಳಿಕ ಮಾತನಾಡಿದ ಅವರು, ಕನ್ನಡ ಸಾಹಿತ್ಯದ ಮಹತ್ವದ ಕೃತಿಶ್ರೇಣಿಗಳಲ್ಲಿ ಸಂಶೋಧಕ ಎಂ.ಎಂ. ಕಲಬುರ್ಗಿ ಅವರ ಸಮಗ್ರ ಸಾಹಿತ್ಯದ 40 ಸಂಪುಟಗಳು ಅಗ್ರಗಣ್ಯವಾಗಿವೆ. ಇವುಗಳು ಸಾಹಿತ್ಯದ ನುಡಿಯ ಮಾಣಿಕ್ಯ ಇದ್ದಂತೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.
ಕಲಬುರ್ಗಿ ಅವರು 20ನೇ ಶತಮಾನದ ವಿದ್ವತ್ ಮಾರ್ಗದರ್ಶಕರಂತಿದ್ದರು. ಸಂಶೋಧನೆಗಳಿಗೆ ಸಹೃದಯತೆ, ಅಧ್ಯಯನಶೀಲತೆಯ ಅಪೂರ್ವವಾದ ವ್ಯಕ್ತಿತ್ವವಾಗಿತ್ತು. ‘ಹಳ್ಳಗನ್ನಡ ವಿಶೇಷವಾಗಿ ಕವಿಗಳು ಸಾಹಿತ್ಯದಲ್ಲಿ ಮಾರ್ಗ ಮತ್ತು ದೇಸಿ, ವರ್ಣಕ ಮತ್ತು ವಸ್ತು ರೂಪಗೊಂಡಿರುವ ವಿಶ್ಲೇಷಿಸಿ ಆಧುನಿಕ ಕಾವ್ಯ, ಆಗಮ ಇವುಗಳ ನೆಲೆಯಲ್ಲಿ ಕಾಲದ ಓದುಗರಿಗೆ ತಲುಪಿಸುವಲ್ಲಿ ಕಲಬುರ್ಗಿ ಅವರು ಮಾಡಿದ ಕಾರ್ಯ ಶ್ಲಾಘನೀಯ’ ಎಂದು ಹೇಳಿದರು.
ಬಿ.ವಿ. ಶಿರೂರ ಮಾತನಾಡಿ, ‘ಕಲಬುರ್ಗಿ ಅವರು ಸಹೃದಯತೆ, ಅಧ್ಯಯನಶೀಲತೆಯ ಅಪೂರ್ವ ವ್ಯಕ್ತಿತ್ವವುಳ್ಳವರಾಗಿದ್ದರು. ಒಳನೋಟದ ಅಂತರಂಗ ಪ್ರವೇಶಿಸಿ ಸತ್ಯಶೋಧನೆ ಮಾಡುವ ಶಕ್ತಿ ಹೊಂದಿದ್ದರು’ ಎಂದರು.
ಎಂ.ಎಂ. ಕಲಬುರ್ಗಿ ರಾಷ್ಟ್ರೀಯ ಪ್ರಶಸ್ತಿ ಪ್ರದಾನ:
ಹಿರಿಯ ಸಂಶೋಧಕ ಬಿ.ವಿ. ಶಿರೂರು ಅವರಿಗೆ ಡಾ.ಎಂ.ಎಂ. ಕಲಬುರ್ಗಿ ರಾಷ್ಟ್ರೀಯ ಸಂಶೋಧನಾ ಪ್ರಶಸ್ತಿ ಹಾಗೂ ವಿದುಷಿ ಸುಜಾತ ಗುರವ ಕಮ್ಮಾರ ಅವರಿಗೆ ಡಾ.ಎಂ.ಎಂ. ಕಲಬುರ್ಗಿ ರಾಷ್ಟ್ರೀಯ ವಚನ ಸಂಗೀತ ಪ್ರಶಸ್ತಿ ಪ್ರದಾನ ಮಾಡಲಾಯಿತು.
ಸಾಹಿತಿ ಬಸವರಾಜ ಜಗಜಂಪಿ ಅತಿಥಿಯಾಗಿ ಆಗಮಿಸಿದ್ದರು. ಟ್ರಸ್ಟ್ ಅಧ್ಯಕ್ಷ ಡಾ. ವೀರಣ್ಣ ರಾಜೂರು ಅಧ್ಯಕ್ಷತೆ ವಹಿಸಿದ್ದರು. ಪ್ರತಿಷ್ಠಾನ ಸದಸ್ಯ ಶಶಿಧರ ತೋಡಕರ್ ಸಂಪುಟಗಳ ಪರಿಚಯ ಮಾಡಿದರು. ಉಮಾದೇವಿ ಎಂ. ಕಲಬುರ್ಗಿ, ಟ್ರಸ್ಟ್ ಸದಸ್ಯ ಕಾರ್ಯದರ್ಶಿ ಕುಮಾರ ಬೆಕ್ಕೇರಿ, ಡಾ. ಚಂದ್ರಶೇಖರ ವಸ್ತ್ರದ, ಡಾ. ಬಾಳಣ್ಣ ಶೀಗಿಹಳ್ಳಿ ಉಪಸ್ಥಿತರಿದ್ದರು.
