ಮೌಢ್ಯ ಬೇಡ: ಚೌತಿ ಚಂದ್ರ ವೀಕ್ಷಿಸಿದ ಬಸವಕೇಂದ್ರದ ಸದಸ್ಯರು

ಸೆಪ್ಟೆಂಬರ್ 14ರ ಸಂಜೆ ಬಾಹ್ಯಾಕಾಶದಲ್ಲಿ ಅಪರೂಪದ ಖಗೋಳ ಘಟನೆ

ನಾಲತವಾಡ:

ಗಣೇಶ ಚತುರ್ಥಿಯ ದಿನ ಚಂದ್ರನ ದರ್ಶನ ಮಾಡಿದವರು ಅನಗತ್ಯ ಅಪವಾದಕ್ಕೆ ಗುರಿಯಾಗುತ್ತಾರೆ ಎಂಬ ಮೌಢ್ಯವನ್ನು ಪಾಲಿಸಿಕೊಂಡು ಬರಲಾಗಿದೆ.

ಸ್ಥಳೀಯ ಬಸವ ಕೇಂದ್ರದ ಪದಾಧಿಕಾರಿಗಳು, ಸದಸ್ಯರು ಸೋಮವಾರ ಸಂಜೆ ಚೌತಿಯ ದಿನ ಚಂದ್ರನನ್ನು ನೋಡುವ ಮೂಲಕ ಹಳೆಯ ಕಾಲದಿಂದ ನಡೆದುಕೊಂಡು ಬಂದಿರುವ ಮೂಢನಂಬಿಕೆ, ಅಂಧಶ್ರದ್ಧೆಯ ರೂಢಿಗೆ ಸೆಡ್ಡು ಹೊಡೆದರು.

ಈ ಹಿಂದೆ ಸಂಘಟನೆ ಗ್ರಹಣ ಕಾಲದಲ್ಲಿ ಗರ್ಭಿಣಿಯರಿಗೆ, ವೈಜ್ಞಾನಿಕ ಮನೋಭಾವ ಹೊಂದಿದವರಿಗೆ ಊಟ-ಉಪಹಾರದ ವ್ಯವಸ್ಥೆ ಮಾಡಿತ್ತು. ಸದ್ಯ ಚಂದ್ರ, ಶುಕ್ರ ಗ್ರಹಗಳನ್ನು ಒಟ್ಟಿಗೆ ನೋಡಿ ಬಾನಂಗಳದಲ್ಲಿ ನಡೆದ ಅಪರೂಪದ ಸುಂದರ ವಿಸ್ಮಯಕ್ಕೆ ಸಾಕ್ಷಿಯಾದರು.

ಈ ಕಾರ್ಯಕ್ರಮದ ವೇಳೆ ಶಂಭುಲಿಂಗಪ್ಪ ದುದ್ದಗಿ, ಅನಿತಾ ದುದ್ದಗಿ, ರಾಜಶೇಖರ ಜಾವೂರ, ಶ್ರೀಶೈಲ ಹೂಗಾರ, ಜಯಪ್ರಕಾಶ ನೂಲಿನವರ, ಅಂಕಿತಾ ದುದ್ದಗಿ, ವಿನುತಾ ನೂಲಿನವರ, ಬಸವರಾಜ ಹಾದಿಮನಿ, ರಾಜು ಹಾದಿಮನಿ, ಎ.ಎಚ್. ಖಾಜಿ ಸೇರಿದಂತೆ ಹಲವಾರು ಜನ ಉಪಸ್ಥಿತರಿದ್ದರು.

ಅಪರೂಪದ ಖಗೋಳ ಘಟನೆ

2026ರ ಸೆಪ್ಟೆಂಬರ್ 14ರ ಚೌತಿಯಂದೇ, ‘ಚಂದ್ರನ ಗುಪ್ತ ಕ್ರಿಯೆ’ ಎಂಬ ಅಪರೂಪದ ಖಗೋಳ ಘಟನೆ ಸಂಭವಿಸಿತು.

ಆಕಾಶ ಪ್ರಿಯರನ್ನು ಸೆಳೆದ ಈ ಘಟನೆಯಲ್ಲಿ ಚಂದ್ರ ಮತ್ತು ಅತ್ಯಂತ ಪ್ರಕಾಶಮಾನವಾದ ಶುಕ್ರ ಗ್ರಹ ಪರಸ್ಪರ ಮುಖಾಮುಖಿಯಾದವು.

ಸಂಜೆಯ ವೇಳೆಗೆ ಮಧ್ಯ ಮತ್ತು ದಕ್ಷಿಣ ಭಾರತದಾದ್ಯಂತ, ಪಶ್ಚಿಮ ಆಕಾಶದಲ್ಲಿ ಅರ್ಧಚಂದ್ರ ಹಾಗೂ ಅತ್ಯಂತ ಪ್ರಕಾಶಮಾನವಾದ ಶುಕ್ರ ಗ್ರಹ ಒಂದೇ ಕಡೆ ಕಂಗೊಳಿಸುವ ದೃಶ್ಯ ಕಾಣಿಸಿತು.

ಚಂದ್ರನು ಶುಕ್ರ ಗ್ರಹದ ನೇರ ಪಥದಲ್ಲಿ ಹಾದುಹೋದ ಕಾರಣ, ಶುಕ್ರ ಗ್ರಹವು ತಾತ್ಕಾಲಿಕವಾಗಿ ಚಂದ್ರನ ಮರೆಯಲ್ಲಿ ಕಣ್ಮರೆಯಾಯಿತು. ಭಾರತೀಯ ಕಾಲಮಾನ ಸಂಜೆ 5:22 ಕ್ಕೆ ಚಂದ್ರನ ಹಿಂದೆ ಮರೆಯಾದ ಶುಕ್ರ ಗ್ರಹವು, ನಂತರ ಸಂಜೆ 6:18 ರ ಸುಮಾರಿಗೆ ಮತ್ತೆ ಪ್ರತ್ಯಕ್ಷವಾಯಿತು.

ಆದರೆ ಸೆಪ್ಟೆಂಬರ್ 14ರಂದು ಗಣೇಶ ಚತುರ್ಥಿ ಹಬ್ಬ ಇದ್ದ ಕಾರಣಕ್ಕೆ ಅನೇಕ ಜನರು ಇದನ್ನು ನೋಡಲು ಹಿಂದೇಟು ಹಾಕಿದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/KwtAu0MkQzPIzsDZf3EOP6