ರೇಣುಕಾಚಾರ್ಯರು ಲಿಂಗಾಯತರ 771ನೇ ಧಾರ್ಮಿಕ ಗುರು: ಸ್ಪಷ್ಟನೆ ನೀಡಿದ ಬಿದರಿ

“770 ಅಮರಗಣಂಗಳು ನಮ್ಮ ಧರ್ಮ ಸಾಹಿತ್ಯ ಸೃಷ್ಟಿಸಿದ ಪೂಜ್ಯರು, ಅವರ ಸಾಲಿಗೆ ರೇಣುಕಾಚಾರ್ಯರನ್ನು ಸೇರಿಸಿರುವುದು ಬಸವಣ್ಣನವರಿಗೆ ಮಾಡಿರುವ ಅವಮಾನ.”

ಬೆಂಗಳೂರು

ಲಿಂಗಾಯತರು ಪೂಜಿಸುವ 770 ಅಮರಗಣಂಗಳ ಪಟ್ಟಿಗೆ ರೇಣುಕಾಚಾರ್ಯರನ್ನು ಸೇರಿಸುವ ನಿರ್ಧಾರವನ್ನು ಶಂಕರ ಬಿದರಿಯವರು ತೆಗೆದುಕೊಂಡಿದ್ದಾರೆ.

ಅವರು ಶನಿವಾರ ನೀಡಿರುವ ಸ್ಪಷ್ಟನೆಯೊಂದರ ಪ್ರಕಾರ ಈಗ ‘ಲಿಂಗಾಯತರ ಧಾರ್ಮಿಕ ಮುಖಂಡರ’ ಸಂಖ್ಯೆ 771ಕ್ಕೆ ಏರಿದೆ.

ಬಸವ ಜಯಂತಿಗೆ ರೇಣುಕಾ ಜಯಂತಿ ಜೋಡಿಸಲು ಆದೇಶಿಸಿ ಏಪ್ರಿಲ್ 2 ಕಳಿಸಿದ್ದ ಸುತ್ತೋಲೆ ದೊಡ್ಡ ವಿವಾದವೆಬ್ಬಿಸಿದ ಮೇಲೆ ಅವರು ಫೇಸ್ಬುಕ್ ನಲ್ಲಿ ಮೂರು ಪುಟಗಳ ಸ್ಪಷ್ಟನೆ ನೀಡಿದರು.

ಮೊದಲನೇ ಪುಟದಲ್ಲಿ ಬಸವೇಶ್ವರರಿಗೆ 770 ಶರಣ ಸಹಯೋಗಿಗಳಿದ್ದಾರೆ, ಎಲ್ಲಾ 770 ಶರಣರ ಜಯಂತಿಗಳನ್ನು ಬಸವ ಜಯಂತಿಯ ದಿನದಂದು ಮಾತ್ರ ಆಚರಿಸಲು ವೀರಶೈವ ಮಹಾಸಭೆಯು ನಿರ್ಧರಿಸಿದೆ, ಎಂದು ಬರೆದಿದ್ದಾರೆ.

ಎರಡನೇ ಪುಟದಲ್ಲಿ “ರೇಣುಕಾಚಾರ್ಯರನ್ನು ಸಹ ಬಸವೇಶ್ವರರೊಂದಿಗೆ ಜಯಂತಿ ಆಚರಿಸಲಾಗುವ 771 ಧಾರ್ಮಿಕ ಮುಖಂಡರ ಪಟ್ಟಿಯಲ್ಲಿ ಸೇರಿಸಲು ನಾವು ನಿರ್ಧರಿಸಿದ್ದೇವೆ,” ಎಂದು ಬರೆದಿದ್ದಾರೆ.

ಅಂದರೆ ಒಂದನೇ ಪುಟದಿಂದ ಎರಡನೇ ಪುಟಕ್ಕೆ ಬರುವಷ್ಟರಲ್ಲಿ ಲಿಂಗಾಯತರ ಧಾರ್ಮಿಕ ಮುಖಂಡರ ಸಂಖ್ಯೆ ರೇಣುಕಾಚಾರ್ಯರ ಸೇರ್ಪಡೆಯಿಂದ 770ರಿಂದ 771ಕ್ಕೆ ಏರಿದೆ.

ಈ ನಿರ್ಣಯವನ್ನು ವೀರಶೈವ ಮಹಾಸಭೆಯ 2017ರ ನಿರ್ಧಾರಕ್ಕೆ ಅನುಗುಣವಾಗಿ ತೆಗೆದುಕೊಳ್ಳಲಾಗಿದೆ ಎಂದೂ ಬಿದರಿ ಹೇಳಿದ್ದಾರೆ. ಇಷ್ಟಲಿಂಗ ಪೂಜೆ ಮಾಡುವ, ಪಂಚಾಚಾರ, ಷಟ್‌ ಸ್ಥಲ ಮತ್ತು ಆಷ್ಟಾವರಣಗಳ ತತ್ವಗಳನ್ನು ಪಾಲಿಸುವವರೆಲ್ಲರೂ ಒಂದೇ ಎಂದು 2017ರಲ್ಲಿ ವೀರಶೈವ ಮಹಾಸಭೆ ನಿರ್ಣಯ ತೆಗೆದುಕೊಂಡಿದೆ, ಎಂದು ಸ್ಪಷ್ಟನೆಯಲ್ಲಿ ಬರೆದಿದ್ದಾರೆ.

ಇಬ್ಬರೂ ಒಂದೇ ಎಂದು ವೀರಶೈವ ಮಹಾಸಭೆ ಪರಿಗಣಿಸಿದರೂ ಬಸವ ಜಯಂತಿಗೆ ರೇಣುಕಾ ಜಯಂತಿ ಜೋಡಿಸಲು ಕಾರಣವೇನು ಎಂದು ಬಸವ ಮೀಡಿಯಾ ಕೇಳಿದಾಗ ಬಿದರಿಯವರಿಂದ ಸ್ಪಷ್ಟ ಉತ್ತರ ಬರಲಿಲ್ಲ.

ಹಿರಿಯ ವಿದ್ವಾಂಸ ಪಂಚಾಕ್ಷರಿ ಹಳೇಬೀಡು ಅವರು 770 ಅಮರಗಣಂಗಳು ಚಾರಿತ್ರಿಕ ವ್ಯಕ್ತಿಗಳು, ಅನುಭವ ಮಂಟಪದ ಚರ್ಚೆಗಳಲ್ಲಿ ಭಾಗವಹಿಸುತ್ತಿದ್ದ ಅನುಭಾವಿಗಳು. ನಮ್ಮ ಧರ್ಮ ಸಾಹಿತ್ಯ ಸೃಷ್ಟಿಸಿದ ಪೂಜ್ಯರು.

12ನೇ ಶತಮಾನದ ನಂತರ ಅಸಂಖ್ಯಾತ ಶರಣರು ಧರ್ಮಕ್ಕೆ ದುಡಿದಿದ್ದಾರೆ. ಸಿದ್ಧಲಿಂಗೇಶ್ವರರು ದೊಡ್ಡ ಪಡೆಯನ್ನೇ ಕಟ್ಟಿದರು. ಆದರೆ ಅವರು ಯಾರನ್ನೂ ಅಮರಗಣಂಗಳ ಸಾಲಿಗೆ ಸೇರಿಸಿಲ್ಲ.

ಅಂತಹ ಪವಿತ್ರವಾದ 770 ಅಮರಗಣಂಗಳ ಸಾಲಿಗೆ ಕಾಲ್ಪನಿಕ ರೇಣುಕಾಚಾರ್ಯರನ್ನು ಸೇರಿಸಿ ಆ ಸಂಖ್ಯೆಯನ್ನು 771ಕ್ಕೆ ಏರಿಸಿರುವುದು ವಿಡಂಬನೆ. ಇದು ಶರಣ ಪರಂಪರೆಗೆ, ಬಸವಾದಿ ಶರಣರಿಗೆ ಮಾಡಿರುವ ಅವಮಾನ, ಎಂದು ಪಂಚಾಕ್ಷರಿ ಹೇಳಿದರು.

ಅಸಂಖ್ಯಾತ ಶರಣರು ಧರ್ಮಕ್ಕೆ ದುಡಿದಿದ್ದಾರೆ. ಆದರೆ ಅವರು ಯಾರನ್ನೂ ಅಮರಗಣಂಗಳ ಪಟ್ಟಿಗೆ ಸೇರಿಸಿಲ್ಲ. ಅಮರಗಣಂಗಳು ಅಷ್ಟು ಪವಿತ್ರರು.

ಬಿದರಿ ಅವರ ಏಪ್ರಿಲ್ 2ರ ಸುತ್ತೋಲೆಗೆ ಬಹಳ ತೀಕ್ಷ್ಣ ಪ್ರತಿಕ್ರಿಯೆ ಬಂದಿದೆ. ಲಿಂಗಾಯತ ಮಠಾಧೀಶರ ಒಕ್ಕೂಟ, ಜಾಗತಿಕ ಲಿಂಗಾಯತ ಮಹಾಸಭಾ, ರಾಷ್ಟ್ರೀಯ ಬಸವ ದಳಗಳಂತಹ ಸಂಘಟನೆಗಳು ಹಾಗೂ ವೈಯಕ್ತಿಕವಾಗಿ ಪ್ರಮುಖರು, ಜನಸಾಮಾನ್ಯರೂ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಹಲವಾರು ಜನ ಬಿದರಿಯವರಿಗೆ ಕರೆ ಮಾಡಿ ಪ್ರತಿಭಟಿಸಿದರೆ, ಸಾಮಾಜಿಕ ಜಾಲತಾಣಗಳಲ್ಲಿ ಅವರ ಸುತ್ತೋಲೆಗೆ ನಿರಂತರವಾಗಿ ಟೀಕೆ ಬರುತ್ತಿದೆ. ಇದರಿಂದ ಗಲಿಬಿಲಿಗೊಂಡು ಬಿದರಿ ತಮ್ಮ ಫೇಸ್ಬುಕ್ ಪುಟದಲ್ಲಿ ಸ್ಪಷ್ಟನೆ ನೀಡಿರುವ ಹಾಗೆ ಕಾಣಿಸುತ್ತದೆ.

ತಮ್ಮ ಸ್ಪಷ್ಟನೆಯಲ್ಲಿ “ನಮ್ಮ ನಿರ್ಧಾರದ ಟೀಕೆಯನ್ನು ನಾವು ಸೂಕ್ತ ಗೌರವ, ಮರ್ಯಾದೆಯಿಂದ ಮತ್ತು ನಮ್ಮನ್ನು ಟೀಕಿಸುವವರ ಬಗ್ಗೆ ಪ್ರೀತಿಯಿಂದ ಸ್ವೀಕರಿಸುತ್ತೇವೆ. ನಮ್ಮನ್ನು ನಿಂದಿಸುವವರು ನಮ್ಮ ಸಹೋದರರು ಎಂದು ಭಾವಿಸುವ ಶ್ರೀ ಬಸವೇಶ್ವರರ ತತ್ವವನ್ನು ನಾವು ಅನುಸರಿಸುತ್ತೇವೆ,” ಎಂದೂ ಬಿದರಿ ಬರೆದುಕೊಂಡಿದ್ದಾರೆ.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ_
https://chat.whatsapp.com/CbYKNyyLfPXA0Br4Dli0d8