ಚಿಕ್ಕಮಗಳೂರು:
‘ಬಸವಣ್ಣ ತನ್ನ ಹುಟ್ಟಿನ ಗುರುತನ್ನು ಕಳಚಿಕೊಂಡು ಹೊರಗೆ ಬಂದವರು. ಇದು ಅಹಂಕಾರವನ್ನು ನಾಶಮಾಡಿಕೊಳ್ಳುವ ಬಹುದೊಡ್ಡ ಪ್ರಯತ್ನ’ ಎಂದು ಲೇಖಕಿ ಎಚ್.ಎಸ್. ಅನುಪಮಾ ಈಚೆಗೆ ಹೇಳಿದರು.
‘ಸಾಕಷ್ಟು ಜನ ತನ್ನ ಹಿಂದೆ ಬಂದರೂ ಎಂದಿಗೂ ಬಸವಣ್ಣ ಅಹಂಕಾರವನ್ನು ತಲೆಗೆ ಏರಿಸಿಕೊಳ್ಳಲಿಲ್ಲ. ಸಾಹಿತ್ಯ ರೈತ ಚಳವಳಿ ಕಟ್ಟುತ್ತಿರುವ ಸಂದರ್ಭದಲ್ಲಿ ನಾವು ಬಸವಣ್ಣನ ರೀತಿಯಲ್ಲಿ ಅಹಂಕಾರಗಳನ್ನು ಮೆಟ್ಟಿ ಸಾಮೂಹಿಕ ನಾಯಕತ್ವದ ಮಾದರಿ ಅನುಸರಿಸಬೇಕು’ ಎಂದು ಕಿವಿಮಾತು ಹೇಳಿದರು.
ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್ತಿನ 40ನೇ ವರ್ಷದ ಸಂಭ್ರಮಾಚರಣೆಯ ಸಮಾರಂಭದಲ್ಲಿ ಅವರು ಮಾತನಾಡಿದರು.
ಕಾರ್ಯಕ್ರಮದಲ್ಲಿ ಮಾತನಾಡಿದ ಜಿಲ್ಲಾ ಉಸ್ತುವಾರಿ ಸಚಿವ ಕೆ.ಜೆ. ಜಾರ್ಜ್ ಬಸವಣ್ಣ, ಅಕ್ಕಮಹಾದೇವಿ ಹಾಗೂ ಅಲ್ಲಮಪ್ರಭುಗಳು ಮತ್ತಿತರ ಶರಣರು 12ನೇ ಶತಮಾನದಲ್ಲೇ ವಚನ ಸಾಹಿತ್ಯದ ಮೂಲಕ ಸಾಮಾಜಿಕ ಕ್ರಾಂತಿ ಮಾಡಿದವರು. ಇದೇ ಮಾರ್ಗದಲ್ಲಿ ಸಮಾಜ ಪರಿವರ್ತನೆಯನ್ನು 21ನೇ ಶತಮಾನದಲ್ಲೂ ಮಾಡಬೇಕಾಗಿದೆ ಎಂದು ಮಾತನಾಡಿದರು.
ಸಮಾಜ ಪರಿವರ್ತನೆಗೆ ಶರಣರ ಚಳುವಳಿ ಮಾದರಿಯಾಗಿತ್ತು ಮತ್ತು ಬಸವಣ್ಣ ಮಾನವ ಧರ್ಮವನ್ನು ಸಂರಕ್ಷಿಸಿದ ಮಹಾಪುರುಷ ಎಂದರು.
ಸಿದ್ದರಾಮಯ್ಯ ನೇತೃತ್ವದ ಸರ್ಕಾರವು ಬಸವಣ್ಣ ಹಾಗೂ ಶಿವಶರಣರ ಆಶಯಗಳಿಗೆ ಅನುಗುಣವಾಗಿ ಹಲವು ಜನಪರ ಯೋಜನೆಗಳನ್ನು ಜಾರಿಗೆ ತಂದಿದೆ ಎಂದು ತಿಳಿಸಿದರು.
ಪ್ರಜಾಪ್ರಭುತ್ವದ ಮೌಲ್ಯಗಳನ್ನು ಅಳವಡಿಸಿಕೊಂಡು ಪ್ರಮಾಣವಚನ ಸ್ವೀಕರಿಸಿದ ದಿನವೇ ‘ಅನ್ನಭಾಗ್ಯ’ ಯೋಜನೆಯನ್ನು ಘೋಷಿಸಲಾಗಿತ್ತು. ಬಡಜನರಿಗೆ ಆಹಾರ ಭದ್ರತೆ ಒದಗಿಸುವ ಈ ಯೋಜನೆ ಬಸವಣ್ಣ ಪ್ರತಿಪಾದಿಸಿದ ಸಮಾನತೆಯ ತತ್ವಕ್ಕೆ ಪ್ರತಿಬಿಂಬವಾಗಿದೆ ಎಂದು ಸರ್ಕಾರದ ಕಾರ್ಯಕ್ರಮಗಳ ಬಗ್ಗೆ ಹೇಳಿದರು.
ಬಸವಣ್ಣ ದುಡಿಮೆಯ ಮೌಲ್ಯವನ್ನು ಜನರಲ್ಲಿ ಬಿತ್ತಿದರು ಎಂದು ಕರ್ನಾಟಕ ಸಾಹಿತ್ಯ ಅಕಾಡೆಮಿಯ ಅಧ್ಯಕ್ಷ ಎಲ್.ಎನ್. ಮುಕುಂದರಾಜ ಹೇಳಿದರು. ದುಡಿಯುವವನು ಶ್ರೇಷ್ಠ ಎಂಬ ಚಿಂತನೆ 12ನೇ ಶತಮಾನದಲ್ಲೇ ಬಸವಣ್ಣ ಜನರಲ್ಲಿ ಮೂಡಿಸಿದ್ದರು ಎಂದು ಅವರು ತಿಳಿಸಿದರು.
ಸಾಹಿತಿ ನಟರಾಜ ಭೂದಾಳ ಮಾತನಾಡಿ, ಒಂದೇ ಧರ್ಮ, ಒಂದೇ ನಾಯಕ, ಒಂದೇ ಪಕ್ಷ ಎಂಬ ಕಲ್ಪನೆ ಮುಂದಿನ ದಿನಗಳಲ್ಲಿ ಸರ್ವಾಧಿಕಾರದ ಅಪಾಯವನ್ನು ಉಂಟುಮಾಡಬಹುದು, 12ನೇ ಶತಮಾನದಲ್ಲಿ ಶರಣರು ಅನೇಕತೆಯನ್ನು ಒಪ್ಪಿಕೊಂಡು ಸಮಾಜದಲ್ಲಿ ಸಮಾನತೆಯ ಚಿಂತನೆ ಬೆಳೆಸಿದರು. ಅನೇಕತೆಯನ್ನು ಗೌರವಿಸುವ ಮನೋಭಾವವೇ ನಿಜವಾದ ಪ್ರಜಾಪ್ರಭುತ್ವ ಎಂದು ತಿಳಿಸಿದರು.
ಮಾಜಿ ಶಾಸಕ ವೈ.ಎಸ್.ವಿ. ದತ್ತ ಅವರು, ಸಜ್ಜನರು ಮತ್ತು ವಿಚಾರವಂತರಾದವರು ರಾಜಕಾರಣದಿಂದ ಹಿಂದೆ ಸರಿಯುತ್ತಿರುವುದು ವಿಷಾದನೀಯ ಎಂದು ಹೇಳಿದರು. ಮತದಾರರ ತಪ್ಪು ನಿರ್ಧಾರಗಳಿಂದ ಸಮಾಜದಲ್ಲಿ ಸದುದ್ದೇಶದ ನಾಯಕತ್ವ ಕುಗ್ಗುತ್ತಿದೆ ಇದರಿಂದ “ಹಿತ್ತಾಳೆಯೇ ಚಿನ್ನವಾದಾಗ” ಹೇಗಿರುತ್ತದೆ ಎಂಬ ನುಡಿಯನ್ನು ವ್ಯಕ್ತಪಡಿಸಿದರು.
ಬಸವಣ್ಣನ ವಚನಗಳಲ್ಲಿ ಇಂದಿನ ಸಾಮಾಜಿಕ ಮತ್ತು ರಾಜಕೀಯ ಸಮಸ್ಯೆಗಳಿಗೆ ಸ್ಪಷ್ಟ ಮಾರ್ಗದರ್ಶನವಿದೆ ಎಂದು ಅವರು ಅಭಿಪ್ರಾಯಪಟ್ಟರು.
ಸಮ್ಮೇಳನದಲ್ಲಿ ಭಾಗವಹಿಸಿದ ಅನೇಕ ಗಣ್ಯರು ಮಾತನಾಡುತ್ತ, ಶರಣರ ವಚನ ಸಾಹಿತ್ಯವು ಕೇವಲ ಧಾರ್ಮಿಕ ಚಿಂತನೆ ಮಾತ್ರವಲ್ಲ, ಅದು ಸಾಮಾಜಿಕ ಕ್ರಾಂತಿಯ ದಾರಿ ತೋರಿದ ಚಳವಳಿ ಎಂದು ಅಭಿಪ್ರಾಯಪಟ್ಟರು.
ಇಂದಿನ ರಾಜಕೀಯ, ಸಾಮಾಜಿಕ ಮತ್ತು ಆರ್ಥಿಕ ಸಮಸ್ಯೆಗಳಿಗೂ ಬಸವಣ್ಣನರ ವಚನಗಳಲ್ಲಿ ಉತ್ತರಗಳಿವೆ ಎಂದು ಹೇಳಿದರು.
ಬಸವ ಮೀಡಿಯಾ Facebook ಪುಟ ಸೇರಲು ಕ್ಲಿಕ್ ಮಾಡಿ
https://www.facebook.com/basavamedia1/
