ಹಿಂದೂ ಸಮಾವೇಶ: ಕಾಯಕ, ದಾಸೋಹ ವೈದಿಕ ಸಿದ್ಧಾಂತಗಳು, ಬಸವಣ್ಣ ಕೊಟ್ಟಿದ್ದಲ್ಲ

‘ಬೌದ್ಧ, ಜೈನ ಧರ್ಮಗಳಂತೆ ಲಿಂಗಾಯತವೂ ಧರ್ಮವೇ. ಅದರ ಬಗ್ಗೆ ಚಕಾರವಿಲ್ಲ.’

ಬಸವಕಲ್ಯಾಣ

“ಕಾಯಕ, ದಾಸೋಹ ಬಸವಣ್ಣನವರಿಂದ ಮಾತ್ರ ಬಂದಿಲ್ಲ, ಅವು ಮೂಲತಃ ವೈದಿಕ ಸಿದ್ದಾಂತಗಳು,” ಎಂದು ಬೆಂಗಳೂರಿನ ಆರೂಢ ಭಾರತಿ ಸ್ವಾಮಿ ಭಾನುವಾರ ಹೇಳಿದರು.

ಅಕ್ಕಮಹಾದೇವಿ ಕಾಲೇಜು ಮೈದಾನದಲ್ಲಿ ಬಸವಾದಿ ಶರಣರ ಹೆಸರಿನ ಹಿಂದೂ ಸಮಾವೇಶದಲ್ಲಿ ಮಾತನಾಡಿದರು.

“ಬಸವಣ್ಣ ಲಿಂಗಾಯತ ಧರ್ಮದ ಸ್ಥಾಪಕರಾದರೂ ಅದರಲ್ಲಿ ಏನೂ ವಿಶೇಷತೆಯಿಲ್ಲ. ನಿರಂತರವಾಗಿ ಕರ್ತವ್ಯ ಮಾಡುವದೇ ನಿಜವಾದ ಧರ್ಮ ಎಂದು ಪ್ರಾಚೀನ ವೇದ ಉಪನಿಷತ್ತುಗಳಲ್ಲಿ ಹೇಳಲಾಗಿದೆ. ಕಾಯಕ ಸಿದ್ದಾಂತದಂತೆ ದಾಸೋಹ ಸಿದ್ದಾಂತವನ್ನೂ ವೈದಿಕ ಧರ್ಮದಲ್ಲಿ ಹೇಳಲಾಗಿದೆ. ದಾಸೋಹ ಬಸವಣ್ಣ ಕೊಟ್ಟ ಅಂತ ಹೇಳ್ತೀವಿ ಆದರೆ ಅದರಲ್ಲಿ ಹೊಸದೇನೂ ಅಲ್ಲ,” ಎಂದು ಭಾರತಿ ಸ್ವಾಮಿ ಹೇಳಿದರು.

“ದೇವಾಲಯ ನಿರಾಕರಣೆ, ಬಯಲು, ಇಷ್ಟಲಿಂಗ ಕಲ್ಪನೆ – ಇವೆಲ್ಲಾ ವೇದ ಉಪನಿಷತ್ತುಗಳಲ್ಲಿವೆ. ಮೈತ್ರೇಯ ಉಪನಿಷತ್ತು ನಾನೇ ಪರಮಾತ್ಮ ಎಂದು ಪೂಜೆ ಮಾಡಿಕೊಳ್ಳಬೇಕು ಎಂದು ಹೇಳಿದೆ. ಬಸವಣ್ಣನಿಂದಲೇ ಇದು ಶುರುವಾಯ್ತು ಅನ್ನುವ ಭ್ರಾಂತಿ ಬೇಡ.

ವಚನಗಳು ವೇದ ಉಪನಿಷತ್ತುಗಳನ್ನು ಪರಿಷ್ಕರಿಸಿದವು. ಬಸವಣ್ಣ ವೇದ ಉಪನಿಷತ್ತುಗಳನ್ನು ಜನಸಾಮಾನ್ಯರಿಗೆ ಅರ್ಥವಾಗುವಂತೆ ಕನ್ನಡದಲ್ಲಿ ವಿವರಿಸಿದ್ದರಿಂದ ಕ್ರಾಂತಿಕಾರಿ ಎನಿಸಿಕೊಂಡ,” ಎಂದು ಹೇಳಿದರು

ಲಿಂಗಾಯತ ಧರ್ಮ ಪ್ರತ್ಯೇಕ ಎನ್ನುವುದು ಸರಿ

ಬೌದ್ಧ, ಜೈನ ಧರ್ಮಗಳಂತೆ ಲಿಂಗಾಯತವೂ ಧರ್ಮವೇ. ಅದರ ಬಗ್ಗೆ ಚಕಾರವಿಲ್ಲ. ಆದರೆ ಲಿಂಗಾಯತ ಧರ್ಮ ಎಂದು ಹೇಳಿಕೊಂಡು ಹಿಂದೂ ಧರ್ಮ ಹೀಯಾಳಿಸುವುದು ಸರಿಯಲ್ಲ. ಲಿಂಗಾಯತ ಹೋರಾಟ ಮೀಸಲಾತಿಗಾಗಿ ನಡೆಯುತ್ತಿದೆ, ಎಂದು ಆರೋಪಿಸಿದರು.

ಸಮಾವೇಶದಲ್ಲಿ ಮಾತನಾಡಿದ ಆಂದೋಲಾ ಮಠದ ಸಿದ್ದಲಿಂಗ ಸ್ವಾಮೀಜಿ ಹಿಂದೂಗಳನ್ನು ಕೆಣಕಬೇಡಿ, ಹಿಂದೂಗಳನ್ನು ವಿರೋಧಿಸುವವರು ಭಾರತದ ನಾಗರಿಕರಾಗಿರಲು ಸಾಧ್ಯವಿಲ್ಲ, ಎಂದರು.

ಬಬಲೇಶ್ವರದಿಂದ ಆರಂಭವಾದ ಹಿಂದೂ ಸಮಾವೇಶ ಈಗ ಕಲ್ಯಾಣಕ್ಕೆ ಬಂದಿದ್ದು ಅತ್ಯಂತ ಹೆಮ್ಮೆಯ ವಿಷಯ.

ಒಬ್ಬ ಕಾಡಸಿದ್ದೇಶ್ವರ ಸ್ವಾಮಿಗಳ ಧ್ವನಿ ಅಡಗಿಸಬಹುದು ಆದರೆ ಇಲ್ಲಿ ಇರುವ ನೂರಾರು ಜನರು ಮಾತನಾಡಲು
ನಿಂತರೆ ಕಾಂಗ್ರೆಸ್‌ ಸರ್ಕಾರ ಧೂಳಿಪಟ ಆಗುತ್ತೆ, ಕಾಂಗ್ರೆಸ್ ಅಧಿಕಾರದಲ್ಲಿ ಇರೋಲ್ಲ ಎಂದು ಎಚ್ಚರಿಸಿದರು.

ಚಿದಂಬರಾಶ್ರಮದ ಶಿವಕುಮಾರ ಸ್ವಾಮೀಜಿ ಅವರು “ವೈದಿಕ ಧರ್ಮಕ್ಕೆ ಬಸವಣ್ಣ ಬೈಯ್ದಿರುವದು ಮಕ್ಕಳಿಗೆ ತಂದೆ ತಾಯಿ ಬೈಯ್ದಂತೆ. ಜನರಲ್ಲಿ ಬೇಧ ಹುಟ್ಟಿಸುತ್ತಿರುವದು ಸರಿಯಲ್ಲ. ನಾವೆಲ್ಲ ಹಿಂದೂಗಳು.
ನಾನು ಹಿಂದೂ ಅಲ್ಲ ಅಂದ್ರೆ ಗೆಟ್ ಔಟ್. ಮುಸ್ಲಿಂಮರ, ಕ್ರಿಶ್ಚಿಯನ್ನರ ದೇಶಗಳಿವೆ ಅಲ್ಲಿಗೆ ಹೋಗಿ,” ಎಂದು ಹೇಳಿದರು.

ಕನ್ನೇರಿ ಶ್ರೀಗಳನ್ನು ಬಸವಕಲ್ಯಾಣದಲ್ಲಿ ಮೌನವಾಗಿಸಿ ಪ್ರತಿಯೊಬ್ಬನನ್ನು ಮಾತನಾಡಿಸುವಂಥ ಶಕ್ತಿ ತುಂಬಿದಂತಾಗಿದೆ. ಹಿಂದು ಧರ್ಮ ಉಳಿಸಿ ಬೆಳೆಸುವ ಕಾರ್ಯ ಇವತ್ತು ಆರಂಭವಾಗಿದೆ ಎಂದು ತಡೋಳಾ ಶಿವಾಚಾರ್ಯರು ಅಭಿಪ್ರಾಯ ವ್ಯಕ್ತಪಡಿಸಿದರು.

ಕನ್ನೇರಿ ಸ್ವಾಮಿ, ಹವಾ ಮಲ್ಲಿನಾಥ ಮಹಾರಾಜರು, ಆಯೋಜಕ ಗುಂಡುರೆಡ್ಡಿ ಸೇರಿದಂತೆ ಹಲವಾರು ಶ್ರೀಗಳು, ಪ್ರಮುಖರು ಇದ್ದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/HyjxiPYAeioCDGVqP9ADsE