ಮತ್ತೆ ಈ ರೀತಿ ವಿವಾದವಾಗದಂತೆ ಸುತ್ತೋಲೆ ಕಳಿಸುತ್ತೇನೆ: ಸಿ ಸೋಮಶೇಖರ್

ಬೆಂಗಳೂರು

ಶರಣ ಸಾಹಿತ್ಯ ಪರಿಷತ್ತಿನ ಮೈಸೂರು ಸಮ್ಮೇಳನಕ್ಕೆ ವಚನ ದರ್ಶನ ತಂಡದ ಮಲ್ಲೇಪುರಂ ವೆಂಕಟೇಶ್ ಅವರನ್ನು ಆಹ್ವಾನಿಸಿರುವುದರ ವಿರುದ್ಧ ಶರಣ ಸಮಾಜದಿಂದ ಸಿಟ್ಟಿನ ಪ್ರತಿಕ್ರಿಯೆ ಬಂದಿದೆ.

ಇಂದು ಬಸವ ಮೀಡಿಯಾಗೆ ಕರೆ ಮಾಡಿದ ಪರಿಷತ್ತಿನ ರಾಜ್ಯಾಧ್ಯಕ್ಷ ಅಧ್ಯಕ್ಷ ಸಿ ಸೋಮಶೇಖರ್ ಅಹ್ವಾನ ದೊಡ್ಡ ವಿವಾದವೆಬ್ಬಿಸಿದೆ, ಈ ರೀತಿ ಮತ್ತೆ ಆಗದಂತೆ ನಿರ್ದೇಶನ ನೀಡುತ್ತೇನೆ, ಎಂದು ಹೇಳಿದರು.

ಬಸವ ಅಭಿಮಾನಿಗಳ ಮನಸ್ಸಿಗೆ ನೋವಾಗದ ರೀತಿಯಲ್ಲಿ ಮತ್ತು ಪರಿಷತ್ತಿನ ಆಶಯಕ್ಕೆ ದಕ್ಕೆ ಬಾರದ ರೀತಿಯಲ್ಲಿ ಸಭೆ ಸಮಾರಂಭಗಳನ್ನು ಏರ್ಪಡಿಸಬೇಕೆಂದು ಸುತ್ತೋಲೆ ಕಳಿಸುತ್ತೇನೆ, ಎಂದು ಹೇಳಿದರು.

ಮಾರ್ಚ್ 23 ಮೈಸೂರಿನಲ್ಲಿ ನಡೆಯುತ್ತಿರುವ ಶರಣ ಸಾಹಿತ್ಯ ಸಮ್ಮೇಳನದಲ್ಲಿ ಸುಮಾರು 3,000 ಜನ ಭಾಗವಹಿಸುವ ನಿರೀಕ್ಷೆ ಆಯೋಜಕರಿಗಿದೆ. ಇಂತಹ ದೊಡ್ಡ ಸಮ್ಮೇಳನದಲ್ಲಿ ವಚನಗಳನ್ನು ತಿರುಚಲು ಪ್ರಕಟವಾಗಿರುವ ವಚನ ದರ್ಶನದ ತಂಡದ ಮಲ್ಲೇಪುರಂ ವೆಂಕಟೇಶ್ ಅವರಿಗೆ ವೇದಿಕೆ ಕೊಟ್ಟಿರುವುದಕ್ಕೆ ಅನೇಕ ಚಿಂತಕರು ಶರಣ ಸಾಹಿತ್ಯ ಪರಿಷತ್ತಿನ ಬಸವ ನಿಷ್ಠೆಯನ್ನೂ ಪ್ರಶ್ನಿಸಿದ್ದಾರೆ.

ನಾನು ಮುಂಚೆ ಹೇಳಿದ ಹಾಗೆ ನಮ್ಮದು ಬಸವ ತತ್ವಕ್ಕೆ ನಿಷ್ಠವಾಗಿರುವ ಸಂಘಟನೆ. ಇದಕ್ಕೆ ವಿರುದ್ಧವಾಗಿ ನಡೆಯುವುದಿಲ್ಲ, ಎಂದು ಸೋಮಶೇಖರ್ ಹೇಳಿದರು.

ಅತಿಥಿಗಳ ಆಯ್ಕೆಯನ್ನು ಜಿಲ್ಲಾ ಘಟಕ ಸ್ವತಂತ್ರವಾಗಿ ಕೆಲಸ ಮಾಡಿದೆ. ನನ್ನನ್ನು ಸಂಪರ್ಕಿಸಿಲ್ಲ, ಇದು ಸತ್ಯ, ಎಂದರು. ಜಿಲ್ಲಾ ಸಮ್ಮೇಳನದಲ್ಲಿ ನನ್ನ ಯಾವುದೇ ಪಾತ್ರವಿಲ್ಲ.

ನನ್ನ ಅಧ್ಯಕ್ಷತೆಯನ್ನು ಬೆಳಗಿನ ಉದ್ಘಾಟನೆಗೆ ಮಾತ್ರ ಹಾಕಿದ್ದಾರೆ, ಸಮಾರೋಪಕ್ಕೆ ಹಾಕಿಲ್ಲ. ಸಾಮಾನ್ಯವಾಗಿ ಎರಡೂ ಸಂದರ್ಭಗಳಲ್ಲಿ ರಾಜ್ಯ ಅಧ್ಯಕ್ಷರು ಇರಬೇಕು, ಎಂದು ಹೇಳಿದರು. (ಮಲ್ಲೇಪುರಂ ವೆಂಕಟೇಶ್ ಅವರು ಸಮಾವೇಶದ ಸಮಾರೋಪ ಭಾಷಣ ಮಾಡಲಿದ್ದಾರೆ.)

ತಾವು ಕಳಿಸಲಿರುವ ನಿರ್ದೇಶನದ ಬಗ್ಗೆ ಮತ್ತೆ ಮಾತನಾಡುತ್ತ ಸೋಮಶೇಖರ್ ಅವರು ಒಂದು ಸಾಮಾನ್ಯ ಸುತ್ತೋಲೆ ತಕ್ಷಣ ಕಳಿಸುತ್ತೇವೆ. ಆದರೆ ಪದೇ ಪದೇ ಜಿಲ್ಲಾ ಘಟಕಗಳ ಕೆಲಸವನ್ನು ಪ್ರಶ್ನೆ ಮಾಡಿದರೆ, ಅವರು ನಿಷ್ಕ್ರಿಯರಾಗುತ್ತಾರೆ ಎಂದು ಹೇಳಿದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ_
https://chat.whatsapp.com/GavGlyNxCLf7iBbDBH8P5b