(ಆಗಸ್ಟ್ 1 ಶ್ರೀಗಳ ಸ್ಮರಣೆಯಲ್ಲಿ ವ್ಯಸನಮುಕ್ತ ದಿನಾಚರಣೆ)
ಪ್ರತಿವರ್ಷ ಆಗಸ್ಟ್ 1 ಬಂದರೆ ಕರ್ನಾಟಕದಾದ್ಯಂತ ಒಂದು ವಿಶಿಷ್ಟ ಜಾಗೃತಿಯ ಅಲೆ ಎದ್ದೇಳುತ್ತದೆ. ಅದು ವ್ಯಸನ ಮುಕ್ತ ದಿನಾಚರಣೆ. ಇದು ಕೇವಲ ಒಂದು ಸರ್ಕಾರಿ ಕಾರ್ಯಕ್ರಮವಲ್ಲ, ಇದು ಒಂದು ಸಾಮಾಜಿಕ ಚಳವಳಿ. ಆ ದಿನವನ್ನು ಬಾಗಲಕೋಟೆ ಜಿಲ್ಲೆಯ ಇಳಕಲ್ಲ- ಚಿತ್ತರಗಿ ವಿಜಯ ಮಹಾಂತೇಶ್ವರ ಸಂಸ್ಥಾನ ಮಠದ ಲಿಂಗೈಕ್ಯ ಡಾ. ವಿಜಯ ಮಹಾಂತಪ್ಪ ಶ್ರೀಗಳ ಜನ್ಮದಿನದ ಪ್ರಯುಕ್ತ ಅವರ ಹೆಸರಿನಲ್ಲಿ ಆಚರಿಸಲಾಗುತ್ತದೆ.
ಈ ಒಂದು ದಿನಾಚರಣೆಯ ಹಿಂದೆ ಒಬ್ಬ ಮಹಾನ್ ಚೇತನದ ಇಡೀ ಬದುಕಿನ ತಪಸ್ಸು ಇದೆ, ಅವರ ದೂರದೃಷ್ಟಿ ಇದೆ, ಯುವಕರ ಬಗೆಗಿನ ಅವರ ಕಾಳಜಿ ಇದೆ.
ಲಿಂಗೈಕ್ಯ ವಿಜಯ ಮಹಾಂತೇಶ್ವರ ಶ್ರೀಗಳು ಕೇವಲ ಮಠಾಧೀಶರಾಗಿರಲಿಲ್ಲ, ಅವರು ಒಬ್ಬ ಸಮಾಜ ಸುಧಾರಕರು, ಒಬ್ಬ ಚಿಂತಕರು, ಯುವ ಚೇತನದ ಹರಿಕಾರರು.
ಮಠವೆಂದರೆ ಕೇವಲ ಪೂಜೆ, ಪುನಸ್ಕಾರ, ದೀಕ್ಷೆ ನೀಡುವ ಸ್ಥಳವಲ್ಲ, ಮಠವೆಂದರೆ ಸಮಾಜವನ್ನು ತಿದ್ದುವ ಪ್ರಯೋಗಶಾಲೆ ಎಂದು ಅವರು ನಂಬಿದ್ದರು. ಅವರ ಕಾಲದಲ್ಲಿ ಮತ್ತು ಇಂದಿಗೂ ಸಮಾಜವನ್ನು ಬಾಧಿಸುತ್ತಿರುವ ಬಹುದೊಡ್ಡ ಪಿಡುಗು ಎಂದರೆ ವ್ಯಸನ.
ಮದ್ಯಪಾನ, ಗುಟ್ಕಾ, ತಂಬಾಕು, ಮಾದಕ ದ್ರವ್ಯಗಳು ಇಂದು ಹಳ್ಳಿ ಹಳ್ಳಿಗಳಿಗೂ ನುಗ್ಗಿವೆ. ಯುವಕರು ಅವಕ್ಕೆ ದಾಸರಾಗಿ ದಾರಿ ತಪ್ಪುತ್ತಿದ್ದಾರೆ. ಒಂದು ಕುಟುಂಬದ ಒಬ್ಬ ವ್ಯಕ್ತಿ ವ್ಯಸನಿಯಾದರೆ ಆ ಇಡೀ ಕುಟುಂಬವೇ ನಾಶವಾಗುತ್ತದೆ. ಆರ್ಥಿಕವಾಗಿ ದಿವಾಳಿಯಾಗುತ್ತದೆ, ಸಾಮಾಜಿಕವಾಗಿ ಅವಮಾನಕ್ಕೆ ಒಳಗಾಗುತ್ತದೆ. ಈ ಸತ್ಯವನ್ನು ಶ್ರೀಗಳು ಅರಿತಿದ್ದರು. ಹೀಗಾಗಿ ಅವರು ತಮ್ಮ ಇಡೀ ಬದುಕನ್ನು ವ್ಯಸನಮುಕ್ತ ಸಮಾಜದ ನಿರ್ಮಾಣಕ್ಕೆ ಮುಡಿಪಾಗಿಟ್ಟರು.
ಶ್ರೀಗಳು ಹಗಲು ಇರಳು ಎನ್ನದೆ ಹಳ್ಳಿ ಹಳ್ಳಿಗಳಿಗೆ ತೆರಳಿ ಈ ಬಗ್ಗೆ ಜಾಗೃತಿ ಮೂಡಿಸುತ್ತಿದ್ದರು. ಅವರ ಪ್ರವಚನವೆಂದರೆ ಕೇವಲ ಪುರಾಣದ ಕಥೆಯಾಗಿರಲಿಲ್ಲ, ಅದು ಬದುಕಿನ ಪಾಠವಾಗಿತ್ತು. “ದೇಹ ದೇವರ ಗುಡಿ, ಅದನ್ನು ವಿಷದಿಂದ ಕಲುಷಿತಗೊಳಿಸಬೇಡಿ” ಎಂದು ಅವರು ಯುವಕರಿಗೆ ತಿಳಿ ಹೇಳುತ್ತಿದ್ದರು.
ಯುವಕರು ಈ ದೇಶದ ಆಸ್ತಿ, ಈ ನಾಡಿನ ಭವಿಷ್ಯ. ಯುವಕರು ಹಾಳಾದರೆ ದೇಶವೇ ಹಾಳಾಗುತ್ತದೆ ಎಂಬ ಕಳಕಳಿ ಅವರ ಮಾತಿನಲ್ಲಿ ಇರುತ್ತಿತ್ತು. ಇದಕ್ಕಾಗಿ ಅವರು ಅನೇಕ ಶಿಬಿರಗಳನ್ನು, ಚಿಂತನ ಮಂಥನ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದ್ದರು. ವ್ಯಸನಿಗಳನ್ನು ದ್ವೇಷಿಸಬಾರದು, ವ್ಯಸನವನ್ನು ದ್ವೇಷಿಸಬೇಕು ಎಂಬುದು ಅವರ ಸಿದ್ಧಾಂತವಾಗಿತ್ತು.
ವ್ಯಸನಕ್ಕೆ ಬಿದ್ದ ಯುವಕರನ್ನು ಕರೆತಂದು, ಅವರೊಂದಿಗೆ ಆಪ್ತ ಸಮಾಲೋಚನೆ ಮಾಡಿ, ಅವರಿಗೆ ಯೋಗ, ಧ್ಯಾನ, ಕಾಯಕದ ಮಹತ್ವವನ್ನು ತಿಳಿಸಿ ಮತ್ತೆ ಸರಿದಾರಿಗೆ ತರುವ ಕೆಲಸವನ್ನು ಅವರು ಮಾಡಿದರು. ಅದರಿಂದಾಗಿ ಸಾವಿರಾರು ಕುಟುಂಬಗಳು ಮತ್ತೆ ಬೆಳಕು ಕಂಡಿವೆ.
ಶ್ರೀಗಳ ಸಮಾಜ ಸುಧಾರಣೆ ಕೇವಲ ವ್ಯಸನ ಮುಕ್ತಿಗೆ ಸೀಮಿತವಾಗಿರಲಿಲ್ಲ. ಅವರು ಸಮಾಜದ ಅಂಕುಡೊಂಕುಗಳನ್ನು, ಮೂಢನಂಬಿಕೆಗಳನ್ನು, ಕಂದಾಚಾರಗಳನ್ನು ತಿದ್ದುವ ಕೆಲಸವನ್ನು ನಿರಂತರವಾಗಿ ಮಾಡಿದರು. ದೇವರ ಹೆಸರಿನಲ್ಲಿ ನಡೆಯುವ ಅನಿಷ್ಟ ಪದ್ಧತಿಗಳ ವಿರುದ್ಧ, ಜಾತಿ ಪದ್ಧತಿಯ ವಿರುದ್ಧ ಅವರು ಧ್ವನಿ ಎತ್ತಿದರು. ಎಲ್ಲರೂ ಒಂದೇ, ಎಲ್ಲರಲ್ಲೂ ದೇವರಿದ್ದಾನೆ ಎಂಬ ಬಸವ ತತ್ವವನ್ನು ಅವರು ತಮ್ಮ ಜೀವನದಲ್ಲಿ ಅಳವಡಿಸಿಕೊಂಡು, ಇತರರಿಗೆ ಬೋಧಿಸಿದರು.
ಶಿಕ್ಷಣವೇ ಮನುಷ್ಯನನ್ನು ಮುಕ್ತಗೊಳಿಸುವ ಸಾಧನ ಎಂದು ನಂಬಿ ಅವರು ಶಿಕ್ಷಣ ಸಂಸ್ಥೆಗಳನ್ನು ಕಟ್ಟಿದರು. ಅನ್ನ ದಾಸೋಹದ ಜೊತೆಗೆ ಅಕ್ಷರ ದಾಸೋಹ ಮತ್ತು ಜ್ಞಾನ ದಾಸೋಹಕ್ಕೆ ಅವರು ಹೆಚ್ಚು ಮಹತ್ವ ನೀಡಿದರು.
ಇಂತಹ ಮಹಾನ್ ಚೇತನದ ಜನ್ಮದಿನವನ್ನು ಅವರ ಚಿತ್ರಕ್ಕೆ ಕೇವಲ ಹೂಮಾಲೆ ಹಾಕಿ, ಭಾಷಣ ಮಾಡಿ ಮುಗಿಸುವುದರಲ್ಲಿ ಅರ್ಥವಿಲ್ಲ. ಅವರ ಕನಸನ್ನು ನನಸು ಮಾಡುವುದೇ ಅವರಿಗೆ ಸಲ್ಲಿಸುವ ನಿಜವಾದ ಗೌರವ. ಅದಕ್ಕಾಗಿಯೇ ಕರ್ನಾಟಕ ಸರ್ಕಾರ ಮತ್ತು ಚಿತ್ತರಗಿ ಮಠದ ಭಕ್ತರು ಸೇರಿ ಆಗಸ್ಟ್ 1 ರಂದು ವ್ಯಸನ ಮುಕ್ತ ದಿನವನ್ನಾಗಿ ಆಚರಿಸುತ್ತಿರುವುದು ಅತ್ಯಂತ ಅರ್ಥಪೂರ್ಣ ಮತ್ತು ಸ್ವಾಗತಾರ್ಹ ನಿರ್ಧಾರ.
ಈ ದಿನದಂದು ರಾಜ್ಯದಾದ್ಯಂತ ಶಾಲಾ ಕಾಲೇಜುಗಳಲ್ಲಿ ಜಾಗೃತಿ ಜಾಥಾಗಳು, ಭಿತ್ತಿಪತ್ರ ಪ್ರದರ್ಶನ, ಉಪನ್ಯಾಸಗಳು, ಪ್ರತಿಜ್ಞಾ ವಿಧಿ, ಬೀದಿ ನಾಟಕಗಳ ಮೂಲಕ ಯುವಕರಿಗೆ ವ್ಯಸನದ ದುಷ್ಪರಿಣಾಮಗಳ ಬಗ್ಗೆ ತಿಳುವಳಿಕೆ ನೀಡಲಾಗುತ್ತದೆ. ಇದು ಕೇವಲ ಒಂದು ದಿನದ ಆಚರಣೆಯಾಗಿ ಉಳಿಯಬಾರದು, ಅದು ವರ್ಷಪೂರ್ತಿ ನಡೆಯುವ ಅಭಿಯಾನವಾಗಬೇಕು.
ಇಂದು ಪರಿಸ್ಥಿತಿ ಇನ್ನಷ್ಟು ಗಂಭೀರವಾಗಿದೆ. ಈಗ ಮದ್ಯ, ತಂಬಾಕು ಜೊತೆಗೆ ಡ್ರಗ್ಸ್, ಮೊಬೈಲ್ ಅಡಿಕ್ಷನ್, ಆನ್ಲೈನ್ ಗೇಮಿಂಗ್ ವ್ಯಸನಗಳು ಯುವಕರನ್ನು ಬಲಿ ತೆಗೆದುಕೊಳ್ಳುತ್ತಿವೆ. ಹಳ್ಳಿಗಳಲ್ಲೂ ಡ್ರಗ್ಸ್ ಜಾಲ ಹರಡುತ್ತಿದೆ. ಇಂತಹ ಸಂದರ್ಭದಲ್ಲಿ ಲಿಂಗೈಕ್ಯ ಶ್ರೀಗಳ ಸಂದೇಶ ಇಂದಿಗೂ ಪ್ರಸ್ತುತ. ವ್ಯಸನಮುಕ್ತ ಸಮಾಜವೆಂದರೆ ಕೇವಲ ಆರೋಗ್ಯವಂತ ಸಮಾಜವಲ್ಲ, ಅದು ಸುಸ್ಥಿರ, ಆರ್ಥಿಕವಾಗಿ ಸದೃಢ, ನೈತಿಕವಾಗಿ ಬಲಿಷ್ಠ ಸಮಾಜ. ವ್ಯಸನದಿಂದ ಮುಕ್ತನಾದ ಯುವಕನೇ ದೇಶವನ್ನು ಕಟ್ಟಬಲ್ಲ.
ಆದ್ದರಿಂದ ಈ ಆಗಸ್ಟ್ 1 ರಂದು ನಾವೆಲ್ಲರೂ ಒಂದು ಪ್ರತಿಜ್ಞೆ ಮಾಡೋಣ. ನಾವು ಯಾವುದೇ ವ್ಯಸನಕ್ಕೆ ಬಲಿಯಾಗುವುದಿಲ್ಲ, ನಮ್ಮ ಕುಟುಂಬವನ್ನು, ನಮ್ಮ ಸ್ನೇಹಿತರನ್ನು ವ್ಯಸನದಿಂದ ದೂರ ಇಡುತ್ತೇವೆ ಎಂದು. ಸರ್ಕಾರ ಕೂಡ ಈ ದಿನಾಚರಣೆಗೆ ಕೇವಲ ಭಾಷಣಕ್ಕೆ ಸೀಮಿತಗೊಳಿಸದೆ, ವ್ಯಸನ ಮುಕ್ತ ಕೇಂದ್ರಗಳಿಗೆ ಹೆಚ್ಚು ಅನುದಾನ ನೀಡಬೇಕು, ಡ್ರಗ್ಸ್ ಜಾಲವನ್ನು ಬೇರುಸಹಿತ ಕಿತ್ತುಹಾಕಲು ಕಠಿಣ ಕಾನೂನು ಜಾರಿಗೆ ತರಬೇಕು. ಮಠಮಾನ್ಯಗಳು ಕೂಡ ವಿಜಯ ಮಹಾಂತೇಶ್ವರ ಶ್ರೀಗಳ ಹಾದಿಯಲ್ಲಿ ನಡೆದು ಸಮಾಜ ಸುಧಾರಣೆಗೆ ಮುಂದಾಗಬೇಕು.
ಲಿಂಗೈಕ್ಯ ಶ್ರೀಗಳು ದೈಹಿಕವಾಗಿ ನಮ್ಮೊಂದಿಗೆ ಇಲ್ಲದಿರಬಹುದು, ಆದರೆ ಅವರ ವಿಚಾರ, ಅವರ ಕನಸು ಇಂದಿಗೂ ನಮ್ಮೊಂದಿಗೆ ಜೀವಂತವಾಗಿದೆ. ಆ ಕನಸಿನ ಬೆಳಕಿನಲ್ಲಿ ನಾವು ವ್ಯಸನ ಮುಕ್ತ, ಸುಸ್ಥಿರ ಕರ್ನಾಟಕವನ್ನು ಕಟ್ಟೋಣ. ಅದೇ ಅವರಿಗೆ ನಾವು ಸಲ್ಲಿಸುವ ನಿಜವಾದ ಜನ್ಮದಿನದ ಗೌರವ.
ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/LcykjUHphtT2VDkfrKC3PM
