ಬೆಳಗಾವಿ:
ಹುಕ್ಕೇರಿ ತಾಲೂಕಿನ ಕಲ್ಯಾಣ ಹೆಬ್ಬಾಳದಲ್ಲಿ ಶ್ರಾವಣ ಮಾಸದ ಪ್ರಭುಲಿಂಗ ಲೀಲೆ ಪ್ರವಚನದ ಮಂಗಲೋತ್ಸವ ಕಾರ್ಯಕ್ರಮ ಗುರುವಾರ ನಡೆಯಿತು.
ಬಳ್ಳಾರಿ ಜಿಲ್ಲೆ ಶಿರಗುಪ್ಪದ ಬಸವತತ್ವ ಪ್ರಸಾರಕರಾದ ಬಸವರಾಜ ವೆಂಕಟಾಪುರ ಶರಣರು ತಿಂಗಳು ಪರ್ಯಂತ ಪ್ರವಚನ ನೀಡಿದರು.
ಕಾರ್ಯಕ್ರಮದಲ್ಲಿ ಬಸವ ಬೆಳವಿಯ ಪೂಜ್ಯ ಶರಣಬಸವ ದೇವರು ಮತ್ತು ಉಳಿವಿಯ ಶಿವಪೂರದ ಪೂಜ್ಯ ಚೆನ್ನಬಸವಾನಂದ ಸ್ವಾಮಿಗಳು ಅನುಭಾವಗೈದರು.
ಮಂಗಲೋತ್ಸವದ ಅಂಗವಾಗಿ ವಚನ ಪಲ್ಲಕ್ಕಿ ಮೆರವಣಿಗೆ ನಡೆಯಿತು. ಶರಣೆಯರು ವಚನ ಕಟ್ಟು ತಲೆಯ ಮೇಲೆ ಹೊತ್ತು ಸಾಗಿದರು. ಅನೇಕ ಶರಣರು ಮೆರವಣಿಗೆಯುದ್ದಕ್ಕೂ ವಚನಗಳ ವಡಪು ಹೇಳಿದ್ದು ವಿಶೇಷವಾಗಿತ್ತು.
ಕಲ್ಯಾಣ ಹೆಬ್ಬಾಳದ ಸಮಸ್ತ ಶರಣ ಶರಣೆಯರು ಹಾಗೂ ಸುತ್ತಮುತ್ತಲಿನ ಹತ್ತಾರು ಗ್ರಾಮಗಳ ಬಸವಪರ ಸಂಘಟನೆಗಳ ನೂರಾರು ಕಾರ್ಯಕರ್ತರು ಪಾಲ್ಗೊಂಡಿದ್ದರು.
