ಜೂನ್ 28ರ ಲಿಂಗಾಯತ ಧರ್ಮದ ಸಮಾಲೋಚನಾ ಸಭೆ ಕೂಡ ರದ್ದು?

ಬಸವಕಲ್ಯಾಣ

ಜೂನ್ 28 ಬಸವಧರ್ಮ ಪೀಠದ ಬಸವ ಮಹಾಮನೆಯಲ್ಲಿ ಲಿಂಗಾಯತ ಧರ್ಮದ ಸಮಾಲೋಚನಾ ಸಭೆ ನಡೆಯುತ್ತಿದೆ ಎಂದು ಹಲವಾರು ಸಂಘಟನೆಗಳ ಪ್ರಮುಖರು ನೆನ್ನೆಯಿಂದ ಹೇಳಿಕೆ ನೀಡಿದ್ದಾರೆ.

ಆದರೆ ಬಸವಧರ್ಮ ಪೀಠದ ಆವರಣದಲ್ಲಿ ಅಂತಹ ಯಾವುದೇ ಸಮ್ಮೇಳನ ನಡೆಸಲಾಗುತ್ತಿಲ್ಲ ಎಂದು ಬಸವಧರ್ಮ ಪೀಠದ ಪೂಜ್ಯ ಸಿದ್ದರಾಮೇಶ್ವರ ಸ್ವಾಮೀಜಿ ಪ್ರಕಟಣೆ ನೀಡಿದ್ದಾರೆ.

‘ಈ ವಿಷಯವಾಗಿ ಪೋಲಿಸ್ ಇಲಾಖೆಯ ಅಧಿಕಾರಿಗಳೊಂದಿಗೆ ಸಮಾಲೋಚನೆ ಮಾಡಿದಾಗ, ಒಂದೇ ಸಮಯದಲ್ಲಿ ಎರಡೆರಡು ಕಡೆ ಪೊಲೀಸ್ ಬಂದೋಬಸ್ತ್ ನೀಡಲು ಸಮಸ್ಯೆಯಾಗುವುದರಿಂದ ಆರಕ್ಷಕ ನಿರೀಕ್ಷಕರು ಜೂನ್ 28 ಬಿಟ್ಟು ಬೇರೊಂದು ದಿನ ಸಮಾಲೋಚನಾ ಸಭೆ ನಡಸಲು ಕೋರಿಕೊಂಡರು,’ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

‘ಜೂನ್ 28 ನಡೆಯಲಿರುವ ಬಸವಾದಿ ಶರಣರ ಹೆಸರಿನ ಹಿಂದೂ ಸಮಾವೇಶಕ್ಕೆ ಕನ್ನೇರಿ ಸ್ವಾಮಿಯ ಪ್ರವೇಶ ನಿಷೇದಿಸಬೇಕೆಂದು ಬಸವಾಭಿಮಾನಿ ಸಂಘಟನೆಗಳ ಮುಖಂಡರು, ಕಾನೂನಾತ್ಮಕ ಹೋರಾಟ ಮಾಡಿ ಭಾಗಶಃ ಯಶಸ್ವಿಯಾಗಿದ್ದಾರೆ.

ಇದೇ ವಿಚಾರವಾಗಿ ಅದೇ ದಿನ ಕನ್ನೇರಿ ಸ್ವಾಮಿಯ ವಿರುದ್ದ ಪ್ರತಿಭಟನೆ ಕರೆಯಲಾಗಿತ್ತು. ಆದರೆ ನಂತರ ಬಂದ ನ್ಯಾಯಾಲಯದ ತೀರ್ಪನ್ನು ಎಲ್ಲಾ ಮಠಾದೀಶರು ಸ್ವಾಗತಿಸಿರುವ ಕಾರಣ, ಹೋರಾಟ ಕೈ ಬಿಟ್ಟು ಪ್ರತಿಭಟನಾ ಸಭೆಯನ್ನು ಸಮಾಲೋಚನಾ ಸಭೆ ಎಂದು ಪರಿವರ್ತಿಸಿ ನಡೆಸಬೇಕೆಂದು ಚರ್ಚೆಯಾಗಿತ್ತು.

ಕೆಲವರು ಮೀಡಿಯಾದಲ್ಲಿ ಸಭೆ ಸಮ್ಮೇಳನ ನಡೆಸುವ ಮೆಸೇಜ್ ಬಿತ್ತರಿಸುತ್ತಿದ್ದರೂ ಅಂತಹ ಯಾವುದೇ ಸಮ್ಮೇಳನ ನಡೆಸಲಾಗುತ್ತಿಲ್ಲ,’ ಎಂದು ಸಿದ್ದರಾಮೇಶ್ವರ ಸ್ವಾಮೀಜಿ ತಿಳಿಸಿದ್ದಾರೆ.

ನೆನ್ನೆಯ ಪ್ರಕಟಣೆಗಳು

ಜೂನ್ 28ರ ಬಸವ ಪರ ಸಂಘಟನೆಗಳ ಸಮಾಲೋಚನಾ ಸಭೆಯಲ್ಲಿ ಲಿಂಗಾಯತ ಧರ್ಮದ ಸ್ವತಂತ್ರ ಧರ್ಮ ಹೋರಾಟದ ಮುಂದಿನ ರೂಪುರೇಷೆಗಳ ಕುರಿತು ಚರ್ಚೆ ನಡೆಸಲಾಗುವುದು, ಎಂದು ಅಖಿಲ ಭಾರತ ಲಿಂಗಾಯತ ಸಮನ್ವಯ ಸಮಿತಿ ರಾಜ್ಯ ಸಂಚಾಲಕ ಶ್ರೀಕಾಂತ ಸ್ವಾಮಿ ನೆನ್ನೆ ರಾತ್ರಿ ಪ್ರಕಟಣೆ ನೀಡಿದ್ದರು.

ನೆನ್ನೆ ಬೆಳಗ್ಗೆ ಬಸವ ಧರ್ಮಪೀಠದ ಮಹಾಮನೆಯ ಸಭಾಭವನದಲ್ಲಿ ನಡೆಯಲಿರುವ ಸಭೆಗೆ ಬರುವಂತೆ ಎಲ್ಲಾ ಬಸವಪರ ಸಂಘಟನೆಗಳ ಮುಖಂಡರಿಗೆ ಅಹ್ವಾನ ನೀಡಲಾಗಿದೆ, ಎಂದು ರಾಷ್ಟ್ರೀಯ ಬಸವದಳದ ಪ್ರಧಾನ ಕಾರ್ಯದರ್ಶಿ ಚಂದ್ರಮೌಳಿ ಎನ್. ತಿಳಿಸಿದ್ದರು.

ಈ ಸಭೆಯಲ್ಲಿ ತಾವೂ ಭಾಗವಹಿಸುತ್ತೇವೆಂದು ಡಾ. ಚನ್ನಬಸವಾನಂದ ಸ್ವಾಮೀಜಿ ಕೂಡ ಪ್ರಕಟಣೆ ನೀಡಿದ್ದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/HyjxiPYAeioCDGVqP9ADsE