ಬಸವ ಜಯಂತಿ ಕರಪತ್ರದಲ್ಲಿ ರೇಣುಕಾ ಚಿತ್ರ: ಬಸವ ಸಂಘಟನೆಗಳ ಉಗ್ರ ಖಂಡನೆ

ರಾಯಚೂರು

ಬಸವ ಜಯಂತಿ ಆಮಂತ್ರಣ ಪತ್ರಿಕೆಯಲ್ಲಿ ರೇಣುಕಾಚಾರ್ಯರ ಚಿತ್ರ ಹಾಕಿ ಮುದ್ರಿಸಿರುವುದನ್ನು ನಗರದ ಬಸವ ಸಂಘಟನೆಗಳು ಉಗ್ರವಾಗಿ ಖಂಡಿಸಿವೆ.

ಏಪ್ರಿಲ್ 20, 21 ನಗರದಲ್ಲಿ ಜಿಲ್ಲಾಡಳಿತ ಹಾಗೂ ಬಸವ ಸಂಘಟನೆಗಳ ಸಹಯೋಗದಲ್ಲಿ ಬಸವ ಜಯಂತಿ ನಡೆಯುತ್ತಿದೆ. ಈ ಕಾರ್ಯಕ್ರಮಗಳಿಗೆ ಸಂಬಂಧಿಸಿದ ಕರಪತ್ರದಲ್ಲಿ ಬಸವಣ್ಣನವರ ಜೊತೆ ರೇಣುಕಾಚಾರ್ಯರ ಚಿತ್ರ ಮುದ್ರಿಸಿ ‘ವೀರಶೈವ ಲಿಂಗಾಯತ ಸಮಾಜ’ ಹಂಚುತ್ತಿದೆ.

ಇದನ್ನು ವಿರೋಧಿಸಿ ಬಸವ ಸಂಘಟನೆಗಳು ಸಭೆ ನಡೆಸಿ ಜಿಲ್ಲಾಧಿಕಾರಿಗಳಿಗೆ ಏಪ್ರಿಲ್ 18 ದೂರು ನೀಡಿವೆ.

21ರ ಮೆರವಣಿಗೆಯಲ್ಲಿ ಕಪ್ಪುಪಟ್ಟಿ ಧರಿಸಿ ಪಾಲ್ಗೊಳ್ಳಲು ಬಸವ ಸಂಘಟನೆಗಳು ನಿರ್ಧರಿಸಿದ್ದರೂ ಜಿಲ್ಲಾಡಳಿತದ ಮನವಿಗೆ ಸ್ಪಂದಿಸಿ ನಿರ್ಣಯ ಹಿಂಪಡೆದಿವೆ. ಏಪ್ರಿಲ್ 24ರಂದು ಪ್ರತ್ಯೇಕವಾಗಿ ಮತ್ತೊಮ್ಮೆ ಬಸವ ಜಯಂತಿ ಆಚರಿಸಿ ತಮ್ಮ ಅಸಮಾಧಾನ ವ್ಯಕ್ತಪಡಿಸಲು ನಿರ್ಧರಿಸಿವೆ.

ಪೂರ್ವಭಾವಿ ಸಭೆಯಲ್ಲೇ ವಿವಾದ

ಬಸವ ಜಯಂತಿಗೆ ಸಿದ್ಧವಾಗಲು ಜಿಲ್ಲಾಡಳಿತ ಅನೇಕ ಪೂರ್ವಭಾವಿ ಸಭೆಗಳನ್ನು ನಡೆಸಿತ್ತು. ಒಂದು ಸಭೆಯಲ್ಲಿ ವೀರಶೈವ ಸಮಾಜದ ಪ್ರತಿನಿಧಿಯೊಬ್ಬರು ಕರಪತ್ರದಲ್ಲಿ ರೇಣುಕಾಚಾರ್ಯರ ಚಿತ್ರವನ್ನೂ ಪ್ರಕಟಿಸಲು ಸಲಹೆ ನೀಡಿದರು. ಅದನ್ನು ಬಸವ ಕೇಂದ್ರದ ಸದಸ್ಯರು ತೀವ್ರವಾಗಿ ಪ್ರತಿಭಟಿಸಿದರು.

ಅದರಿಂದ ಕೆರಳಿದ ಪಂಚಪೀಠ ಸಂಪ್ರದಾಯದ ಸ್ವಾಮಿಗಳೊಬ್ಬರೊಡನೆ ತೀವ್ರವಾದ ವಾಗ್ವಾದವೂ ನಡೆಯಿತೆಂದು ಪ್ರತ್ಯಕ್ಷದರ್ಶಿಯೊಬ್ಬರು ತಿಳಿಸಿದ್ದಾರೆ.

ಈ ಸಭೆಯಲ್ಲಿ ವಿರೋಧ ಬಂದರೂ ಲೆಕ್ಕಿಸದೆ ‘ವೀರಶೈವ ಲಿಂಗಾಯತ ಸಮಾಜ’ ಸಂಘಟನೆಯ ಪದಾಧಿಕಾರಿಗಳು ತಮ್ಮ ಸಂಘಟನೆಯ ಹೆಸರಿನಲ್ಲಿ ಪ್ರತ್ಯೇಕವಾಗಿ ವಿವಾದಿತ ಕರಪತ್ರ ಪ್ರಕಟಿಸಿ ಹಂಚಲು ಶುರು ಮಾಡಿದರು.

“ಇದನ್ನು ಪ್ರತಿಭಟಿಸಲು ವೀರಶೈವ ಲಿಂಗಾಯತ ಸಮಾಜದ ಅಧ್ಯಕ್ಷ ಭೂಪಾಲ ನಾಡಗೌಡರಿಗೆ ಕರೆ ಮಾಡಿದಾಗ ಅವರು ಕರಪತ್ರ ಹಿಂಪಡೆಯಲು ನಿರಾಕರಿಸಿ, ‘ಸಣ್ಣ ವಿಷಯ ದೊಡ್ಡದು ಮಾಡಬೇಡಿ’ ಎಂದು ಹೇಳಿದರು,” ಎಂದು ಬಸವ ಸಂಘಟನೆಗಳ ಪ್ರತಿನಿಧಿಯೊಬ್ಬರು ತಿಳಿಸಿದರು.

ಬಸವ ಸಂಘಟನೆಗಳು ಏಪ್ರಿಲ್ 17ರಂದು ಸಭೆ ನಡೆಸಿ ಕರಪತ್ರದಿಂದ ಲಿಂಗಾಯತರ ಧಾರ್ಮಿಕ ಭಾವನೆಗೆ ಧಕ್ಕೆಯಾಗಿದೆ ಎಂದು ಜಿಲ್ಲಾಧಿಕಾರಿಗಳಿಗೆ ದೂರು ನೀಡಿದ್ದಾರೆ. ಕರಪತ್ರದಲ್ಲಿ ಜಿಲ್ಲಾಡಳಿತದ ಹೆಸರೂ ಬಳಕೆಯಾಗಿರುವುದರಿಂದ ಅದನ್ನು ಹಿಂಪಡೆಯಲು ನಿರ್ದೇಶನ ನೀಡಬೇಕೆಂದು ಜಿಲ್ಲಾಧಿಕಾರಿಗಳನ್ನು ಆಗ್ರಹಿಸಲಾಗಿದೆ.

ಬಸವ ಕೇಂದ್ರದಲ್ಲಿ ಸಭೆ

ಈ ವಿವಾದವನ್ನು ಚರ್ಚಿಸಲು ಏಪ್ರಿಲ್ 17ರಂದು ಬಸವ ಕೇಂದ್ರದಲ್ಲಿ ಕರೆದ ಸಭೆಯಲ್ಲಿ ಕರಪತ್ರದಲ್ಲಿ ರೇಣುಕಾಚಾರ್ಯರ ಭಾವಚಿತ್ರ ಹಾಕಿದ್ದು ಅಕ್ಷಮ್ಯ ಅಪರಾಧ ಎಂದು ಹಲವಾರು ಬಸವ ಸಂಘಟನೆಗಳ ಮುಖಂಡರು ಖಂಡಿಸಿದರು.

“ಬಸವಪಥ ಸಂಚಲನ ಸಮಯದಲ್ಲಿ ಕಪ್ಪುಪಟ್ಟಿ ಧರಿಸಿ ಪಾಲ್ಗೊಳ್ಳಬೇಕೆಂದು,” ಬಸವ ಕೇಂದ್ರದ ಉಪಾಧ್ಯಕ್ಷ ಚನ್ನಬಸವ ಮಹಾಜನಶೆಟ್ಟಿ ಕರೆ ನೀಡಿದರು.

ಜಾಗತಿಕ ಲಿಂಗಾಯತ ಮಹಾಸಭಾದ ತಾಲೂಕ ಅಧ್ಯಕ್ಷ ಜೆ. ಬಸವರಾಜ, “ವೀರಶೈವ ಲಿಂಗಾಯತ ಸಮಾಜದ ಏಕಪಕ್ಷೀಯ, ವಿವೇಚನಾರಹಿತ ನಿರ್ಣಯ ಸಮಾಜದಲ್ಲಿ ಕಲುಷಿತ ವಾತಾವರಣವನ್ನು ಸೃಷ್ಟಿಸಿದೆ,” ಎಂದು ಖಂಡಿಸಿದರು.

“ನಮಗೆ ಐತಿಹಾಸಿಕ ಬಸವಣ್ಣನವರು ಬೇಕು, ಕಾಲ್ಪನಿಕ ರೇಣುಕಾಚಾರ್ಯರು ಬೇಡ. ಬಸವಣ್ಣನವರ ಭಾವಚಿತ್ರದ ಜೊತೆ ರೇಣುಕಾಚಾರ್ಯರ ಭಾವಚಿತ್ರ ಸೇರಿಸುವುದು ದ್ರೋಹದ ಕೃತ್ಯ,”
ಎಂದು ರಾಷ್ಟ್ರೀಯ ಬಸವದಳದ ಸಿದ್ದರಾಮಪ್ಪ ಪಾಟೀಲ ಹೇಳಿದರು.

“ಸಾಂಸ್ಕೃತಿಕ ನಾಯಕ ಬಸವಣ್ಣನವರ ಬಗ್ಗೆ ಪ್ರತಿವರ್ಷ ಸಹಿತ ಗೊಂದಲಗಳು, ಮನಸ್ತಾಪಗಳನ್ನು ವೀರಶೈವ ಸಮಾಜದವರು ಸೃಷ್ಟಿಸುತ್ತಿದ್ದಾರೆ. ಇದರಿಂದಾಗಿ ಮುಂದಿನ ಪೀಳಿಗೆಗೆ ತಪ್ಪು ಮಾಹಿತಿ ಹೋಗುತ್ತಿದೆ,” ಎಂದು ಜಾಗತಿಕ ಲಿಂಗಾಯತ ಮಹಾಸಭೆ ಮಹಿಳಾ ಘಟಕದ ಜಿಲ್ಲಾಧ್ಯಕ್ಷೆ ಡಾ. ಸರ್ವಮಂಗಳ ಸಕ್ರಿ ಹೇಳಿದರು.

ರಾಜನ ಗೌಡ ಕೋಳುರು, ಹರಿವಿ ನಾಗನಗೌಡ, ನಾಗರಾಜ ಪಾಟೀಲ್, ಅಮರೇಶ ನಿಲೋಗಲ್, ಜೆ ಬಸವರಾಜ, ನಾಗೇಶಪ್ಪ ನಿವೃತ್ತ ಎ.ಎಸ್.ಐ, ಸೋಮಶೇಖರ ಪಿ., ಡಾ.ವಿರುಪಾಕ್ಷಪ್ಪ ಪಾಟೀಲ್, ಲಲಿತಾ ಎಂ., ಜಗದೇವಿ ಎಂ.ಸಿ., ಮುಕ್ತ ಎಸ್ ನರಕಲದಿನ್ನಿ, ತಾಯಮ್ಮ ಗೌಡ, ಗೀತಾ ಪೂರ್ಣಿಮಾ ಸಭೆಯಲ್ಲಿ ಭಾಗವಹಿಸಿದ್ದರು.

2025ರಲ್ಲಿಯೂ ಘರ್ಷಣೆ

ರೇಣುಕಾಚಾರ್ಯರ ಚಿತ್ರದ ವಿಷಯದಲ್ಲಿ ಲಿಂಗಾಯತ ಮತ್ತು ವೀರಶೈವ ಸಂಘಟನೆಗಳಲ್ಲಿ ಕಳೆದ ವರ್ಷವೂ ಘರ್ಷಣೆ ನಡೆದಿವೆ.

2025ರ ಬಸವ ಜಯಂತಿಯಲ್ಲಿಯೂ ವೀರಶೈವ ಲಿಂಗಾಯತ ಸಮಾಜದ ಕರಪತ್ರದಲ್ಲಿ ರೇಣುಕಾಚಾರ್ಯರ ಚಿತ್ರ ಮುದ್ರಿಸಲಾಗಿತ್ತು. ಅದರ ವಿರುದ್ಧ ಬಸವ ಸಂಘಟನೆಗಳು ಸಿಡಿದೆದ್ದಾಗ ಜಿಲ್ಲಾಡಳಿತವು ಬಸವಣ್ಣವರನ್ನು ಬಿಟ್ಟು ಬೇರೆ ಯಾರ ಭಾವಚಿತ್ರವನ್ನೂ ಮೆರವಣಿಗೆಯಲ್ಲಿ ಬಳಸಬಾರದೆಂದು ಆದೇಶ ನೀಡಿತ್ತು.

ಕಳೆದ ಮಾರ್ಚ್ ತಿಂಗಳು ಇಲ್ಲಿ ನಡೆದ ನಿಜಾಚರಣೆ ಕಮ್ಮಟದಲ್ಲಿ ಲಿಂಗಾಯತ ಸಂಘಟನೆಗಳು ರೇಣುಕಾಚಾರ್ಯರ ಭಾವಚಿತ್ರ ಹಾಕಲು ನಿರಾಕರಿಸಿದ ಮೇಲೆ ವೀರಶೈವ ಸಂಘಟನೆಗಳು ಹೊರನಡೆದವು.

ಇದೇ ವಿಷಯದ ಮೇಲೆ ಕಮ್ಮಟದ ಆಮಂತ್ರಣ ಪತ್ರಿಕೆ, ಕರಪತ್ರಗಳು ಬದಲಾದವು. ಕಮ್ಮಟದ ಸ್ಥಳವೂ ಕೊನೆಗಳಿಗೆಯಲ್ಲಿ ಬದಲಾದರೂ, ಬಸವ ಸಂಘಟನೆಗಳು ಹಠ ಹಿಡಿದು ಕಾರ್ಯಕ್ರಮವನ್ನು ಯಶಸ್ವಿಯಾಗಿ ನಡೆಸಿದವು.

ವೀರಶೈವ ಸಮಾಜದ ಪ್ರತಿಕ್ರಿಯೆ

ವೀರಶೈವ ಲಿಂಗಾಯತ ಸಮಾಜದ ಕಾರ್ಯದರ್ಶಿ ವಿರುಪಣ್ಣ ಬಂಡಿ ವಿವಾದದ ಬಗ್ಗೆ ಬಸವ ಮೀಡಿಯಾಗೆ ಪ್ರತಿಕ್ರಿಯೆ ನೀಡಿದರು.

“ನಮ್ಮ ಕಾರ್ಯಕಾರಿ ಸಮಿತಿಯ ಸಭೆಯ ನಿರ್ಣಯದ ಪ್ರಕಾರ 2,000 ಕರಪತ್ರ ಪ್ರಕಟ ಮಾಡಿ ಹಂಚಿದ್ದೇವೆ.

ಪೂರ್ವಭಾವಿ ಸಭೆಯಲ್ಲಿ ಯಾರೂ ಇದಕ್ಕೆ ವಿರೋಧ ವ್ಯಕ್ತಪಡಿಸಲಿಲ್ಲ, ಬಸವಾಭಿಮಾನಿಗಳು ತಮ್ಮ ಅಭಿಪ್ರಾಯವನ್ನು ಮಾತ್ರ ಹೇಳಿದರು, ವಿರೋಧವೇನೂ ಮಾಡಿಲ್ಲ.

ನಮ್ಮ ಸಂಘಟನೆ ಹೆಸರೇ ವೀರಶೈವ ಲಿಂಗಾಯತ ಎಂದಿರುವದು. ಅವರಿಬ್ಬರನ್ನು ಒಟ್ಟಿಗೆ ಕರೆದುಕೊಂಡು ಹೋಗಬೇಕೆನ್ನುವ ಉದ್ದೇಶದಿಂದ ರೇಣುಕಾಚಾರ್ಯರ ಭಾವಚಿತ್ರವನ್ನು ಹಾಕಿದ್ದೇವೆ,” ಎಂದು ಹೇಳಿದರು.

ಬಸವ ಮೀಡಿಯಾ ವಾಟ್ಸ್ ಆಪ್ ಗುಂಪು ಸೇರಲು ಕ್ಲಿಕ್ ಮಾಡಿ
https://chat.whatsapp.com/J7ms3D54f67LKI9uBwRD0M